“E Kimi ia Iehova, e Tona ra Ririnui”

“Te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.”​—2 PARALEIPOMENO 16:9.

1. Eaa te mana ririnui, e akapeea ta te au tangata taangaanga i te reira?

KA TAU te aiteanga o te mana ririnui ki etai au tu apinga, mei te rave akatere anga, me kare mana taoonga, me kare mana manako ki runga ia etai ke; te kite i te rave me kare kia akatupu i tetai tupu anga; mana kopapa; me kare manako me kare kite akono tau. Kare o te au tangata akakiteanga meitaki no te akatereanga mana ririnui. Ko Lord Acton, e tata tuatua enua, i te tuatuaanga no runga i te mana ririnui i roto i nga rima o te tangata poritiki, kua karanga aia: “Te rave ra te mana ririnui kia taviivii e ko te mana ririnui takiri te taviivii takiri ra ia.” Te ki ra te au tata tuatua enua o teianei tuatau i te au akatauanga akaarianga i te tuatua mou tikai o te au tuatua a Lord Acton ra. I te 20 anere mataiti nei, “te tutara ra tetai tangata ki rungao i tetai, ei mate nona uaorai” kare i aiteia i mua ana. (Koheleta 8:9) Te aronga tutara viivii kino kua rave tau kore i to ratou mana ririnui e kua akapou atu i te au ora anga o te aronga e au mirioni ua atu. Ko te mana ririnui kare ra i akatereia e te aroa, te pakari, e te tuatua tau e mea kino ia.

2. E akataka mai e akapeea etai atu tu-Atua i te akatupuanga i te tu o ta Iehova ra taangaanga i tona mana ririnui.

² Kare mei te au tangata e manganui, te taangaanga tamou ra te Atua i tona mana ririnui no te meitaki. “Te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.” (2 Paraleipomeno 16:9) Te arataki nei a Iehova i tona mana ririnui na roto i tetai tu akatereia. Na te akakoromaki i arai i ta te Atua ra akapou anga i te aronga rave kino kia oronga atu kia ratou i te tuatau kia tataraara. Na te aroa i akakeu iaia kia akaiti mai i te ra ki runga i te au tu tangata ravarai​—te aronga tuatua tika e te tuatua tika kore oki. Na te tuatua tau e akakeu iaia i te openga ra kia taangaanga i tona mana kotinga koreia kia takore atu i tei iaia ra te aiteanga kia akatupu i te mate, koia Satani te Tiaporo ra.​—Mataio 5:​44, 45; Ebera 2:14; 2 Petero 3:9.

3. Eaa ra te Atua mana katoatoa i tau ei ei tumu no te irinakianga iaia ra?

³ Te mana ririnui umere o to tatou Metua i te rangi ra ko tetai tumu ia no te irinaki e te irinaki papu anga​—i tana au taputou e i tana paruru anga. Te manako ngakau meitaki ra tetai tamaiti rikiriki i roto i te au tangata ke me te mou atura aia i te rima o tona metua, i te mea kua kite aia e kare tona metua e tuku i tetai kino kia tupu kiaia. Pera katoa oki, to tatou Metua i te rangi ra, ko “tei mana kia akaora ra,” ka paruru ia tatou mei tetai ua atu kino tamou me ka aaere tatou ma ia katoa ra. (Isaia 63:1; Mika 6:8) Ei Metua meitaki, ka akatupu katoa a Iehova i tana au taputou. Te akapapu maira tona mana kotinga koreia e ‘ka tupu ra tei akakoroia e ia ra; e manuia oki te mea i akaue atu ei aia ra.’​—Isaia 55:11; Tito 1:2.

4, 5. (a) Eaa tei tupu i ta te Ariki ko Asa ra irinaki takiri anga ia Iehova? (e) Penei eaa te ka tupu me irinaki tatou i te au tauturu anga a te tangata i to tatou au manamanata?

⁴ Eaa ra i puapinga maatai kia tamanako tatou kia kore e ngaro te matakite i te paruru anga a to tatou Metua i te rangi ra? No te mea ka rauka kia riro te manako i te au turanga i tupu ra e ka ngaropoina e teiea to tatou tu tinamou tikai. Kua kitea teia i te akatauanga a te Ariki ko Asa, koia tetai tangata tei matauia i te irinaki ia Iehova. I te tuatau o to Asa tutara anga, kua aere maira tetai nuku vaeau Etiopia e tai mirinoi kia tamaki ia Iuda. I te kiteanga e tei tona au enemi te au vaeau maata atu, kua pure a Asa: “E Iehova e, kare te mea ravengata ia koe ki tupae mai i te riri iti i rotopu i te aronga katoa e manganui: e tauturu mai ia matou, e to matou Atua, e Iehova e; te irinaki nei oki matou ki runga ia koe, e no toou ingoa e aere atu ei matou e tamaki i teianei aronga maata. Ko koe to matou Atua, e Iehova; auraka ta te tangata kia tupu i taau ra.” (2 Paraleipomeno 14:11) Kua oronga a Iehova i ta Asa i pati e kua oronga i te autu anga kiaia.

⁵ Inara, i muri ake i te au mataiti e manganui te tavini tiratiratu anga, kua topa to Asa irinaki anga i to Iehova ra mana ririnui akaoraanga. Kia kopae ke i te akakoko anga vaeau mei te patireia tokerau o Iseraela ra, kua ariu atu aia kia Sura no te tauturu. (2 Paraleipomeno 16:​1-3) Noatu rai e kua tupu te akakoreanga i te akakoko anga a Iseraela kia Iuda no tana tutaki anga i te Ariki o Sura ko Beneadada, kua akaari ra te koreromotu a Asa ma to Sura ra i tetai ngere i te irinaki anga ia Iehova. Kua ui tika atura te peroveta ko Hanani kiaia: “Kare ainei te nuku maata to Kusa, e to Lubia, e te kariota i te maata, e te aronga akaoro oroenua? no te mea ra kua irinaki koe ia Iehova, kua tuku maira aia ia ratou ki to rima.” (2 Paraleipomeno 16:​7, 8) Inara, kua kopae ke a Asa i teianei ako. (2 Paraleipomeno 16:​9-12) Me aro atu i te au manamanata, auraka tatou e irinaki ki runga i te au tauturu a te tangata. Mari ra, e akakite tatou i te irinaki anga i te Atua, no te mea ko te irinakianga i te mana ririnui o te tangata ka taki atu ki te reka koreanga.​—Salamo 146:​3-5.

E Kimi i te Mana Ririnui ta Iehova e Oronga Maira

6. Eaa tatou i tau ei kia “kimi ia Iehova, e tona ra ririnui”?

⁶ Ka rauka ia Iehova te oronga mai i te mana ririnui ki tona au tavini pera katoa te paruru ia ratou. Te raurau maira te Pipiria ia tatou kia “kimi ia Iehova, e tona ra ririnui.” (Salamo 105:4) No teaa ra? No te mea me ka rave tatou i te au apinga i to Iehova ra ririnui, ka taangaangaia to tatou mana ririnui no te puapinga, kare no te kino, o etai ke ra. Kare e kitea e tatou i tetai atu ngai tetai akatauanga meitaki atu no teianei i ta Iesu Karaiti ra, tei rave ra i te au temeio e manganui i roto i te ‘mana o Iehova.’ (Luka 5:17) Ka rauka ua ia Iesu kia akatapu iaia uaorai kia riro ei apinganui, ei rongonui, me kare ei ariki mana ririnui katoa. (Luka 4:​4-7) Kareka ra, kua taangaanga aia i te mana ririnui ta te Atua i oronga kiaia kia tereni e kia apii oki, kia tauturu e kia rapakau. (Mareko 7:37; Ioane 7:46) Mei teaa ra tetai akatauanga meitaki no tatou!

7. Eaa te tu puapinga maata ta tatou ka tatanu me ka rave tatou i te au apinga i to te Atua ra maroiroi kare i to tatou uaorai?

⁷ Pera katoa oki, me rave tatou i te au apinga “kia tau i ta te Atua i oronga maira,” ka tauturu teia ia tatou kia taakaaka. (1 Petero 4:11) Te au tangata kimi mana ririnui ra no ratou uaorai ka riro kia manako akateitei. Ko tetai mei teia ko te ariki o Asura ko Esarahadona, tei tuatua akaparau ra: “E ririnui au, e ririnui katoa au, ko tetai tangata toa au, e maata au, e maatamaata au.” Ei tuke anga, “kua iki oki te Atua i te mea parukaua o teianei ao, ei taakama atu i te aronga maroiroi.” No reira me ka akaparau tetai Kerititiano mou ra, ka akaparau aia ia Iehova, no te mea te kite ra aia ko tana i rave kare i raveia i tona uaorai ririnui. Ko te ‘akamoraro anga ia tatou uaorai i raro i te rima mana o te Atua’ ka apai mai i te akateitei anga mou.​—1 Korinetia 1:​26-31; 1 Petero 5:6.

8. Eaa ta tatou ka tau kia rave na mua kia raukai to Iehova ra mana ririnui?

⁸ Akapeea e rauka mai ei ia tatou te ririnui mei te Atua? Te mea mua, ka tau tatou kia pati no te reira na te pure. Kua akapapu atura Iesu ki tana au pipi e ka oronga mai tona Metua i te vaerua tapu ki te aronga e pati i te reira. (Luka 11:​10-13) E akamanako i akapeea teia i te akaki anga i te au pipi a Karaiti ma te mana ririnui i ta ratou iki anga kia akarongo i te Atua e kare ki te au arataki akonoanga tei ikuiku ra ia ratou kia kore e tuatua no Iesu. I ta ratou pure anga no ta Iehova tauturu, kua pauia mai ta ratou pure ngakau tae, e kua akamaroiroi mai te vaerua tapu ia ratou kia rave ua atu i te tutuanga tuatua meitaki ma te mataku kore ra.​—Angaanga 4:​19, 20, 29-31, 33.

9. E akakite mai i tetai tumu rua no te maroiroi pae vaerua, e akakite mai i tetai akatauanga Tuatua Tapu kia akaari i tona puapinga?

⁹ Te rua, ka rauka ia tatou te maroiroi pae vaerua mei te Pipiria maira. (Ebera 4:12) Kua kiteaia te mana ririnui o te tuatua a te Atua i te tuatau o te Ariki ko Iosia. Noatu rai e kua akakore keia e teia ariki o Iuda ra te au itoro peikani ra mei taua enua ra, kua akakeuia mai aia e te kitea anga poitirere te Ture a Iehova ra i te iero kia akamaroiroi atu i teianei porokaramu tamaanga.a I muri ake i ta Iosia uaorai tatau anga i te Ture ki te au tangata ra, kua papau maira te iti tangata katoa i tetai koreromotu ma Iehova ra, e ei tuarua, tei maata atura te ririnui, kua rave akaouia te patoianga akamori itoro. Ko te tupu anga meitaki o ta Iosia rave akaou anga koia oki ‘kare akerai ratou i akapaki i te aru ia Iehova, e ope rava akera ona au ra.’​—2 Paraleipomeno 34:33.

10. Eaa te toru o te tu e raukai te maroiroi mei ko mai ia Iehova ra, e eaa te reira ka puapingai?

¹⁰ Te toru, ka rauka ia tatou te ririnui mei ko mai ia Iehova ra na roto i te taokotaianga Kerititiano. Kua akamaroiroi maira Paulo i te au Kerititiano kia aere putuputu ki te au uipaanga “kia maata te aroa, e i te angaanga memeitaki ra” e kia akamaroiroi atu tetai i tetai ra. (Ebera 10:​24, 25) I to Petero ra tatara anga temeio mai anga i te tapekaanga, kua anoano aia kia kapiti atu ma tona au taeake, no reira kua aere tika atu aia ki te are o te metua vaine o Ioane Mareko ra, i te ngai “e manganui oki tei putuputu i reira, te pure ra.” (Angaanga 12:12) Inara, ka rauka ua ia ratou katoatoa i te noo i te kainga e ka pure ei. Inara kua iki ratou kia akaputu mai kia pure e kia akamaroiroi tetai i tetai i taua tuatau ngata ra. I te vaitata anga te openga o ta Paulo aerenga roa e te kino ki Roma, kua aravei atu aia i etai au taeake i Puteoli e i muri akera ma etai atu tei aere maira kia aravei iaia. Tana i rave? “Kite akerā Paulo ia ratou [te aronga i mua ana], akameitaki atura i te Atua, e maroiroi atura.” (Angaanga 28:​13-15) Kua akamaroiroiia aia na te kapiti akaouanga ma te au oa Kerititiano ra. Ka rauka katoa mai to tatou ririnui mei te taokotai anga ma te au taeake Kerititiano. I te mea te rangatira ua ia nei tatou e te rauka ra i te taokotai atu tetai ma tetai, kare tatou e tika kia tauta i te aaere ko koe anake i te mataara oiti te taki atura ki te ora anga.​—Maseli 18:1 Mataio 7:14.

11. E taiku mai i etai au turanga te umuumu tikaia ra “te mana maata meitaki nei.”

¹¹ Na te pure putuputu, te apii i te Tuatua a te Atua, e te taokotai anga ma te au oa akarongo ra, “kia maroiroi [tatou] i te Atu, e i te ririnui o tona mana.” (Ephesia 6:10) Kare e ekoko anga te umuumu ra tatou katoatoa “kia maroiroi [tatou] i te Atu.” Te mamae ra tetai papaki i te au maki akaparuparu, ko etai no te au tu kino o te ruaine anga me kare no te takake anga toou tokorua no tetai oraanga roa. (Salamo 41:3) Ko etai atu kua akakoromaki i te patoianga na tetai tokorua akarongo kore ra. Te au metua, e maata oki te au metua okotai, penei ka kite e ko te raveanga i tetai angaanga i te tuatau katoa e te akono anga i tetai pamiri e apainga akaroiroi ia. Ka umuumu te au Kerititiano ou i te ririnui kia rauka te tu atu ki te taomianga taeake e kia tuatua kare ki te au apinga akakona e te apinga tau kore oki. Kare tetai e tau kia akakore i te pati anga kia Iehova no “te mana maata meitaki nei” kia akono ma taua au akaaoanga ra.​—2 Korinetia 4:7.

‘Oronga Nei i te Maroiroi no Tei Paruparu’

12. Akapeea ta Iehova ra akamatutu anga ia tatou i te angaanga orometua Kerititiano ra?

¹² Pera katoa, te oronga nei a Iehova i te maroiroi ki tona au tavini me te rave ra ratou i tana angaanga. Ka tatau tatou i ta Isaia totou: “Te oronga nei aia i te maroiroi no tei paruparu; e te akamaata nei aia i te maroiroi no tei apikepike. . . . Ko te aronga ra e tapapa ia Iehova, e rauka ïa te maroiroi ou, e rere ratou ki runga i te peau mei to te au aeto ra; e oro ratou e kare e roiroi; e aere atu rai oki ratou, e kare ïa e potopoto te aʼo.” (Isaia 40:​29-31) Kua rauka i te apotetoro ko Paulo uaorai te maroiroi kia rave i tana angaanga. Ei tetai tupu anga, kua meitaki tana angaanga orometua. Kua tata aia, ki te au Kerititiano i Tesalonia: “Kare ta matou evangelia i tae tuatua vaa ua atu ia kotou na, ma te mana katoa ra, e ma te Vaerua Tapu.” (1 Tesalonia 1:5) E mana katoa to tana tutuanga e te apiianga kia rave i te au tauianga maata i te au oraanga o te aronga tei akarongo atura kiaia.

13. Na teaa i akamaroiroi ia Ieremia kia akakoromaki e noatu te patoianga ra?

¹³ Me ka aro atu tatou ki tetai vaerua manako kore mai i ta tatou ngai tutuanga​—penei i tetai ngai ta tatou i tutu putuputu ana no etai mataiti ma te meangiti ua te akarongo mai​—penei ka ngakau kore ua tatou. Ma aiteite kua manako ngakau maroiroi kore a Ieremia i te patoi anga, te aviri, e te manako kore tana i aravei atu. “Kare au e akaiki iaia, e kare au e tuatua akaou i tona ra ingoa,” tana i tuatua kiaia uaorai. Inara kare i rauka iaia kia muteki ua. Kua “riro atura ra mei te ai ka i roto i toku ngakau ra, kua popaniia ki roto i toku ra au ivi.” (Ieremia 20:9) Na teaa i oronga i te maroiroi ou kiaia i roto i taua au tu e maata ra te ngata? “Tei iaku rā Iehova ei toa rikarika ïa,” ta Ieremia i tuatua. (Ieremia 20:11) Na to Ieremia arikianga i te puapinga maata tana tuatua e tana angaanga orongaia mai e te Atua kua akariro iaia kia akono i ta Iehova akamaroiroi anga.

Te Mana kia Tamamae e te Mana kia Akaora

14. (a) Akapeea te apinga ririnui o te arero ra? (e) E oronga mai i etai akatauanga ei akaari i te kino ta te arero ra ka rauka kia rave.

¹⁴ Kare te katoa o to tatou mana ririnui e te aere tikai maira mei te Atua. Ei akaraanga, te arero, kua rauka i te reira te mana ririnui kia tamamae e pera katoa kia akaora. “Tei te arero te mate e te ora i te vairanga,” ta Solomona i akamatakite. (Maseli 18:21) Te akaari maira te au tupu anga no ta Satani tuatuaanga poto ma Eva ra i te maata o te taitaia kino te ka rauka mai ma te au tuatua. (Genese 3:​1-5; Iakobo 3:5) Ka rauka katoa ia tatou te rave i te kino maata ma te arero ra. Te au tuatua akaapaanga no te paunu o tetai tamaine ou ra ka rauka kia akatere atu iaia na te mataara kia ngere i te kai. Ko tetai tuatua taokiokiia no te manako kore o etai tuatua akakino penei ka akakino i tetai pirianga oa roa. Ae, ka tau kia akatereia te arero.

15. Akapeea ka raukai ia tatou kia taangaanga i to tatou arero kia patu ake e kia akaora oki?

¹⁵ Inara, ka rauka i te arero te patu ki runga pera katoa te akapururu ki raro. Te tuatua ra te materi Pipiria: “Te tangata vaa karea ua ra, e tau ïa ki te koputaputa koke ra: ko te arero ra o te aronga pakari ra, mei te vairakau ïa.” (Maseli 12:18) Te taangaangaia ra te mana ririnui o te arero o te au Kerititiano pakari kia akapumaana i tei maromaroa e tei mamae ngakau ra. Ka rauka i te au tuatua aroa kia akamaroiroi i te au mapu tei maro atura ki te taomianga akakino a te au oa ra. Ka rauka i te arero manako tau ra kia akapapu atu ki te au taeake e te au tuaine ruaine ra e te vai anoanoia ra ratou e te inangaroia ra oki. Ka rauka i te au tuatua takinga meitaki kia akamanea mai i te ra o te aronga tei maki ra. I runga ravao, ka rauka ia tatou kia taangaanga i to tatou arero kia tutu aere i te tuatua mana ririnui o te Patireia ra ma te aronga katoa te ka akarongo. Te akakiteanga i te Tuatua a te Atua tei roto ia i to tatou mana ririnui me tei roto to tatou ngakau i te reira. Te tuatua ra te Pipiria: “Auraka koe e tāpu i te meitaki i te tangata e tau iaia ra, e tei to rima rai taua meitaki ra kia o atu.”​—Maseli 3:27.

Taangaanga Tika i te Mana

16, 17. I te akonoanga i to ratou mana orongaia mai e te Atua, akapeea te aronga pakari, te au metua, te au tane, e te au vaine i te aruanga ia Iehova?

¹⁶ Noatu rai e mana katoatoa aia, te tutara ra a Iehova i te putuputuanga ma te aroa. (1 Ioane 4:8) I te aruanga iaia, ka utuutu te aronga akaaere no te anana a te Atua ra ma te aroa​—kare na te akaapaanga me taangaanga i to ratou mana. E tika, ka tau te au akaaere i etai taime kia “akakite ua i te apa, e ako atu, e akamaroiroi atu,” inara ka rave i teia “ma te akakoromaki maata e te apii marie anga atu.” (2 Timoteo 4:2) No reira te aronga pakari e akamanako tamou marie i te au tuatua ta te apotetoro ko Petero i tata ki te aronga mana taoonga i roto i te putuputuanga: “Ka angai i te anana a te Atua i roto ia kotou na, ka rave i te taoonga tiaki auraka ra no te akaueue, no te anoano ra; auraka no te apinga tika kore ra kia rauka, no te tae tika ra o te ngakau; Auraka ma te akaueue ua ki runga i te tuanga a te Atua ra, ei kaveinga ra kotou no te anana.”​—1 Petero 5:​2, 3; 1 Tesalonia 2:​7, 8.

¹⁷ Te au metua e te au tane oki e mana to ratou tei orongaia maira e Iehova, e ka tau teia mana ririnui kia akonoia ei tauturu, ei akatupu ake, e ei akaperepere. (Ephesia 5:​22, 28-30; 6:4) Te akaari maira ta Iesu akatauanga e ka rauka kia akono meitakiia taua mana ra na roto i te tu aroa. Me ka akatauia te akoanga e kia rave marieia, kare te tamariki e riro kia taitaia. (Kolosa 3:21) Ka akaketaketaia te au akaipoipo anga me akono aroa ua te au tane Kerititiano i ta ratou turanga upoko e me akangateitei oonu tikai te au vaine i te upoko o ta ratou au tane e kia akono tau kore i to ratou turanga akakeu anga tei orongaia maira e te Atua ki tutara ki rungao me kare kia rauka ua tana.​—Ephesia 5:​28, 33; 1 Petero 3:7.

18. (a) Akapeea te aruanga tau na tatou i ta Iehova akatauanga i te akatereanga i to tatou riri? (e) Eaa te mea tau na te aronga e mana to ratou kia tauta i te akanoo ki roto i te aronga i raro ake i ta ratou utuutu anga?

¹⁸ Te aronga e mana to ratou i roto i te ngutuare tangata e i roto i te putuputuanga ka tau kia matakite tikai kia akatere i to ratou riri, i te mea ka akatupu te riri i te mataku kare i te aroa. Kua tuatua te peroveta ko Nahuma: “Kare a Iehova e rapurapu i te riri, te maata ra te mana.” (Nahuma 1:3; Kolosa 3:19) Ko te akatereanga tau i to tatou riri e akairo ia no te maroiroi, kareka ra ko te riri vave ua e akapapu anga i te tu paruparu. (Maseli 16:32) I roto i te pamiri e i roto i te putuputuanga, ko te akakoroanga kia akanoo i te aroa​—te aroa ia Iehova, te aroa tetai i tetai, e te inangaro i te au kaveinga tika. Ko te aroa te tatua maroiroi katoa no te taokotai anga e te akakeu anga maroiroi katoa ia no te raveanga i te mea tika ra.​—1 Korinetia 13:​8, 13; Kolosa 3:14.

19. Eaa te akapapuanga akapumaanaanga ta Iehova e oronga maira, e akapeea te akono tau na tatou?

¹⁹ Te kite ia Iehova ko te kite ia i tona mana ririnui. Kua tuatua a Iehova na roto ia Isaia: “Kare koe i kite? kare koe i akarongo? e mutu kore to te Atua ra, ko Iehova, ko tei anga i te enua e tae ua atu ki te openga ra; kare aia e paruparu, e kare oki e roiroi.” (Isaia 40:28) Kare e openga o to Iehova ra mana ririnui. E ka irinaki tatou kiaia e kare kia tatou uaorai, kare rava ia e akaruke ia tatou. Te akapapu maira aia kia tatou: “Auraka e mataku, te vaitata katoao au ia koe: auraka e taitaia, ko au oki toou Atua: e akamaroiroi au ia koe; koia ïa, e tauturu au ia koe; koia ïa, e mou au ia koe i toku rima katau tuatua tika ra.” (Isaia 41:10) Akapeea tatou me akono tau i tana utuutuanga aroa? Mei ia Iesu rai, e rave tamou marie tatou noatu eaa te mana ta Iehova e oronga mai kia tatou ei tauturu e ei patu ake ki runga. Kia akatere tatou i to tatou arero kia akaora te reira kare kia akakino. E kia vai ara ua tatou i te pae vaerua, kia tu ngaueue kore i te akarongo, e kia tupu maroiroi i te mana o Tei Anga Mekameka maira ia tatou, koia te Atua ko Iehova.​—1 Korinetia 16:13.

[Tataanga Rikiriki i Raro]

Ka Rauka Ainei ia Koe te Akataka?

• Akapeea ta Iehova ra taangaanga i tona mana ririnui?

• Na roto i teea au tu e raukai ia tatou kia akono i to Iehova ra mana ririnui?

• Akapeea te taangaanga tau i te mana ririnui o te arero ra?

• Akapeea te mana orongaia mai e te Atua ra e riro ei ei akameitakianga?

[Tutu i te kapi 15]

Kua taangaanga a Iesu i to Iehova maroiroi kia tauturu atu ia etai ke

[Au Tutu i te kapi 17]

Tei roto i to tatou mana te akakiteanga i te Tuatua a te Atua me tei roto to tatou ngakau i te reira