Te Au Akameitakianga o te Tuatua Meitaki

“Na Iehova au i akatainu, ei akakite i te tuatua rekareka ki tei [“maru,” NW] ra; kua tono mai aia iaku ei vaî i te aronga ngakau paruparu, . . . ei akapumaana i te aronga ravarai i mii ra.”​—ISAIA 61:​1, 2.

1, 2. (a) Eaa ta Iesu i akakite maira iaia uaorai, e i akapeea oki? (e) Eaa te au akameitakianga ta te tuatua meitaki ta Iesu i akakite ra i apai mai?

I TETAI ra Tapati i te tuanga mua o tana angaanga orometua, tei roto a Iesu i te tunako i Nazareta. Kia tau ki te tataanga, “kua tuku maira ratou i te buka a te peroveta ra a Isaia ki tona rima, e kia eeu akera aia i taua buka ra, kite iora aia i te ngai i tataia ra, Tei rungao iaku te Vaerua o te Atu, koia i akatainu mai iaku ei tutu aere i te evangelia.” Kua tatau katoa maira Iesu i tetai ngai o taua tuatua totou ra. I reira kua noo aia ki raro e kua tuatua atura: “Teianei tuatua i tataia nei, ta kotou i akarongo nei, kua tupu ïa i teianei rā.”​—Luka 4:​16-21.

² I roto i teia tu, kua akataka maira Iesu iaia uaorai ei tangata tutu evangeria i totouia maira, tei akakite i te tuatua meitaki e tei apai mai i te pumaana. (Mataio 4:23) E eaa te tuatua meitaki ta Iesu i akakite aere! Kua akakite atu aia ki te aronga akarongo mai kiaia: “Ko au te mārama o teianei ao: ko te aru mai kiaku nei, kare aia e aere ua i te poiri, e mārama ora tona.” (Ioane 8:12) Kua tuatua katoa aia: “I tāpu tika kotou i taku tuatua, e pipi tikai kotou naku i reira: Ka kite ïa kotou i te tuatua-mou, e na te tuatua-mou kotou e akarangatira.” (Ioane 8:​31, 32) Ae, ia Iesu “te tuatua o te ora mutu kore ra.” (Ioane 6:​68, 69) Te marama, te ora, te tu rangatira​—e tika tikai e au akameitaki anga kia riro ei apinganui!

3. Eaa te tuatua meitaki ta te au pipi a Iesu ra i tutu aere?

³ I muri ake ia Penetekote 33 T.N., kua rave ua atu te au pipi i te angaanga tutu aereanga a Iesu. Kua tutu aere ratou i te “evangelia o te basileia nei” ki to Iseraela e ki te au tangata o te au pa enua. (Mataio 24:14; Angaanga 15:7; Roma 1:16) Te aronga tei akarongo ra kua kite i te Atua ko Iehova. Kua tataraia ratou mei te tuikaaanga akonoanga e kua riro ei tuanga no te iti tangata ou i te pae vaerua ko, “te Iseraela o te Atua,” e manakonakoanga to tona au mema i te tutara anga mutu kore i te rangi ra ma to ratou Atu, ko Iesu Karaiti. (Galatia 5:1; 6:16; Ephesia 3:​5-7; Kolosa 1:​4, 5; Apokalupo 22:5) E au akameitakianga apinganui tikai te reira!

Tutu Anga Evangeria i Teia Tuatau

4. Na roto i teea tu te akauenga kia tutu aere i te tuatua meitaki i te akatupu angaia i teianei tuatau?

⁴ I teia tuatau, te turuia ra te au Kerititiano akatainuia e te “aronga maata” te tupu ra no “te au mamoe ke atu,” te rave ua atura i te akatupu i te angaanga totouia tei orongaia ra kia Iesu. (Apokalupo 7:9; Ioane 10:16) Ei tupu anga, kua tutu aereia te evangeria i tetai tu kare i kitea i mua ana. I te 235 enua e te au ngai, kua aere atu te Au Kite o Iehova “ei akakite i te tuatua rekareka ki tei [maru] ra; . . . ei vaî i te aronga ngakau paruparu, ei tutu aere i te ora ki te tuikaa, e ei eeu i te are tapeka anga i tei tapekaia ra; Ei tutu aere i te mataiti inangaroia e Iehova, e te rā akaoko anga na to tatou Atua; ei akapumaana i te aronga ravarai i mii ra.” (Isaia 61:​1, 2) No reira, kua rave ua atu te angaanga evangeria a te au Kerititiano i te apai mai i te au akameitakianga ki te aronga e manganui e te akapumaana tikai “i te aronga i rokoia e te mate ra.”​—2 Korinetia 1:​3, 4.

5. No runga i te tutu aereanga i te tuatua meitaki, akapeea te tuke anga o te Au Kite o Iehova ki te au akonoanga o Kerititome?

⁵ E tika rai e ko te au akonoanga o Kerititome te oronga maira i ta ratou au ravenga tuke tuke no te akono anga evangeria. E manganui tei tono i te au mitinari ra kia akariro poroteraita i roto i etai atu enua. Ei akatauanga, te ripoti maira The Orthodox Christian Mission Center Magazine i te angaanga a te au mitinari Otototi i Madagascar, Aperika Apatonga, Tanzania, e Zimbabwe. Inara, i roto i te Akonoanga Otototi, mei etai atu au akonoanga o Kerititome ra, ko te maataanga o te au mema kare a ratou tuanga i taua angaanga ra. E tuke anga, te Au Kite akatapu katoaia o Iehova te tauta ra kia o atu ki te tutuanga evangeria. Te kite ra ratou e ko te akakitekiteanga i tuatua meitaki e akapapu anga i te tika tikai o to ratou akarongo. Kua tuatua a Paulo: “Ko te ngakau oki to te tangata nei e akarongo, e kia rauka atu te tuatua-tika: ko te vaa oki tei aaki te tuatua e kia rauka atu te ora.” Te akarongo kare ra e akakeu i tetai kia akono, i taua tu ra, kua mate ia.​—Roma 10:10; Iakobo 2:17.

Te Tuatua Meitaki te ka Apai Mai i te Au Akameitaki Anga Mutu Kore

6. Eaa te tuatua meitaki te tutu aereia ra i teianei tuatau?

⁶ Te tutu ra te Au Kite o Iehova i te nuti meitaki katoa te ka rauka. Te eeu ra ratou i ta ratou au Pipiria e te akaari atura ki te aronga i ariki mai e kua tuku atinga a Iesu i tona oraanga kia oronga ki te au tangata i te aerenga kia akavaitata atu ki te Atua, i te akakore anga i te ara, e te manakonakoanga no te ora mutu kore. (Ioane 3:16; 2 Korinetia 5:​18, 19) Kua akakite ratou e kua akanooia te Patireia o te Atua i te rangi i raro ake i tana Ariki akatainuia, ia Iesu Karaiti, e kare e roaia ka takore atu te reira i te rave kino mei te enua nei e ka akono i te akaou anga i te Parataito. (Apokalupo 11:15; 21:​3, 4) I te akatupu anga i te totou a Isaia, te akakite ra ratou ki to ratou au tangata tupu e ko teianei “te mataiti inangaroia e Iehova” e raukai i te au tangata kia akarongo atu ki te tuatua meitaki. Te akamatakite katoa ra ratou e kare e roaia ka tae mai “te rā akaoko anga na to tatou Atua” e apai mai ei a Iehova i te openga ki te aronga rave tarevake ma te kore e tataraara.​—Salamo 37:​9-11.

7. Eaa te tupuanga te akakite maira i te taokotai anga o te Au Kite o Iehova, e eaa ratou i rekarekai i taua taokotai anga ra?

⁷ I roto i te ao te ki ra i te mate e te tumatetenga, ko teia anake te nuti meitaki ma te au puapinga mutu kore. Ko te aronga te ka ariki i te reira ka riro ei tuanga no te taeake anga taokotaiia, i te ao katoa nei o te au Kerititiano kare ra e akatika i te au pa enua, te au kopu, me kare te au tuke anga no te puapinga kia akatataka ke ia ratou. Kua ‘akakakau ratou ia ratou uaorai ma te aroa, ko taua tatua apa kore ua ra ïa.’ (Kolosa 3:14; Ioane 15:12) Kua kitea teia i te mataiti i topa akenei i tetai enua i Aperika. I tetai popongi kua akaara poitirereia te oire maata e te aruru pupui. Kua akamataia tetai ravenga viviki kia takore atu i te mana poritiki. I te riroanga te au tupuanga ei maro anga eteniki, kua akaapaia tetai pamiri Au Kite no te paruruanga i te taeake Au Kite e pupu eteniki ke atu. Kua pau atu taua pamiri ra: “E Au Kite anake matou no Iehova te noo nei i to matou are.” Kia ratou, kare te au tuke anga eteniki i te mea puapinga maata; ko te aroa Kerititiano​—te oronga anga i te pumaana ki te aronga te ngere ra​—ko te reira ia. Kua tuatua tetai vaine kopu tangata kare ra i te Kite: “Kua pikikaa te au mema o te au akonoanga katoatoa i to ratou au oa akamori. Ko te Au Kite anake o Iehova kare i pera.” E manganui te au tupu anga tei ripotiia mei te au enua kua tataka ke ra na te tamaki anga te akaari tikai maira e ko te Au Kite o Iehova “te aroa ra i te taokotai anga o te au taeake.”​—1 Petero 2:17.

Te Taui ra te Tuatua Meitaki i te Au Tangata

8, 9. (a) Eaa te au tauianga ta te aronga tei ariki i te tuatua meitaki ka rave? (e) Eaa te au tupuanga te akatutu maira i te mana o te tuatua meitaki?

⁸ Te akono ra te tuatua meitaki i ta Paulo i karanga ra e ko ‘te oraanga i teianei, e to a muri atu.’ (1 Timoteo 4:8) Kare te reira i oronga ua mai i te manakonakoanga papu e te meitaki no te tuatau ki mua mari ra ka apai katoa mai i te meitakianga ki ‘te oraanga i teianei.’ Ei aronga tataki tai, te aratakiia ra te Au Kite o Iehova e te Tuatua a te Atua, koia te Pipiria, kia apai mai i to ratou au oraanga kia rotai ma te anoano o te Atua. (Salamo 119:​101) Te akaouia ra to ratou au tu tangata ia ratou e tatanu ra i te au tu tuatua tika e te tiratiratu.​—Ephesia 4:24.

⁹ E akamanako ana i te akatauanga o Franco. E manamanata tona ma te tu riri. Me tarevake te au apinga, kua riri kino vave aia e kua akangaangaa i te au apinga. Kua apii tana vaine i te Pipiria ma te Au Kite o Iehova, e kua tauturu marie ta ratou akatauanga Kerititiano ia Franco kia kite e ka tau kia taui aia. Kua apii aia i te Pipiria ma ratou katoa e kua rauka iaia i te openga ra i te akakite i te au ua o te vaerua tapu o te au e te akatere-uaorai. (Galatia 5:​22, 23) Koia tetai o te 492 i papetitoia i Belgium i te mataiti tavinianga 2001. E akamanako katoa ia Alejandro. Kua kai maata taua tangata ou ra i te apinga akakona e kua akono atu aia i te oraanga noo ua i te ngai akaputu anga teita, i te koianga i te apinga ei oko e raukai i te turu i tana raveanga apinga akakona. Iaia i te 22 mataiti, kua pati atu te Au Kite o Iehova ia Alejandro kia apii i te Pipiria, e kua akatika aia. Kua tatau aia i te Pipiria i te au ra ravarai e kua aere ki te au uipaanga Kerititiano. Kua tama viviki aia i tona oraanga e kare i ono marama ake, kua rauka iaia te rave i te angaanga tutu aere i te evangeria​—ko tetai o te 10,115 i rave i te reira i te mataiti i topa akenei i Panama.

Te Tuatua Meitaki​—E Akameitakianga ki Tei Maru

10. Koai ma te akarongo ra i te tuatua meitaki, e akapeea te tauianga i to ratou manakonako anga?

¹⁰ Kua totou a Isaia e ka tutu aereia te tuatua meitaki ki te aronga maru. Koai ma teianei aronga maru? Ko ratou te aronga tei akatakaia maira i te puka o Angaanga ei “aronga i akonoia no te ora mutu kore ra.” (Angaanga 13:48) E aronga akaaka ratou tataki tai te kitea ra i te au tuanga taiate katoa tei akatuera i to ratou ngakau ki te tuatua o te tuatua mou. Ko taua aronga ra te apii ra e na te rave anga i to te Atua anoano ka apai mai i te au akameitaki anga e maata atu te apinganui i to tetai ua atu apinga te orongaia maira e teianei ao. (1 Ioane 2:​15-17) Inara, akapeea, te Au Kite o Iehova e itae ei i te au ngakau i roto i ta ratou angaanga tutu aereanga?

11. Kia tau ki ta Paulo, akapeea e tau ei te tutuanga i te tuatua meitaki ra?

¹¹ I na, e akamanako ana i te akatauanga a te apotetoro ko Paulo, tei tata ra ki to Korinetia: “Iaku oki i aere atu ia kotou na, e te au taeake, kare au i aere atu ma te tuatua akamanea e te pakari, i te tuatua anga atu kia kotou i te tuatua-akakite a te Atua. Kua akakoro marie oki au e, kare rava aku e tuatua e akakite atu ki o kotou na, mari ra ko Iesu Mesia, ko tei akasatauroia ra.” (1 Korinetia 2:​1, 2) Kare a Paulo i tauta kia akateitei atu iaia ki te aronga tei akarongo maira i tana apiianga. Kare ana apinga i apii mari ra ko te au tika tu-Atua, te au tika tei tataia ra i teia tuatau i roto i te Pipiria. E akara, katoa, ta Paulo akamaroiroi anga i tona oa tutu evangeria ko Timoteo: “E akakite ua koe i te tuatua; kia tamou marie rai.” (2 Timoteo 4:2) Kia akakite a Timoteo “i te tuatua,” te tuatua a te Atua ra. Kua tata katoa a Paulo kia Timoteo: “E akamaroiroi kia vai meitaki ra koe ki mua i te aroaro o te Atua, ei rave angaanga kare e akama anga, e te tika oki i te tua i te tuatua-mou ra.”​—2 Timoteo 2:15.

12. Akapeea ta te Au Kite o Iehova i teia tuatau nei i te akarongo anga ki ta Paulo au tuatua e te akatauanga?

¹² Kua aru te Au Kite o Iehova i ta Paulo akatauanga, e pera katoa i tana au tuatua kia Timoteo. Kua kite ratou i te mana o te Tuatua a te Atua e te taangaanga meitaki ra i te reira ia ratou e kimi ra kia akakite ki to ratou tangata tupu i te au tuatua tau no te manakonakoanga e te pumaana. (Salamo 119:52; 2 Timoteo 3:​16, 17; Ebera 4:12) E tika, te taangaanga meitaki ra ratou i te au puka apii Pipiria kia raukai i te aronga inangaro kia maata atu te kite Pipiria i to ratou tuatau akaangaroi anga. Inara te kimi tamou ra ratou kia akakite atu i te au tuatua o te Tuatua Tapu ki te au tangata. Kua kite ratou e ka akakeu te Tuatua akauruia a te Atua ra i te au ngakau o te aronga akaaka. E na te taangaangaanga i te reira i roto i teianei tu ka akamaroiroi katoa i to ratou uaorai akarongo.

“Ei Akapumaana i te Aronga Ravarai i Mii Ra”

13. I te mataiti 2001, eaa te au tupu anga tei akatu mai te umuumuia ra no te akapumaana anga i te aronga te mii ra?

¹³ Kua tupu i te mataiti 2001 tona tuanga tumatetenga, e tei tupu mai, e manganui te aronga tataki tai tei umuumu i te akapumaana anga. Ia Tepetema i topa akenei kua kitea tetai akatauanga maata i Marike, i te au takino anga tamataku ki runga i te World Trade Center i New York e te Pentagon vaitata ia Washington, D.C. Mei teaa ra tetai poitirere anga o taua au takino anga ra no te enua katoa ra! I roto i taua au tupu anga ra, kua tauta te Au Kite o Iehova i te akatupu i ta ratou angaanga kia oronga i te ‘akapumaana ki te aronga i mii ra.’ Na etai tupuanga tokoiti ua e akatutu mai i akapeea ratou i te rave anga i teia.

14, 15. Akapeea te Au Kite i nga atianga tuke e rua i te taangaanga anga meitaki anga i te au Tuatua Tapu ei akapumaana i te aronga mii ra?

¹⁴ Kua aravei atu tetai Kite tutu evangeria tamou ra i tetai vaine i runga i te arataa e kua ui atu eaa tona manako no te au takino anga tamataku tei tupu ua akera. Kua akamata taua vaine ra i te aue. Kua tuatua aia e te tangi ra aia e te inangaro ra aia i te tauturu ua atu na tetai tu. Kua tuatua atu te Kite kiaia e te manako maata maira te Atua ia tatou katoatoa, e kua tatau aia ia Isaia 61:​1, 2. Kua tau tikai teianei au tuatua akauruia a te Atua ki taua vaine ra, tei tuatua mai e te mii ra te katoatoa. Kua ariki aia i tetai aenga pepa e kua pati i te Kite kia aere atu e aravei iaia i tona kainga.

¹⁵ E rua nga Kite tei rave ra i te angaanga tutu aere i te evangeria kua aravei atu i tetai tangata te angaanga ra i roto i tona kapakapa are. Kua pati atu raua no te oronga atu kiaia i etai tuatua akapumaana mei te au Tuatua Tapu i te manako anga i te tumatetenga tei tupu i te World Trade Center. I tona akatika anga kua tatau raua ia 2 Korinetia 1:​3-7, tei kapiti ra i teia nga tuatua: “Pumaana i te Mesia.” Kua ariki taua tangata ra e ko tona au tangata i te pae mai iaia e Au Kite te oronga maira i tetai apinga akapumaanaanga ma etai atu e kua karanga: “Kia akameitaki te Atua i te angaanga meitaki ta korua e rave ana.”

16, 17. Eaa nga tupuanga e rua tei akakite maira i te mana o te Pipiria kia tauturu i te aronga tataki tai tei mii ra me kare tei tamanataia e te au tumatetenga ra?

¹⁶ I te oki akaou anga tetai Kite i te atoro i te au tangata tei inangaro mai e kua aravei atu i te tamaiti a tetai vaine tei akaari maira i tona inangaro i mua atu ana e kua akataka atu aia e te akamanako ra aia e te peea ua ra te aronga i te pae mai i muri ake i taua tumatetenga ra. Kua umere taua tangata ra e kua akapou te Kite i tona uaorai taime i te atoro i te au tangata kia kite e te peea ua ra ratou. Kua tuatua atu aia e te angaanga vaitata ua ra aia ki te World Trade Center i te tupu anga taua raveanga kino e kua kite katoa i te tupu anga taua mea. I tona ui anga e eaa te Atua i tuku uai kia tupu taua mamaeanga ra, kua tatau atu te Kite i te au irava mei roto mai i te Pipiria, kapiti mai ia Salamo 37:39, te karanga ra: “Te ora o te aronga tuatua-tika ra, no ko ïa ia Iehova ra, koia to ratou maroiroi i te tuatau tumatetenga.” Kua ui aroa ua mai taua tangata ra me te akapeea ra taua Kite ra e tona pamiri, e kua pati atura iaia kia oki akaou mai, e kua tuatua mai i te ariki anga ngakau no te atoro anga.

¹⁷ Tetai atu o te au tauatini ua atu tei mii ra e tei akapumaanaia e te Au Kite o Iehova i te au ra i muri iora i te takino anga tamataku ra ko tetai vaine ta te Au Kite i aravei atu ia ratou e atoro aere ra i te aronga i te pae mai ia ratou. E mamae ngakau maata tona i tei tupu ra e kua akarongo atu i te tatau anga ratou ia Salamo 72:​12-14: “Ko tei putaua ra me kapiki maira, nana ïa e akaora; e tei akaaka ra, e kare ona e tauturu. Ka akaperepere aia i tei apikepike ra e tei putaua, e akaora oki aia i te au vaerua o te aronga ao ra. Ka akaora aia i to ratou vaerua i te takinga-kino e te rotoriri ra, e to ratou toto, ka riro ïa ei mea apinga nana.” Mei teaa ra te meitaki taua au tuatua ra! Kua pati atu taua vaine e kia tatau akaou mai te nga Kite i te au irava e kua pati atu ia raua kia tomo mai ki roto i tona are e kia rave ua atu i te uriuri anga. Kia tae ki te openga o ta ratou tuatua anga, kua akamataia tetai apiianga Pipiria.

18. Akapeea tetai Kite i te tauturu anga i tona au tangata i te pae mai i te pati angaia mai aia kia pure no ratou?

¹⁸ Te angaanga ra tetai Kite i roto i tetai are kaikaianga e ngai manea tikai e te apinganui kare te au tangata i akaari i te inangaro i te tuatua meitaki o te Patireia. I muri ake i te takino anga tamataku ra, kua akaraanga ruketekete te au tangata i reira. I te aiai Varaire i muri ake i taua takino anga ra, kua pati atu te manitia o taua are kaikaianga ra i te katoatoa kia aere atu ki vao e ka mou ei i te au kanara, i te akonoanga i tetai tuatau muteki ua i te akamaara anga i te aronga tei takake ra. I te akangateitei anga i to ratou au manako ngakau, kua aere katoa atu te Kite ra ki vao e kua tu muteki ua i te pae arataa. Kua kite oki te manitia e e orometua aia no te Au Kite o Iehova, no reira i muri ake i te atianga no te akamaara anga, kua pati atura aia iaia kia rave i te pure anga na te katoatoa ra. Kua akatika taua Kite ra. I roto i tana pure, kua taiku aia i te mii anga maata takapini inara kua tuatua e kare e anoanoia kia mamae ua atu te aronga mii ra ma te kore e manakonakoanga. Kua tuatua aia no te tuatau kare e tupu akaou taua au tupu anga kino e kua karanga e ka rauka i te katoatoa i te akapiri vaitata atu ki te Atua o te pumaana na roto i te kite tika mei te Pipiria maira. I muri ake i te tuatuaanga “Amene,” kua aere atura te manitia​—aru katoa atu etai tere atu i te 60 tangata tei vao ake i te are kaikaianga ra​—kua aere atu ki te Kite ra, kua akameitaki atu iaia, e kua takave atu iaia, i te tuatua atu anga e ko te pure meitaki katoa te reira tana i akarongo ana.

E Akameitakianga ki te Au Ngai Tangata Ra

19. Eaa te tupuanga te akakite maira e te kite ra tetai papaki i te au turanga teitei o te Au Kite o Iehova?

¹⁹ I teia tuatau tikai, te au ngai tangata te rave angaanga ra te Au Kite o Iehova te puapingaia ra no te mea tei reira ratou​—ta te aronga e manganui i tuatua. Akapeea te au tangata tei akatupu ra i te au, te tiratiratu, e te au tu akono ma e kore ei e riro ei mana no te meitaki? I tetai enua i Asia Rotopu, kua aravei atura te Au Kite i tetai opita kua akamutu i te angaanga na tetai pupu tinamou au-enua i mua ana. Kua tuatua aia e i tetai tuatau kua akaueia aia kia kimikimi i te au akaaerenga akono anga. I tana akara anga ki roto i te Au Kite o Iehova ra, kua umere aia i to ratou tiratiratu e te tu akono meitaki. Kua akaperepere aia i to ratou akarongo ngaueue kore e te tika te akatumuia ra ta ratou au apiianga ki runga i te au Tuatua Tapu. Kua akatika teianei tangata i tetai apiianga Pipiria.

20. (a) Eaa ta te angaanga i ripotiia mai a te Au Kite o Iehova i te mataiti i topa akenei e akaari maira? (e) Eaa te akakite maira e e maata atu te angaanga ka raveia, e akapeea to tatou manako i ta tatou angaanga tutuanga evangeria?

²⁰ Mei te au tupu anga tokoiti ua tei akakiteia i roto i teianei atikara, no roto mai i te au tauatini ua atu te ka rauka kia akakiteia, te taka meitaki ra e te angaanga maata ra te Au Kite o Iehova i te mataiti tavini anga 2001.a Kua tuatua ratou ma te au mirioni ua atu au tangata, kua akapumaana ratou i te aronga e manganui tei mii ra, e kua akameitakiia ta ratou angaanga tutu aereanga. E 263,431 katoa tei akatutu i to ratou akatapuanga ki te Atua na te papetito anga. I te ao katoa nei, kua kake te numero o te aronga tutu evangeria e 1.7 patene. E ko te tika e 15,374,986 tei aere atu ki te Akamaara Anga mataiti i to Iesu ra matenga te akakite maira e e maata atu te angaanga ka raveia. (1 Korinetia 11:​23-26) E rave ua atu tatou i te kimi anga i te aronga maru te ka akarongo mai i te tuatua meitaki. E mei teaa te roa o te mataiti inangaroia e Iehova, e rave ua atu tatou i te akapumaana i te “ngakau paruparu” ra. Mei teaa ra te angaanga merengo ra tei ia tatou! E mea tika ka tuatua tatou i te au tuatua a Isaia: “E rekareka maata au ia Iehova; e rere ua taku vaerua i te rekareka i taku Atua.” (Isaia 61:10) Kia taangaanga tamou marie te Atua ia tatou iaia e akatupu ra i teianei au tuatua totou: “Ka pera katoa ta te Atu ra ta Iehova akatupu anga mai i te tuatua-tika, e te akameitaki, ki mua i te pa enua katoa ra.”​—Isaia 61:11.

[Tataanga Rikiriki i Raro]

Maara Ainei ia Koe?

• Akapeea te akameitaki anga i te aronga maru na ta Iesu ra tutu anga i te tuatua meitaki?

• Eaa te au akameitakianga i rauka i te aronga tei akarongo ra i te angaanga tutu evangeria a te au pipi a Iesu i te anere mataiti mua ra?

• Akapeea te aronga tei ariki ra i te tuatua meitaki i teia tuatau nei i te akameitaki angaia?

• Akapeea to tatou manako anga i to tatou tika kia riro ei aronga tutu aere i te evangeria?

[Au Tutu i te kapi 15]

Te maaraara tamou marie ra te Au Kite o Iehova i ta ratou apainga kia tutu aere i te evangeria

[Tutu i te kapi 17]

Te aronga tei akarongo i te tuatua meitaki kua riro ei tuanga taokotaiia, no te taeake anga i te ao katoa