Te Aronga Pakari e Tereni i Etai ke kia Apai i te Apainga

I ROTO i te au putuputuanga o te Au Kite o Iehova takapini i te ao, te anoano ia ra te au tane te ka rauka i te tavini i roto i te au turanga o te akaaere anga. E toru tumu maata no teia tupu anga.

Te mea mua, te akatupu nei a Iehova i tana taputou i te maani i “tei mea ngiti poepoe ra, e riro ïa ei enua maroiroi.” (Isaia 60:22) Na roto i tona takinga meitaki, kua vaitata e tai mirioni pipi ou tei papetitoia ei Au Kite o Iehova i roto i te toru mataiti i topa. Te anoanoia ra te au tane tau kia tauturu i teia aronga papetito ouia kia tere ki mua ki te tu pakari Kerititiano.​—Ebera 6:1.

Te rua, ko etai tei tavini ei aronga pakari no te au ngauru mataiti kua maroia no te ruaineanga me kare te au manamanata kopapa kia akaiti mai i te apainga angaanga ta ratou e rave ra i roto i te putuputuanga.

Te toru, te tavini nei te manganui o te aronga pakari Kerititiano maroiroi ei au mema no te Au Kumiti Liaison o te Are Maki, te Au Kumiti Patu Anga Regional, me kare te Au Kumiti Are Uipaanga Akaputuputuanga. I etai au turanga te anoano ia ra ratou kia akatupu i te akatau anga na te akarukeanga i etai o ta ratou au apainga i roto i to ratou putuputuanga i reira.

Akapeea e akonoiai te au umuumu anga maata no tetai atu au tangata tau? Ko te terenianga te taviri. Te akamaroiroi maira te Pipiria i te au akaaere Kerititiano kia tereni i te “aronga tuatua mou, ko te tau kia apii atu ia etai ke ra.” (2 Timoteo 2:2) Kia tau ki tetai tikitinari, te verepa “kia tereni” te aite anga “kia apii e tano ei, kia tau, me kare kia kite.” Ka akamanako tatou e peea ra te aronga pakari i te tereni anga i etai au tangata tau.

E Aru i to Iehova Akatau Anga

Te ‘tano ra, te tau, e te kite ra’ a Iesu Karaiti i roto i tana angaanga​—e kare ia i te mea umere! Kua tereniia aia e te Atua uaorai ko Iehova. Eaa te au tumu tei maani i teia porakaramu no te terenianga ei mea meitaki tikai? Kua taikuia mai e Iesu e toru, tei rekotiia ia Ioane 5:20: “E [1] akaperepere rai oki te Metua i te Tamaiti, e [2] akakite mairai oki kiaia i te au mea katoa tana tikai e rave ra: e [3] mea maata atu rai tana e akakite mai kiaia i teia.” Na te akara matatio anga i etai o teia au tumu ka oronga ia mai te kite i roto i te tumu o te terenianga.

E akara i ta Iesu i tuatua mua mai: “E akaperepere rai oki te Metua i te Tamaiti.” Mei te akamata anga mai o te anga anga, kua tupu tetai pirianga maana i rotopu ia Iehova e tana Tamaiti. Kua akaata marama mai a Maseli 8:30, NW i taua pirianga: “E kua tano mai au [Iesu] i te pae iaia [te Atua ko Iehova] ei pu rave angaanga, e ko au tana i akaperepere tikai i te au ra, i rekareka uai au i mua iaia i te au taime ravarai.” Kare roa e manako ekoko anga i roto i to Iesu manako e kua “akaperepere tikai” a Iehova iaia. E kare roa a Iesu i uuna ana i tona manako rekareka iaia e angaanga ra i te pae i tona Metua. Mei teaa te meitaki me tupu tetai pirianga maana, akatuera ua i rotopu i te aronga pakari Kerititiano e te aronga ta ratou e tereni ra!

Te rua o te tumu tei taiku ia maira e Iesu e ko te Metua te “akakite mairai oki kiaia i te au mea katoa tana tikai e rave ra.” Kua akapapu mai teia au tuatua eaa tei tataia ia Maseli 8:30, koia oki, e “i te pae” a Iesu ia Iehova i te angaia anga te ao e pini ua ake. (Genese 1:26) Ka rauka i te aronga pakari i te aru i taua akatau anga meitaki tikai na te angaanga piri vaitata anga ma te au tavini orometua, i te akaarianga kia ratou e akapeea i te apai anga i ta ratou au angaanga na tetai mataara meitaki. Inara, kare ua e ko te au tavini orometua iki ouia te aronga te anoano ia ra kia tereniia kia tere ki mua. Akapeea ra taua au taeake tiratiratu tei itae ana i te taoonga akaaere i te au mataiti e manganui inara kare roa ratou i ikiia ana? (1 Timoteo 3:1) Ka tau te aronga pakari kia oronga i te ako anga tau ki taua au tangata ra kia kite ratou e akapeea ratou i te tuku anga atu i ta ratou au tauta anga.

Ei akatau anga, penei e tau, e tae viviki ana, e te manako akava ngakau ra tetai tavini orometua i te akonoanga i tana au angaanga. Penei e puapii meitaki katoa aia. I te au akaraanga e manganui penei te rave ra aia i te angaanga meitaki tikai i roto i te putuputuanga. Inara, penei e kare aia i kite e te akaari ra aia i te tu riri i tana akonoanga i te au taeake Kerititiano. Te anoano ia ra te aronga pakari kia akaari i “te maru e te pakari tikai.” (Iakobo 3:13) Kare ainei i te mea meitaki no tetai tangata pakari kia tuatua atu ki te tavini orometua ra, na te akataka meitaki anga i te manamanata, te orongaanga i te au akatau anga tau, e te raveanga i te au manako tau no te akamako anga? Me akono meitaki te tangata pakari ‘i te rapakau anga i tana ako anga i te tai,’ penei ka ariki meitakiia tana au tuatua. (Kolosa 4:6) Ae, ka rauka i te tavini orometua i te maani i te angaanga a te tangata pakari ra kia mareka maata ia na te ariki anga e te akarongo anga ki tetai ako anga tei orongaia mai kiaia.​—Salamo 141:5.

I roto i etai au putuputuanga, te oronga ra te aronga pakari, i te terenianga tau kia tere ki mua ki te au tavini orometua. Ei akatau anga, te aru ra te au tavini orometua tau ia ratou me atoro ratou i te aronga maki me kare ra te aronga ruaine. Na teia mataara nei e raukai i te au tavini orometua i te kite i te angaanga tiakianga. Ae, e maata atu ta te tavini orometua ka rave i te tauturu anga i to ratou uaorai tere anga ki mua i te pae vaerua.​—Akara i te pia i raro ake te tumu tuatua “Eaa ta te Au Tavini Orometua ka Rave.”

Te toru o te tumu tei maani i ta Iesu terenianga kia tau tikai koia oki kua tereni a Iehova iaia ma te manakoanga i te tuatau ki mua. Te karanga ra a Iesu i te Metua e ka akakite aia ki te Tamaiti i te ‘mea maata atu i teia.’ Te kite tei rauka ia Iesu i te enua nei kua tauturu iaia kia akatupu i te au tu tana e anoano ra i te raveanga i tetai atu au angaanga. (Ebera 4:15; 5:​8, 9) Ei akatau anga, mei teaa te teiaa o ta Iesu angaanga te ka rauka kare e roa atu ana​—koia oki te akatuakaouanga e te akavaanga i te au tangata e pirioni ua atu tei mate i teianei!​—Ioane 5:​21, 22.

Te terenianga i te au tavini orometua, ka tau kia akamanako te aronga pakari i te au anoano o te tuatau ki mua. Penei e i te akaraanga kua rava ua te aronga pakari e te au tavini orometua te akono ra i te au anoano i teianei, ka rava ua ainei te reira me akatupuia tetai putuputuanga ou? Ka rava ua ainei te reira me akatupu ia etai atu au putuputuanga? I nga mataiti e toru i topa akenei, te vaira e tere atu i te 6,000 putuputuanga ou takapini i te ao katoa. Mei teaa te maata i te numero o te aronga pakari e te au tavini orometua te umuumuia ra kia akono i taua au putuputuanga ou ra!

Te aronga pakari e, te aru ra ainei kotou i ta Iehova akatau anga na te tatanuanga i tetai pirianga maana ma te au tangata ta kotou e tereni ra? Te akaari ra ainei kotou kia ratou e akapeea i te rave anga i ta ratou angaanga? Te manako ra ainei kotou i te au anoano no te tuatau ki mua? Te aruanga i ta Iehova akatau anga i tona terenianga ia Iesu ka akatupu i te au akameitakianga maata ki te manganui.

Auraka e Mataku i te Oronga Atu

Te aronga pakari tau tei matau i te tauiui i te au angaanga teiaa maata ra penei e kare e inangaro roa ana i te oronga atu i te mana ki etai ke. Penei i tauta ana ratou i te rave i te reira i mua atu inara kua reka kore i te au tupu anga. Penei e kua rave ratou i te manako e, ‘Me ka inangaro koe kia rave meitakiia tetai angaanga, naau uaorai e rave i te reira.’ Inara te rotai ra ainei teia manako ki to Iehova anoano, mei tei akakiteia i roto i te au Tuatua Tapu, e e iti ua te au tangata kite tei orongaia mai te terenianga e te aronga tei kite maata ra?​—2 Timoteo 2:2.

Kua reka kore te apotetoro ko Paulo i te akaruke anga tetai o tona oa teretere, ko Ioane Mareko, i tana angaanga i Pamephulia e kua oki atu ki te kainga. (Angaanga 15:​38, 39) Inara, kare a Paulo i akatika ana i taua manamanata kia tamaromaroa iaia i te terenianga i tetai ke. Kua iki aia i tetai atu taeake mapu, ko Timoteo, e kua tereni iaia i roto i te angaanga mitinari.a (Angaanga 16:​1-3) I Berea kua aravei atu te au mitinari i te patoi anga kino e i meitaki kia noo a Paulo i reira. No reira kua akaruke aia i te putuputuanga ou na Sila, e taeake pakari ruaine, raua ko Timoteo e akono. (Angaanga 17:​13-15) Kare e ekoko anga e maata ta Timoteo i kite mei ia Sila. I muri mai, te papa anga a Timoteo i te akamata i te apai i tetai atu apainga, kua tono atura a Paulo iaia ki Tesalonia kia akamaroiroi i te putuputuanga i reira.​—1 Tesalonia 3:​1-3.

Kare te pirianga i rotopu ia Paulo raua ko Timoteo mei te tu pitiniti rai, te anuanu, me kare e tu manako kore ua. E piri anga maana tei rotopu ia raua. Te tataanga ki te putuputuanga i Korinetia, kua taiku a Paulo ia Timoteo, tana i parani ana i te tono ki reira, ei “tamaiti akaperepere [nana ra] e te pikikaa kore i te Atu nei.” Kua tuatua oki aia: “[Na Timoteo] e akakite atu ia kotou i toku au aerenga i te Mesia nei.” (1 Korinetia 4:17) Kua ariki a Timoteo i te terenianga tei orongaia mai kiaia e Paulo, te riroanga kia tau i te apaianga i tana au angaanga. E manganui te au taeake mapu kua riro mai ko tetai tavini orometua tau, e tangata pakari, me kare ko tetai akaaere teretere no te mea kua puapingaia aia i te terenianga tei orongaia mai e te aronga pakari te manako tikai ra iaia, mei ta Paulo i rave kia Timoteo ra.

Te Aronga Pakari, e Tereni i Etai Ke!

Kua taka marama, e te akatupu ia nei te totou ia Isaia 60:22 i teia tuatau. Te maani ra Iehova i “tei mea ngiti poepoe ra, e riro ïa ei enua maroiroi.” E raukai i taua enua kia vai “maroiroi,” e tau kia akaaere meitakiia. Te aronga pakari e, eaa i kore ei e akamanako i te au mataara te ka rauka i te oronga atu i tetai terenianga ki te au tane akatapuia tei tau ra? E akapapu atu e te kite meitaki ra te tavini orometua tataki tai i tetai atu au akamako anga te anoanoia ra e ia i te rave e raukai i te tere ki mua. E kotou e te au taeake papetitoia, e mou i te maata anga o tetai ua atu manako anga tei orongaia mai kia kotou. E rave i te au tuatau kia akamaata i toou manako kite, te kite, e te kite anga. Na Iehova e akameitaki tikai i taua porokaramu o te tauturu aroa.​—Isaia 61:5.

[Tataanga Rikiriki i Raro]

[Pia i te kapi 30]

Eaa ta te Au Tavini Orometua ka Rave

Koi orongai te aronga pakari i te terenianga ki te au tavini orometua, e maata atu ta te au tavini orometua ka rave i te tauturu anga i to ratou uaorai tere anga ki mua i te pae vaerua.

—Ka tau te au tavini orometua kia maroiroi e kia irinaki ia i te akonoanga i ta ratou au angaanga. Ka tau katoa kia akatupu ratou i te au peu kia apii meitaki. No tetai tuanga maata, te vaira te tere anga ki mua ki runga i te apii anga e te akono anga i te au apinga tei apiiia.

—Me akapapa tetai tavini orometua i te oronga i tetai tuatua i te uipaanga Kerititiano, kare aia e tapupu i te pati atu ki tetai tangata pakari tau ra i te au manako e akapeea i te oronga anga i te tuatua.

—Penei ka pati katoa te tavini orometua i tetai tangata pakari kia akarakara e akapeea aia i te oronga anga i tetai tuatua Pipiria e te oronga anga i te ako anga no te akamako anga.

Ka tau te au tavini orometua i te kimi, te ariki, e te akono i te ako anga no ko mai i te aronga pakari. Na teia mataara nei, ka ‘kitea e te au peretana ravarai’ to ratou tere anga ki mua.​—1 Timoteo 4:15, NW.