E Arataki i Toou Au Takainga na te au Kaveinga a te Atua

“[Ko Iehova], ko tei akakite ia koe i te mea e puapingaʼi koe na.”​—ISAIA 48:17.

1. Akapeea ta Tei Anga ra arataki anga i te au tangata?

I TE tauta anga te au taineti kia akatuera i te roka o te au mea muna o te ao katoa e pini ua ake, kua umere ratou i te maata o te ririnui e akaputuia ra i roto i te au paraneta takapini ia tatou. To tatou ra​—e etu apa ua te maata​—te akatupu maira i te ririnui e “100 pirioni pomu hydrogen te aruru ra i te tekene ravarai.” Te rauka ra i Tei Anga i te akatere e te arataki i taua au kopapa maata i te rangi ra na tona mana ua. (Iobu 38:32; Isaia 40:26) Akapeea oki tatou te au tangata nei, tei orongaia mai ma te anoano rangatira, te kite akono tau, te akamanako anga e te kite katoa i te pae vaerua? Na roto i teea tu i kite ei Tei Anga mai ia tatou i te tika kia arataki ia tatou? Te arataki aroa ra aia ia tatou na tana au ture apa kore e te au kaveinga teitei, kapiti katoa ma to tatou akava ngakau tei tereni meitakiia.​—2 Samuela 22:31; Roma 2:​14, 15.

2, 3. I teea tu akarongo anga ta te Atua kite anga i te marekaanga?

² Te kite ra te Atua i te mareka anga i te au mea ora kite tei iki ra kia akarongo kiaia. (Maseli 27:11) Kare i porokaramu mai ia tatou kia kauraro matapo ua ei au ropoti manako kore, kua oronga maira a Iehova kia tatou i te anoano rangatira kia rauka ia tatou i te rave i te au ikianga kite kia rave i te tika ra.​—Ebera 5:14.

³ Ko Iesu, tei akaata apa kore maira i tona Metua, kua tuatua ki tana au pipi: “Ko kotou toku oa, kia akono kotou i te au tuatua katoa taku i akaue atu ia kotou na. Kare atura au e karanga kia kotou e, e tavini.” (Ioane 15:​14, 15) I te au tuatau taito ra, e meangiti ua te ikianga a te tavini mari ra kia akarongo i te ikuiku anga a tona pu. I tetai pae, te akatupuia maira te oa anga na te akakite anga i te au tu te akamareka ra i te ngakau. Ka rauka kia riro tatou ei au oa no Iehova. (Iakobo 2:23) Ka akamaroiroiia teianei oaanga na te kapiti anga aroa. Kua kapitiia e Iesu te akarongo ki te Atua ma te aroa i tana tuatua anga: “Kia anoano mai te tangata iaku ra, ka akono ïa i taku tuatua: e ka akaperepere mai oki taku Metua iaia.” (Ioane 14:23) I te reira tu​—e kia arataki meitaki ia tatou​—te pati maira Iehova ia tatou kia akono i tana au kaveinga.

Au Kaveinga a te Atua

4. Akapeea koe me akataka i te au kaveinga ra?

⁴ Eaa te au kaveinga? Kua akatakaia mai te kaveinga ei “tuatua mou matauia me kare akatumuia: tetai ture, apiianga, me kare manakoanga i akatumuia maira me kare i aere mai ei etai atu manakoanga.” (Webster’s Third New International Dictionary) Te akakite maira te apiianga matakite i te Pipiria e te oronga maira to tatou Metua i te rangi i te au aratakianga akatumuia te kapiti ra i te au turanga tuke ke e te au tuanga o te oraanga. Te rave ra aia i teianei ma to tatou puapinga mutu kore i roto i tona manako. Te tau ra te reira ki ta te Ariki pakari ko Solomona i tata: “E akarongo mai, e taku tamaiti e āriki mai i taku nei tuatua e e riro toou ra au mataiti i te maata i te ora anga nei. Ko te mataara o te pakari taku e apii atu ia koe nei; te arataki nei au ia koe na te au ara tika ra.” (Maseli 4:​10, 11) Te au kaveinga puapinga te orongaia maira e Iehova tei runga i to tatou pirianga kiaia e ma to tatou au oa tangata nei, ta tatou akamori anga, e to tatou oraanga i te au ra ravarai. (Salamo 1:1) E akamanako tatou i etai o taua au kaveinga akatumu anga ra.

5. E oronga mai i etai akatauanga tumu no te au kaveinga?

⁵ No runga i to tatou pirianga ma Iehova, kua tuatua a Iesu: “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.” (Mataio 22:37) Kapiti katoa mai oki, kua oronga maira te Atua i te au kaveinga te piri atura ki ta tatou akonoanga ma te au oa tangata nei, mei te Ture Auro ra: “E te au mea katoa ta kotou i anoano ia etai ke ra, na reira katoa kotou ia ratou.” (Mataio 7:12; Galatia 6:10; Tito 3:2) No runga i te akamori anga, te akamaroiroiia maira tatou: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga.” (Ebera 10:​24, 25) I etai atu tu o to tatou oraanga i te au ra ravarai, te tuatua ra te apotetoro ko Paulo: “E teianei, te kai ra e te inu ra oki, e te au mea ravarai ta kotou e rave na, e rave anake ïa ma te akakakā i te Atua.” (1 Korinetia 10:31) Te vaira e maata ua atu etai atu au kaveinga i roto i te Tuatua a te Atua ra.

6. Akapeea te akataka anga i te au kaveinga mei te au ture ra?

⁶ Te au kaveinga e au tuatua mou ora e te meitaki oki, e te apii ra te au Kerititiano pakari kia inangaro ia ratou. Kua akauru a Iehova ia Solomona kia tata: “E akono meitaki mai i taku nei au tuatua; e ariu mai i to taringa ki taku e tuatua nei. Auraka te reira e ngaro ke i to mata na: e tāpu marie ra i te reira ki roto rava i to ngakau na. Ko te ora oki te reira ki te aronga i kite atu ia ratou ra, e ora oki to ratou au kopapa katoa i te reira.” (Maseli 4:​20-22) Eaa te tuke anga o te au kaveinga mei te au ture? Te oronga maira te au kaveinga i te tumu anga no te au ture. Te au ture, te akaraanga tau ra, penei no tetai tuatau me kare turanga akatakaia ra, mari ra ko te au kaveinga kare e openga. (Salamo 119:​111) Te au kaveinga a te Atua ra kare e piro e kare katoa e ope. Te tika ra te au tuatua akauruia a te peroveta ko Isaia: “Te mae nei te ngangaere, te maeaea nei te tiare: kareka te tuatua a to tatou Atua, e tu ïa e rimua.”​—Isaia 40:8.

E Manako e kia Akono ki Runga i te Tumuanga o te Au Kaveinga

7. Akapeea te akamaroiroi anga a te Tuatua a te Atua ra ia tatou kia tamanako e kia akono i te tumuanga o te au kaveinga ra?

⁷ E putuputu, ‘te tuatua a to tatou Atua’ i te akamaroiroi mai ia tatou kia manako e kia akono ki runga i te tumuanga o te au kaveinga. I te pati anga ia Iesu kia akataka mai i te Ture, kua akakite mai aia e rua nga akakiteanga poto​—tetai te akaketaketa maira i te anoano atu ia Iehova, te rua te akakite maata maira i te aroa atu i toou tangata tupu. (Mataio 22:​37-40) I te raveanga i te reira, kua taiku ua maira Iesu i te tuanga poto no te akataka anga i te tumuanga o te Ture a Mose, tei akakiteia maira ia Deuteronomi 6:​4, 5: “Ko Iehova to tatou Atua, okotai Iehova. E teianei, e inangaro atu koe i to Atua ia Iehova ma to ngakau katoa, e ma to vaerua katoa, e ma to maroiroi katoa.” I te akaraanga, i roto katoa i te manako o Iesu ko te arataki anga te kitea ra ia Levitiku 19:18. I te ngai taka meitaki, poto ua e te ketaketa, o te openga o te puka a Koheleta, te tapoto maira te au tuatua a te Ariki ko Solomona i te au ture tu-Atua e manganui: “E akarongo ana tatou i te akaotianga o taua au tuatua katoa nei; Ko te Atua te mataku atu, e akono oki i tana au akauenga: ko ta te tangata katoa ïa e pini ua ake. E apai oki te Atua i te au tuatua katoatoa ki te akavaanga, e te au mea ngaro katoa ra, te au mea meitaki, e te kino katoa ra.”​—Koheleta 12:​13, 14; Mika 6:8.

8. Eaa ra i riro ei ei paruru anga kia mou ngaueue kore i te au kaveinga tumuanga o te Pipiria?

⁸ Te mou ngaueue kore anga i taua au kaveinga akatumuia ra ka tauturu ia tatou kia kite e kia akono i te au arataki anga akatakaia ra. Pera katoa, me kare tatou e kite meitaki e e ariki i te au kaveinga tumuanga ra, penei kare e rauka ia tatou te akanoo i te au ikianga tau e penei ka ngoie ua te akangaueue i to tatou akarongo. (Ephesia 4:14) Me ka tamou tatou i taua au kaveinga ra i roto i to tatou manako e te ngakau, ka papa tatou kia taangaanga ia ratou i te rave anga i te au ikianga. Me ka akono tatou ia ratou ma te kite, ka apai mai ratou i te autu anga.​—Iosua 1:8; Maseli 4:​1-9.

9. Eaa ra i kore ei e ngoie ua kia kite e kia akono oki i te au kaveinga Pipiria?

⁹ Te kiteanga e te akonoanga i te au kaveinga Pipiria kare e ngoie ua ana mei te aruanga i te au ture akanooia ra. Ei au tangata apa ua nei penei ka kopae ke tatou i te tautaanga te umuumuia ra kia tamanako i te au kaveinga. Penei ka iki tatou i te kite mama ua i tetai ture i te aro atuanga tatou i te ikianga me kare i tetai tu ngata. I etai taime penei ka kimi tatou i te arataki anga mei tetai Kerititiano pakari—​penei e tangata pakari no te putuputuanga​—ma te manakoanga kia rauka tetai ture akatakaia te piri maira ki to tatou turanga. Inara, kare te Pipiria me kare te au puka akatumuia i te Pipiria ra e oronga mai i tetai ture taka meitaki, e noatu me te orongaia maira kia tatou tetai, penei kare te reira i tetai arataki anga tapoki no te au tuatau katoa e i raro ake i te au turanga katoatoa ra. Penei ka maara ia koe tetai tangata tei pati atura kia Iesu: “E te Orometua, e tuatua ake ana koe ki taku tuakana, e tua aia i to maua apinga.” Kare aia i oronga viviki ua i tetai ture kia akakore i te maroanga i rotopu i te au tangata ra, kua oronga atura Iesu kiaia i tetai kaveinga maata atu: “E akono meitaki e e matakite ia kotou i te morimori apinga.” No reira kua oronga atura Iesu i te arataki anga tei puapinga ra i reira e te vai nei oki i teianei.​—Luka 12:​13-15.

10. Akapeea te akonoanga ia tatou uaorai kia rotai ma te au kaveinga i te akakiteanga i te au akakeu anga o to tatou ngakau?

¹⁰ Penei kua kite ana koe i te au tangata tei akatika ra i te akarongo reka kore ua i te au ture, no te mataku i te akautunga. Ko te akangateitei i te au kaveinga te akakore atura i taua tu manako ra. Na te tu tikai o te au kaveinga e akakeu i te aronga i akatereia ra e ratou kia akono mei te ngakau maira. Ko te tika, te maataanga o te au kaveinga kare e o atu ana ki te akautunga viviki no te aronga kare ra e akono i te reira. Na teia i oronga mai kia tatou i te tika kia akakite eaa tatou i akarongo ei kia Iehova, e eaa oki te akakeuanga a to tatou ngakau. Te kite nei tatou i te akatauanga i to Iosepha ra akakore anga i te au manako tau kore o te vaine a Potiphara ra. Noatu rai e kare a Iehova i oronga i tetai ture tataia no te akaturi anga e no te akautunga tau i te Atua ra tei akatakaia mai no te pirianga ma te vaine a tetai tangata ke ra, kua matakite a Iosepha i te au kaveinga no te tiratiratu anga ta te Atua i akanoo no te akaipoipo anga. (Genese 2:24; 12:​18-20) Kua kite tatou mei tana i akono ra e ko taua au kaveinga ra e mana ririnui ia kiaia: “Eaa oki au e tikaʼi kia rave i tenana kino maata, e te ara i te Atua?”​—Genese 39:9.

11. I roto i teea au ngai to te au Kerititiano anoano anga kia aratakiia e ta Iehova ra au kaveinga?

¹¹ I teia tuatau, te anoano ra te au Kerititiano kia aratakiia ratou e te au kaveinga a Iehova no te au tumu no ratou uaorai, mei te ikianga i te au oa, te tamataora anga, te akatangianga imene, e te apinga tatau. (1 Korinetia 15:33; Philipi 4:8) Ia tatou e tupu nei i te kite, te marama anga, e te ariki anga ia Iehova e tana au turanga, to tatou akava ngakau, e to tatou tu akono tau, ka tauturu ia tatou kia akono i te au kaveinga tu-Atua i raro ake i te au turanga ravarai te ka aro atu tatou, noatu rai i te au tumu muna ravarai. I te arataki angaia e te au kaveinga Pipiria, kare tatou e kimi i te au aere keanga tau kore i te au ture a te Atua ra; kare katoa oki tatou e aru i te aronga te tauta ra kia kite eaa te mamao e raukai ia ratou te aere ma te kore e aati i tetai ture. Te kite nei tatou e ko taua manakoanga ra e topaanga no tatou uaorai e te kino katoa oki.​—Iakobo 1:​22-25.

12. Eaa te taviri kia riro ei kia aratakiia e te au kaveinga tu-Atua ra?

¹² Te kite ra te au Kerititiano pakari e ko te taviri ki te aruanga i te au kaveinga tu-Atua ra ko te anoanoanga kia kite akapeea to Iehova ra manako ngakau no tetai tumu. “Ko kotou, tei inangaro ia Iehova,” ta te tata taramo i akamaroiroi mai, “kia rikarika i te kino ra.” (Salamo 97:10) I te papaanga mai i etai o te au apinga ta te Atua ra i akataka ei mea kino, te tuatua ra a Maseli 6:​16-19: “Eia nga mea e ono ra ta Iehova e riri nei, e te itu oki, e mea viivii katoa ïa na tona vaerua: Ko te mata teitei, te arero pikikaa, e te rima i maringi ei te toto ara kore ra; Ko te ngakau i akakoro i te tuatua kino ra, te vaevae e oro viviki e rave i te kino, Te kite pikikaa, e tuatua i te tuatua pikikaa ra, e ko tei akatupu i te karo i rotopu i te au taeake ra.” Me akatereia to tatou au oraanga e te inangaro kia akaata akapeea to Iehova manako ngakau no runga i taua au tumu akatere ra , ko te nooanga kia tau ma te au kaveinga ka riro mai ei ravenga tamou marieanga.​—Ieremia 22:16.

Te Umuumuia ra te Akakeu Anga Meitaki

13. Eaa te tu manakoanga ta Iesu ra i akaketaketa mai i tana Tuatua i runga i te Maunga ra?

¹³ Te kiteanga e te akonoanga i te au kaveinga ka paruru katoa ia tatou mei te ereere o te tu ngere anga i te akamori. E tuke anga tetai i rotopu i te aruanga i te au kaveinga e te akarongoanga maata i te au ture ra. Kua akakite meitaki a Iesu i teia i tana Tuatua i runga i te Maunga ra. (Mataio 5:​17-48) Kia maara e ko te aronga i akarongo atura ia Iesu e au ngati Iuda, no reira te tau ra to ratou tu akono kia akatereia e te Ture a Mose. Inara ko te tika e manako taruri ke to ratou i te Ture. Kua riro ratou kia akaketaketa i te reta o te Ture kare ra i tona vaerua. E kua akaketaketa ratou i ta ratou au ikuikuanga, na te tuku anga i te reira ki runga ake i te apiianga a te Atua. (Mataio 12:​9-12; 15:​1-9) Ei tupuanga, kare te au tangata i reira i apiiia kia manako i te au kaveinga.

14. Akapeea ta Iesu ra tauturu anga i te aronga akarongo mai kiaia ra kia manako i runga i te tumuanga o te au kaveinga ra?

¹⁴ Ei tuke anga, kua kapiti atu a Iesu i roto i tana Tuatua i runga i te Maunga ra i te au kaveinga i roto i nga ngai e rima no te akono meitaki: te riri, te akaipoipoanga e te kopae anga, te au taputou, te tutakianga kino, e te aroa e te makitakita. I roto i te au tu tataki tai, kua akaari a Iesu i te puapinga i te aruanga i te kaveinga. No reira kua akateitei a Iesu i te turanga akono tau no tana au pipi. Ei akatauanga, no runga i te tumu no te akaturi, kua oronga mai aia kia tatou i te kaveinga tei paruru ra kare i ta tatou au angaanga anake mari ra i to tatou au manako katoa e te inangaro oki: “Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.”​—Mataio 5:28.

15. Akapeea e raukai ia tatou kia kopae ke i tetai ua atu manako anga kia aru i te ture?

¹⁵ Te akatutu maira teianei akatauanga e ka tau tatou kia kore e ngere i te kite i te manako anga e te vaerua oki o te au kaveinga a Iehova. Kare tatou e tau kia tauta kia rauka mai ta te Atua ra akaperepere anga na te akaari anga i te akono tau mei vao ua. Kua akakite a Iesu i te tarevake o taua tu akono ra na te touanga ki to te Atua ra aroa ua e te inangaro. (Mataio 12:7; Luka 6:​1-11) I te aruanga i te au kaveinga Pipiria, ka kopae ke tatou i te tautaanga kia akono (me kare kia akaue i etai ke ra kia rave) i te au akauenga ketaketa no te rave e auraka e rave kia mamao ke atu i te au apiianga a te Pipiria. Ka maata atu to tatou manakoanga no te au kaveinga o te aroa e te akarongo anga ki te Atua i to te akaraanga o vao ua i te akamori anga.​—Luka 11:42.

Au Tupuanga Mataora

16. Oronga mai i etai akatauanga no te au kaveinga i roto i etai au aratakianga ture i te Pipiria ra.

¹⁶ Ia tatou e tauta ra kia akarongo kia Iehova, e puapinga maata kia kite e te akatumuia ra tana au ture ki runga i te au kaveinga puapinga. Ei akatauanga, ka tika te au Kerititiano kia kopae ke i te akamori itoro, te ainga tau kore, e te taangaanga tarevake i te toto. (Angaanga 15:​28, 29) Eaa te vaira i te turanga o te Kerititiano i runga i taua au tumu ra? Te tau tikai ra te Atua i ta tatou akamori anga katoa; ka tau oki tatou kia tiratiratu ki to tatou tokorua; e ko Iehova te Oronga Ora. (Genese 2:24; Exodo 20:5; Salamo 36:9) Na te arikianga i teianei au kaveinga ka akariro kia ngoie atu i te ariki anga e te aru anga i te au ture e piri maira.

17. Eaa etai tupuanga meitaki ka rauka mai i te manako anga e te akonoanga i te au kaveinga Pipiria ra?

¹⁷ Ia tatou e kite ra i te au kaveinga e ka akono ei ia ratou, ka kite tatou e no to tatou meitaki ratou ra. Te au puapinga vaerua e rekarekaia ra e te au tangata o te Atua e putuputu te taime te kapitiia maira e te au puapinga tikai. Ei akatauanga, te aronga tei akamutu ra i te kai avaava, tei akono ra i te au oraanga akono tau, e tei akangateitei ra i te tapu o te toto te kopae ra i te topaanga ki etai au maki mate. Mei te reira katoa oki, ko te nooanga rotai ma te tuatua mou tu-Atua penei ka akapuapinga ia tatou i te pae o te oraanga, te taiate, me kare te pae ngutuare tangata. Etai ua atu au puapinga ka akapapu mai i te meitaki o ta Iehova au turanga, e te tau tika ra ratou. Inara kare ko te raukaanga taua au puapinga ra te tumu maata no te akonoanga i te au kaveinga a te Atua ra. Te akarongo ra te au Kerititiano mou ia Iehova no to ratou inangaro iaia, no te mea te tau tikai ra aia no ta ratou akamori anga, e no te mea ko te mea tika ia kia raveia.​—Apokalupo 4:11.

18. Me te anoano ra tatou kia riro ei au Kerititiano autu, eaa te ka tau kia arataki i to tatou oraanga?

¹⁸ Te tukuanga i to tatou oraanga kia aratakiia e te au kaveinga Pipiria ka taki atu ki te tu teitei no te oraanga, penei ka akapiri vaitata mai i etai atu ki ta te Atua ra aerenga. Te mea puapinga maata rava atu, te akangateitei ra to tatou oraanga ia Iehova. Kua kite tatou e ko Iehova e Atua aroa tikai tei anoano ra i te meitaki rava no tatou. Me tuku tatou i te ikianga kia tau ki te au kaveinga Pipiria e ka kite i ta Iehova ra akameitaki anga ia tatou, ka riro tatou kia manako ngakau piri vaitata atu kiaia ra. Ae, ka akatupu maata atu tatou i te pirianga aroa ma to tatou Metua i te rangi ra.

Maara Ainei ia Koe?

• Eaa te kaveinga?

• Akapeea te tuke anga o te au kaveinga mei te au ture?

• Eaa ra i puapingai no tatou kia manako e kia akono i runga i te tumuanga o te au kaveinga?

[Pia i te kapi 20]

Ko Wilson, tetai Kerititiano no Ghana mai, kua akakiteia atu e i nga ra tokoiti, ka akamutuia aia mei tana angaanga. I tona ra openga i te angaanga, kua akaueia aia kia orei i te motoka o te manitia akaaere o te kamupani ra. I te kitea anga e Wilson tetai moni maata i roto i te motoka ra, kua tuatua atu tona tangata teitei i runga ake iaia e na te Atua i tuku mai te moni no te mea ka akamutuia a Wilson mei te angaanga i taua ra ra. Inara, i te akono anga i te kaveinga Pipiria no te tiratiratu, kua oronga atura Wilson i te moni ki te akaaere ra. I te poitirere anga e te umere anga, kare te akaaere i oronga anake i te angaanga tamou i reira tikai na Wilson mari ra kua akateitei katoa i tona turanga ei mema teitei no te pupu o te kamupani ra.​—Ephesia 4:28.

[Pia i te kapi 21]

Ko Rukia tetai vaine Albania e 60 ona mataiti. No tetai pekapeka i te pamiri kare aia i tuatua ana ki tona tungane tere atu i te 17 mataiti. Kua akamata aia i te apiianga i te Pipiria ma te Au Kite o Iehova e kua kite e ko te au Kerititiano mou ka tika kia au ma etai atu, auraka e akamoupuku. Kua pure aia i te po katoa, e ma tona ngakau te tukituki ra, kua aere atu aia ki te are o tona tungane. Kua vai mai tana niti i te ngutupa. Ma te poitirere, kua ui mai aia kia Rukia: “Koai tei mate? Eaa taau angaanga i konei?” Kua pati atura Rukia kia aravei i tona tungane. Kua akamarama maru atura e i te apiianga i te au kaveinga Pipiria e ia Iehova oki kua akakeukeu iaia kia akatupu i te au ma tona tungane. I muri ake i te au roi mata e te au takave anga, kua akono raua i teia taokotai anga taka ke.​—Roma 12:​17, 18.

[Tutu i te kapi 23]

Mataio 5:​27, 28

[Tutu i te kapi 23]

Mataio 5:3

[Tutu i te kapi 23]

Mataio 5:24

[Tutu i te kapi 23]

“E kite aturā Iesu i te urupu tangata ra, kake atura aia ki runga i te maunga; noo iora ki raro, e kua aere maira tana au pipi kiaia. Kua tuatua akera tona vaa, apii atura ia ratou.”​—MATAIO 5:​1, 2