Ka Rauka ia Koe te Autu i te Maromaroa

KA RAUKA iaai i te tuatua e kare rava ratou i kite ana i te mamae te apai maira i te tu maromaroa? E manganui te au tumu te ka akariro ia tatou kia maromaroa. Inara, ko tei kino pakari koia oki ko te tu maromaroa o te au vaine kare rava i akaipoipo ana me kare te au vaine takaua me kore ra tei akarukeia.

Ei akaraanga, te akakite maira tetai vaine mapu Kerititiano ko Frances e: “I te tae anga au ki te 23 mataiti, i te akaraanga kua akaipoipo pouroa toku au oa, e kua toe ua mai ko au.”a Penei ka maata ua atu te manako anga takake i te au mataiti e aere maira e kua kotingaia te manakonakoanga no te akaipoipo anga. “Kare rava au i akakoro ana e kia vai ua ma te kore e akaipoipo, e te inangaro nei rai au i te akaipoipo me tupu mai te tuatau,” i na Sandra ei, teianei tei roto i te openga anga o tona 40 mataiti. Te akakite maira a Angela, tei roto i tona 50 mataiti, e: “Kare au i tauta pakari ana e kia vai mai ma te kore e akaipoipo, inara kua tupu akapera te au mea. Kua iti ua te au tungane kare i akaipoipo ake i roto i te ngai tei tukunaia au ki reira ei painia takake.”

Ma te akameitaki ua, e manganui te au vaine Kerititiano tei iki kia kore e akaipoipo no te mea te akarongo tiratiratu ra ratou i ta Iehova ako anga kia akaipoipo “kia tau ra i te Atu.” (1 Korinetia 7:39) Kua akatano meitaki ua etai ki te turanga kare e akaipoipo, inara te kite ra tetai e kua maata mai te anoano anga kia akaipoipo e kia anau tamariki i te au mataiti i aereia mai. “Te riro ra tetai ngai va i te pae ngakau, tei akatupuia no te kore e tokorua akaipoipo, ko toku ia tokorua tamou,” i aaki ei a Sandra.

Ko tetai atu au tumu, mei te akonoanga i te au metua ruaine, penei te akamaata ra i te tu maromaroa. “I te mea kare au i akaipoipo ake, kua tapapa mai te pamiri e kia akono atu au i to matou nga metua ruaine,” i na Sandra ei. “E 20 mataiti kua akono au i te maata anga o teia apainga, noatu rai ko au tetai o te ono tamariki. Ka ngoie ua te oraanga ma tetai tane te ka tauturu mai i tei anoanoia e au.”

Te taiku maira a Frances i tetai atu tumu te akamaata ra i tona tu maromaroa. Te akakite maira aia: “Kua ui tika ua mai tetai au tangata, ‘Eaa koe i kore ei i akaipoipo ake?’ Te akariro ra taua tuatua iaku kia manako e kua apa au no toku turanga kare i akaipoipo ake. I te au akaipoipo taku i aere ana, kua ui mai tetai kiaku i taua ui anga emiemi ra, ‘No reira, aea oki koe e akaipoipo ei?’ Kua akamata au i te manako, ‘Me kare te au tungane manako pae vaerua e reka mai ana iaku, penei kare i rauka iaku te au tu Kerititiano umuumuia me kare penei kare au e manea roa ana.’”

Akapeea e autuiai te tu manako ngakau o te takake anga e te maromaroa? Me e apinga tetai, eaa te ka rauka i tetai i te tauturu mai?

Irinaki ki Runga ia Iehova

Kua imene te tata taramo ra: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.” (Salamo 55:22) Te tuatua “apainga” i roto i te tataanga Epera te aite anga tikai “tuanga,” e te taiku ra no runga i te au umuumu anga e te au taitaia ka mamae atu tatou no ta tatou tuanga i roto i te oraanga. Te kite maata nei a Iehova no runga i teia au apainga i tetai atu e ka rauka i te oronga mai i te maroiroi kia tatou kia akono atu i te reira. Te irinaki anga ki runga i te Atua ko Iehova kua tauturu ia Angela kia autu ua atu i te au manako maromaroa. No tana angaanga orometua tamou, kua maara iaia: “I te akamata anga au i te painia, kua noo maua ko toku patana ki tetai ngai mamao mei te au putuputuanga i te pae mai. Kua apii maua i te irinaki tamou atu ki runga ia Iehova, e kua tauturu mai teia irinaki anga iaku i toku oraanga katoa. Me tupu mai te au manako papu kore kiaku, kua tuatua au kia Iehova e kua tauturu mai aia iaku. Kua riro a Salamo 23 ei akapumaana anga, e e tatau putuputu ana au i te reira.”

E apainga puapinga ta te apotetoro ko Paulo i akono. I nga atianga e toru, kua ‘pati atu aia i te Atu i taua mea ra, kia akataka keia mei iaia.’ Kare a Paulo i tauturu temeio uaia, inara kua rauka mai iaia tetai taputou e ka akaora to te Atua tu takinga meitaki kare i tau iaia. (2 Korinetia 12:​7-9) Kua kite katoa a Paulo i te mea muna o te tu merengo ua. Kua tata aia i muri mai: “I te au ngai katoa e te au mea katoa, kua piki ïa au i te merengo e te pongi, te taonga nui e te ngere. E tika iaku te au mea ravarai nei i te Mesia, ko tei akamaroiroi mai iaku nei.”​—Philipi 4:​12, 13.

Akapeea tetai i te irinaki anga ki runga i te maroiroi o te Atua me te akamaroiroi koreia ra me kare te maromaroa ra? Kua tata a Paulo: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Philipi 4:​6, 7) Te taangaanga ra a Sandra i teia ako anga. Te akamarama maira aia: “No te tu takaua, e akapou ana au i te tuatau ko au ua. Te oronga mai nei teia i te tuatau maata kiaku kia pure kia Iehova. Te piri vaitata nei au kiaia e ka tuatua ua kiaia no runga i toku au manamanata e te au rekareka anga.” E te akakite maira a Frances: “Te tamakianga i te au manako papu kore ko au ua e tamaki anga ngata ia. Inara te akakite tika anga i toku manako kia Iehova te tauturu maata maira. Te papu nei iaku e te manako maira a Iehova no runga i tetai apinga te ka akakino i toku turanga pae vaerua e te pae ngakau.”​—1 Timoteo 5:5.

“Ka Rave Atu Tetai i ta Tetai Apainga”

I roto rai i te taokotai anga taeake Kerititiano, kare te au tu teiaa e akono uaia e tetai ra. “Ka rave atu tetai i ta tetai apainga, kia pera kotou i te akatika i te ture a te Mesia,” i raurau mai ei te apotetoro ko Paulo. (Galatia 6:2) Na roto i ta tatou taokotai anga ma te au taeake Kerititiano, ka rauka ia tatou te “tuatua meitaki” o te akamaroiroi anga te ka akamama mai i te teiaa o te tu maromaroa.​—Maseli 12:25.

Ka akamanako, katoa, i ta te au Tuatua Tapu e akakite ra no runga i te tamaine a te Akava Iseraela ko Iepheta. I mua ake ka autu atu ei i te enemi maata o Amona ra, kua tia a Iepheta i te oronga atu kia Iehova i te ka aere mua mai ki vao i tona ngutuare i te akameitaki iaia. Kua riro mai te reira e ko tana tamaine. (Akava 11:​30, 31, 34-36) Noatu te aite anga o te reira e ka vai takaua aia e kia tuku ua atu i tona akakoroanga kia anau tamariki, kua kauraro puareinga ua te tamaine a Iepheta i teia tia e kua tavini i te ngai tapu i Silo no te katoa anga o tona oraanga. Kua manako koreia ainei tana tuku anga atinga? Ei tuke anga: “E aere rai te au tamaine i Iseraela ra i te au mataiti katoa, e paapaa i te tamaine a Iepheta ngati Gileada, taki a rā i te mataiti okotai.” (Akava 11:40) Ae, ka rauka i te akameitaki anga i te akamaroiroi i te aronga e ariki ra i te reira. No reira, auraka tatou e poka i te akameitaki i te aronga tau ra.

Ka meitaki katoa tatou i te akamanako atu i to Iesu akaraanga. Noatu kare i te peu na te ngati Iuda kia tuatua te tane ki tetai vaine, kua akapou a Iesu i tetai tuatau kia Maria raua ko Mareta. Papu e, e nga vaine takaua raua me kare e nga vaine kare i akaipoipo ra. Kua inangaro a Iesu ia raua kia rekareka i te au puapinga i te pae vaerua o tona pirianga oa. (Luka 10:​38-42) Ka rauka ia tatou te aru i to Iesu akaraanga na te kapitianga mai i to tatou au tuaine pae vaerua kare i akaipoipo ake ki roto i te au tuatau oaoa anga e na te akapapa anga i te piri atu ki roto i te angaanga tutuanga ma ratou. (Roma 12:13) Te ariki ra ainei ratou i taua manako anga? Kua tuatua mai tetai tuaine: “Te kite ra au e te inangaro maira te au taeake e te ariki maira iaku, inara te ariki meitaki atu nei au me manako ua mai ratou iaku.”

“I te mea kare a matou tangata i piri mai kia matou,” i akamarama mai ei a Sandra, “e anoano maata to matou kia inangaroia mai, kia riro e ko tetai tuanga i roto i te pamiri o te au tungane e te au tuaine pae vaerua.” Te taka meitaki ra, te manako maira a Iehova i taua aronga, e ka taokotai tatou kiaia me akakeu tatou ia ratou kia manako e te inangaroia ra e te aroaia maira. (1 Petero 5:​6, 7) Kare taua manako anga e akangaropoinaia, ko “tei aroa i te ao ra, kua oronga aia i te apinga na Iehova; e nana [na te Atua ko Iehova] rai e tutaki mai iaia i taua mea ra.”​—Maseli 19:17.

“Ei Runga Iaia Uaorai ta te Tangata Ravarai Apainga”

Noatu ka rauka i tetai i te tauturu mai, e ka riro ta ratou turuanga ei akamaroiroi anga, “ei runga iaia uaorai ta te tangata ravarai apainga.” (Galatia 6:5) Inara, te rave anga i te apainga o te maromaroa, ka anoanoia tatou kia matakite i tetai au mea tumatetenga. Ei akatauanga, penei ka autu te tu maromaroa ia tatou me kare tatou e tuatua ua. I tetai tua, ka rauka ia tatou te autu i te tu maromaroa ma te tu aroa. (1 Korinetia 13:​7, 8) Te orongaanga e te tuaanga e nga mataara meitaki ia i te kite anga i te mataora​—noatu to tatou au turanga. (Angaanga 20:35) “Kare e maata ana toku taime i te manako atu i te tu maromaroa,” i na tetai tuaine painia angaanga pakari ei. “Me manako tau ua au e te maata te angaanga, kare au e manako maromaroa ana.”

Kia matakite katoa tatou auraka te maromaroa e opara ia tatou ki roto i tetai pirianga kare e meitaki ana. Ei akaraanga, mei teaa te mii i te akatika i te anoano no te akaipoipo kia akamatapoiri ia tatou ki te au manamanata e manganui te tupu maira mei te akaipoipo anga i tetai tangata irinaki kore koia tikai te ako anga Tuatua Tapu kia kopae i taua amo! (2 Korinetia 6:14) Kua tuatua tetai vaine Kerititiano akatakakeia e: “Te vaira tetai apinga kino roa atu i te takaua. Koia oki ko te akaipoipo anga i tetai tangata kare i tau tikai.”

Ko tetai manamanata kare e rauka i te akatikatikaia penei kia akakoromakiia, no tetai tuatau ua. Ma te tauturu a te Atua, ka rauka e kia autuia te manako maromaroa. Ia tatou e tavini ua atura ia Iehova, kia papu tatou e a tetai ra ka akamerengo pouroaia to tatou au anoano i roto i tetai mataara meitaki roa.​—Salamo 145:16.

[Tataanga Rikiriki i Raro]

[Au Tutu i te kapi 28]

Ka rauka te maromaroa kia autuia na te orongaanga e te tuaanga