Te au Kaveinga Tu Atua ka Akapuapinga ia Koe

KARE e ekoko ana kua kite koe e te akaaereia ra te au animara e te tu kite. E manganui te au matini kua akapapaia kia akarongo i te au ikuiku anga. Inara kua angaia mai te au tangata ravarai kia aratakiia e te au kaveinga. Akapeea koe i te akapapu anga i te reira? Kua akakite oki a Iehova, tei Akamata i te au kaveinga tuatua tika pouroa, i te maani anga aia i nga tangata mua: “E anga taua i te tangata i to taua uaorai tu.” E vaerua Tei Anga; kare ona kopapa tangata mei ia tatou rai, no reira tei roto tatou i tona “tu” i roto i te tu ka rauka ia tatou i te akaata i tona tu peretana, te akaariarianga i tetai o tona au tu meitaki roa. Ka rauka i te au tangata ravarai te tu kia akono i to ratou au oraanga e kia tau ki te au kaveinga, koia oki, kia tau ki ta ratou i irinaki e ko tetai papaanga o te angaanga tika. Kua rekoti a Iehova i teia au kaveinga e manganui i roto i tana Tuatua.​—Genese 1:26, NW; Ioane 4:24; 17:17.

‘Inara kua ki te Pipiria i te au anere ua atu au kaveinga,’ i na tetai mai ei. ‘Kare e rauka iaku i te kite pouroa i te reira.’ E tika. Ka akamanako ana ra i teia tuatua: Koi puapinga ei te au kaveinga tu Atua pouroa, e teiaa atu etai i tetai atu. Ka kite koe i te reira mei ia Mataio 22:​37-39, i reira kua akaari mai a Iesu i roto i te au akauenga e te au kaveinga aiteite atu o te Ture a Mose, e puapinga maata atu etai ki tetai.

Ko teea te au kaveinga teiaa? Ko te au kaveinga maata o te Pipiria ko tera te piri atura ki to tatou pirianga ma Iehova. Me akono tatou i teia, ka riro mai Tei Anga ei akakeu anga maata no to tatou compass o te tu akono. Pera katoa, te vaira tetai au kaveinga te akamana ra i to tatou au pirianga ma tetai au tangata. Te taangaangaanga i teia ka tauturu ia tatou kia autu i te tu ko au tikai, inara kia akatakakeia te reira.

Ka akamata ana tatou ma tetai o te au tuatua mou puapinga roa i roto i te Pipiria. Eaa oki taua tuatua mou ra, e akapeea ra te reira i te akakeu anga ia tatou?

“Tei Teitei i te Enua Katoa Nei”

Te akataka meitaki maira te au Tuatua Tapu e ko Iehova to tatou Anga Mekameka, te Atua Mana Katoatoa. Kare rava aia e akaaiteia atu me kare e tupauia. E tuatua mou maata teia tei rekotiia i roto i te Pipiria.​—Genese 17:1; Koheleta 12:1.

Kua akakite oki tetai o te aronga tata i te puka o Salamo no runga ia Iehova: “Ko koe anake Tei Teitei i te enua katoa nei.” Kua tuatua te ariki taito ko Davida e: “Tei ia koe te au, e Iehova, e ko koe tei teitei ei upoko i te au mea katoa nei.” E kua akakeuia te peroveta rongoia ko Ieremia kia tata e: “Kare oki oou e aite, e Iehova e; te maata ra koe, e te maata ra toou ingoa i te mana.”​—Salamo 83:18; 1 Paraleipomeno 29:11; Ieremia 10:6.

Akapeea tatou i te taangaangaanga i taua au tuatua mou no runga i te Atua i roto i te oraanga i te au ra?

Te taka meitaki ra e koai tei tau kia puapinga maata atu i roto i to tatou au oraanga​—ko Tei Anga ia tatou e Tei Oronga i te Ora. Kare ainei i te mea tau, i reira, kia kopae i tetai tu kia tuku mai i te manako maata ki runga ia tatou uaorai​—e tu penei te pakari ra i roto i tetai papaki kare i tetai atu? Ko tetai kaveinga arataki anga pakari koia oki ‘e rave anake i te au mea ravarai ma te akakakā i te Atua.’ (1 Korinetia 10:31) Kua akanoo mai te peroveta ko Daniela i tetai akaraanga meitaki no teia tu.

Te akakite maira te tataanga taito kia tatou e kua manamanata tikai te Ariki ko Nebukanesa o Babulonia no runga i tetai moemoea e kua maro atu i te kite i tona aite anga. Kareka ra kua oripu ua te katoatoa, kua akakite tika atu a Daniela ki te ariki i tana i inangaro i te kite atu. Kua ariki ainei a Daniela i te akameitaki anga no teia? Kare, kua akakaka aia i te “Atua ra tei te rangi, ko tei akakite mai ïa i te au tuatua ngaro.” Kua akakite oki a Daniela: “Kare teianei tuatua ngaro i akakiteia mai kiaku nei, no te mea, te maata nei toku pakari i to te aronga katoa e ora nei.” E tangata akono kaveinga a Daniela. No reira rai i roto i te puka o Daniela, kua akatakaia aia e toru taime e ko tei “akaperepere maataia” i roto i nga mata o te Atua.​—Daniela 2:​28, 30; 9:23; 10:​11, 19.

Ka puapingaia koe me aru koe ia Daniela. I te aruanga i to Daniela akaraanga, ko te tu papu tikai te akakoroanga. Kia rauka iaai te ngateitei no taau i rave ra? Noatu toou turanga, ka rauka ia koe te rave kia rotai ma teia kaveinga puapinga o te Pipiria​—ko Iehova te Atu Ngateitei. Taau rave akapera anga te akariro ra ia koe kia “akaperepere maataia” i roto i tona nga mata.

Ka akamanako ana tatou i teianei e rua kaveinga te ka arataki ia tatou i roto i te ngai o te au pirianga tangata. Noatu te totoa maata o te tuatua pakari no runga ia koe uaorai, e ngai akaaoanga tikai teia o te oraanga.

“Ei Ngakau Akaaka Ra”

Ko te aronga te tuku ra ia ratou na mua kare e merengo ana. Te inangaro ra te maata anga i tetai oraanga meitaki atu, e te inangaro ra ratou i te reira i teianei. No ratou, e tu paruparu te tu tau. Te manako ra ratou i te tu akakoromaki ei apinga na tetai ke anake e akaari. Me no runga i to ratou tere anga ki mua, te akatika uaia ra etai au mea. Toou manako e iki anga tuke atu taau no te akono akapera anga mei ia ratou rai?

Te aro atura te au tavini o te Atua i taua tu i te au ra, inara auraka te reira kia akakino mai ia ratou. Te ariki ra te au Kerititiano pakari i te kaveinga koia oki “kare oki ko tei akameitaki iaia uaorai tei kiteia mai, ko ta te Atu ra i akameitaki.”​—2 Korinetia 10:18.

Te taangaangaanga i te kaveinga ia Philipa 2:​3, 4 ka tauturu mai. Te akamaroiroi maira taua irava ia koe “auraka takiri e mea e raveia ma te taumāro, e te akanengonengo puapinga kore; ei ngakau akaaka ra, i te manako akameitaki atu tetai ki tetai, auraka iaia uaorai.” Kare i reira koe “e akono i [toou] anake uaorai au mea, e akono katoa ra i to etai ke ra au mea.”

Ko tetai tei akono i te tu tau no runga iaia uaorai e tei tare meitaki me e puapinga rai aia, ko Gideona, e akava i roto i te au Epera taito ra. Kare aia i umuumu ana kia riro ei arataki no Iseraela. Inara, i te iki angaia aia kia akono i taua tuanga angaanga, kua taiku atu a Gideona no tona tu tau kore. “E kopu-tangata akaaka toku ia Manase nei, e ko au tei iti rava i te kopu-tangata o toku metua,” i akamarama atu ei aia.​—Akava 6:​12-16.

Pera katoa, i muri mai i te oronga anga a Iehova i te autu anga kia Gideona, kua akatupu pekapeka atu te au tangata o Epheraima kiaia. Akapeea a Gideona i te ariu anga atu? Kua akamaataia atu ainei tona uaorai puapinga e te autu anga? Kare. Kua kopae aia i te tumatetenga na te pau maru anga. “Eaa oki taku puapinga iti i rauka i ta kotou na?” E manako akaaka tikai to Gideona.​—Akava 8:​1-3.

E tika, te au kiteanga no Gideona kua tupu ke ana no tetai tuatau roa. Noatu rai, te vaira te puapinga i roto i te akamanako anga i te tataanga. Ka kite koe e kua rauka ia Gideona te tu tuke atu mei tei matauia i teia tuatau, e kua akono tau aia ma te reira, ei puapinga nona.

Te tu maata te akono tika ra i tetai uaorai ka rauka i te akakino i to tatou manako puapinga. Te akatikatika ra te au kaveinga Pipiria i taua manako kino, te apiianga mai ia tatou i to tatou puapinga mou i te kapiti anga ma Tei Anga e tetai atu.

Na te akonoanga i te au kaveinga Pipiria, ka autuia teia tu matauia e tatou. Kare rava tatou e akaaereia e te au manako ngakau me kare te au tu tangata. Te maata atu i ta tatou apiianga i te au kaveinga tuatua tika, ka matau meitaki atu tatou i to ratou Akamata Anga. Ae, te akamanako takake anga i te au kaveinga tu Atua i te tatauanga i te Pipiria e mea puapinga maata ia.​—Akara i te pia.

Kua maani a Iehova i te au tangata e kia teitei atu i te au animara, tei akakeu maata uaia e te tu kite. Te aruanga i to te Atua anoano te kapiti maira i te taangaanga anga i te au kaveinga tu-Atua. Ka rauka ia tatou i reira i te taangaanga meitaki i to tatou compass o te tu akono, e compass te ka arataki ia tatou ki roto i tetai akatereanga na te Atua i maani. Te oronga maira te Pipiria i te tumu kia tatou kia tapapa kare e roa atu i tetai akatereanga ou takapini i te ao i roto i reira ka ‘vai tika te tuatua-tika ra.’​—2 Petero 3:13.

[Pia/Tutu i te kapi 6]

Etai au Kaveinga Pipiria Tauturu Ua

I roto i te ngutuare:

“Auraka rava e tangata e kimi i tona uaorai meitaki, e kimi ra te tangata ravarai i to etai ke ra.”​—1 Korinetia 10:24.

“Te aroa . . . kare e kimi i te meitaki nona uaorai.”​—1 Korinetia 13:​4, 5.

“E aroa ra te tangata katoa i tana uaorai vaine mei te aroa iaia uaorai.”​—Ephesia 5:33.

“E te au vaine ra, e moraro marie kotou i ta kotou uaorai au tane.”​—Kolosa 3:18.

“E akarongo mai i to metua tane i anau ei koe ra, e auraka e akavaavaa i to metua vaine me ruaine aia ra.”​—Maseli 23:22.

I te apii, te angaanga, me kare i te pitiniti:

“E mea viivii na Iehova te aite pikikaa ra . . . Te angaanga nei te tangata kino i te angaanga pikikaa.”​—Maseli 11:​1, 18.

“Te tangata i keia na, auraka aia e keia akaou: e rave ra i te angaanga.”​—Ephesia 4:28.

“Ko te tangata kare e rave i te angaanga, auraka katoa aia e kaikai.”​—2 Tesalonia 3:10.

“E ta kotou au mea e rave ra, e rave ïa ma te ngakau katoa, mei te mea e na te Atu.”​—Kolosa 3:23.

“Ei akono meitaki ta matou i te au mea katoa nei.”​—Ebera 13:18.

Te tu no te apinganui:

“Ko tei rapurapu ra i te akaputu i te apinga kia maata, kare e kore te ara.”​—Maseli 28:20.

“Ko tei inangaro i te ario ra, kare ïa e mareka i te ario.”​—Koheleta 5:10.

Te akataka anga i to tetai tu tau:

“Te kimi i tona uaorai kakā, kare ïa i te kakā.”​—Maseli 25:27.

“Na tetai ke koe e akapaapaa, auraka toou uaorai vaa.”​—Maseli 27:2.

“Teia taku tuatua kia kotou katoatoa . . . eiaa e maata te manako iaia uaorai, i tei tau iaia kia manako ra.”​—Roma 12:3.

“Kia manako tetai iaia uaorai e, e tangata maata aia, e kare ua ana e puapinga, kua vavare aia iaia uaorai.”​—Galatia 6:3.

[Tutu i te kapi 5]

Kua akameitaki a Daniela i te Atua

[Tutu i te kapi 7]

Te akonoanga i tetai ma te au kaveinga tu Atua te akatupu maira i te au pirianga tau e te mataora

[Akameitakianga no te Tataanga i te kapi 7]

U.S. Fish & Wildlife Service, Washington, D.C./Robert Bridges