Apii Terenianga Orometua—Ei Ngutupa Maata te Taki Atura ki te Angaanga
1 Na roto i te peroveta ko Ieremia, kua totou a Iehova e: “E tuku oki au i te tiaki ki rungao [i toku au tangata], te ka angai ia ratou ra; kare atura ratou e mataku akaou, kare oki e tumatetenga, e kare oki tetai e ngaro.” (Iere. 23:4) Te akatupuia ra taua au angaanga tiaki anga i teia tuatau i rotopu i te au tangata o te pa enua ravarai. Te raveia ra teia e te au ngauru tauatini aronga pakari o te putuputuanga. Kapiti katoa mai, ko tetai pupu tane mapu e maata atu mei te au ia kua oronga puareinga ua ia ratou uaorai i roto i ta Iehova tavinianga. (Sa. 110:3) Mei teaa tikai te akameitaki anga o teia au taeake akaaka ki te au putuputuanga o to te Atua iti tangata! E te aere ua atura te angaanga akaputuanga i te pae vaerua, e umuumuanga rai tetai no te au tane tei tau kia akapapa ia ratou uaorai kia tavini i to ratou au taeake.
2 Tetai akanoonooanga meitaki kia tereni i te aronga pakari e te au tavini orometua takaua no te au apainga maata atu koia oki ko te Apii Terenianga Orometua. Kua rauka e tere atu i te 22,000 aronga apiipii mei etai 140 enua i teia terenianga i roto i te 999 pupu apii tei raveia mei te akamataanga o te apii i te 1987. No teia au taeake, kua riro mai te apii “ei ngutupa maata te taki atura ki te angaanga.”—1 Kori. 16:9, NW.
3 Akakoroanga o te Apii: Te akakoroanga o te Apii Terenianga Orometua koia oki kia tereni e kia akapapa i te au tane tei tau no te au apainga i te ngai ua te umuumuia ra i roto i te akaaereanga. Ka akamaata te apii i to ratou tu kite no te akonoanga i te aratakianga i roto i te tutu evangeria, piri atu anga ki roto i te tiaki anga i te anana, e te apii anga i roto i te putuputuanga. I muri mai i te karatuati anga, kua tukunaia etai aronga apiipii ei au painia takake me kore ei au akaaere tutaka i roto i to ratou enua rai me kore i tetai enua ke. Ko tetai ke kua rauka mai te au tukuanga angaanga kia tavini i roto i to ratou putuputuanga e noo ana ratou me kore i roto i te au ngai e maata atu te umuumuanga i roto tikai i te ngai o te manga.
4 I te tuatau o te apiipiianga e varu epetoma, ka rave te aronga apiipii i tetai apiianga pakari o te Pipiria. Ka akamanako meitaki tikai ratou i te au apiianga Pipiria e manganui e pera katoa i te au apainga no te tiaki anga e te au aratakianga no te akono anga i te au manamanata i roto i te oraanga Kerititiano. Ka kite katoa mai ratou e eaa ta te au Tuatua Tapu e apii maira no runga i te au tumu no te raverave anga, te akava anga, e te akaaerenga. Ka rauka ia ratou te terenianga takake i roto i te tuatuaanga ki te papuriki e ka orongaia te tauturuanga kia ratou uaorai kia akaviviki i to ratou tupuanga i te pae vaerua.
5 Au Umuumuanga: Ma te marama tikai, e teitei te au umuumuanga no te aere atu anga ki te apii. Ka anoanoia te aronga tei aere atu kia tavini na mua e rua mataiti e tai aerenga ei tangata pakari me kore ei tavini orometua. E aronga takaua te katoatoa e tei rotopu i te 23 e te 50 mataiti. Kia kite te aronga tei tae atu i te tatau, te tata, e te tuatua meitaki i te reo e raveia ra te apii, e kia meitaki oki i te pae o te oraanga kopapa, kare oki e umuumu ana i tetai akonokonoanga me kore tetai kaikaianga takake. Ka orongaia te akatikaanga ki te aronga tei roto i te tavinianga painia tamou.
6 Kia puareinga ua e kia rauka i te aronga tei pati atu i te tavini i te ngai ua te ka anoanoia ratou. Te umuumu ra teia tu mei te peroveta ko Isaia rai, tei oronga rekareka iaia uaorai kia rave i tetai angaanga takake, i te na ko anga e: “I na, teia au; ko au taau e tono.” (Isaia 6:8) Kua akaari katoa aia i te tu akaaka i te au tuatau o tona oraanga. Ka tau te aronga tei akono ia ratou uaorai no te Apii Terenianga Orometua kia akakeuia e te aroa no to ratou au taeake e te inangaro anga i te tavini ia ratou i to te inangaro anga no te taoonga teitei me kore te turanga takake. I muri ake i te rauka anga mai taua terenianga meitaki tikai, ka umuumuia te au karatuati kia akono i ta ratou i tamou mai ei puapinga anga no tetai ke.—Luka 12:48.
7 Au Puapinga: I te tuatau o te terenianga pakari e varu epetoma, kua “angaiia [te au karatuati] i te tuatua i akarongoia nei, i taua tuatua meitaki.” (1 Timo. 4:6) Ka tauturu teia ia ratou kia akamaroiroi i etai ke i roto i to ratou au putuputuanga e te au kotinga i tukunaia atu. I te au ngai i tukunaia atu te au karatuati no te Apii Terenianga Orometua, kua maata mai te angaanga koro, kua akamaroiroiia te tavinianga painia, i roto tikai i te aronga mapu, e kua maata mai te akonoanga uaorai tei orongaia ki te aronga ou e manganui te kapiti maira ki to te Atua iti tangata.
8 E tangata pakari me e tavini orometua takaua ainei koe tei rotopu i te 23 e te 50 mataiti? Kore koe e akamanako i te tata atu anga no te Apii Terenianga Orometua? E taeake mapu ainei koe te tamanako ra i taau au akakoroanga no te tuatau ki mua i roto i ta Iehova tavinianga? Kore koe e akono ngoie ua i toou oraanga e kia kore te au arairaianga kia rauka oki ia koe kia tomo atu ki roto i teia “ngutupa maata te taki atura ki te angaanga”? Ka apai mai te reira i te rekareka maata e te merengoanga. E tika, kua riro te Apii Terenianga Orometua ei akameitakianga kare ua ki te au karatuati o te apii mari katoa ki te au putuputuanga o te iti tangata o te Atua e kako rava ake i te ao katoa.
[Pia i te kapi 3]
Akapeea Ratou i te Puapinga Anga mei te Terenianga
“Kua akameitaki tikai te terenianga i taku angaanga orometua kia akono ma te kite pakari, i te taangaanga anga i te au Tuatua Tapu.”
“Kua oronga mai te apii kiaku te irinakianga maata tikai i te akono anga i taku au apainga tukeke i roto i te putuputuanga.”
“E vaitata rai kua taui te reira i te au tu ravarai o toku oraanga, kapiti mai i toku manakoanga no te tutara anga teokaratiki e to te Atua akaaereanga.”
“Te terenianga tei rauka mai iaku kua tauturu iaku kia ariki rekareka i te umuumuanga kia akono iaku uaorai i te ngai te umuumuia ra.”