Kia Matakite, kia Tere ki Mua ma te Mataku Kore!

Ripoti No te Au Uipaanga Takake

KOAI tei kore e akatika e te noo nei tatou i roto i te “au tuatau kikino tei ngata roa no te akono atu”? Ei Au Kite o Iehova, kare tatou i akataka keia mai mei te au taomi anga o te ora anga i “te au ra openga ra.” (2 Timoteo 3:​1-5, NW) Inara te kite nei tatou e te anoano ra te au tangata i te tauturu. Kare ratou i marama i te aiteanga o te au tupu anga i te ao. Te anoano ra ratou i te pumaana e te manakonako anga. Eaa oki, ta tatou tuanga maata roa atu, te tauturuanga i to tatou au oa.

E akauenga ta tatou tei orongaia mai e te Atua kia tua i te tuatua meitaki o te Patireia tei akatumuia e te Atua ra. (Mataio 24:14) Te anoanoia ra te tangata kia kite e ko teia Patireia i te rangi ra ko te manakonako anga anake ia no te au tangata. Noatu rai, kare ta tatou tuatua i ariki mareka uaia mai. I etai au ngai te araiia ra ta tatou angaanga e te takinokinoia ra to tatou au taeake. Noatu rai, kare tatou e akamutu. Ma te irinaki maata anga kia Iehova, ka tauta tatou kia matakite e kia tere ua atu ki mua ma te mataku kore, i te akakitekiteanga i te tuatua meitaki e kare e akamutu anga.​—Angaanga 5:42.

Kua kiteaia mai taua tauta anga ketaketa i te au uipaanga takake tei raveia i roto ia Okotopa o te 2001. I te Maanakai, ia Okotopa 6, kua raveia te uipaanga mataiti a te Taiate Punanga Tiaki Pipiria e te Pepa o Pennsylvania i Jersey City, New Jersey, ki te Are Akaputuputuanga a te Au Kite o Iehova i Marike.a I tera mai ra, kua raveia te au uipaanga kapitiia e a ngai, e toru i Marike e tai i Kanata.b

I roto i tana tuatua akamata anga i te uipaanga mataiti, kua taiku te tiamana, ko Samuel F. Herd, ko tetai mema o te Pupu Akaaere o te Au Kite o Iehova, kia Salamo 92:​1, 4 e i reira kua tuatua e: “Te inangaro nei tatou i te akaari ia tatou uaorai i te akameitaki anga.” E tikai, kua orongaia mai te au tumu anga no te akameitaki anga i roto i te ripoti e rima te takapini ra i te ao.

Au Ripoti mei te Au Ngai Ravarai

Kua ripoti mai te Taeake ko Alfred Kwakye no runga i te tere anga ki mua o te angaanga tutuanga i Ghana, tei kitea i mua ana e ko te Gold Coast. Kua araiia ta tatou angaanga i taua enua ra no te au mataiti e manganui. Ka ui mai te au tangata e: “Eaa i araiiai? Eaa ta kotou i rave ana?” Kua akatuera teia i te au tuatau kia oronga i tetai akakite anga, i akataka mai ei te Taeake ko Kwakye. I te 1991 te akaatea angaia te arai anga, te vaira e 34,421 Au Kite o Iehova i Ghana. I roto ia Aukute 2001, te katoa anga e 68,152​—e 98 patene tei kake. Te raveia ra te au parani anga kia akatu i tetai Are Uipaanga Akaputuputuanga e 10,000 nooanga. Te taka meitaki ra, e te rave maata ra to tatou au taeake pae vaerua i Ghana i to ratou rangatira akonoanga.

Noatu te tamanamanata anga poritiki, te piri maroiroi ra to tatou au taeake i Ireland i roto i te angaanga orometua, e te akangateiteiia ra ratou no to ratou turanga neutara. E 115 putuputuanga i Ireland e 6 kotinga, i karangai te akatere Kumiti Manga ko Peter Andrews. Kua akakite te Taeake ko Andrews i tetai kite anga no runga ia Liam, e tamaiti e tai ngauru mataiti kare i mataku i te akakitekiteanga i te apii. Kua oronga a Liam i te My Book of Bible Stories, tei neneiia e te Au Kite o Iehova, ma tona au pupu apii e 25 e pera katoa ki tona puapii. Kua inangaro a Liam kia papetitoia, inara kua ui tetai tangata e me e ou ua oki aia. Kua pau mai a Liam: “Kare ko toku mataiti mari ra ko toku aroa ia Iehova ko te tumu maata ia. Ka akaari toku papetito anga e te aroa maata ra au iaia.” To Liam akakoro anga kia riro mai ei mitinari.

I te 1968 te vaira e 5,400 papuritia o te tuatua meitaki i Venezuela. Inara te vaira i teianei e tere atu ki te 88,000, i akakite mai ei a Stefan Johansson, te akatere Kumiti Manga. E te vaira te puapinga no te tere anga ki mua no te mea kua tere atu i te 296,000 tei tae ki te Akamaara anga i te 2001. I roto ia Titema o te 1999, kua akatupu te au ua pakari i te vari pururu tei manakoia e 50,000 tangata tei tamateia, kapitiia atu etai Au Kite. Kua ki tetai Are Uipaanga Patireia i te vari e tae ua atu e rua tapuae mei te auaro are. Te karanga anga tetai tangata e kia akarukeia te are ra, kua pau mai te au taeake: “Kare roa! No tatou teia Are Uipaanga Patireia, e kare tatou e inangaro i te akaruke i te reira i teianei.” Kua rave ratou i te angaanga, i te akaateaanga i te au tane vari, te au toka, e etai atu tita. Kua akaouia te are, e te karanga ra te au taeake e e manea atu te reira i to mua ana i mua ake i te tumatetenga maata!

Te vaira e 87 reo e te au reo ke ke te tuatuaia ra i te Philippine, i karanga ei te Taeake ko Denton Hopkinson, te akatere o te Kumiti Manga. I te au tuatau o te mataiti tavini anga i topa, kua tukunaia te New World Translation of the Holy Scriptures i roto i nga reo maata e toru ra o te enua​—Cebunao, Iloko, e te Tagalog. Kua akakite mai te Taeake ko Hopkinson i tetai kite anga no tetai tamaiti e iva mataiti tei tatau i te puka Good News​—To Make You Happy, tei neneiia e te Au Kite o Iehova. Kua rauka iaia tetai au puka mei te manga, kua tatau katoa aia i te reira, inara kua patoi tona ngutuare iaia. I te au mataiti i muri mai iaia i te apii rapakau vairakau, kua aravei atu aia i te manga e kua pati atu i tetai apii Pipiria. Kua papetitoia aia i te 1996 e kare i roa ana kua tomo atu ki roto i te angaanga orometua tamou. Te tavini ra aia i teianei ma tana vaine i te opati manga.

‘Tei roto a Puerto Rico i te pitiniti “tono anga i te Kite,”’ i akataka mai ei te akatere Kumiti Manga ko Ronald Parkin. Te vaira mei te 25,000 papuritia i runga i te airani, e kua vai aiteite ua te numero no te au mataiti. No teaa ra? I na, kua tamanakoia e te “tono” ra a Puerto Rico mei te 1,000 papuritia i te mataiti ki Marike, te manganui o ratou te aere atura no te au tumu anga pae moni. Kua akakite te Taeake ko Parkin no te rave anga i tetai akava anga te piri atura a Luis, ko tetai Kite e 17 mataiti tei tuia e te rukimia. No te mea kua patoi a Luis i te toto, kua apainaia tona turanga ki te akava anga. Kua inangaro te akavanui i te tuatua tika atu kiaia, no reira kua atoro atu aia iaia i roto i te are maki. Kua ui atu a Luis kiaia: “Eaa ra e me rave au i tetai kino maata ra, ka akava mai koe iaku ei aronga mamaata, inara me inangaro au i te akarongo ki te Atua, kua manako mai koe iaku e e tamariki rikiriki?” Kua papu i te akavanui e kua pakari aia e te rauka ra i te iki nona uaorai.

I te aruanga i te au ripoti mei te au enua mamao, kua rave a Harold Corkern, o te Kumiti Manga i Marike, i te au uiui anga ma te au tavini roa e a o Iehova ra. Kua akapou a Arthur Bonno e 51 mataiti i roto i te tavini anga tamou e i teianei te tavini ra i roto i te Kumiti Manga i Ecuador. Kua akapou a Angelo Catanzaro e 59 mataiti i roto i te angaanga tamou, te maata anga i te reira ei tangata akaaere tutaka. Kua karatuati a Richard Abrahamson mei te Apii Gileada i te 1953, e kua akameitakiia aia i te akono anga i te angaanga i Denmark e 26 mataiti i mua ake ka oki akaou atu ei ki te Betela i Brooklyn. I te openga, kua rekareka pouroa te katoatoa i te akarongo anga ia Carey W. Barber e 96 mataiti. Kua papetitoia i te 1921, kua akapou te Taeake ko Barber e 78 mataiti i roto i te angaanga tamou e kua riro ei mema no te Pupu Akaaere mei te 1978 mai.

Te Au Apii Anga Oraora

Kua kapitiia mai ki te uipaanga mataiti tetai au akapapa anga no te au apii anga te akakeu ra i te manako. Kua tuatua te Taeake ko Robert W. Wallen no runga i te tumu manako “E Au Tangata no Tona Ingoa.” E au tangata tatou no te ingoa o te Atua, e ka kitea tatou i roto i te au enua tere atu i te 230. Kua oronga mai a Iehova kia tatou “i tetai tuatau ki mua e tetai manakonako anga.” (Ieremia 29:11, NW) E mea tau kia rave ua atu tatou i te akatupu i te Patireia o te Atua, i te tuaanga i te tuatua umere no te pumaana e te akamaru anga. (Isaia 61:1) “Ka tau tatou i tera ra ki tera ra,” i taopenga ei te Taeake ko Wallen, “kia akono ua atu ma te tau ra ki te ingoa te kapikiia ra tatou, te Au Kite o Iehova.”​—Isaia 43:10.

Te tuanga openga o te porokaramu ko tetai tuatua kapiti na te nga mema e toru o te Pupu Akaaere. Ko te ingoa “Ko Teianei te Tuatau kia Matakite, kia Mou Piri Tikai, e Akamaroiroi.”​—1 Korinetia 16:13.

Te mea mua, kua tuatua mai te Taeake ko Stephen Lett no runga i te tumu manako “Kia Matakite i Teia Ora Openga.” E apinga oronga uaia mai te moe anga i te pae kopapa, i akataka ei te Taeake ko Lett. Te akamaroiroi ra ia ia tatou. Inara, te moe i te pae vaerua, kare e meitaki ana. (1 Tesalonia 5:6) No reira, akapeea e raukai ia tatou i te vai matakite anga i te pae vaerua? Kua akapapa mai te Taeake ko Lett e toru “ua vairakau” pae vaerua: (1) Kia maata te rave anga i te angaanga a te Atu. (1 Korinetia 15:58) (2) E akamanako i to tatou anoano i te pae vaerua. (Mataio 5:3) (3) E akarongo i te ako anga tei akatumuia e te Pipiria kia rauka te pakari.​—Maseli 13:20.

Kua oronga mai te Taeake Theodore Jaracz i tetai tuatua oraora ko te ingoa “Kia Mou Piri Tikai i Raro Ake i te Timata Anga.” Te taikuanga kia Apokalupo 3:10, kua ui te Taeake ko Jaracz: “Eaa te ‘ora no te timata anga’?” Te aere maira taua timata anga “i te rā o te Atu ra,” te tuatau e noo nei tatou. (Apokalupo 1:10) Te koropini ra te timata anga i te maro anga maata​—no te Patireia akatumuia o te Atua ainei tatou me kare no te akatere anga kino o te au mea o Satani ra? Kia tae taua ora ra no te timata anga ki te openga, ka aro ua atu tatou i te au timata anga me kare te au manamanata. Ka vai tiratiratu ainei tatou kia Iehova e tana akaaerenga? ‘Ka akaari tatou i taua tu tiratiratu ra ei au tangata tataki tai,’ i karanga ei te Taeake ko Jaracz.

I te openga ra, kua tuatua te Taeake ko John E. Barr no runga i te upoko tuatua “E Akamaroiroi ei Tangata Pae Vaerua.” I te taikuanga kia Luka 13:​23-25, kua akakite aia e kia uapou ua atu rai tatou ia tatou uaorai “i te tomo na te ngutupa o iti.” E manganui tei puapinga kore no te mea kare ratou i pakari roa i te akamaroiroi anga. E raukai kia riro mai ei au Kerititiano akamaroiroi, e mea tau kia apii tatou i te akono i te au kaveinga Pipiria i roto i te au turanga ravarai o te oraanga. Kua raurau mai te Taeake ko Barr: “Kua papu iaku e ka akatika kotou e ko teia te tuatau kia (1) e tuku e ko te mea mua e te mea maata roa atu ko Iehova; (2) kia maroiroi; e (3) kia uapou ua atu tatou uaorai i te rave i to Iehova ra anoano. Na roto i teia mataara ka rauka ia tatou i te tomo atu ki roto i te ngutupa o iti te taki atura ki te oraanga umere ma te ope kore.”

Te vaitata anga te uipaanga mataiti ki te openga, e okotai uianga te vaira kare i pauia ake: Eaa te irava mataiti no te mataiti tavini anga 2002? Kua pauia mai taua uianga ra i tera mai ra.

Uipaanga Kapitiia

E maata tikai te au tapapa anga i te popongi Tapati i te akamata anga te porokaramu no te uipaanga kapitiia. Kua akamata ma tetai apii anga poto o te Punanga Tiaki no te epetoma, kua aru mai te uriuri anga poto o etai au tuatua no te uipaanga mataiti. Aru mai, kua rekareka te katoatoa i te akarongo anga i tetai tuatua no runga i te irava mataiti no te 2002: “E aere mai kotou kiaku nei, . . . e naku e akaanga i to kotou roi.” (Mataio 11:28) Kua akatumuia te tuatua ki runga i te au atikara apii tei neneiia i muri ake i roto i te itiu o Titema 15, 2001, o Te Punanga Tiaki.

Aru mai i te reira, ko etai aronga e au tereketi ki te au Uruoaanga “Ei Aronga Apii i te Tuatua a te Atua” i Varani e i Itaria i roto ia Aukute 2001 kua oronga mai i to ratou au manako.c I te openga, ei akakitekite anga no te porokaramu o te ra ra, kua orongaia mai e rua tuatua openga e te au vaa tuatua tei atoro mai mei te Betela i Brooklyn.

Te ingoa o te mea mua “Irinaki Mataku Kore Anga ki Roto ia Iehova i Teia Au Tuatau Kinokino.” Kua oronga mai te vaa tuatua i te au tumu manako te aru maira: (1) Te irinaki mataku kore anga ki roto ia Iehova ko te mea puapinga maata ia no te au tangata o te Atua. Te vaira i roto i te Pipiria te au akatauanga e manganui o te aronga tei akaari i te mataku kore e te akarongo i te aro atu anga i te patoi anga. (Ebera 11:​1–​12:3) (2) Te oronga maira a Iehova i tetai tumu anga tau kia tatou kia irinaki tikai iaia. Te akapapu maira tana au angaanga e tana Tuatua e te manako maira aia i tona au tavini e kare rava e ngaropoina iaia ia ratou. (Ebera 6:10) (3) Te anoano tikai ia ra te mataku kore e te irinaki anga i teia tuatau. “E e makitakitaia” maira tatou, mei ta Iesu i totou ra. (Mataio 24:9) E raukai i te akakoromaki, te anoanoia ra tatou kia irinaki ki runga i te Tuatua a te Atua, te irinaki anga e tei ia tatou tona vaerua, e te mataku kore anga kia rave ua atu i te akakitekiteanga i te tuatua meitaki. (4) Te akaari maira te au akatauanga e te aro nei tatou i te patoi anga i teianei. Kua akakeu oonuia te katoatoa i te akakite anga te vaa tuatua e akapeea to tatou au taeake i Armenia, Varani, Georgia, Kazakhstan, Rutia, e i Turkmenistan i te akakoromaki anga. E tikai, ko teia te tuatau i te akaari i te mataku kore e te irinaki anga kia Iehova!

Kua oronga mai te vaa tuatua openga ra i te upoko tuatua “Aere Taokotai Anga ki Mua ma te Akaaerenga a Iehova.” Kua uriuri te tuatua i te au manako tau e manganui. (1) Te aere anga ki mua no te au tangata o Iehova ra te akara maataia ra. Ta tatou angaanga tutuanga e ta tatou au uruoaanga te apai maira ia tatou ki mua i te mata o te tangata. (2) Kua akatumuia e Iehova tetai akaaerenga te taokotai ra. I te 29 T.N., kua akatainuia a Iesu e te vaerua tapu ma te manako anga i tona apaianga i te “au mea katoatoa”​—ko ratou no te manakonako anga ki te rangi ra e pera katoa ko ratou ma te manakonako anga i te enua nei​—ki roto i te pamiri taokotaiia o te Atua. (Ephesia 1:​8-10) (3) E akaari anga maata te au uruoaanga no te taokotai anga pa enua. Kua kite meitakiia teia i te au uruoaanga takake tei raveia i Varani e i Itaria ia Aukute i topa akenei. (4) Kua akanooia tetai akataka anga manako oraora i Varani e i Itaria. Kua oronga mai te vaa tuatua i tetai au tuanga tokoiti ua no roto mai i te akataka anga manako oraora.Te mama maira te katoa anga o te akataka anga manako i raro akenei.

I te ope anga o te tuatua openga ra, kua tatau mai te vaa tuatua atoro ra i tetai akakite anga akakeu tei akapapaia mai e te Pupu Akaaere. Te karanga ra, i tetai tuanga: “Ko teia te tuatau kia matakite, i te akarakaraanga e te akapeea nei te au tupu anga e tupu nei i te ao. . . . Te inangaro nei matou i te akakite atu kia kotou i te manako aroa o te Pupu Akaaere no kotou e no te katoatoa o te au tangata o te Atua. Nana e akameitaki maata mai ia kotou i te rave ngakau katoa anga i tona ra anoano.” Te tauta nei te au tangata o Iehova i te au ngai ravarai kia matakite i roto i teia au tuatau kinokino e kia tere ki mua ma te mataku kore ma te akaaerenga taokotaiia a Iehova.

[Au Tataanga Rikiriki i Raro]

[Pia/Au Tutu i te kapi 29-31]

Akataka Anga Manako

I roto ia Aukute 2001, kua raveia te au Uruoaanga takake “Ei Aronga Apii i te Tuatua a te Atua” i Varani e i Itaria. I taua au uruoaanga kua orongaia tetai akataka anga manako oraora. Te aru maira te tuatua no taua akataka anga manako.

“EI AU KITE O IEHOVA, ko tatou katoatoa tei akaputuputu mai ki teia Uruoaanga a te ‘Aronga Apii i te Tuatua a te Atua’ kua ikuikuia e te apii puapinga maata. Te tumu no teia apiianga kua akataka meitakiia mai. Kare te apiianga e no ko mai i te tangata. No ko mai te reira i Tei akatakaia mai e te peroveta taito ko Isaia e ko to tatou ‘Pu Ikuiku Maata Rava Atu.’ (Isaia 30:20, NW) E akara i te au akamaara anga a Iehova tei akakiteia mai ia Isaia 48:17: ‘Ko au toou Atua ra ko Iehova, ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra.’ Akapeea aia i te akatupu anga i teia? Te mataara maata oki na roto i te puka tei uri maataia e te tuaia ra i roto i te ao, ko te Pipiria, i roto i te reira te akakite maira kia tatou i te au tuatua taka meitaki: ‘Te au tuatua tapu katoa i tataia ra, e mea akauruia mai e te Atua, e e mea meitaki.’​—2 Timoteo 3:16.

“I teia ra, te anoano maata ra te au tangata i taua apiianga puapinga maata. Eaa teia ka tuatuaiai? I te akamanakoanga i te tauianga, te akaraanga manamanata o teia ao, eaa ta te au tangata manako e akakite maira? Ko teia ua: Noatu rai e mirioni ua atu tei apiiia e te au akaaerenga apii o te ao, te vaira te ngere anga no te akapuapinga tikai anga e te kore anga e kite i te akataka anga i rotopu i te tika e te tarevake. (Isaia 5:​20, 21) Te maata ua atura te kite kore i te Pipiria. Koi oronga mai ei te kite ki tetai putunga apinga no te tuatua na te taangaanga anga i te au komopiuta, teiea te au pau anga ki te au uianga puapinga maata e, Eaa te akakoro anga o te oraanga? Akapeea tatou e marama ei i te au tupu anga i to tatou tuatau nei? Te vaira ainei tetai manakonako anga tau no te tuatau ki mua? Ka tupu tika tikai ainei te au e te tinamou? Pera katoa, i runga i te au vairanga puka kua kiteaia e mirioni ua atu au kapi i roto i te au angaanga akapapa anga no runga i te au tumu manako tauta anga a te au tangata. Noatu rai, kua ripiti ua te au tangata i te au tarevake i topa. E maata te kino. Te au maki tei manakoia i mua ana e kua takoreia kua tupu akaou mai, ko etai, mei te AIDS, te akatotoa vivikiia ra. Te pururu viviki tikai nei te oraanga ngutuare. Te akakino nei te taero i te reva. Te akakoko nei te terrorism e te au apinga tamaki i te tamate anga maata i te au e te tinamou. Te maata ua atura te au manamanata ma te kore e rapakau anga. Eaa ta tatou tuanga tau i te tauturuanga i to tatou au oa i roto i teia au tuatau kikino nei? Te vaira ainei te au apiianga te akataka ra i te tumu no te manamanata o te au tangata e kare i akaari anake ra i te mataara ki te oraanga meitaki atu i teianei mari katoa ra te oronga maira i tetai manakonako anga kaka, ma te papu no te tuatau ki mua ra?

“Ta tatou akauenga Tuatua Tapu ra kia ‘aere e akariro i te au tangata o te pa enua ei pipi, i te apiianga ia ratou kia akono i te au mea katoa ta Karaiti i akaue mai.’ (Mataio 28:​19, 20) Na Iesu Karaiti i oronga mai i teia akauenga i muri ake i tona mateanga e te tuakaouanga, te rauka anga mai iaia te mana katoatoa i te rangi ra e te enua nei. Tei runga roa atu te reira i te angaanga katoatoa ta te au tangata i akatupu. Mei to te Atua ra tu manako, ta tatou akauenga, kia akara ki runga i te au anoano pae vaerua o te aronga te pongi ra no te tuatua tika, ko te mea mua ia. E au tumu anga tau no te Tuatua Tapu ta tatou kia akono tikai i taua akauenga.

“Te anoano ra teia i te akonoanga i taua angaanga ko te mea mua ia i roto i to tatou oraanga. Ma te akameitakianga e te tauturu anga a te Atua, ka oti te angaanga, noatu te au ravenga tamanamanata, te au arairai anga, e te au mana patoianga no ko mai i te au tuanga o te akonoanga e te poritiki, tei raveia kia arai i te tere anga ki mua o teia porokaramu apiianga i te ao katoa. Te papu nei e te irinaki ra tatou e ka tere ua atu rai teia angaanga ki mua e ka taeria tona akaotianga mekameka. Eaa i papu ei ia tatou? No te mea kua taputou mai te Atu ko Iesu Karaiti e tei ia tatou aia i roto i ta tatou angaanga orometua tei orongaia mai e te Atua e tae roa atu ki te openga o teianei akatere anga o te au mea nei.

“Te vaitata nei te ora no te au tangata taitaia. Ta tatou akauenga i teia tuatau nei ka akatupuia i mua ake ka tae mai ei te openga. No reira, ko tatou, ei Au Kite o Iehova, te papa nei te manako e:

“Te mea mua: Ei au orometua akatapuia, ka tauta tatou kia akono i te au anoano Patireia na mua i roto i to tatou au oraanga e tamou marie ua atu kia tupu i te pae vaerua. No te reira akakoro anga, te tau ra ta tatou pure ki te au tuatua ia Salamo 143:10: ‘E apii mai koe iaku kia rave au i to inangaro; ko koe oki taku Atua.’ Te umuumu maira teia kia riro ei aronga apiipii meitaki, te tautaanga kia tatau i te Pipiria i te au ra, kia rave i te apii naau uaorai e te kimikimi anga. Kia akaari i to tatou tere anga ki mua ki te au tangata katoatoa ra, ka rave katoatoa tatou i te tauta anga tau kia akapapa e kia puapinga maata mei te apii teokaratiki tei orongaia mai i te au uipaanga a te putuputuanga, i te au akaputuputuanga i roto i te kotinga, e i te au uruoaanga tapere, te enua, e te pa enua.​—1 Timoteo 4:15; Ebera 10:​23-25.

“Te rua: E raukai kia apiiia e te Atua, ka kai anake ua tatou ki tana kaingakai e ka akarongo meitaki i te akamatakiteanga a te Pipiria no runga i te au apiianga akavare a te au temoni. (1 Korinetia 10:21; 1 Timoteo 4:1) Ka anoanoia tatou kia matakite tikai i te kopae i te au ravenga kikino, kapitianga atu te akonoanga pikikaa, te au manako puapinga kore, te au angaanga ainga viivii ra, te maata o te ravenga tau kore, te tamataora viivii, e te au mea pouroa kare ‘i tau i te akono i te apii ora ra.’ (Roma 1:​26, 27; 1 Korinetia 3:20; 1 Timoteo 6:3; 2 Timoteo 1:13) No te akangateitei anga i te “meitaki i te tangata nei,” tei tau kia apii i te mea tau tikai, ka akangateitei tikai tatou i ta ratou au tauta anga e ka taokotai ma te ngakau tae kia ratou i te mouanga i te akono ma e te tuatua tika e te au turanga pae vaerua o te Tuatua a te Atua.​—Ephesia 4:​7, 8, 11, 12; 1 Tesalonia 5:​12, 13; Tito 1:9.

“Te toru: Ei au metua Kerititiano, ta tatou tauta anga ngakau tae kia apii i ta tatou au tamariki kare anake ua e na te tuatua mari ra na te akatauanga. To tatou manako maata kia tauturu ia ratou mei to ratou tamariki anga kia ‘kite i te tuatua tapu i tataia ra kia pakari ei e tae ua atu ki te ora.’ (2 Timoteo 3:15) Ka tamou tikai tatou ki te manako e ko te apii anga ia ratou kia pakari ma te ako anga a Iehova e ka oronga kia ratou i te tuatau meitaki kia kite i te taputou tu-Atua e ‘kia meitaki ratou e kia akaroaia to ratou puke rā i te enua nei.’​—Ephesia 6:​1-4.

“Te a: Me rokoia e te au taitaia me kare te au manamanata kino ra, ka na mua pouroa, tatou i te, ‘akakite i to tatou au anoano ki te Atua,’ te oronga mai anga i te akapapu anga e ‘na te au o te Atua, tei maata ua atu i te kite o te tangata ra’ e paruru ia tatou. (Philipi 4:​6, 7) I te aere mai anga ki raro ake i te amo a Karaiti ra, ka kite tatou i te akaangaroi anga. I te kiteanga e te manako maira te Atua ia tatou, kare tatou e tapupu i te uri atu i to tatou au taitaia ki runga iaia.​—Mataio 11:​28-30; 1 Petero 5:​6, 7.

“Te rima: I te akakiteanga i ta tatou akameitaki anga kia Iehova no te akameitaki anga i te riro anga mai ei aronga apii i tana Tuatua, ka akaou tatou i ta tatou au tauta anga kia ‘tika oki i te tua anga i tana tuatua-mou’ e te ‘rave tamou anga i ta tatou angaanga orometua.’ (2 Timoteo 2:15; 4:5, NW) No te mea te kite meitaki ra tatou e eaa te piri maira, to tatou anoano ngakau tae ra kia kimi i te aronga tau e kia tatanu i te ua tei ruruia. Pera katoa, ka akamaata tatou i ta tatou apiianga na te rave meitaki maata anga i te au apii Pipiria i te ngutuare. Ka apai maata atu teia ia tatou kia rotai ki to te Atua ra anoano e ‘kia ora te au tu tangata ravarai e kia rauka te kite tika tikai i te tuatua mou.’​—1 Timoteo 2:​3, 4, NW.

“Te ono: I roto i te anere mataiti i topa e i roto i teianei, kua kite te Au Kite o Iehova i roto i te au enua e manganui i te au tu tukeke no te patoi anga e te tamamae anga. Inara kua akapapuia mai e tei ia tatou a Iehova. (Roma 8:31) Kua akapapu mai tana Tuatua mou kia tatou e ‘kare te taoonga i angaiaʼi e patoi ia tatou’ kia arairai, kia akamarie, me kare kia akamutu i ta tatou angaanga tutuanga e te apiianga o te Patireia e manuiai. (Isaia 54:17) Noatu rai te atianga tau me kare i roto i te atianga tau kore, kare tatou e akamutu i te tuatuaanga i te tuatua mou. Ta tatou manako anga kia akatupu i ta tatou akauenga tutuanga e te apiianga ma te tamou marie. (2 Timoteo 4:​1, 2) Ta tatou akakoro anga kia piri ki katoa atu i te tua anga i te tuatua meitaki o te Patireia o te Atua ki te au tangata o te pa enua ravarai. No reira, ka rave ua atu ratou kia rauka te tuatau i te apii no runga i te ravenga e raukai te ora mutu kore i roto i tetai ao ou no te tuatua tika. Ei aronga apii taokotai no te Tuatua a te Atua, ta tatou manako anga kia tamou ua atu i te aruanga i te akatauanga a te Puapii Maata, ko Iesu Karaiti, e te akaataanga i tona au tu tau i te Atua. Pouroa teia ka rave tatou no te akangateitei anga e te akapaapaa anga i to tatou Pu Ikuiku Maata Rava Atu e te Oronga Ora, ko te Atua ko Iehova.

“Te katoatoa tei akaputu mai ki teianei uruoaanga tei akaperepere ra i te akanoo anga no teianei akataka anga manako, e tuatua AE!”

Te orongaia anga te uianga openga no te akataka anga manako ki te 160,000 tei akaputu mai ki te au uruoaanga e toru ra i Varani e ki te 289,000 i te au ngai e iva i Itaria, kua kapiki maata mai e “Ae” i roto i te au reo e manganui tei komonoia i rotopu i te au tereketi.