Akarongo​—E Apiianga Puapinga Ainei mei te Tamariki Anga?

“INANGARO te Au Metua i te Au Tu Tataki tai, Kare i te Au Tamariki Akarongo Ua.” I na tetai upoko tuatua ei o tetai nutipepa. Kua akanooia teia manga ngai o te ripotianga ki runga i te au tupuanga o tetai tareanga tei raveia i Nu Tireni, tei akakite mai e “22 patene [ua] o te aronga i pau mai kua manako e kia apiipiiia te akarongo ki te tamariki i te kainga.” Kua kitea katoaia e te tareanga e te irinaki ra te au metua i teia tuatau e mea puapinga maata i te apiipii ki te tamariki i te au tu meitaki, te manako takake, e te apainga.

I roto i teia tuatau manako ua i tetai e te inangaro-uaorai, kare i te mea poitirere e te ekoko ra te maata anga o te tangata no te akarongo e kia apiiia te reira ki te tamariki. Inara kia manako uaia ainei te akarongo mei te tamariki anga e ko tetai apinga taito ia e kare e tau? Me kare tei roto ainei te reira i te au apiianga puapinga ka rauka i te tamariki i te apii e kia puapinga mei te reira? Tei puapinga maata atu, eaa to te Atua ko Iehova manako, Tei Akamata mai i te akapapaanga pamiri, no runga i te akarongo i te au metua, e eaa ra tetai o te au puapinga te tupu maira mei te akarongo?​—Angaanga 17:28; Ephesia 3:​14, 15.

“E Tuatua-Tika Oki te Reira”

Ki te putuputuanga Kerititiano o te anere mataiti mua i Ephesia, kua tata atu te apotetoro ko Paulo: “E te au tamariki ra, e akarongo atu i to kotou au metua i tei tau i te Atu ra; e tuatua-tika oki te reira.” (Ephesia 6:1) No reira, ko te tumu maata no taua akarongo koia oki e te rotai ra te reira ma te turanga tu-Atua o te mea tika. Mei ta Paulo i taiku ra, “e tuatua-tika oki te reira.”

Te aru anga i teia, ka kite tatou e teakataka maira ta te Atua Tuatua i te akoanga a nga metua ma te aroa ei apinga akamanea, e “pare manea ki runga i to upoko ra, e ei pirianganaoa auro ki runga i to kaki na,” e e apinga “mareka te reira na te Atu.” (Maseli 1:​8, 9; Kolosa 3:20) Ei tuke anga, te akatupu ra te akarongo kore ki nga metua i te mareka tau kore tu-Atua.​—Roma 1:​30, 32.

“Kia Meitaki Koe”

Kua taiku a Paulo i tetai puapinga o te akarongo i te tataanga aia: “‘E akangateitei i to metua tane e to metua vaine;’ (ko te akauenga muatangana ïa i paʼuia i te meitaki i akakiteia mai;) ‘Kia meitaki koe, e kia akaroaia toou puke rā i te enua nei.’” (Ephesia 6:​2, 3; Exodo 20:12) Na roto i teea au mataara e riro ei te akarongo anga ki te au metua i te akatupu i te tu meitaki ki tetai?

Ei akamata anga, kare ainei i te tika e kua rauka i nga metua te pakari anga e te kite? Noatu i te akaraanga e penei kare ratou i kite maata no runga i te au komopiuta me kare tetai atu au apii ke te apiiia ra i te apii, e kite maata ra to ratou no runga i te oraanga e te autuanga i te au manamanata o te oraanga. Ko te mapu, i tetai tua, te ngere ra i te manako parani te tupu maira mei te kite karape. No reira, te viviki ra ratou i te iki ua i tetai apinga, i te maata anga o te taime te tuku au ra ki te taomianga taeake, te ka takinga kino ia ratou uaorai. Ma te tika tikai, te karanga ra te Pipiria: “Kua mou rava te neneva ki roto i te ngakau o te tamariki.” Eaa i reira te rapakau anga? “Na te pāpā ra, na te ako, e akataka ke atu iaia.”​—Maseli 22:15.

Te au puapinga o te akarongo te tupu ra kare ua i roto i te pirianga o te au metua e te tamariki. No tetai taiate tangata kia angaanga maru ua e kia tere meitaki, kia vai te taokotai anga, aru mai i te reira te umuumuia ra te akarongo. Ei akaraanga, i roto i te akaipoipo anga, e mea puareinga i te tuku ua atu, kare e ka maro atu e te manako kore ra i te au tika anga e te manako ngakau o tetai, te tupu maira ki roto i te au, te rotaianga, e te mataora. I roto i te ngai angaanga, te umuumuia ra te aronga angaanga kia kauraro e manuiai tetai ua atu pitiniti. I te kapiti anga atu ki te au ture e te arairai anga a te au kavamani, kare anake te akarongo e akarangatira i tetai mei te utunga pera katoa te apai maira i te meitaki e te paruru anga.​—Roma 13:​1-7; Ephesia 5:​21-25; 6:​5-8.

Ko te au mapu tei akarongo kore i te mana akaaere kua riro putuputu mai ei aronga akono kore i roto i te taiate tangata. Ei tuke anga, te apiianga i te akarongo te apiipiiia ra mei te tamariki anga mai ka totoa puapinga ua i roto i to tetai oraanga. Mei teaa ra te meitaki no te apii i teia mei te tamariki anga mai!

Te Tutaki Anga Maata no te Akarongo

Kare anake te akarongo e apai mai i te au pirianga mataora i roto i te pamiri e tetai atu au puapinga mutu kore pera katoa te oronga maira i tetai tumu anga e i runga i te reira ka patuia tetai pirianga puapinga roa atu​—i rotopu i tetai tangata e Tei Anga iaia. E ko “Tei anga” tei iaia te “tumu o te ora,” kua tau tikai ki te Atua ko Iehova to tatou akarongo pu tikai.​—Koheleta 12:1; Salamo 36:9.

Te tuatua “akarongo” i roto i to te reira au tu tukeke te mama maira e maata atu i te 160 taime i roto i te Pipiria. Kapiti mai, te vaira e au anere ua atu taiku anga ki ta te Atua au ture, te au ota, te au akauenga, te au ikianga akavaanga, e te au arairai anga, pouroa te reira te anoano ra i te kauraro anga. Kare e ekoko anga e te manako ra te Atua i te akarongo ei umuumu anga no te rekareka anga i tona tu mareka anga. Ae, e umuumu anga puapinga te akarongo no te patuanga i tetai pirianga kia Iehova. (1 Samuela 15:22) Ma te maromaroa, ko te tu matau ua o te tangata koia oki kare ko te akarongo mari ra ko te akarongo kore. “Kino uaorai te manako o te ngakau tangata mei tona tamariki mea riki anga mai,” i na te Pipiria ei. (Genese 8:21) No reira, te apiianga o te akarongo ka tau kia apiipiiia kare ua mei te tamariki anga mai pera katoa i roto i te oraanga. Te raveanga i te reira te apai maira i tetai tutaki anga maata.

Kia akamaara, mei tei taikuia e te apotetoro ko Paulo, te akauenga e kia akarongo i nga metua te aere maira ma te taputou anga e rua, koia oki, “kia meitaki koe, e kia akaroaia toou puke rā i te enua nei.” Ka kitea tetai akapapu anga o teia taputou ia Maseli 3:​1, 2: “E taku tamaiti, auraka e akangaropoina i taku nei ture; e kia akono marie toou ngakau i taku nei au akauenga: E au rā roa oki, e te au mataiti roa, e te au, ta te reira e kapiti katoa mai kia koe ra.” Ko te tutaki anga maata no te aronga tei akarongo koia oki ko tetai pirianga uaorai kia Iehova i teianei e te oraanga mutu kore i roto i tetai ao ou ma te au tikai.​—Apokalupo 21:​3, 4.

[Au Tutu i te kapi 31]

Apai mai te akarongo i te au pirianga mataora i roto i te pamiri, te ngai angaanga, e ma Iehova