Eaa ra Ka Tatanu ei i te Tu Tika-meitaki?

I OU akenei kua neke atu tetai tangata Tiapani manga pakari ko Kunihito tona ingoa ki Marike.a I roto ua i nga mea epetoma i tona taeanga, kua aro atu aia i tetai turanga tei vaitata i te akakino i tona turanga angaanga. Te akakite ra a Kunihito: “I te ui anga mai toku akaaere kiaku me ka rauka iaku te akono i tetai apainga ke, kua irinaki papu au no te ariki atu i te reira. Inara, no te mea kua utuutuia mai mei te meangiti anga kia manako i te tu mako ei tu tika-meitaki, kua pau atu au: ‘Kare i papu iaku me ka rauka iaku te akono i te reira, inara ka tauta au i tei meitaki iaku.’ Ki toku akaaere Marike, kua tangi anga e kare au i papu tikai e kua ngere i te tu irinaki papu. I toku marama anga mai i te reira, kua kite mai au e te anoanoia ra au kia rave i te au akatikatika anga.”

E tamaine apii meitaki tikai a Maria, te noo ra i New York City, te reka ua ra i te tauturu i tona au oa apii. E taeake apii a Juan tei pati tauturu i tetai taime kia Maria. Inara kua akainangaro katoa aia iaia e kua tauta i te akamareka iaia. Noatu i tona anoano e kia vai akono meitaki tikai, kua tuku au a Maria ki ta Juan akainangaro anga e kua piri atu ki roto i te ainga tau kore.

Te akaarianga i te tu tika-meitaki i roto teia ao tuke te peu e te pikikaa i te pae o te tu akono tau e akaaoanga tikai ia. No reira eaa ra ka tatanu ei i te tu tika-meitaki? No te mea te akamareka ra te tu akono tika-meitaki i te Atua, papu e te anoano ra te maata anga ia tatou e kia rauka tona tu mareka anga.

Te raurau maira te Tuatua a te Atua, te Pipiria, i to te reira aronga tatau kia tatanu i te tu tika-meitaki. Ei akaraanga, kua tata te apotetoro ko Paulo: “Te vai ra tetai [tu tika-meitaki], te vai ra tetai mea paapaaia ra, e akamaara i taua au mea ra.” (Philipi 4:8, akaaite ia NW) E te aruaru maira te apotetoro ko Petero ia tatou kia ‘kapiti katoa to tatou akarongo ki te tu tika-meitaki.’ (2 Petero 1:5, akaaite ia NW) Inara eaa ra te tu tika-meitaki? Ka rauka ainei e kia apiiia te reira ki roto i te pia apii? Akapeea tatou me tatanu i te reira?

[Tataanga Rikiriki i Raro]