Tetai Manako Tau i te Atua No te tu Akono Ma

“Ko au toou Atua ra ko Iehova, ko tei akakite ia koe i te mea e puapingaʼi koe na; ko tei arataki kia koe na te arataa e tau ei kia aere koe ra.”​—ISAIA 48:17.

1, 2. (a) Eaa te manako matauia o te au tangata no te akono tau o te ainga? (e) Eaa te manako o te au Kerititiano no te akono tau i te ainga?

I TEIA tuatau, i te au tuanga e manganui o te enua nei kua akamanakoia te tu akono tau ei tumu no tetai tangata uaorai. Kua manako te au tangata i te au pirianga ainga ei akakite anga natura i te inangaro kia raveia i ta ratou uaorai tuatau e anoano ei, kare i tetai apinga tei tau ra kia kotingaia ki tei akaipoipoia. Te manako ngakau ra ratou e me kare tetai tangata e mamae, kare e tarevake i te ikianga nona uaorai e eaa tana ka rave. I to ratou manako, kare e tau te au tangata kia akavaia i te au tumu no te akono tau, e maata oki no runga i te ainga.

² E tuke ra te manako o te aronga kua kite ia Iehova ra. Ka aru rekareka ua ratou i te au kaveinga Tuatua Tapu no to ratou inangaro ia Iehova e te anoano ra kia akamareka iaia. Kua kite ratou e te aroa ra Iehova ia ratou e te oronga maira i te arataki anga ei meitaki no ratou, te arataki anga te ka akapuapinga tikai ia ratou e ka akariro kia mataora ratou. (Isaia 48:17) I te mea ko te Atua te Tumu o te ora, ka tau ra ratou kia akara atu kiaia no te arataki anga e akapeea ta ratou taangaanga i to ratou au kopapa, e maata atu oki i teianei tumu tei piri vaitata ra ki te akaaereanga no te oraanga.

E Apinga Oronga Uaia mai e Tei Anga Aroa Maira

3. Eaa tei apiiia ki to Kerititome e manganui no te pirianga ainga, e akapeea te akaaite anga o te reira ma ta te Pipiria apiianga?

³ Ei tuke anga ma to te ao o teia tuatau, kua apii etai i roto ia Kerititome e ko te pirianga ainga e mea akama, e ara ia, e ko te “ara mua” i te kainga i Edene ra ko te akavare anga a Eva ia Adamu. Ko taua manako ra e tuke ia ki ta te au Tuatua Tapu akauruia i tuatua ra. Kua taiku te tataanga Pipiria no nga tangata mua e rua ko “Adamu, raua katoa ko te vaine.” (Genese 2:25) Kua tuatua atu te Atua ra kia raua kia anau tamariki, i te na ko anga: “Kia anau korua, e kia maata roa, e e akaki i te enua nei.” (Genese 1:28) Ka akariro te reira kia tau kore no te Atua ra kia akaue ia Adamu raua ko Eva kia anau tamariki e i muri iora ka akautungai ia raua no te raveanga i taua au akauenga ra.​—Salamo 19:8.

4. Eaa ra te Atua i orongai i te mana ainga ki te tangata?

⁴ I taua akauenga i orongaia ra ki to tatou nga metua mua ra, tei taiku akaouia ra kia Noa e tana nga tamaroa ra, ka kite tatou i te akakoroanga maata no te pirianga ainga: kia anau tamariki. (Genese 9:1) Inara, te akakite maira te Tuatua a te Atua e kare tona au tavini akaipoipo ra i raro ake i te apinga kia kotinga i te pirianga ainga no te tauta anga kia anau tamariki. Ko te au pirianga ra ka tika katoa kia akaki i te umuumuanga manako ngakau e to te kopapa oki e kia riro ei tumu marekaanga ki nga tokorua akaipoipoia ra. Ko tetai ravenga ia no raua kia akakite inangaro oonu tetai no tetai.​—Genese 26:​8, 9; Maseli 5:​18, 19; 1 Korinetia 7:​3-5.

Au Tapupu Anga Tu-Atua

5. Eaa te au araianga ta te Atua i tuku ki runga i te rave ainga a te tangata ra?

⁵ Noatu rai e e apinga orongaia mai e te Atua ra te ainga, kare ia i te mea raveia ma te tapupu koreia ra. Te tau ra teianei kaveinga noatu rai i roto i te akanoonoo anga akaipoipo anga. (Ephesia 5:​28-30; 1 Petero 3:​1, 7) I vao ake i te akaipoipo anga, te tureia ra te au pirianga ainga. Te taka meitaki ra ta te Pipiria no runga i teianei tumu. I roto i te Ture ta te Atua i oronga ra ki te iti tangata o Iseraela, kua tuatuaia: “Auraka rava koe e akaturi.” (Exodo 20:14) I muri iora, kua kapiti katoa a Iesu i te au “moeaana” e te au “akaturi” ma te “manako kikino” no roto mai i te ngakau e kua akaviivii i tetai tangata. (Mareko 7:​21, 22) Kua akauruia te apotetoro ko Paulo kia akamaroiroi i te au Kerititiano i Korinetia ra: “E rere ke atu i te akaturi.” (1 Korinetia 6:18) E i tana reta ki te au Epera ra, kua tata a Paulo: “Kia akameitakiia te akaipoipo i te tangata ravarai, e te viivii kore oki te roi: e akava oki te Atua, i te akaturi e te moeana ra.”​—Ebera 13:4.

6. I roto i te Pipiria eaa te kapitiia ra e te tuatua “fornication”?

⁶ Eaa te aiteanga o te tuatua “fornication”? Kua uriia mai te reira mei te tuatua Ereni por·neiʹa, tei taikuia i etai taime ki te pirianga ainga i rotopu i nga tangata kare ra i akaipoipo. (1 Korinetia 6:9) I etai atu ngai, mei ia Mataio 5:32 e Mataio 19:9, e atea atu te aiteanga o taua tuatua te taiku katoa ra i te akaturi, te pirianga ainga kopu tangata, e te pirianga ainga ma te manu. Ko etai atu raveanga ainga i rotopu i tei kore ra i akaipoipo ki tetai e tetai, mei te ainga vaa e te ainga toe, e te ainga amirimiri i te mero o tetai ke, ka rauka katoa e kia tuatuaia e e por·neiʹa. Te akaapaia ra taua au ravenga katoatoa​—te tuatua uaia ra me kare te akakite anga​—i roto i te Tuatua a te Atua.​—Levitiku 20:​10, 13, 15, 16; Roma 1:​24, 26, 27, 32.a

Puapingaanga mei ta te Atua Au Ture o te Tu Akono Tau

7. Akapeea tatou e puapingaiai i te tamou marie i te tu akono ma?

⁷ Te akarongo anga i ta Iehova ra arataki anga no te tu akono ainga ka rauka kia riro ei akaaoanga no te au tangata apa ua ra. Kua tata te tangata kite ngati Iuda e te rongonui o te 12 anere mataiti ko Maimonides e: “Kare e ture anga i roto i te Torah [Ture a Mose] katoa ra i ngata atu kia akono i to te au pirianga tureia ra e te au pirianga ainga tei tau kore.” Inara, me ka akarongo tatou ki ta te Atua arataki anga, ka puapinga maataia tatou. (Isaia 48:18) Ei akatauanga, na te akarongo anga ki teianei tumu ka tauturu ia tatou kia paruru ia tatou mei te au maki mate akatupuia mai no te ainga, ko etai kare e rapakau e ka tamate oki.b Ka paruruia tatou i te au nuianga kare i akaipoipoia. Na te akonoanga i te pakari tau i te Atua ra ka oronga katoa mai i te akavangakau ma. Na te raveanga i te reira ka akatupu i te akangateitei ia koe uaorai e ka rauka katoa oki te akangateitei anga na etai ke ra, kapiti katoa to tatou au kopu tangata, to tatou au oa, ta tatou tamariki, e to tatou au taeake Kerititiano e te au tuaine. Ka akatupu katoa oki ki roto ia tatou i tetai ora anga meitaki, tetai tu manako papu no te ainga te ka tauturu kia mataora te akaipoipo anga. Kua tata tetai vaine Kerititiano: “Ko te tuatua mou o te Tuatua a te Atua ko te paruru meitaki ia. Te tatari nei au kia akaipoipoia, e me akaipoipoia au ka akaparau au kia akakite atu ki te tangata Kerititiano taku ka akaipoipo e kua vai paretenia ma ua ana au.”

8. Na roto i teea au tu penei ka akatupu to tatou tu akono ma i te akamori anga mou?

⁸ Na to tatou tamou marieanga i te tu akono ma, ka rauka ia tatou kia arai atu i te au manako tarevake no te akamori anga mou e ka akainangaro ei i te au tangata ki te Atua ta tatou e akamori ra. Kua tata te apotetoro ko Petero: “Kia meitaki ta kotou tuatua i rotopu i te au etene: ta ratou oki i akakino mai ia kotou, mei te mea e aronga rave tuatua kino, kia akara ra ratou i ta kotou tuatua meitaki, kia akameitaki ratou i te Atua i te rā e rokoia mai ei ra.” (1 Petero 2:12) Noatu rai me ka kore te aronga kare ra e tavini ia Iehova e kite me kare e mareka i to tatou tu akono ma, ka papu ia tatou e te kite ra to tatou Metua i te rangi, te mareka ra, e te rekareka ra i ta tatou au tautaanga kia aru i tana aratakianga.​—Maseli 27:11; Ebera 4:13.

9. Eaa tatou i tau ei kia irinaki i ta te Atua arataki anga, noatu penei kare i mou tikai ia tatou i tana au tumu? E akatutu mai.

⁹ Te kapiti ra te akarongo anga i te Atua i te irinaki anga e te kite ra aia i tei meitaki no tatou, noatu rai me kare tatou i mou tikai i te au tumu i arataki ei aia ia tatou i taua aerenga tana i akaue ra. E akamanako i tetai akatauanga no te Ture a Mose ra. Ko tetai ture no te au puakapa vaeau ra kua umuumuia te repo kia tanumia ki vao i te puakapa. (Deuteronomi 23:​13, 14) Penei kua tamanako to Iseraela no te tumu no taua arataki anga ra; penei kua manako tetai papaki e kare ia e umuumuia. Inara, mei reira maira, kua kite te aronga taineti rapakau e kua tauturu teianei ture kia ma te au tumu no te vai mei te viivii anga e kua oronga mai i te paruru anga mei te au maki e manganui tei apaiia maira e te au manumanu. Pera katoa, te vaira te au tumu pae vaerua, pae tangata, te manako ngakau, to te kopapa, e to te manako oki i kotingaiai e te Atua te au pirianga ainga ki te roi akaipoipo anga. Ka akamanako tatou i teianei i etai akatauanga tokoiti no te Pipiria o te aronga tei tamou i te tu akono ma.

Ko Iosepha​—Akameitakiia no Tona Tu Akono Tau

10. Koai tei tauta i te akavare ia Iosepha, e akapeea aia i te pauanga?

¹⁰ Penei kua matau koe i te akatauanga o Iosepha ra i te Pipiria, koia te tamaiti a Iakoba ra. E 17 ona mataiti, kua kite aia iaia uaorai ei tavini no Potiphara, te rangatira o te vaeau o Pharao i Aiphiti ra. Kua akameitaki atura Iehova ia Iosepha, e i muri akera kua akamanaia aia ki rungao i te are katoa o Potiphara ra. Kia tae tona mataiti ki te 20 ra, kua riro a Iosepha ‘e purotu oki i te tu, e te mata meitaki.’ Kua akaari atu te manako o te vaine a Potiphara ra kiaia, tei tauta ra kia akavare iaia. Kua akataka meitaki atura Iosepha i tona turanga, te akakiteanga e kia akatika atu kare e ka riro anake ei pikikaa anga i tona pu mari ra “e ara [katoa ia] i te Atua” ra. Eaa ra a Iosepha i manako ei mei tana i rave ra?​—Genese 39:​1-9.

11, 12. Noatu kare e ture tu-Atua i tataia no te akakore i te kanga me kare te moeana e te akaturi, eaa a Iosepha i manako ei mei tana i rave ra?

¹¹ I te akara anga, kare te ikianga a Iosepha i akatumuia ki runga i te mataku e ka kitea e te au tangata. E mamao ke atu to Iosepha ra ngutuare tangata, e kua manako tona metua kua mate aia. Me rave a Iosepha i te ainga tau kore, kare tona ngutuare tangata e kite i te reira. Penei ko taua tu ara ra ka tapoki keia mei ia Potiphara e tona au tavini tane katoa ra, i te mea i etai tuatau kare ratou i roto i te are ra. (Genese 39:11) Inara, kua kite a Iosepha e ko taua tu akono ra kare e rauka kia uunaia mei te Atua ra.

¹² Penei kua manako a Iosepha i tana i kite no Iehova ra. Kare e ekoko anga kua kite aia i ta Iehova i akakite i te kainga i Edene ra: “E akaruke ei te tangata i tona metua tane e tona metua vaine, ka piri atu ei ki tana vaine; e ka riro oki raua e kopapa okotai.” (Genese 2:24) Pera katoa, penei kua matakite a Iosepha i ta Iehova i tuatua ki tetai ariki Philiseti tei anoano ra kia akavare i te tupuna vaine o Iosepha koia Sara. Kua tuatua atura Iehova ki taua ariki ra: “I na, e tangata mate koe na, i tenana vaine i taau i arataki mai ana; e vaine noo tane oki aia. . . . I tāpu ei oki au ia koe, kia kore koe e ara iaku nei: no reira oki au i kore ei i tuku atu ia koe kia rave atu koe iaia.” (Genese 20:​3, 6) No reira noatu kare a Iehova i oronga mai ake i tetai ture tataia, kua taka meitaki tona manako ngakau no te akaipoipo anga. Na to Iosepha manako akono tau, kapiti katoa ma tona inangaro kia akamareka ia Iehova, kua akariro iaia kia kopae ke i te ainga tau kore.

13. Penei, eaa i kore ei i rauka ia Iosepha te kopae ke atu i te vaine a Potiphara?

¹³ Inara, kua manono te vaine a Potiphara ra, i te patianga iaia “i tera rā i tera rā” kia moe atu ma ia ra. Eaa ra i kore ei a Iosepha i kopae ua atu iaia ra? Ei tetai tavini, e au angaanga tana no te rave e kare e rauka kia taui i tona turanga. Kua akakite maira te au tika a te aronga ko enua ra e ko te akapapaanga au are o Aiphiti ra kua riro kia na roto atu i te tuanga maata o te are ra kia itae atu ki te au pia vairanga apinga. No reira, penei kare i rauka ia Iosepha no te kopae ke mei te vaine a Potiphara.​—Genese 39:10.

14. (a) Eaa tei tupu kia Iosepha i muri ake i tona oro ke anga mei te vaine a Potiphara ra? (e) Akapeea ta Iehova akameitaki anga ia Iosepha no tona tu tiratiratu?

¹⁴ Kua tae mai te ra ko raua anake i roto i te are ra. Kua opu maira te vaine a Potiphara ia Iosepha e kua kapiki atu: “E moe ana taua.” Kua oro iora aia. I te puta anga na tana kopae anga, kua akaapa taua vaine ra iaia no te tauta anga kia kukumi iaia. Eaa te au tupu anga? I tutaki viviki atu ainei a Iehova iaia no tona tiratiratu? Kare. Kua titiriia a Iosepha ki roto i te are tapekaanga i roto i te tapeka auri. (Genese 39:​12-20; Salamo 105:18) Kua kite a Iehova ra i te tuatua tau kore e i te openga kua akateitei atu ia Iosepha mei te are tapekaanga ra ki te are ariki. Kua riro aia ko te rua o te tangata mana maata i Aiphiti e kua akameitakiia ma tetai vaine e te tamariki. (Genese 41:​14, 15, 39-45, 50-52) Pera katoa oki, te tataanga no to Iosepha ra tiratiratu kua tataia e 3,500 mataiti kua topa no te akamanako anga i te au tavini o te Atua mei reira mairai. Mei teaa ra te au akameitakianga no te akonoanga i ta te Atua au ture tuatua tika ra! Mei te reira katoa, ko tatou i teia tuatau penei kare e kite vave i te au puapinga no te tamou marieanga i te tiratiratu akono tau, inara ka papu ia tatou e te kite ra a Iehova e ka akameitaki ia tatou i te tuatau tau.​—2 Paraleipomeno 16:9.

Ta Iobu ‘Koreromotu ma Tona Nga Mata’

15. Eaa ta Iobu ‘koreromotu ma tona nga mata’ ra?

¹⁵ Tetai atu tei tamou marie i tona tiratiratu ko Iobu. I te tuatau i apaiia mai ei te au timataanga ki runga iaia e te Tiaporo, kua akamanako akaou a Iobu i tona oraanga e kua akakite e marekaanga tona uaorai kia akono i te akautunga ketaketa me kua aati aia, i roto i etai atu apinga, i ta Iehova ra kaveinga no te ainga tau ra. Kua na ko maira Iobu: “Kua papau au i te koreromotu i oku nei mata: eaa ra au ka akara atu ei ki te paretenia?” (Iobu 31:1) Na teianei, te akakite ra Iobu e i tona tamanakoanga kia mou i te tiratiratu ki te Atua, kua iki aia kia kopae ke noatu rai i te akaraanga inangaro atu i tetai vaine. Inara, ka kite aia i te au vaine i te au ra takitai o tona oraanga e penei ka tauturu ia ratou me te umuumu ra i te tauturu. Inara ko te riroanga kia manako atu i te tu no te aruaruanga inangaro, e au kotinga e mamao ke ia. I mua ake ka akamatai tona au timataanga, koia tetai tangata apinganui, “e maata rava atura aia, i to te itinga o te rā katoa ra.” (Iobu 1:3) Inara, kare aia i taangaanga i te mana apinganui kia akaariu mai i te au vaine e manganui. Te taka meitaki ra, kare aia i kanga ua ma te manakonako kia rave i te pirianga ainga tau kore ma te au vaine ou ra.

16. (a) Eaa a Iobu i riro ei ei akatauanga meitaki no te au Kerititiano akaipoipo? (e) Akapeea te tu akono o te tangata i to Malaki tuatau i tuke roai mei to Iobu, e akapeea i teia tuatau?

¹⁶ No reira, na roto i te au tuatau meitaki e te au tuatau ngata, ku akaari a Iobu i te tiratiratu akono tau. Kua akara a Iehova i teia e kua akameitaki maata iaia. (Iobu 1:10; 42:12) Mei teaa ra tetai akatauanga meitaki o Iobu no te au Kerititiano akaipoipoia, te au tane e te au vaine! No reira ra Iehova i aroa maatai iaia! Ei tuke anga, te tu akono o te aronga e manganui i teia tuatau te akatutu piri vaitata ra i tei tupu i to Malaki tuatau ra. Kua aue taua peroveta ra i te tu akaruke anga a te au tane e manganui i to ratou au tokorua, e putuputu kia akaipoipo i te au vaine ou ra. Kua akangaroia te atarau o Iehova ki te roimata o te au vaine akarukeia ra, e kua akaapa te Atua i taua aronga tei ‘rave pikikaa ra’ i to ratou au tokorua ra.​—Malaki 2:​13-16.

Tetai Vaine Ou Ma Ra

17. Akapeea te vaine Sulami i aite ei ki tetai “kainga koropiniia” ra?

¹⁷ Te toru o te aronga tiratiratu mou ko tetai vaine Sulami. E ou e te manea, kua akainangaro aia kare i tetai tamaiti tiaki mamoe anake mari katoa ra i te ariki apinganui o Iseraela, ko Solomona. I roto katoa i te tua manea tei akakiteia i te Peʼe na Solomona, kua vai ma ua taua vaine Sulami ra, no reira kua rauka iaia te akangateitei anga a te aronga takapini iaia. Ko Solomona, noatu kua kopae keia e ia, kua akauruia kia tata i te tua nona ra. Te tiaki mamoe tana i inangaro ra kua akangateitei katoa i tona tu akono ma ra. I tetai tuatau kua akamanako aia e te aite ra taua vaine Sulami ra ki tetai “kainga koropiniia.” (Imene a Solomona 4:12) I Iseraela taito ra, i roto i te au kainga manea ra te au kai tanutanuia tuke tuke, te au tiare kakara, e te au pu rakau manea oki. Taua au kainga ra kua koropiniia e te ngangaere me kare e tetai paruru e ka rauka kia tomo atu na tetai pa tei rokoia ra. (Isaia 5:5) Ki te tiaki mamoe ra, te tu akono ma o te vaine Sulami e tona manea te aite ra ki taua kainga manea ra. E tu tau meitaki tikai tona. Ka riro anake tona au tu inangaroia ra ki tana tane a te tuatau ki mua ra.

18. Eaa ta te au tataanga o Iosepha, Iobu, e te vaine Sulami ra i akamaara mai kia tatou?

¹⁸ I te tiratiratu akono tau, kua akanoo te vaine Sulami ra i tetai akatauanga meitaki roa no te au vaine Kerititiano i teia tuatau nei. Kua kite a Iehova e kua ariki oki i te tu ma o taua tamaine Sulami ra e kua akameitaki iaia mei tana akameitaki anga ia Iosepha raua ko Iobu ra. No te aratakianga ia tatou, kua tataia ta ratou au angaanga tiratiratu ki roto i te Tuatua a te Atua ra. Noatu rai kare ta tatou au tauta anga kia tiratiratu i teia tuatau nei i tataia ki roto i te Pipiria, e “buka manakoanga” ta Iehova no te aronga te kimi ra kia rave i tona anoano. Auraka e ngaropoina ia tatou e te “akarongo mairā” a Iehova e te rekareka ra ia tatou e tauta tiratiratu ra i te tamou marie i te tu akono ma.​—Malaki 3:16.

19. (a) Akapeea tatou me manako i te tu akono ma? (e) Eaa te ka uriuriia i te atikara i muri akenei?

¹⁹ Noatu rai e penei ka aviri te aronga kare ra e akarongo, ka rekareka ra tatou i to tatou akarongo anga ki Tei Anga aroa maira ia tatou. E tu akono teitei atu to tatou, ko tetai akono tau i te Atua ra. Ko tetai apinga te tau ra kia akaparauia, tetai tei apinganuiia. Na te tamou marieanga i tetai turanga akono tau, ka mareka tatou i ta te Atua ra akameitakianga e ka rauka kia tamou marie i tetai manakonakoanga kaka no te au akameitakianga mutu kore ki mua. Inara, i roto i tetai tu tau, eaa ta tatou ka rave kia vai akono ma? Na te atikara te aru mai nei e uriuri i teianei uianga puapinga maata.

[Au Tataanga Rikiriki i Raro]

Ka Rauka Ainei ia Koe te Akataka?

• Eaa ta te Pipiria apiianga no te au pirianga ainga?

• Eaa te kapitiia ra e te tuatua “fornication” i roto i te Pipiria?

• Akapeea tatou e puapingaiai e kia vai akono ma?

• Eaa a Iosepha, Iobu, e te tamaine Sulami i riro ei ei akatauanga meitaki no te au Kerititiano i teia tuatau?

[Tutu i te kapi 9]

Kua oro ke a Iosepha mei te ainga tau kore

[Tutu i te kapi 10]

Mei tetai “kainga koropiniia” te tamaine Sulami

[Tutu i te kapi 11]

Kua papau a Iobu i tetai ‘koreromotu ma tona nga mata’