“Na Iehova te Meitaki i Apingaʼi te Apinga”

POUROA tatou te anoano ra e kia akameitakiia. Te akakite ra The American Heritage College Dictionary e te akamaata ra te au akameitakianga i te “tu mataora, te tu oraanga meitaki, me kare te puapinga anga.” I te mea e ko Iehova Tei Oronga i te ‘au mea memeitaki e te au mea tika ravarai,’ te aere maira te au akameitakianga mutu kore e te tika tikai mei Tei Anga aroa mai ia tatou. (Iakobo 1:17) Te akamaringi maira aia i te au akameitakianga ki runga i te au tangata ravarai, pera katoa i te au tangata kare i kite iaia. Kua tuatua a Iesu no tona Metua: “Te akaiti nei aia i tona rā ki rungao i te kino e te meitaki, e te akatopa mai nei aia i te ua ki runga i te tangata tuatua-tika e te tangata tuatua-tika kore.” (Mataio 5:45) Inara, te akaari ra a Iehova i te manako takake no te aronga te inangaro ra iaia.​—Deuteronomi 28:​1-14; Iobu 1:1; 42:12.

Kua tata te tata taramo: “Kare rava ona meitaki e tāpu i te aronga aerenga tiratiratu ra.” (Salamo 84:11) Ae, ko te aronga te tavini ra ia Iehova e au oraanga apinganui e te puapinga tikai to ratou. Kua kite ratou e “na Iehova te meitaki i apingaʼi te apinga, kare oki e kapiti katoaia mai te kino i te reira.” Te akakite katoa ra te Pipiria: “Ko tei akameitakiia oki e [Iehova] ra, ka riro ia ratou te enua.” (Maseli 10:22; Salamo 37:​22, 29) Mei teaa atura te akameitaki anga!

Akapeea e raukai ia tatou ta Iehova akameitakianga? Te mea mua, ka anoanoia tatou kia tatanu i te au tu te akamareka ra iaia. (Deuteronomi 30:​16, 19, 20; Mika 6:8) Ka kite tatou i teia i roto i te akaraanga o nga tavini e toru o Iehova i te tuatau taito ra.

Akameitaki a Iehova i Tona Au Tavini

E tavini meitaki tikai a Noa no te Atua. Ia Genese 6:8, ka tatau tatou: “Karekā Noa, i kite aroaia mai aia e Iehova ra.” No teaa ra? No te mea kua kauraro a Noa. Te na ko ra te tataanga: “Kua aaere a Noa raua ko te Atua.” Kua akono a Noa i ta Iehova au turanga tuatua tika e kua akarongo i tana au akauenga. I tetai tuatau i topa oonu atu ei te ao ki roto i te rave anga takinga kino e te tau kore, kua akakeuia a Noa kia ‘pera oki i te au mea katoa ta te Atua i akaue mai iaia ra, ko tana ïa i rave marie.’ (Genese 6:​9, 22) Tei tupu mai, kua akaue atura a Iehova iaia kia tarai “i te pai, kia ora [to Noa] ngutuare.” (Ebera 11:7) Na teia mataara, a Noa e tona ngutuare​—na roto ia ratou te au tangata ravarai​—i orai i te akapou anga o taua uki ra. E kua mate atura a Noa ma te manakonakoanga kia akatuakaouia mai ki tetai oraanga mutu kore ki runga i tetai parataito i te enua ra. Mei teaa ra te akameitakianga apinganui tei rauka iaia!

Kua rauka katoa ia Aberahama te au tu tei akamareka ra ia Iehova. Ko tei maata i roto i teia ko te akarongo. (Ebera 11:​8-10) Kua akaruke a Aberahama i tetai oraanga meitaki i Ura e i muri mai i Harana no te mea kua rauka iaia te akarongo i roto i ta Iehova au taputou e ka manganui tona uanga e ka riro ei akameitakianga ki te au pa enua ravarai. (Genese 12:​2, 3) Noatu te au mataiti roa o te timataanga, kua tutakiia tona akarongo i te anau angaia mai tana tamaiti ko Isaaka. Na roto iaia, kua riro mai a Aberahama ei tupuna no te iti tangata ikiia e te Atua, a Iseraela, e i te openga ra o te Mesia. (Roma 4:​19-21) Pera katoa, kua riro aia “ei metua no te peritome kore ravarai i akarongo ra,” e kua tapaia aia ei “oa no te Atua.” (Roma 4:11; Iakobo 2:23; Galatia 3:​7, 29) Mei teaa te puapinga o tona oraanga, e kua akameitaki maataia aia!

Ka akamanako katoa i te tangata tiratiratu ko Mose. Ko tei meitaki rava i tona au tu ko te ariki anga i te au mea pae vaerua. Kua kopae a Mose i te au apinganui ravarai o Aiphiti e “i maroiroi rava atura aia i te akara anga atu iaia, i tei kore e kitea kia akara ra.” (Ebera 11:27) I muri ake i te 40 mataiti i Midiana, kua oki akaou atu aia ki Aiphiti ei tangata ruaine e kua tu mataku kore ki mua i te mana teitei roa atu o taua tuatau ra, ko Pharao, no te maro i te akamatara anga o tona au taeake. (Exodo 7:​1-7) Kua kite atu aia i te au maki mate ngauru, te maveteanga o te Tai Muramura, e te akapou anga o te vaeau o Pharao. Kua taangaanga a Iehova iaia kia oronga i te Ture ki to Iseraela e kia akamaaraara i Tana koreromotu ma taua iti tangata ou ra. E 40 mataiti, i to Mose arataki anga i te iti tangata Iseraela i roto i te metepara. Kua ki tona oraanga i te akakoroanga tika tikai, e kua rekareka aia i te au akameitakianga apinganui roa o te angaanga anga.

Au Akameitakianga o Teia Tuatau

Te akatutu mai nei teia au tataanga e ko te au oraanga o te aronga tei tavini ra i te Atua e mea puapinga tikai. I te iti tangata o Iehova e tatanu ra i taua au tu mei te kauraro anga, te akarongo, e te ariki anga i te au mea pae vaerua, te akameitaki maataia ra ratou.

Akapeea tatou i te akameitaki angaia? Koi mamae ei te au mirioni i roto ia Kerititome i te onge i te pae vaerua, ka ‘maringi ua mai te takinga-meitaki a Iehova’ ki runga ia tatou. (Ieremia 31:12) Na roto ia Iesu Karaiti e “te au tavini akono meitaki e te pakari,” kua oronga mai a Iehova i te au kai pae vaerua ma te maata tikai te tauturu nei ia tatou kia vai ki runga i “te ara, e tae atu ei ki te ora.” (Mataio 7:​13, 14; 24:45; Ioane 17:3) Te kapiti anga ma to tatou taokotai anga taeake Kerititiano ko tetai atu ia akameitakianga apinganui. I te au uipaanga e i tetai atu au atianga, i te kapiti anga ma te au taeake akamori te akatutu ra i to ratou inangaro e te tauta pakari ra kia “akatangata ou” e tumu ia no te mataora maata. (Kolosa 3:​8-10; Salamo 133:1) Inara, ko ta tatou akameitakianga maata roa atu koia oki ko te akameitaki anga akaperepere no te rauka anga tetai pirianga ma te Atua ko Iehova e no te aruanga i te au takainga o tana Tamaiti, ko Iesu Karaiti.​—Roma 5:​1, 8; Philipi 3:8.

Te akamanakoanga no runga i taua au akameitakianga, ka kite tatou e mei teaa te puapinga o ta tatou angaanga ki te Atua ra. Penei te manako ra tatou i ta Iesu parapore o te tangata okooko tei kimi i te au poe meitaki roa atu. Kua tuatua a Iesu no teia tangata: “E kitea iora e ia tetai poe meitaki maata roa ra, aere atura aia, oko atura i te au apinga katoa nana ra, oko atura i taua poe ra.” (Mataio 13:46) Papu e akapera oki tatou i te manako anga no runga i to tatou pirianga ma te Atua, ta tatou akameitaki anga no te tavini anga iaia, to tatou kapiti anga Kerititiano, to tatou manakonakoanga Kerititiano, e tetai atu au akameitakianga te kapiti atura ki to tatou akarongo. Kare e apinga puapinga roa atu i roto i to tatou au oraanga.

E Oronga Atu kia Iehova

No te mea kua kite oki tatou ia Iehova e ko Tei Oronga ra i te mea memeitaki ra, te akakeuia ra to tatou ngakau kia akakite i te tu ariki anga no te au akameitakianga tei rauka ia tatou. Akapeea e raukai ia tatou i te rave i te reira? Ko tetai mataara na te tauturu anga i tetai atu kia rekareka i teia au akameitakianga. (Mataio 28:19) E tere atu i te 230 enua, te maroiroi nei te Au Kite o Iehova i te atoro atu i to ratou aronga i te pae mai kia rave i te reira. Ia ratou e pera ra, te akapou ra ratou i ta ratou au mea​—te ora, te maroiroi, e te au apinga materia​—kia tauturu i tetai atu kia “rauka te kite i te tuatua-mou.”​—1 Timoteo 2:4.

Ka akamanako ana i te au painia e noo ra i Glendale, California, U.S.A. I te au popongi Maanakai, e teretere ana raua e 100 kiro mita ki te are auri. Noatu kare e rauka ia ratou i te akapou maata atu i te ora i roto i te atoro anga i te aronga mouauri, kare ratou i akamaroiroi koreia. Te na ko maira tetai ia ratou: “E mea puapinga tikai i te tavini i roto i teia tuanga o te angaanga tuke ua atu. Te rave nei matou i teia ma te rekareka maata. E maata ta matou aronga inangaro e te ngata nei ia matou i te akono atu. I teianei, te apii nei matou ma te au tangata e rima, e kua pati mai etai no tetai apii Pipiria.”

Te mataora ra te au orometua Kerititiano maroiroi no te rave i ta ratou angaanga ma te kore e tutakiia mai kia rave i teia angaanga akaora anga. Te akaata ra ratou i te tu o Iesu, tei tuatua: “E mea o mai ua to kotou, e oronga ua atu oki kotou.” (Mataio 10:8) E au mirioni ua atu takapini i te ao te piri nei ki roto i tetai angaanga noinoi kore mei teia rai, tei tupu mai, te ariu mai nei te au urupu tuatua tika e te riro mai nei ei au pipi. I roto i te rima mataiti ua i topa, vaitata rai e 1.7 mirioni tei akatapu i to ratou au oraanga kia Iehova. Te akono anga i te au anoano anga o teia akamaata anga e tupu ua nei te umuumu ra i te nenei anga i te au Pipiria e te au puka akanooia ki runga i te Pipiria e pera katoa te patuanga i te au Are Uipaanga Patireia ou e tetai atu ngai uipaanga. Noea mai te moni kia akatupu i teia au umuumu anga? No roto mai i te au moni oronga ua.

No te au turanga kino i te pae moni i etai au tuanga o te enua, e manganui te putoto ra no te oronga i tei umuumuia no te oraanga no to ratou au pamiri. Kia tau ki te makatini New Scientist, e tai pirioni tangata te akapou ra e vaitata i te 70 patene o ta ratou moni no te ngutuare ki runga i te kai. E manganui to tatou au tungane e te au tuaine Kerititiano tei roto i taua turanga. Naringa kare te tauturu a te au taeake irinaki ra, kare e rauka ia ratou i te tutaki i te au apinga mei te au puka Kerititiano me kare te au Are Uipaanga Patireia tau ua.

E tikai, kare te aite anga o te reira e te merengo ra taua aronga kia tuku i tetai kia apai i ta ratou apainga. Inara te umuumu ra ratou i te tauturu anga. Ko Mose, i te akamaroiroianga i to Iseraela kia oronga i te au apinga ei mataara akameitaki anga kia Iehova no ta ratou au akameitakianga, kua na ko ra: “E oronga ra te tangata ravarai i tei tika iaia ra, i te tau i te meitaki ta to Atua ra ta Iehova i oronga atu kia koe ra.” (Deuteronomi 16:17) No reira, i te kite anga a Iesu i tetai vaine takaua e tuku ra “i nga lepeta e rua ki roto” i te iero, kua akapaapaa aia iaia ki tana au pipi. Kua rave aia i tei rauka iaia. (Luka 21:​2, 3) Ma te aiteite, te rave ra te au Kerititiano i roto i te au turanga putaua i tei rauka ia ratou. Me tupu oki te rava kore, ka rauka i te akatupuia na roto i te au moni orongaia mei te au taeake Kerititiano kare i ngere i te pae apinga.​—2 Korinetia 8:​13-15.

Me oronga tatou ki te Atua na taua au mataara, e mea puapinga kia rauka ia tatou te akakoroanga tau. (2 Korinetia 8:12) Kua akakite a Paulo: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.” (2 Korinetia 9:7) Na te oronga ua anga mei te ngakau, te tauturu nei tatou i te akamaata atu i te angaanga teokaratiki te tupu nei e ka akamaata atu i to tatou tu rekareka.​—Angaanga 20:35.

I te pirianga ki roto i te angaanga tutuanga e te oronga ua anga e nga mataara ia ka rauka ia tatou i te oronga kia Iehova no te au akameitakianga tana i oronga mai kia tatou. E mei teaa atura te pumaana i te kite anga e te inangaro ra a Iehova i te tuku mai i tana akameitakianga ki rungao i te au tangata ngakau tae e manganui, tei kore i kite iaia i teianei! (2 Petero 3:9) No reira, kia tamou marie ua atu tatou i te taangaanga i ta tatou au apinga i roto i ta te Atua angaanga e kitea ei te au tangata ngakau tuatua tika e kia tauturu ia ratou kia akatupu i te au tu mei te kauraro anga, te akarongo, e te ariki anga. Na te reira tu, ka rauka ia tatou te rekareka no te tauturu anga ia ratou kia kite e “na Iehova te meitaki i apingaʼi te apinga.”​—Salamo 34:8.

[Pia i te kapi 28, 29]

Au Ravenga ta Etai e Iki ra no te Oronga

AKAPUTU ANGA NO TE ANGAANGA I TEIANEI AO

E manganui te akapae ra, me kore te akapapa ra, i tetai moni no te tuku ki roto i te au pia akaputu anga tei akairoia “Akaputu Anga no te Angaanga i Teianei Ao​—Mataio 24:14.”

I te au marama katoatoa e tuku ana te au putuputuanga i teia au moni ki te opati maata o teianei ao i Brooklyn, New York, me kore ki te opati manga o te reira ngai. Kia tuku tika katoaia te au moni tauturu tei oronga uaia ki te Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, me kore ki te opati manga e akono ra i toou enua. Ka tau te au apinga akamanea me kore tetai atu au apinga puapinga kia oronga katoaia. Kia aru mai tetai reta poto ua i te au akaputu anga no te akakite i teia apinga aroa tikai.

AKANOO ANGA I TE TURANGA NO TE TAUTURU

Penei ka orongaia te moni na roto i tetai akanoo anga takake i roto i te reira, me e anoano takake to te tangata oronga, ka akaokiia atu te moni oronga ua kiaia. No tetai akakite anga maata atu, e tata ki te Treasurer’s Office i te ngai noo anga i akakiteia i runga ake nei.

PARANIANGA ORONGA UA

I te pae i te au moni aroa oronga ua e te au moni tauturu akaturangaia, te vaira tetai atu au ravenga orongaanga no te akapuapinga i te angaanga Patireia i teianei ao. Ka kapiti mai te:

Initiua: Penei kia tukuia te ingoa o te Taiate Punanga Tiaki e ko tei puapingaia mei tetai tika anga initiua ora me kore tetai akapapa anga akaangaroi anga/moni pakari.

Akapapa Anga Pangika: Penei kia tukuia te au akapapa anga pangika, te au pepa tuku anga, me kore te au akapapa anga akaangaroi no tetai tangata ki roto i te tataanga irinakiia me kore tei maaniia kia tutakiia me mate ake ki te Taiate Punanga Tiaki, kia tau ki te au ikuiku anga a te pangika o te reira ngai.

Apinga Akaputuia e te Poni: Penei ka orongaia te au apinga akaputuia e te poni ki te Taiate Punanga Tiaki ei apinga aroa.

Enua: Penei ka orongaia te au enua e te au are ka rauka i te oko ki te Taiate Punanga Tiaki ei apinga aroa me kore na te akono anga i tetai pepa koreromotu ki tei orongaia mai i te reira, te ka rauka iaia i te noo ki roto i te tuatau e ora ra aia. Kia araveiia atu te opati manga i toou enua i mua ake ka akamanaiai tetai ua atu enua.

Moni Oronga ei Apinga Aroa: E akapapaanga te moni oronga ei apinga aroa i roto i te reira ka tuku atu tei oronga ra i te moni me kare te au apinga akaputuia ki te Taiate Punanga Tiaki. Ei tupau anga, ka rauka i tei oronga ra, me kare te aronga tei ikiia e tei oronga ra, i tetai tutaki anga moni oronga tei akatakaia i te au mataiti ravarai no te oraanga. Ka rauka i tei oronga ra tetai tero akameangitiia i te mataiti i akanooiai te moni oronga ei apinga aroa.

Au Koreromotu e te Au Tataanga Irinakiia: Penei ka oronga tikaia te apinga me kore te moni ki te Taiate Punanga Tiaki na roto i tetai koreromotu tikaia e te tataia, me kore kia tukuia te ingoa o te Taiate Punanga Tiaki te ka puapingaia no tetai tataanga koreromotu irinakiia. Tetai tataanga irinakiia tei orongaia ki tetai akaaerenga akonoanga ka riro te reira ei au puapinga i te pae o te tero i tetai taime.

Mei ta te tuatua “paranianga oronga ua” e taiku ra, ka anoanoia kia paraniia teia au ravenga oronga moni tauturu i te tua o te tangata oronga. Ei tauturu i tetai te inangaro ra i te akapuapinga i te angaanga a te Au Kite o Iehova i te ao katoa na roto i tetai paranianga oronga ua, kua akapapa te Taiate i tetai poroutia reo Papaa e te reo Paniora te ingoa Charitable Planning to Benefit Kingdom Service Worldwide. Kua tataia te poroutia ei pau i te au uiui anga e manganui tei rauka no te au apinga aroa, au koreromotu, e te au tataanga irinakiia. Te kapiti katoa maira i tetai akakite anga puapinga no runga i te enua, pae moni, e te parani anga i te tero. Kua akanooia te reira ei tauturu i tetai i Marike te parani ra i te oronga i tetai apinga aroa takake i teianei me kore no te akaruke i tetai koreromotu i te mateanga kia iki i tetai ravenga meitaki rava e te mako i te manako anga i to ratou uaorai turanga e te pamiri. Ka rauka tetai kopi o teia poroutia na te pati tikai anga i tetai kopi no ko mai i te Charitable Planning Office.

I muri ake i te tatauanga i te poroutia e te tuku anga ki te Charitable Planning Office, kua rauka i te manganui te tauturu i te Au Kite o Iehova i teianei ao e i taua taime rai, kua akameangiti i te au puapinga o te tero no te akapera anga. Ka tau kia akakiteia e kia rauka i te Charitable Planning Office tetai kopi o tetai tataanga tau te piri atura ki teia au akanoo anga. Ko te aronga te inangaro ra i etai o teia au akanoo anga paranianga oronga ua, ka tau kia aravei atu i te Charitable Planning Office, na te tataanga me kore na te terepaoni anga, i te atereti i tataia i raro ake nei me kare i ko i te opati o te Jehovah’s Witnesses e akono ra i toou enua.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Telephone: (845) 306-0707