‘E Apai Tatou i Tetai Atinga na Iehova’

ME RAVE tetai tangata i tetai angaanga takinga meitaki kia koe, akapeea koe me akaari i taau akameitakianga? Akamanako ana e i akapeea tetai au rangatira vaeau i Iseraela i te akaari anga i ta ratou akameitakianga, i muri ake i tetai tamaki anga ki to Midiana. Kua tupu te tamaki i muri ake i to Iseraela ara anga no tei piri atu kia Baala o Peora. Kua akaautu te Atua i tona iti tangata, e kua tuaia te au apinga ki te au vaeau e 12,000 e te toenga o te iti tangata Iseraela. Kia tau ki te aratakianga a Iehova, kua oronga te au vaeau i tetai patene o ta ratou tuanga na te kau taunga, e kua oronga te au Iseraela ke i tetai patene na te ngati Levi.—Nume. 31:1-5, 25-30.

Inara, kua inangaro te au rangatira vaeau e kia maata atu ta ratou ka rave. “I tatau ana toou au tavini i te au tangata tamaki i raro ake ia matou nei, e kare tetai o matou nei i riro,” i akakite ei ratou kia Mose. No te atinga a Iehova, kua iki ratou i te oronga i te auro e te au apinga manea tukeke. Te teimaa o te au apinga akamanea auro, tere atu i te 500 paunu (190 kiro karamu).—Nume. 31:49-54.

I teia tuatau, e manganui ua atu te tangata tei akakeuia kia akaari i ta ratou akameitakianga no ta Iehova i rave no ratou. Tetai, kare ko te au tavini akatapu uaia o te Atua te manako akameitaki ra. Ei akaraanga, akamanako ana i tetai tangata akaoro bus tei apai e tei akaoki mai i tetai pupu tereketi ki te ngai o te uruoaanga pa enua, tei raveia i Bologna, i Itaria, i te mataiti 2009. No te mea e tangata akaoro maru aia e te matakite, kua manako te aronga tei aru i tona bus i te tata i tetai kati akameitaki nana, e te oronga atu i tetai moni akamauruuru, pera te puka Eaa Tikai ta te Pipiria e Apii Maira? No te reira, kua pau mai te tangata akaoro e: “Te ariki rekareka nei au i te kati e te puka tera ra, te akaoki atu nei au i te moni no te mea te inangaro nei au i te oronga i te reira kia rauka ia kotou te rave ua atu i ta kotou angaanga. Noatu e kare au i te Kite no Iehova, inangaro au te oronga atu i teia no te mea kua kite au e e rave ana kotou i te angaanga no to kotou tu aroa.”

Me kua akakeuia koe i te akameitaki i ta Iehova i rave noou, tetai mataara i te akaari i taau akameitakianga koia oki, na te oronga anga i te au tauturu no te angaanga a te Au Kite o Iehova i te ao katoa nei. (Mata. 24:14) Te au ravenga ta tetai aronga i iki i te oronga atu kua tataia ki roto i te pia.

AU RAVENGA TA ETAI E IKI RA NO TE ORONGA

AKAPUTUANGA NO TE ANGAANGA I TEIANEI AO

Manganui te akapae ra, me kore te akapapa ra, i tetai moni no te tuku ki roto i te au pia akaputu anga tei akairoia: “Akaputuanga no te Angaanga i Teianei Ao.”

I te marama tataki tai, e tuku ana te au putuputuanga i teia au moni ki te opati o te Au Kite o Iehova e akono ra i to ratou au enua. E tuku tika katoaia atu ana te au moni tauturu tei oronga uaia mai ki te Watch Tower Bible and Tract Society of New Zealand, PO Box 75142, Manurewa, Manukau 2243, me kore ki te opati manga o te Au Kite o Iehova e akono ra i toou enua. Te au cheque ka tuku atu ki te atereti i runga akenei e tata kia tutaki ia ki te “Watch Tower.” Ka tau te au apinga akamanea me kore tetai atu au apinga puapinga kia oronga katoaia. Kia aru mai tetai reta poto ua i te akakite e e au apinga aroa tikai taua au apinga ra no teia au akaputuanga.

AKANOOANGA I TE TURANGA NO TE TAUTURU ME KORE E ROUNU KARE E INTEREST

Penei e tuku i te moni ki roto i te au mea oronga (trust) kia rauka i te taangaanga i Nu Tireni me kore i te ao katoa. Me inangaroia e te tangata nana te reira, ka rauka i te akaoki i teia au moni me patiia mai. No tetai akakiteanga maata atu, e tata ki te Treasurer’s Office i te atereti i runga akenei, ine.

PARANIANGA ORONGA UA

I te pae mai te au moni oronga aroa ua, te vaira tetai atu au ravenga orongaanga no te akapuapinga i te angaanga Patireia i teianei ao. Te kapiti maira teia i te:

Initurini:

Penei kia tukuia te ingoa o te Watch Tower Bible and Tract Society of New Zealand, koia te ka puapingaia mei tetai koreromotu initurini no te oraanga me kore tetai akapapaanga akaangaroi anga/moni pakari.

Apinga Akaputuia e te Au Poni:

Penei ka orongaia te au apinga akaputuia e te au poni ki te Watch Tower Society ei apinga aroa.

Are e te Enua:

Penei ka orongaia te au enua e te au are ka rauka i te oko ei apinga aroa me kore, te au are e nooia ra e te tangata na te akono anga i tetai koreromotu no te au apinga o te oraanga ki tei oronga mai i te reira, te ka rauka iaia i te noo ki roto i te tuatau e ora ra aia. Aravei atu i te opati manga i toou enua i mua ake ka akamanaia ai tetai ua atu enua e te are.

Au Koreromotu e te Au Mea Oronga:

Penei ka oronga tikaia te apinga me kore te moni ki te Watch Tower Bible and Tract Society of New Zealand na roto i tetai koreromotu tikaia e te ture, me kore kia tukuia te ingoa o te Watch Tower Society te ka puapingaia i tetai koreromotu no te au mea oronga. Penei ka riro tetai au mea oronga e akapuapinga ra i tetai akaaerenga akonoanga, ei oronga mai i tetai tauturu i te pae o te tero.

No tetai akakiteanga maata atu, aravei atu i te Treasurer’s Office, na te tata anga me kore na runga i te tereponi, i te atereti i runga akenei, me kore i te opati manga e akono ra i toou enua.