Ora No te Aronga Tei Iki i te Marama
“Ko Iehova toku mārama e toku ora: koai oki taku e mataku atu?”—SALAMO 27:1.
1. Eaa te au apinga oronga oraanga ta Iehova i maani?
KO IEHOVA te Tumu o te marama o te ra tei akariro e kia rauka te oraanga ki runga i te enua nei. (Genese 1:2, 14) Koia katoa oki Tei Anga mai i te marama pae vaerua, tei akakore atu i te poiri tei oronga mai i te mate o te ao o Satani. (Isaia 60:2; 2 Korinetia 4:6; Ephesia 5:8-11; 6:12) Te aronga tei iki i te marama ka tuatua ma te tata taramo: “Ko Iehova toku marama e toku ora: koai oki taku e mataku atu?” (Salamo 27:1a) Inara, mei tei tupu i to Iesu tuatau ra, ko te aronga tei iki i te poiri ka rauka anake kia tapapa atu i tetai akavaanga akaperepere koreia.—Ioane 1:9-11; 3:19-21, 36.
2. I te au tuatau i taito, eaa tei tupu ki te aronga tei kopae ke i te marama o Iehova e ki te aronga tei akarongo ra ki tana tuatua?
2 I to Isaia tuatau ra, kua kopae ke te maata anga o te au tangata koreromotu o Iehova i te marama. Ei tupuanga, kua kite atu a Isaia i te akapouanga o te patireia apatokerau o Iseraela ei iti tangata. I te 607 M.T.N., kua akapouia a Ierusalema e tona iero e te au tangata o Iuda kua riro atu ei tuikaa. Inara, ko te aronga tei akarongo atu ki te tuatua a Iehova kua akamaroiroiia kia arai atu i te apoteiti o taua tuatau ra. No runga i te 607 M.T.N., kua taputou a Iehova e ko te aronga tei akarongo atu kiaia ka ora ratou. (Ieremia 21:8, 9) I teia tuatau nei ko tatou tei anoano ra i te marama ka rauka kia kite maata mei te mea i tupu i reira ra.—Ephesia 5:5.
Te Mataora Anga o te Aronga i Roto i te Marama
3. I teia tuatau, eaa te irinakianga ka rauka ia tatou, eaa te “enua tuatua-tika” ta tatou e inangaro ra, e eaa te “oire ketaketa” tei rauka i taua “enua” ra?
3 “E oire ketaketa to tatou; ko te ora ta te Atua e akono, ei patu, e ei paruru. Ka eeu na kotou i te au pa, kia tomo mai te enua tuatua-tika, i tei tāpu i te tuatua mou ra, ki roto.” (Isaia 26:1, 2) Ko teia te au tuatua akateitei a te au tangata tei irinaki ra ia Iehova. Kua akara atura te au ngati Iuda tiratiratu i to Isaia tuatau ra kia Iehova, kare ki te au atua pikikaa o to ratou au tangata enua ra, ei Tumu tika anake no te tinamou. I teia tuatau, tei ia tatou katoa taua irinaki anga ra. Pera katoa, te inangaro ra tatou i to Iehova “enua tuatua-tika”—koia “te Iseraela o te Atua ra.” (Galatia 6:16; Mataio 21:43) Te inangaro katoa ra Iehova i teia iti tangata no te mea e akono tiratiratu ia. Ma tana akameitaki anga, e “oire ketaketa” te Iseraela o te Atua, e akaaerenga mei tetai oire tei turu e tei paruru ra i te reira.
4. Eaa te tu manako ka meitaki tatou i te tatanu?
4 Te aronga i roto i teia “oire” te kite ra e “ko tei ngaueue kore te manako ra, [ta Iehova] ia e tiaki, e ei au nuingangare tona, koia i irinaki ia [Iehova].” Te turu ra Iehova i te aronga tei irinaki ra iaia e te akono ra i tana au kaveinga tuatua tika. No reira, kua akarongo te aronga tiratiratu i Iuda ra i ta Isaia akamaroiroi anga: “E irinaki kotou ia Iehova e tuatau ua atu: ko Ia tika rai oki a Iehova, e Mato mutu kore ïa.” (Isaia 26:3, 4; Salamo 9:10; 37:3; Maseli 3:5) Taua aronga ma te reira akanooanga manako te akara atura ‘Ia Iehova’ ei Mato tinamou anake. Te rekareka ra ratou i te “au nuingangare” ma ia katoa.—Philipi 1:2; 4:6, 7.
Akaaka Anga no to te Atua Au Enemi
5, 6. (a) Akapeea te taakaaka anga ia Babulonia i taito ra? (e) Na roto i teea tu to Babulonia Maata akataakaaka angaia?
5 Ka akapeea me ka mamae te aronga irinaki ia Iehova ra i te tumatetenga? Kare ratou e tau kia mataku. Te tuku ra Iehova i taua au apinga ra kia tupu no tetai tuatau, inara i te openga ka apai mai aia i te akaora anga, e ko te aronga akatupu i taua mate ra ka aro atu i tana akavaanga. (2 Tesalonia 1:4-7; 2 Timoteo 1:8-10) E akamanako ana i te turanga o tetai “oire teitei ra.” Kua tuatua Isaia: “Kua taakaaka oki [a Iehova] i te aronga nooanga teitei: te oire teitei ra, ko tana ia i tuku ki raro; kua tuku aia i te reira ki raro rava i te one; kua akaarite aia i te reira ki te one-pueu. E takatakaiia te reira e te vaevae; te vaevae o te aronga ao, te tapuvae o te aronga apinga kore.” (Isaia 26:5, 6) Penei te oire teitei tei taikuia ra i konei ko Babulonia ia. Kua takinga kino tikai taua oire ra i te au tangata o te Atua. Inara eaa tei tupu kia Babulonia? I te 539 M.T.N., kua topa ia ki to Madai e to Peresia. Mei teaa ra tetai taakaaka anga!
6 I to tatou tuatau nei te akataka meitaki maira te au tuatua totou a Isaia i tei tupu kia “Babulonia Maata” mei te 1919 mairai. Kua mamae taua oire akateiteiia ra i tetai topa anga taakaaka i taua mataiti ra i tona opara angaia kia akamatara mai i te au tangata o Iehova mei te tuikaa anga pae vaerua. (Apokalupo 14:8) Tei tupu i muri akera e maata atu te taakaaka anga. Kua ariu atu taua pupu Kerititiano meangiti ra kua ‘takatakai atu ki raro’ i tei akatuikaa taito ra ia ratou. I te 1922 kua akamata ratou i te akakite i te openga o Kerititome te aere maira, ma te akakitekite anga i te akatangi anga pu a nga angera e a o Apokalupo 8:7-12 e nga aueanga e toru tei akakiteia maira ia Apokalupo 9:1–11:15.
“E Aerenga Tiratiratu to te Aronga Tuatua Tika”
7. Eaa te aratakianga te rauka ra i te aronga tei ariu atu ki te marama a Iehova, koai ta ratou e manakonako ra, e eaa ta ratou e akaperepere ra?
7 Te oronga ra Iehova i te ora no te aronga tei ariu atu ki tona marama, e kua arataki aia i to ratou arataa, mei ta Isaia i akakite maira: “E aerenga tiratiratu to te aronga tuatua-tika; kua akatikaoru ua koe, e Tei Tika e, i te aerenga o te aronga tuatua-tika. Tei te arataa o taau ra tuatua-tau matou, e Iehova e, i te tapapa anga ia koe; i toou ra ingoa, e kia akamaara matou ia koe ra, ko te inangaro ïa o to matou vaerua.” (Isaia 26:7, 8) E Atua tuatua tika a Iehova, e ko te aronga e akamori iaia ka tika kia akono i tana au turanga tuatua tika. Me rave ratou i te reira, ka arataki a Iehova ia ratou, ma te akamaneaanga i to ratou aerenga. Na te akonoanga i tana aratakianga, ka akaari teia aronga akaaka e te manakonako ra ratou ia Iehova e te akaperepere ra i tona ingoa ma te ngakau katoa—ko tona ia “akakite.”—Exodo 3:15.
8. Eaa te tu akono tau ta Isaia i akaari?
8 Kua akaperepere a Isaia i te ingoa o Iehova. Te kitea ra te reira mei tana au tuatua i aru maira: “Taku vaerua tei inangaro ia koe i te po ra; koia ïa, ko taku vaerua i roto roa ra tei kimi ia koe i te popongi roa ra; kia kitea taau au tuatua-tau i te enua nei; te apii ra to te ao nei i te tuatua-tika i reira.” (Isaia 26:9) Kua inangaro a Isaia ia Iehova ‘ma tona vaerua katoa’—ma tona ora anga tangata katoa oki. E akamanako atu i te peroveta e rave ra i te tuatau kare e turituri i te po kia pure kia Iehova, ma te akakiteanga i tona au manako oonu e te kimi akatenga anga i ta Iehova ra aratakianga. Mei teaa ra tetai akatauanga meitaki! Pera katoa, kua apii a Isaia i te tuatua tika mei te au angaanga akavaanga a Iehova ra. Na teianei kua akamaara mai aia ia tatou i te umuumu anga no te matakite tamou marie, kia matariki i te kite i to Iehova ra anoano.
Kua Iki Tetai Papaki i te Poiri
9, 10. Eaa te au angaanga takinga meitaki ta Iehova i rave ki tona iti tangata tiratiratu kore, inara akapeea ratou i te ariu atu anga ki te reira?
9 Kua akaari a Iehova i te aroa takinga meitaki kia Iuda, inara e mea reka kore kare ko te katoa tei akarongo atu. E putuputu te taime, kua iki te maata anga kia meameaau e kia rave apoteiti kare i akono i te marama o te tuatua mou a Iehova. Kua tuatua Isaia: “Kia akaperepereia te tangata kino, kare aia e apii i te tuatua-tika: ei te enua tiratiratu ra aia e rave ei i te tuatua-tka kore, kare rai aia e akono i te tapunui o Iehova.”—Isaia 26:10.
10 I te tuatau ia Isaia i te paruru anga te rima o Iehova ia Iuda i tona au enemi, kua patoi te maata anga i te kite i teia. I tana akameitakianga ia ratou ma tona au, kare taua iti tangata ra i akaari i te akameitakianga. No reira, kua akaruke atu a Iehova ia ratou kia tavini i ‘etai au pu ke atu,’ i te openga kua tuku atu i te au ngati Iuda ra kia tuikaaia ki Babulonia i te 607 M.T.N. (Isaia 26:11-13) Inara, i te openga ko tetai toenga o taua iti tangata ra tei oki akaou mai ki to ratou enua kainga i muri ake i te papa angaia.
11, 12. (a) Eaa te tuatau ki mua tei rauka i te aronga akatuikaa ra i to Iuda? (e) I te 1919 eaa te tuatau ki mua tei vai mai no tei akatuikaa i te au tavini akatainuia o Iehova i mua akera?
11 Akapeea oki te aronga i akatuikaaia ra o Iuda? Kua pau totou atura Isaia: “Kua mate ratou, kare rava e ora; e turama anake ra, kare ratou e tu mai ki runga: kua tiki mai oki koe, e kua rave akamate roaia ratou; e kua akakore roa koe i te manako anga ia ratou.” (Isaia 26:14) Ae, i muri ake i tona topa anga i te 539 M.T.N., kare o Babulonia tuatau ki mua. I muri akera, kare ua taua oire ra. Kua riro ia ‘kia ora kore i te mate,’ e ko tona patireia maata kua tukuia ki roto i te au puka tuatua enua. Mei teaa ra tetai akamatakiteanga no te aronga tei manakonako ra i te aronga ririnui o teianei ao!
12 Te au tuanga o teianei totou kua akatupuia i ta te Atua ra tuku anga i tona au tavini akatainuia kia o ki roto i te tuikaa anga i te pae vaerua i te 1918 e kua tataraia mai ratou i reira i te 1919. Mei reira mairai, ko te tuatau ki mua o tei akatuikaa ra ia ratou i mua akera, ko Kerititome tei maata ra, kua poiri ia. Inara ko te au akameitakianga te vaira no te au tangata o Iehova ra kua apinganui tikai ia.
“Kua Akamaata Koe i te Enua Nei”
13, 14. Eaa te au akameitakianga apinganui tei rekarekaia e te au tavini akatainuia o Iehova mei te 1919?
13 Kua akameitaki te Atua i te vaerua tataraara o tona au tavini akatainuia ra i te 1919 e kua oronga i te tupuanga kia maata kia ratou. Te mea mua, kua raveia te akaputuanga i te au mema openga o te Iseraela o te Atua ra, e i reira ko “tetai aronga maata rava” no te “au mamoe ke atu” kua akamataia te akaputu angaia. (Apokalupo 7:9; Ioane 10:16) Kua akakiteia mai teianei au akameitakianga i ta Isaia totou ra: “Kua akamaata koe i te enua nei, e Iehova e, kua akamaata koe i te enua nei: kua akakakāia koe: kua akaatea koe i te au kotinga katoa o te enua nei. E Iehova e, i te pini anga ra to ratou kimi anga ia koe ra; kua pati ratou ma te taakaaka ra i reira, te iri ra te ako naau ki runga ia ratou.”—Isaia 26:15, 16.
14 I teia tuatau, kua totoa te au kotinga o te Iseraela o te Atua ra kia koropini te enua katoa nei, e ko te urupu maata tei kapitiia atura i teianei kua tae ki etai ono mirioni aronga maroiroi i te angaanga tutuanga i te tuatua meitaki. (Mataio 24:14) Mei teaa ra tetai akameitakianga mei ko mai ia Iehova ra! E mei teaa ra te kaka ta teia i apai mai ki tona ingoa! Te akarongoia ra taua ingoa ra i teia tuatau i roto i te 235 enua—ko tetai akatupu anga umere ia i tana taputou ra.
15. Eaa te tuakaouanga akatutuia tei rokoia i te 1919?
15 Kua umuumu a Iuda i ta Iehova tauturu kia orai mei te tuikaa anga i Babulonia. Kare e rauka ia ratou uaorai ma te kore e tauturu. (Isaia 26:17, 18) Mei te reira katoa, te matara anga mai te Iseraela o te Atua i te 1919 e akapapu anga i ta Iehova turu anga. Kare te reira e tupu ua me kare aia. E no te poitirere ua te taui anga i to ratou turanga e kua akaaite atura Isaia i te reira ki tetai tuakaouanga: “Toou ra aronga mate, e ora ïa, to ratou kopapa mate, e tu akaou ïa: e ara, e imene, e tei noo ki te one-pueu: mei te au o te ngangaere ra, toou ra au, ka akapuaki mai oki te enua i te aronga i mate ra.” (Isaia 26:19; Apokalupo 11:7-11) Ae, ko te aronga mate ra, mei tera te tu, ka anau akaouia no tetai angaanga akaouia!
Paruru Anga i te Au Tuatau Kino
16, 17. (a) I te 539 M.T.N., eaa ta te au ngati Iuda i tau kia rave e orai i te topa anga o Babulonia? (e) Te akara anga, eaa ra te “au pia ra” i teia tuatau, e akapeea ratou i te akapuapinga anga ia tatou?
16 Te umuumu ua ra te au tavini a Iehova i tana paruru anga. Inara, kare e roaia, ka totoa mai tona rima no te tuatau openga ki te ao o Satani, e ka umuumu tona aronga akamori i tana tauturu anga e kare i aiteia i mua ana. (1 Ioane 5:19) No taua tuatau kino ra, te akamatakite maira Iehova ia tatou: “E aere mai, e taku iti-tangata e, e tomo ki roto i to au pia ra, e topiri marie i toou au pa ia koe: e pipini ei koe i tetai manga tuatau iti kia okotai ake kamoanga mata, kia ngaro ke atu taua riri otooto nei. I na oki, te aere mairā Iehova mei tona ra ngai, e tutaki i to te enua nei i ta ratou ara; e na te enua e akakite mai i te toto i roto iaia ra, e kare oki aia e tapoki akaou i tona au tangata i taia ra.” (Isaia 26:20, 21; Zephania 1:14) Kua akaari teia akamatakiteanga ki te au ngati Iuda e akapeea e oraʼi i te topa anga a Babulonia i te 539 M.T.N. Te aronga tei akarongo i te reira kua noo ki roto i to ratou au are, kua ora atu mei te au vaeau te tamaki maira i vao i te au arataa.
17 I teia tuatau te “au pia ra” o taua totou ra penei ko te au putuputuanga e rau ngauru ua atu au tauatini no te au tangata o Iehova takapini te ao nei. Ko taua au putuputuanga ra e paruru anga noatu i teianei, ko tetai ngai e kiteai e te au Kerititiano te akapuanga i roto i to ratou au taeake, i raro ake i te utuutu anga aroa a te aronga pakari. (Isaia 32:1, 2; Ebera 10:24, 25) Ko te tika teianei i te mea te vaitata nei te openga o teianei akatereanga o te au mea nei no te mea tei runga te ora anga i te akarongo anga.—Zephania 2:3.
18. Akapeea a Iehova me ‘ta i te taae i raro i te moana’ kare e roaia?
18 No taua tuatau ra, te totou ra Isaia: “Kia tae ki taua rā ra e tutaki ei a Iehova, kite koke māro, e te maata, e te pakari, nona ra, ia Leviatana, i te ovi rere ra, e ia Leviatana, te ovi mingimingi ra, e ka ta oki aia i te taae i raro i te moana ra.” (Isaia 27:1) Eaa te “Leviatana” o teia tuatau? I te akaraanga, ko “taua ovi taito ra,” ko Satani uaorai, kapiti katoa ma tana akatereanga kino o te au mea nei, tana e taangaanga ra i te tamakianga i te Iseraela o te Atua ra. (Apokalupo 12:9, 10, 17; 13:14, 16, 17) I te 1919, kua kore ta Leviatana mou anga ki runga i te au tangata o te Atua ra. A muri akenei, ka ngaro takiri atu aia. (Apokalupo 19:19-21; 20:1-3, 10) Na reira, ka ‘ta a Iehova i te taae i raro i te moana.’ I teianei, kare e apinga ta Leviatana e tauta kia rave ki te au tangata o Iehova ra te ka autu. (Isaia 54:17) Mei teaa ra te akapumaana anga a taua akapapu anga!
“I te Kainga Vine i Akaperepereia”
19. Eaa te turanga o te toenga i teia tuatau?
19 I te manakoanga no teianei marama katoa mei ko mai ia Iehova ra, kare ainei ia tatou te au tumu ravarai kia rekareka? Ae, tikai! Kua akataka manea maira Isaia i te rekareka o te au tangata o Iehova ra i tana tataanga: “I te reira rā, i te kainga vine i akaperepereia nei, e peʼe kotou: Ko au, ko Iehova, e tiaki iaia nei: e tamauu au iaia ki te vai kare e tukua: e tiaki au iaia i te po e te ao nei, kia kore e rave kinoia.” (Isaia 27:2, 3) Kua tiaki a Iehova i tana “kainga vine,” te toenga o te Iseraela o te Atua, e no to ratou au oa rave angaanga maata ra. (Ioane 15:1-8) Te tupu anga e uua anga tei apai maira i te kaka ki tona ingoa e te akatupu ra i te rekareka anga maata i roto i tona au tavini i runga i te enua nei.
20. Akapeea ta Iehova paruru anga i te putuputuanga Kerititiano?
20 Ka rauka kia mareka tatou e ko to Iehova riri i mua akera ki tona au tavini akatainuia—no reira aia i tuku ei ia ratou kia aere ki roto i te tuikaa anga pae vaerua i te 1918—kua akamutuia. Na Iehova uaorai i tuatua: “Kare e makitakita o roto iaku: naringa e tamaki ta tatou ko te rakau taratara e te tataramoa! e oro pu ua atu au ki runga i te reira, e ka kapipiti katoa ïa iaku. Kia opu ra tetai iaku ei akapuanga, ka ongi mai aia iaku; ka ongi mairai aia iaku.” (Isaia 27:4, 5) Kia papu e ka tupu ua atu tana au vine i te au ua maata o te “vine i akaperepereia,” ka akapueu rikiriki a Iehova e ka akapou atu i tetai ua atu mana mei te teita rai te ka taviivii ia ratou ra. No reira, auraka tetai e akakino i te tu meitaki o te putuputuanga Kerititiano ra! ‘Kia mou te katoatoa i te punanga ketaketa o Iehova,’ i te kimianga i tana akaperepere anga e te paruru anga. I te raveanga i te reira ka ongi tatou i te Atua ma te au—ko tetai apinga puapinga maata ia kua taikuia mai e Isaia e rua taime.—Salamo 85:1, 2, 8; Roma 5:1.
21. Na roto i teea tu i kapi ei te enua katoa i te “ua”?
21 Te tupu ua atura te au akameitakianga: “I te au rā a muri atu e toro ei te aka o Iakoba: e kao oki Iseraela, e e pua oki, e kapi te enua katoa nei i tona ua.” (Isaia 27:6) Kua tupu teianei irava i te 1919 mairai, i te oronga anga mai i te akakiteanga meitaki i to Iehova ra mana. Kua ki te enua i te “ua” o te au Kerititiano akatainuia ra, te kai vaerua akamatutu ra. I roto i tetai ao viivii, te akono rekareka ra ratou i te au turanga akateiteiia a te Atua. E te rave ua atura Iehova i te akameitaki ia ratou ma te tupuanga maata. Ei tupu anga, to ratou au oa e au mirioni ua atu, te au mamoe ke ra, “e i akamori ei ratou [i te Atua] i te po e te ao.” (Apokalupo 7:15) Auraka tatou e manako kore i te tuanga mekameka no te kainga i te “ua” e te tua anga i te reira ma etai atura!
22. Eaa te au akameitakianga te aere maira ki te aronga ariki i te marama?
22 I teianei tuatau kino, te tapokiia nei te enua i te poiri e te au tangata i te poiri tangotango ra kare ainei tatou e akameitaki ana e kua akaiti maira Iehova i te marama pae vaerua ki runga i tona au tangata? (Isaia 60:2; Roma 2:19; 13:12) No te aronga katoatoa tei ariki ra i te reira, ko te aiteanga o taua marama ra e au no te manako e te rekareka i teianei e noatu ko te ora anga mutu kore i te tuatau ki mua. Ma te tumu meitaki, i reira, ko tatou tei inangaro ra i te marama ka taaki i to tatou au ngakau ki runga i te akapaapaa anga kia Iehova e te tuatua anga ma te tata taramo ra: “Ko Iehova te maroiroi o toku ora; e mataku oki au iaai? Tiaki ia Iehova: e akamaroiroi; e nana e akamaroiroi mai i to ngakau ra: e tenana e tiaki rai koe ia Iehova.”—Salamo 27:1e, 14.
Maara Ainei ia Koe?
• Eaa te tuatau ki mua te vaira no te aronga takinga kino i te au tangata o Iehova?
• Eaa te tupuanga maata te totouia maira ia Isaia?
• Ki roto i teaa “au pia ra” ka tau tatou kia noo, e no teaa ra?
• Eaa ra te turanga o te au tangata o Iehova i apai mai ei i te akapaapaa anga kiaia?
[Pia i te kapi 22]
TETAI PUKA OU
Te maata anga o te akakite anga tei uriuriia i roto i teia nga atikara no te apiianga e rua kua orongaia ei tuatua akoanga i te porokaramu uruoaanga tapere no te 2000/2001. I te openga o taua tuatua ra, kua orongaia mai tetai puka ou, tei tapaia e ko ta Isaiah’s Prophecy—Light for All Mankind I. I roto i teianei puka e 416 kapi te vaira te uriurianga manako no te 40 pene mua o te puka a Isaia.
[Tutu i te kapi 18]
Ko te aronga tuatua tika ua te ka akatikaia ki roto i to Iehova “oire ketaketa,” tana akaaerenga
[Tutu i te kapi 19]
Kua kimi a Isaia ia Iehova “i te po”
[Tutu i te kapi 21]
Paruru a Iehova i tana “kainga vine” e te akauua ra i te reira