Te Akamaroiroi ra Iehova i tei Paruparu
“Te oronga nei [a Iehova] i te maroiroi no tei paruparu; e te akamaata nei aia i te maroiroi no tei apikepike.”—ISAIA 40:29.
1. E akatutu mai i te maroiroi te vaira i roto i te au apinga na te Atua i anga mai.
E KOTINGA koreia to Iehova ra maroiroi. E mei teaa ra te maata o te ririnui te vaira i roto i te au apinga tana i anga! Te atomu meangiti ua—te tumu tikai no te au apinga katoatoa—e meangiti ua e ko tetai topata vai e okotai anere pirioni pirioni au atomu i roto i te reira.a Te irinaki ra te oraanga katoa i to tatou paraneta nei i te ririnui tei akatupuia mai e te au angaanga atomu o te ra. Inara eaa te maata o te ririnui o te ra te umuumuia ra kia akaroa i te oraanga i te enua nei? Te rauka ra i te enua i tetai tuanga meangiti ua o te ririnui katoatoa te akatupuia ra e te ra. Noatu rai, ko tetai tuanga meangiti o te ririnui o te ra te topa maira ki runga i te enua e maata rava atu ia i te katoa anga o te ririnui te taangaangaia ra i roto i te au ngai angaanga i te ao nei.
2. I tona tu, eaa ta Isaia 40:26 i tuatua no to Iehova ra mana ririnui?
2 Noatu me ka akamanako tatou i te atomu me kare ka akaariu i to tatou manako anga ki te ao maata e pini ua ake, ka umere ra tatou i te maroiroi maata roa o Iehova ra. No reira oki aia i tuatuai: “Ka nānā na i to kotou mata ki runga, ka akara: naai te reira i anga? te arataki ra aia i taua au nuku ra ki vao ma te tatauia: kua tapa anakeia to ratou au ingoa e ia; no tona ra ririnui, e te mana maata, i kore ei tetai i ngaro”! (Isaia 40:26) Ae, e “ririnui” to Iehova, e koia te Tumu o te “mana maata” tei taangaangaia kia akatupu mai i te ao katoa e pini ua ake.
E Tere Atu i te Maroiroi ua te Umuumuia Ra
3, 4. (a) Eaa etai au tumu te ka akaparuparu mai ia tatou? (e) Eaa te au uianga te umuumuia ra kia akamanakoia?
3 Noatu ra e kare i kotingaia to te Atua ra maroiroi, te roiroi ra te au tangata. I te au ngai ravarai ta tatou ka aere, ka kite ra tatou i te au tangata roiroi. Ka ara roiroi mai ratou, ka aere ki te angaanga me kare ki te apii te roiroi ra, ka oki mai ki te kainga te roiroi ra, e ka aere atu ki te roi kare i roiroi ua mari ra kua kino tikai te maroiroi. Te anoano ra tetai papaki kia rauka ia ratou te aere ki tetai ngai kia akaangaroi i tetai taime umuumuia ra. Ei au tavini no Iehova, te roiroi katoa ra tatou, no te mea te umuumu maira to tatou oraanga akono tau i te Atua ra i te tauta anga maroiroi. (Mareko 6:30, 31; Luka 13:24; 1 Timoteo 4:8) E te vaira tetai au tumu ke e manganui te akaparuparu ra i to tatou maroiroi.
4 Noatu rai e au Kerititiano tatou, kare tatou i atea ke i te au manamanata te matauia ra e te au tangata nei. (Iobu 14:1) Te maki, te ngere i te moni, me kare etai atu tu ngata te matauia ra i te oraanga penei ka akatupu i te mareka kore, ma tona au akaparuparuanga. Kapiti katoaia ki teianei au akaaoanga ko te au timataanga te tupu ra ki te aronga takinga kinoia no te tuatua tika. (2 Timoteo 3:12; 1 Petero 3:14) No te au taomianga i te au ra tataki tai mei teianei ao e te patoi anga oki ki ta tatou angaanga tutu Patireia, penei kua maata rava te roiroi o tetai papaki o tatou e kua manako ngakau tatou kia rave marie i te tavini anga ia Iehova. Pera katoa oki, i te tauta anga kia akakore i to tatou tiratiratu ki te Atua, kua rave a Satani te Tiaporo kia taangaanga i te au tu ravarai te ka rauka iaia. Akapeea, i reira, e raukai ia tatou te maroiroi pae vaerua te umuumuia ra ei akakore i te roiroianga e te akamutuanga?
5. Eaa ra i umuumuiai kia tere atu te maroiroi o te tangata nei kia rave i te angaanga orometua Kerititiano ra?
5 No te maroiroi pae vaerua, ka tika tatou kia irinaki ia Iehova, koia Tei Anga maroiroi katoa ra. Kua tou maira te apotetoro ko Paulo e ka umuumuia no te angaanga orometua Kerititiano kia tere atu i te maroiroi matauia no te au tangata apa ua nei. Kua tata aia: “Te āriki nei ra matou i taua apinga nei i te āriki karakaraea nei, kia riro te mana maata meitaki nei ki te Atua, auraka ia matou.” (2 Korinetia 4:7) Te rave nei te au Kerititiano akatainuia ra i “te taoonga akaongi nei” ma te turu anga a to ratou au oa e manakonakoanga to ratou ra no te enua nei. (2 Korinetia 5:18; Ioane 10:16; Apokalupo 7:9) I te mea te rave nei tatou e au tangata apa ua nei i te angaanga a te Atua ma te aro atu i te takinga kinoanga, kare e rauka ia tatou kia rave i te reira ma to tatou uaorai maroiroi. Te tauturu maira Iehova ia tatou na tona vaerua tapu, e na to tatou tu paruparu e akamaata i tona maroiroi. E mei teaa ra to tatou akapumaana angaia e te akapapu anga e te “tauturuia ra te aronga tuatua-tika e Iehova”!—Salamo 37:17.
‘Ko Iehova to Tatou Maroiroi Maata’
6. Akapeea ta te au Tuatua Tapu akapapu anga kia tatou e ko Iehova to tatou Tumu no te maroiroi?
6 E “ririnui” to tatou Metua i te rangi ra ka ngoie ua i te akamaroiroi mai ia tatou. Ko te tika, te akakiteia maira kia tatou: “Te oronga nei [a Iehova] i te maroiroi no tei paruparu; e te akamaata nei aia i te maroiroi no tei apikepike. E potopoto te aʼo o te aronga mapu, e mate oki i te roiroi, e te au tangata ou, e inga takiri roa ïa ki raro: Ko te aronga ra e tapapa ia Iehova, e rauka ïa te maroiroi ou; e rere ratou ki runga i te peau mei to te au aeto ra; e oro ratou e kare e roiroi; e aere atu rai oki ratou, e kare ïa e potopoto te aʼo.” (Isaia 40:29-31) No te tupuanga kia maata te au taomianga, penei i etai taime te manako ngakau aite ra tatou ki tetai tangata oro kua roiroi ra e kua akara anga mei te mea rai e kare e rauka i tona nga vaevae kia apai iaia kia mamao atu. Inara ko te openga o taua oro anga no te oraanga ra te vaitata maira i mua ua, e auraka tatou e tuku i te au. (2 Paraleipomeno 29:11) Te aaere nei to tatou Enemi, te Tiaporo, mei “te liona ngunguru ra,” e te anoano ra aia kia tapu ia tatou. (1 Petero 5:8) Kia maara tatou e ‘ko Iehova to tatou maroiroi e to tatou paruru,’ e kua oronga mai aia ma te maata i te au apinga kia ‘oronga i te maroiroi ki tei paruparu.’—Salamo 28:7.
7, 8. Eaa te akapapu anga e na Iehova i akamaroiroi ia Davida, ia Habakuka, e ia Paulo ra?
7 Kua oronga a Iehova kia Davida i te maroiroi tei umuumuia nona kia aro ua atu i te au arairaianga maata ra. No reira ma te akarongo ki katoa e te irinaki anga, kua tata Davida: “E maroiroi matou i te Atua kia rave ra; e nana e takatakai i to matou au enemi ki raro.” (Salamo 60:12) Kua akamaroiroi katoa a Iehova ia Habakuka kia rauka iaia te akaoti i tana angaanga ei peroveta. Te tuatua ra Habakuka 3:19: “Ko te Atu ra ko Iehova, ko toku ïa maroiroi; nana e akariro i toku vaevae mei to te aili, e ka aaere au iaia na runga i taku au ngai teitei.” E mea tau katoa oki te akatauanga a Paulo, tei tata ra: “E tika iaku te au mea ravarai nei i te [Atua], ko tei akamaroiroi mai iaku nei.”—Philipi 4:13.
8 Mei ia Davida, ia Habakuka, e Paulo ra, ka tau tatou kia akono i te akarongo i to te Atua kite kia akamaroiroi ia tatou e i tona mana kia akaora ia tatou. Ma te matakite e ko te Atu Ngateitei ko Iehova to tatou Tumu no te “maroiroi,” e akamanako tatou i teianei i etai au tu e raukai te maroiroi pae vaerua mei te au apinga ta te Atua e oronga maata maira.
Te Au Apinga Vaerua ei Akamaroiroi ia Tatou
9. Eaa te tuanga ta te au puka Kerititiano i rave i te akamaroiroianga ia tatou?
9 Na te apiianga tiratiratu i te au Tuatua Tapu ra ma te tauturu a te au puka Kerititiano ka rauka kia akamaroiroi meitaki mai ia tatou. Kua imene te tata taramo ra: “E ao to te tangata . . . tei inangaro ra i te ture a Iehova; e tei tana ture tona manakoanga i te po e te ao. E tau aia ki te rakau i tanumia ki te pae kauvai ra, ko tei ua i tona ra tuatau tikai, e ko tei kore roa i mae tona rau; ko tana katoa e rave ra, te meitaki ra ïa.” (Salamo 1:1-3) Mei ia tatou ka tika kia kaikai kia akatinamou i to tatou maroiroi pae kopapa, ka tau katoa tatou kia kai i te kai vaerua tei orongaia mai e te Atua na roto i tana Tuatua e te au puka Kerititiano oki kia akatinamou i to tatou maroiroi pae vaerua. No reira, te umuumuia ra te apii anga tau e te manako anga tika.
10. Ko teea te tuatau ka kiteai e tatou no te apii e te akamanako anga?
10 E puapinga tikai kia akamanako i “te au mea oonu rai o te Atua ra.” (1 Korinetia 2:10) Inara aea e kiteai e tatou te tuatau no te akamanako anga? “E kua aere aturā [te tamaiti a Aberahama ko Isaaka] ki vao i te kainga i te aiai [e te akamanako ra].” (Genese 24:63-67, akaaite ia NW.) Te tata taramo ko Davida ‘kua manako atu i te Atua i te au atianga i te po ra.’ (Salamo 63:6) Penei ka apii tatou i te Tuatua a te Atua e te akamanako anga ki runga i te reira i te popongi, i te aiai, e i te po—e tika katoa i tetai ua atu taime. Ko taua apii anga e te akamanako anga ka taki atu ki tetai atu ravenga akamaroiroianga a Iehova ra i te pae vaerua—koia oki te pure.
11. Eaa tatou ka tau ei kia tuku i te puapinga maata ki te pure putuputu anga?
11 Na te pure putuputu ki te Atua e tauturu ia tatou kia maroiroi. No reira kia “tamou marie tikai [tatou] i te pure.” (Roma 12:12) I etai taime, ka tau tatou kia rave tikai i tetai pati anga akatakaia no te pakari e te maroiroi te anoanoia ra kia akakoromaki ma tetai timata anga. (Iakobo 1:5-8) Kia akameitaki oki tatou e kia akapaapaa i te Atua me kite tatou i te akatupu angaia tana akakoroanga e kia kite oki e kua akamaroiroi mai aia ia tatou i te tavinianga iaia. (Philipi 4:6, 7) Me ka vai piri vaitata atu tatou kia Iehova na roto i te pure, kare rava aia e akaruke ia tatou. “I na!” ta Davida i imene, “ko te Atua te tauturu iaku.”—Salamo 54:4.
12. Eaa tatou i tau ei kia pati ki te Atua no tona vaerua tapu?
12 Te akaririnui maira to tatou Metua i te rangi ia tatou e te akamaroiroi maira ia tatou ma tona ra vaerua tapu, me kare mana rave angaanga. Kua tata a Paulo: “No reira oki au i akamingi atu ei i taku turi ki raro i te aroaro o te Metua o to tatou Atu ra o Iesu Mesia . . . kia oronga aia ia kotou i te maata o tona kakā, kia akaetaetaia mai te tangata i roto ra e tona Vaerua.” (Ephesia 3:14-16) Ka tau tatou kia pure no te vaerua tapu, ma te irinaki anga e ka akameitaki mai a Iehova ia tatou ma te reira. Kua akamanako a Iesu: Me ka pati tetai tamaiti no tetai ika, ka oronga atu ainei tetai metua aroa i tetai ovi? Kare. No reira, kua taopenga aia: “E te tika na ia kotou, kino ua rai [e maata me kore e meangiti e te ara ua ra], kia oronga i te mea meitaki no ta kotou tamariki, ka tangaʼi oki i to kotou Metua i te ao ra, i te oronga i te Vaerua Tapu i te aronga e pati atu aia ra.” (Luka 11:11-13) E pure tatou ma te irinaki anga tikai e kia maara e ka rauka rai te au tavini tiratiratu o te Atua e “kia akaetaetaia” ma te mana na roto i tona vaerua.
Te Putuputuanga e Tauturu Akamaroiroi Anga
13. Eaa te manako anga tau na tatou no te au uipaanga Kerititiano?
13 Te akamaroiroi maira Iehova ia tatou na roto i te au uipaanga o te putuputuanga Kerititiano. Kua tuatua Iesu: “I te ngai e putuputu ei e toko rua e toko toru i toku nei ingoa, tei rotopu katoa au ia ratou i reira.” (Mataio 18:20) I ta Iesu papau anga i taua taputou, te uriuri ra aia i te au tumu manako te umuumuia ra te manako o te aronga te arataki ra i te putuputuanga. (Mataio 18:15-19) Inara, te tau ra tana au tuatua ei kaveinga ki ta tatou au uipaanga katoatoa, te au putuputuanga, e te au uruoaanga, te akamataia ra e te akaotiia ra na roto i tona ingoa i roto i te pure. (Ioane 14:14) No reira ko tetai mea meitaki ia kia aere atu ki taua au akaputuputuanga Kerititiano, me e tokoiti ua i reira me kare e au tauatini ua atu. No reira e akakite tatou i te akameitaki anga no taua au atianga tei akapapaia ra kia akamaroiroi ia tatou i te pae vaerua kia maata te aroa, e i te angaanga memeitaki.—Ebera 10:24, 25.
14. Eaa te puapinga ka rauka mai ia tatou mei te au tauta anga a te aronga pakari Kerititiano ra?
14 Te oronga ra te aronga pakari Kerititiano i te tauturu pae vaerua e te akamaroiroi anga. (1 Petero 5:2, 3) Kua tauturu a Paulo e kua akamaroiroi atu i te au putuputuanga tana i tavini atura, mei ta te au akaaere tutaka i teia tuatau nei. Ko te tika, kua inangaro aia kia kapiti atu ki te au oa akarongo ra kia raukai tetai akatinamou anga akamaroiroi anga i rotopu ia ratou katoa. (Angaanga 14:19-22; Roma 1:11, 12) Kia akaari tamou ua atu tatou i te ariki anga no to tatou aronga pakari e tetai atu au akaaere Kerititiano, te rave ra i te tuanga maata i te akamaroiroianga ia tatou i te pae vaerua.
15. Akapeea te au oa akarongo i to tatou putuputuanga ra i riro ei ei “akapumaanaanga”?
15 Te au oa no roto i to tatou putuputuanga ka rauka kia riro ‘ei akapumaana mai.’ (Kolosa 4:10, 11) Ei ‘au oa mou’ ka rauka ia ratou te tauturu mai ia tatou i te au tuatau taitaia ra. (Maseli 17:17) Ei akatauanga, i te matara anga mai e 220 tavini o te Atua ra mei te puakapa takinga kinoanga i Sachsenhausen i raro ake i te tiaki Nazi ra i te 1945, kua aro atu ratou i tetai aaere anga e 200 kiro mita. Kua aere atura ratou ei pupu, e na te aronga maroiroi o ratou ra i kika aere te aronga paruparu i roto i etai au pereoo rikiriki tokoiti ra. Te tupu anga? I taua aaere anga no te mate ra tei mate atura e tere atu i te 10,000 o taua aronga no te puakapa takinga kinoanga ra, kare e okotai o te Au Kite o Iehova ra i mate. Kua mama mai taua au tataanga ra i roto i te au puka a te Watch Tower, kapiti katoa te Yearbook of Jehovah’s Witnesses e te Jehovah’s Witnesses—Proclaimers of God’s Kingdom, te akapapu maira e te akamaroiroi ra te Atua i tona au tangata, kia kore e unui ki muri.—Galatia 6:9.b
Akamaroiroiia e ta Tatou Angaanga Orometua Tutu Aere
16. Akapeea te rave putuputuanga i te tutu aereanga i te akamaroiroi anga ia tatou i te pae vaerua?
16 Ka akamaroiroi ia tatou i te pae vaerua te rave putuputu anga i te angaanga tutuanga Patireia. Ka tauturu taua angaanga ra ia tatou kia akara atu ki te Patireia o te Atua e kia tamou marie i te tuatau mutu kore ki mua e tona au manakonakoanga meitaki ki roto i te manako. (Iuda 20, 21) Na te au taputou Tuatua Tapu ta tatou e tuatua ra i ta tatou angaanga tutu aere e oronga mai i te manakonakoanga kia tatou te ka akariro kia tamanako tikai tatou mei te peroveta ia Mika ra, tei tuatua ra: “Ka aaere ra tatou i te ingoa o Iehova, o to tatou Atua, e tuatau ua atu.”—Mika 4:5.
17. Eaa te au manako anga te orongaia ra no runga i te au apii anga Pipiria i te ngutuare ra?
17 Ka akamaroiroiia to tatou uaorai pirianga ma Iehova ia tatou e taangaanga maata atura i te au Tuatua Tapu i te apiianga ia etai ke atu. Ei akatauanga, i te akonoanga i te au apii Pipiria i te ngutuare ma te tauturu a te puka Te Kite te ka Arataki ki te Ora Mutu Kore, e mea pakari kia tatau e kia uriuri manako oki i etai o te au tuatua tapu taikuia maira. Na teianei e tauturu i tei apiiia ra e ka akamaroiroi i to tatou uaorai kite i te pae vaerua. Me e tu ngata to tei apiiia ra i te manako no te Pipiria no tetai akatutu anga, ka tau kia akonoia kia tere atu i te okotai ua apii anga kia oti tetai pene okotai i te puka Kite ra. Mei teaa ra to tatou mataora kia teateamamao meitaki e kia rave maata atu i te tauta anga ka tauturu atu ia etai ke ra kia akavaitata atu ki te Atua!
18. Akatutuia mai i akapeea te puka Kite i te taangaanga meitaki angaia.
18 I te au mataiti taki tai, kua meitaki te taangaanga anga i te puka Kite ra i te tauturu anga e au tauatini ua atu tangata kia riro mai ei au tavini akatapuia no Iehova, e kua kapiti katoa teia i te aronga e manganui kare ra e manakoanga Pipiria. Ei akatauanga, iaia e tamariki ra, kua rongo atu tetai tangata Hindu i Sri Lanka i tetai Kite i te tuatua anga no Parataito. I etai mataiti i muri akera kua aravei atura i taua vaine ra, e kare i roaia kua akamata tana tane i tetai apii Pipiria ma taua tangata ra. Ko te tika, kua aere atu taua tangata ou ra no tana apii i te au ra taki tai katoa, e tuatau poto ua kua oti taua puka Kite ra. Kua akamata aia i te aere ki te au uipaanga katoatoa, kua akakore atu i tona piri anga ki tana akonoanga mua ra, e kua riro mai ei papuritia Patireia. I tona papetitoangaia, kua akamata ke ana aia i tetai apiianga Pipiria ma tetai tangata matauia e ia ra.
19. Ia tatou ka kimi i te Patireia na mua, eaa te ka papu ia tatou?
19 Na te kimianga i te Patireia na mua ka apai mai i te rekareka akamaroiroianga kia tatou. (Mataio 6:33) Noatu rai e ka kite tatou i etai tu timataanga, ka rave mataora ua atu tatou e te akakitekiteanga maroiroi i te evangeria. (Tito 2:14) E manganui o tatou te rave ra i te au umuumu anga no te tavini ei painia i te au tuatau ravarai, e ko tetai papaki te tavini ra i te au ngai anoano maataia ra te aronga tutu evangeria. Me te akono rekareka ra tatou i te au apinga no te Patireia na roto i teia me kare i etai atu tu, te irinaki ra tatou e kare e ngaropoina ia Iehova ta tatou angaanga i rave e te anoano ta tatou i akakite no tona ra ingoa.—Ebera 6:10-12.
Rave ua Atu na Roto i to Iehova Maroiroi
20. Akapeea e raukai ia tatou te akakite e te akara atura tatou kia Iehova no te maroiroi?
20 Ka tau tatou, kia akakite e te manakonako ra tatou i roto ia Iehova e te akara atura kiaia no te maroiroi. Ka rauka ia tatou te rave i te reira na te akonoanga ki katoa ia tatou uaorai i te au apinga pae vaerua tana e oronga maira na roto i te “tavini akono meitaki” ra. (Mataio 24:45) Te apii anga i te Tuatua a te Atua ko koe anake e i te putuputuanga oki ma te tauturu a te au puka Kerititiano ra, te pure ngakau tae, te tauturu pae vaerua a te aronga pakari, te au akatauanga meitaki a te au oa akarongo tiratiratu ra, e te rave anga putuputu i te angaanga orometua tei roto i te au ravenga te ka akamaroiroi i to tatou pirianga ma Iehova e ka akamaroiroi oki ia tatou kia rave ua atu i tana tavini anga tapu.
21. Akapeea ta nga apotetoro ko Petero raua ko Paulo akakite anga i te umuumu anga no te maroiroi mei ko mai i te Atua ra?
21 Noatu ra to tatou tu paruparu i te pae kopapa, ka akamaroiroi mai a Iehova ia tatou kia rave i tona anoano me ka irinaki tatou kiaia no te tauturu. No te matakite i taua umuumuanga no te tauturu, kua tata te apotetoro ko Petero: “Kia tuatua tetai tangata ra, kia tau ïa i te tuatua a te Atua.” (1 Petero 4:11) Kua akaari a Paulo i tona irinaki anga ki runga i te maroiroi no ko mai i te Atua ra i tana tuatua anga: “E teianei e mea rekareka iaku te paruparu, te akakino, te pini, te takinga-kino, e te tumatetenga i te Mesia nei; kia paruparu oki au ra, te maroiroi ra au i reira.” (2 Korinetia 12:10) Kia akakite oki tatou i taua irinaki anga ra e kia apai mai i te kaka ki te Atu Ngateitei kia Iehova ra, nana ra e akamaroiroi mai i tei paruparu ra.—Isaia 12:2.
[Au Tataanga Rikiriki i Raro]
a Ko teia numero, e tare anga numero na te U.S., ko te numero 1 aru mai e 20 zero.
b Neneiia e te Watchtower Bible and Tract Society of New York, Inc.
Akapeea Koe me Pau?
• Eaa te au tangata o Iehova i umuumu ei kia maata atu i te maroiroi?
• Eaa te akapapu anga Tuatua Tapu te vaira e te akamaroiroi maira te Atua i tona au tavini?
• Eaa etai au apinga vaerua ta Iehova ra i oronga mai ei akamaroiroi ia tatou?
• Akapeea e raukai ia tatou te akaari e te akara ra tatou ki te Atua no te maroiroi?
[Tutu i te kapi 12]
Te akamaroiroiia ra to tatou uaorai pirianga ma Iehova ia tatou e taangaanga ra i te Pipiria i te apii i etai ke