Ko Tatou te Aronga e Akarongo Tetai
Akakitekiteanga i te Patireia o te Atua i Roto i te Au Airani o Viti
E TUATUA ana a Iesu Karaiti no runga i tetai nga mataara e rua. Ko tetai e pararauare e tae atu ei ki te mate. Ko tetai ra e piri oki inara te tae atura ki te ora. (Mataio 7:13, 14) Kia tauturu i te tangata kia iki i te mataara tika, kua akakoro te Atua ko Iehova i te tuatua meitaki o te Patireia kia tutu aere ia e takapini i teianei ao. (Mataio 24:14) No reira, kua akarongo te tangata i te au ngai katoatoa ki te tuatua o te Patireia, e te iki ra tetai i te ora i te riro anga ei “aronga ra i rauka te akarongo e ora atu ei te [meta].” (Ebera 10:39, akaaite ia NW.) Te pati atu nei matou ia koe kia tatau i te iki anga no te oraanga tei raveia e tetai i Viti e tetai atu au airani o te Patipika Apatonga i vaitata ua mai.
Kua Irinaki Ratou ia Iehova
E tamaine apii ua rai a Mere i te akarongo anga aia i te tuatua no te Patireia no te taime mua i te 1964. No tona noo ke anga i tetai airani mamao, e meangiti ua tona aravei anga ma te Au Kite o Iehova. Inara, kare i roa ana, kua rauka mai iaia te kite tika tikai no runga i te Pipiria. I te reira taime, kua akaipoipo aia ki tetai tangata rangatira i roto i tona vira. Ei tupu anga no ta Mere iki anga kia aru i te au kaveinga Pipiria, kua takinokinoia aia e tana tane e tona au kopu tangata, e kua akavaavaaia aia e te au tangata vira. Tera ra, kua papetitoia aia i te 1991.
I muri poto ua mai, kua maru mai te tane a Mere ko Josua, i tona tu e kua noo katoa aia i roto i te au uriuri anga Pipiria ta Mere i rave ma ta raua tamariki. Kua akamutu a Josua i te aereanga ki te Akonoanga Methodist. Inara, ei rangatira, kua akaaere rai aia i te au uipaanga vira i te epetoma. I roto i te mata o te au tangata vira, kua tiratiratu kore a Josua, no te mea e tuanga maata tikai te Akonoanga Methodist i roto i te oraanga o te au tangata Viti. No reira, kua raurau te orometua ia Josua kia oki atu ki tana akonoanga mua.
Kua akakite mataku kore atu a Josua e kua rave aia e tona ngutuare tangata i ta ratou iki anga e kua tauta i te akamori i te Atua ko Iehova “ma te vaerua e te tuatua-mou ra e tikaʼi.” (Ioane 4:24) I tetai uipaanga vira i muri mai, kua akaue te ariki ia Josua e tona ngutuare tangata kia akaruke i te vira ei aronga akatakakeia atu. Kua orongaia kia ratou e itu ra kia akaruke i te airani e to ratou kainga, te enua, e te au mou—ae, ta ratou au apinga katoatoa.
Kua tauturu mai tetai au taeake pae vaerua i tetai atu airani ia Josua e tona ngutuare tangata, te tauturuanga ia ratou ma tetai ngai kia noo e te enua kia tatanu i te mou. Kua papetitoia Josua e tana tamaiti mataiapo i teianei, e te tavini ra tetai atu tamaiti ei papuritia kare i papetitoia ake no te tuatua meitaki. I ou ake nei kua akamata Mere i te angaanga painia tamou (ei tangata tutu aere i te Patireia tamou). Kua tupu ta ratou iki anga i te ngere anga o te turanga e te au apinga materia, inara mei te apotetoro ko Paulo, kare teia i te mea puapinga ia ratou me akaaiteia atu ki te au mea i rauka mai ia ratou.—Philipi 3:8.
Tetai Iki Anga tei Kapiti Mai i te Akava Ngakau
Ka umuumu te iki anga kia aru tetai akava ngakau tereniia i te Pipiria i te akarongo e te mataku kore. E tika rai teia i te turanga o Suraang papetito ouia, ko tetai vaine mapu tei noo ra i Tarawa, etai o te au airani o Kiribati. Kua pati a Suraang i te akatika anga kia kore aia e rave i tetai apinga o tana angaanga i te are maki. Kare tana pati anga i ariki rekarekaia ana, e ko tei tupu kua tukunaia atu aia kia akono i tetai are maki meangiti i tetai airani mamao e kare aia i kite i tetai atu ma tona akarongo.
I taua airani ra e mea tau no te aronga ou kia rave i tetai atinga ki te “au vaerua” i te reira ngai. Kua irinaki te tangata e me kare koe e rave i te reira ka tupu te mate. No tei kore a Suraang i akatika i teia angaanga akamori itoro kia raveia nona e tona pupu, kua tapapa te au tangata vira i te vaerua akatamamae kia takaviri i tona kaki. I kore te tamamae anga ia Suraang e tona au pupu, kua va te atianga e manganui nona kia oronga i tetai akakitekite anga meitaki.
Inara kare to Suraang au timata anga i oti ake. Kua manako tetai au tane ou e akaao anga te akavare i te vaine ou tei atoro maira. Inara, kua arai a Suraang i ta ratou au angaanga e kua tamou aia i tona tiratiratu ki te Atua. Ko te tika, kua rauka iaia te tavini ei painia tamou, noatu e kua angaanga aia ei neti e 24 ora i te ra.
I mua ake i tetai umukai tei raveia no Suraang i te akapapaanga aia i te akaruke i te airani, kua karanga atu te aronga pakari o te vira e koia te mitinari mua tika tikai tei atoro mai ia ratou. No tona tamou ki anga i te au kaveinga o te Pipiria, kua ariki rekareka etai atu i te reira airani ki te tuatua Patireia.
Te Akaao Anga Pae Kopapa
No te mamao o tetai au vira kua angaanga maroiroi te au tangata o Iehova i roto i te angaanga orometua e kia aere atu ki te au uipaanga Kerititiano. E akamanako ana i te akatauanga o nga Kite papetito e a—okotai tangata e e toru vaine—tei akapou i te au ora kia aere e kia oki mai mei te au uipaanga. Kua kapiti atu to ratou aaereanga i te tikotianga e toru kauvai i te aereanga e te oki mai. Me e teitei te vai, kua kau atu te tungane na mua, te utianga i tetai pani maatamaata ma ta ratou au kete, te au puka, e te au kakau no te uipaanga. Kua kau akaou atu aia i reira i te tauturu i nga tuaine e toru.
Kua aro tetai atu pupu meangiti, tei aere ki te au uipaanga i te airani mamao o Nonouti i Kiribati, i te au akaaoanga tuketuke. Ka o ki roto i te are ta ratou e uipa ra e itu ua me kare e varu tangata. Ka noo etai atu ki vao e kua akara mai ki roto na roto i te paruru niuniu moa. Ka kite te au tangata vira i te are uipaanga na te aere anga atu e te oki anga mai mei to ratou au are pure manea tikai. Tera ra, kua kite te au tavini o Iehova e ko te tangata kare ko te au are, te mea puapinga tikai mei to te Atua turanga. (Hagai 2:7) E okotai tuaine ruaine tei papetitoia i runga i te airani e kare aia e rauka i te aaere mamao. Inara, kua tauturuia aia i roto i te angaanga orometua e tetai vaine ou, e papuritia kare i papetitoia tei opara iaia na roto i te pereoo meangiti. Mei teaa te arikianga ta ratou i akaari atu no te tuatua mou!
Te tauta ra te maata anga o te 2,100 papuritia e tavini ra i te au airani o Viti kia akakitekite ua atu i te tuatua meitaki o te Patireia o te Atua. E kua irinaki ratou e e manganui atu te ka riro mai ei “aronga ra i rauka te akarongo e ora atu ei te [meta].”
[Mapu i te kapi 8]
(No teia i runga, akara i te puka)
Autireria
Viti