Ei Aronga Apii i te Tuatua a te Atua Kua Raurauia kia Akatupu i ta Ratou Angaanga
KUA akaputuputu mai i te au marama i ou akenei e anere e tauatini ua atu au aronga apii no te apii anga. Akamataanga ia Me i topa akenei, kua akaputuputu mai ratou ki te Au Uruoaanga Tapere “Ei Aronga Apii i te Tuatua a te Atua” e anere ua atu o te Au Kite o Iehova takapini i te ao katoa. Kua raurauia te au tereketi kia apii ia ratou uaorai, kia meitaki roa atu, e kia akatupu i ta ratou angaanga ei aronga apii.
Kua tae ainei koe ki tetai o teia au uruoaanga? Me koia ia, kare e ekoko ana e kua ariki koe i te kai vaerua meitaki tei oronga ia i teia au akaputuputu anga no te akamori anga i te Atua mou, ia Iehova. Eaa i kore ei e piri mai kia matou i te tamanako akaou anga i te porokaramu ikuiku o te uruoaanga?
Ra Tai—Te Au Tuatua Tapu Akauruia ei Puapinga no te Apiianga
Kua turou maana mai te vaa tuatua o te uruoaanga i te au tereketi ma te tuatua “Kia Ikuikuia, Kotou te Aronga Apii i te Tuatua a te Atua.” Te apiianga mei ia Iehova, te “Pu Ikuiku Maata Rava Atu,” kua riro a Iesu Karaiti ei Puapii Maata. (Isaia 30:20; Mataio 19:16) Me ka tere tatou ki mua ei aronga apii i te Tuatua a te Atua, ka tau katoa kia ikuikuia tatou e Iehova.
Te tuanga tei aru mai “Te Uua ra te Apiianga Patireia i te Ua Meitaki.” Na te uiui anga i te aronga apii kite no te Tuatua a te Atua, kua akakiteia mai te au tu rekareka e te au akameitakianga i te akariro anga i te tangata ei pipi.
Kua aru mai tetai tuatua akakeuanga te ingoa “Akakeuia e ‘te Peu Taka Ke a te Atua.’” I te anere mataiti mua, kua akatupu te “peu taka ke” te piri ra ki te Patireia o te Atua i te au tangata kia rave i te angaanga. (Angaanga 2:11) Ka rauka katoa ia tatou i te akakeu i te au tangata kia rave i te angaanga na te akakiteanga i taua “peu taka ke” ei au apiianga Tuatua Tapu no te oko, te tuakaouanga, e te koreromotu ou.
Kua akamaroiroi te tuatua tei aru mai i te katoatoa kia “Kimi i te Mataora i Roto i te Tuatua Tika a Iehova.” (Salamo 35:27) Kua tauturuia tatou kia aruaru i te tuatua tika na te apiianga kia inangaro i te tu tika e te makitakita anga i te kino, na te apiianga i te Pipiria, na te patoi maroiroi anga i te au akakeu anga kino i te pae vaerua, e na te tatanuanga i te tu akaaka. Ka tauturu taua au takainga ra i te paruru ia tatou mei te au taokotai anga tau kore, mei te au apinga materia o te ao, e mei te tamataora anga tau kore e te kino.
Te tuatua puapinga maata, te ingoa “Kia Tau Tikai ei Aronga Apii i te Tuatua a te Atua,” te akamarama maira ia tatou e kua maani a Iehova ia tatou ei au orometua tau nona na roto i tana Tuatua, tona vaerua tapu, e tana akaaerenga i te enua nei. No runga i te taangaanga anga i te Tuatua a te Atua, kua ako mai te vaa tuatua ia tatou: “To tatou akakoroanga kia akaoraora i te tuatua Pipiria e kia tuku i te reira ki roto i te ngakau o te aronga te akarongo maira kia tatou.”
Kua akamata te tuatua kapipiti mua ma te tuatua “Te Apiianga ia Tatou Uaorai Koi Apii ra ia Etai Ke.” Kua akakite maata mai te tuanga mua e ka tau tatou kia akono aiteite i te turanga teitei no te tu akono Kerititiano ma ta tatou e apii ra kia etai ke. Te tuanga i aru mai kua ako mai ia tatou kia ‘rave i te tika i te tua i te tuatua-mou.’ (2 Timoteo 2:15) Kia apii ia tatou uaorai, e mea puapinga i te apii putuputu e te kite uaorai i te Pipiria, noatu rai e eaa te roa i te tavini anga tatou i te Atua. Te tuanga openga o te tuatua maata te akaari maira e te akarakara maira te Tiaporo ia tatou, i te akaraanga no taua au tu mei te akaparau, tetai vaerua irinaki kore, te manako akapuapinga ia koe uaorai, te vareae, te vareae tau kore, te roto riri, te mamae ngakau, e te kimi apa anga. Inara, me patoi putuputu tatou i te Tiaporo, ka rere ke atu aia mei ia tatou. E raukai te patoi atu iaia, te anoanoia ra tatou kia akavaitata atu ki te Atua.—Iakobo 4:7, 8.
Te tuatua tau “E Rikarika i te Mate o te Au Ravenga Viivii o te Ao” kua akaari mai ia tatou e akapeea i te autu anga i taua tamataku anga tau kore ki to tatou tu pae vaerua. Te karanga ra te perevota ko Habakuka no Iehova e: “E mata ara kore rava toou, kare e tika kia akara mai i te kino.” (Habakuka 1:13) Ka tau tatou “kia rikarika i te kino.” (Roma 12:9) Kua akoia te au metua kia akarakara i ta ratou au tamariki taangaanga anga i te Internet e te akarakara tivi. Ko te aronga te akavaitata ra ki te ravenga viivii, te karanga ra te vaa tuatua, e mea tau kia kimi i te tauturu mei tetai oa pakari i te pae vaerua. Ka rauka katoa ei tauturu kia akamaaraara e kia tamou ngakau i taua au irava ra mei ia Salamo 97:10; Mataio 5:28; 1 Korinetia 9:27; Ephesia 5:3, 12; Kolosa 3:5; e 1 Tesalonia 4:4, 5.
Te tuatua tei aru mai, “Kia Vai te Au o te Atua ei Paruru ia Koe,” te akapumaana ra ia tatou ma te akapapu anga e me taitaia tatou, ka rauka ia tatou i te tuku i ta tatou apainga ki rungao ia Iehova. (Salamo 55:22) Me akakite tatou i to roto i to tatou ngakau na roto i te pure, ka oronga mai a Iehova kia tatou i “te au o te Atua,” te tu maru e te tu au tikai tei tupu ra no to tatou pirianga puapinga kiaia ra.—Philipi 4:6, 7.
Kua ope te ra mua ma tetai tuatua mataora tikai “Te Akamanea ra Iehova i Tona Iti Tangata ma te Marama,” tei akataka ra i te akatupu anga o Isaia pene 60. I rotopu i teianei ao poiri, te “aronga ke”—te urupu maata te mama maira o te aronga mamoe—te rekareka ra i te marama o Iehova ma te au Kerititiano akatainuia. Te taikuanga i nga irava 19 e te 20, kua akataka mai te vaa tuatua: “Kare a Iehova ‘e opu’ mei te ra e kare e ‘mate’ mei te marama ra. Ka rave ua atu aia i te akamanea i tona iti tangata na te akaitianga i te marama ki rungao ia ratou. Mei teaa te akapapu anga umere o te reira kia tatou ia tatou e ora atura i roto i te au ra openga o teia ao poiri!” I te openga o te tuatua, kua akakite mai te vaa tuatua i te tuku mai anga o te puka Isaiah’s Prophecy—Light for All Mankind, Voriumu Rua. Kua oti ainei ia koe te tatau i teia puka ou?
Ra Rua—E Tau Tikai kia Apii i Etai Ke
I muri mai i te uriuri anga i te tia o te ra i te ra rua, kua akarongo tatou ma te manako irinaki ki te rua o te tuatua kapipiti o te uruoaanga, “Te Au Orometua na Roto Mai ia Ratou i Riro Mai ei Etai Ke ei Aronga Irinaki.” Te au vaa tuatua o teia tuanga e toru o te tuatua kapipiti kua akakite tataki tai mai i te au takainga e toru te o atura i te tauturuanga i te au tangata kia riro mai ei aronga irinaki—te akatotoaanga i te tuatua o te Patireia, te tatanu anga i te irinaki anga tei kiteaia mai, e te apiianga i te aronga inangaro kia akono i ta Karaiti i akaue mai. Ma te tauturu anga o te au uiui anga e te akatutu anga, kua rauka ia tatou i te kite tikai e akapeea tatou i te apii anga ia etai ke kia riro mai ei au pipi.
Te tuanga i aru mai no runga i te tumu tuatua “Kapiti atu ki Toou Akakoromaki Anga i te Akono i te Atua.” Kua akaari mai te vaa tuatua e ko te mea maata roa atu koia oki to tatou ‘tamou marie anga e tae ua atu ki te openga.’ (Mataio 24:13, NW) Ka tau tatou kia taangaanga katoatoa i te au apinga a te Atua—te pure, ta tatou uaorai apii, te au uipaanga, e te angaanga orometua—kia tatanu i te akono i te Atua. Ka anoano ia tatou kia arai i te au anoano e te au angaanga o te ao kia kore e tamanamanata me kare e akakore i ta tatou akono anga i te Atua.
Akapeea e raukai i te au tangata te roiroi ra e te teiaa te apainga i te kimi i te akaangaroi anga i teia tuatau? Te pau maira te tuatua “Kimianga i te Akaangaroi Anga i Raro Ake i te Amo a Karaiti” i taua ui anga ra. Kua pati rekareka a Iesu i tana au pipi kia aere ki raro i tana amo e kia apiiia e ia. (Mataio 11:28-30) Ka rauka rai ia tatou kia aere ki raro i te amo a Iesu na te aru vaitata anga i tona akaraanga o te akonoanga i tetai oraanga ngoie, e te tau. Te au tumu maata o teia akakite anga kua akamaataia na te au uiui anga ma te aronga kua akamama mai i to ratou au oraanga.
Ko tetai o te au akakite anga maata o te au akaputuputu anga maata o te Au Kite o Iehova ko te papetito anga o te au tavini akatapu ouia ra o te Atua. Te taeake te oronga ra i te tuatua “Te Arataki ra te Papetito Anga ki te Au Akameitaki Anga Maata Roa Atu o te Apiianga” kua turou maana i te aronga ka papetitoia e kua pati ia ratou kia o atu ki roto i te au akameitaki anga maata o te angaanga. Ko te aronga apii papetito ouia o te Tuatua a te Atua tei akatano ki te au tu o te Tuatua Tapu ka rauka i te itae i te au apainga tukeke i roto i te putuputuanga.
“E Aru i te Puapii Maata” te tumu tuatua o te tuatua mua o taua avatea ra. No tetai tuatau i te rangi ra, kua akarakara e kua aru meitaki a Iesu i tona Metua, te riro anga i reira ko te Puapii Maata. Iaia i runga i te enua, kua taangaanga meitaki aia i te au tu o te apiianga, mei te au ui anga mama e te oonu inara ma te au akatutu anga taka meitaki ra. Kua akatumu a Iesu i tana apiianga ki runga i te Tuatua a te Atua e kua tuatua ma te oraora, maanaana, e te mana. Kare ainei tatou i akakeuia kia aru i te Puapii Maata ra?
Ko tetai tuatua akakeuanga, “Te Puareinga ra Ainei Koe i te Tavini ia Etai Ke?,” kua akamaroiroi mai ia tatou kia aru i te akaraanga o Iesu i te tavinianga ia etai au tangata. (Ioane 13:12-15) Kua raurau tika mai te vaa tuatua i te au tane tei tau kia aite mei ia Timoteo rai i te kimi anga i te au tuatau kia tauturu ia etai ke. (Philipi 2:20, 21) Kua akamaroiroiia rai te au metua kia aru ia Elakana raua ko Hana i te tauturuanga i ta ratou au tamariki kia aruaru i te angaanga orometua tamou. E te aronga mapu kua akamaroiroiia rai kia aru i nga akaraanga o Iesu Karaiti raua ko Timoteo mapu i te oronga puareinga anga ia ratou uaorai. (1 Petero 2:21) Kua akakeu katoaia tatou e te au tuatua a te aronga tei rave i te tuatau i te tavini ia etai ke.
Te tumu tuatua o te toru o te tuatua kapipiti ra “Kia Puapinga Maataia mei te Apii Anga Teokaratiki.” Kua akamarama akaou mai te vaa tuatua mua i te puapinga no te akamaata anga i to tatou akarongo. Kia akatupu i teia akakoro anga, ka rauka ia tatou i te akamata ma te au apii anga poto na tatou uaorai e te tauta anga kia akaroa atu ia ratou. Kua akamaroiroi katoa mai aia i te aronga akarongorongo kia akara i te au irava e kia rave i te tata anga i te tuatau o te au uipaanga. Kua akamatakite mai te rua o te vaa tuatua ia tatou i te anoano no te mou piri anga ki te “akonoanga tuatua tikai.” (2 Timoteo 1:13, 14) Kia paruru ia tatou uaorai mei te au akakite anga nuti tau kore, te au apiianga a te tangata, te akaapa anga maata, e te au apiianga apoteiti, ka tau tatou kia taporoporo i te tuatau no te apii uaorai e no te aere anga ki te uipaanga. (Ephesia 5:15, 16) Kua akakite mai te vaa tuatua openga o te tuatua kapipiti i te anoano no te raveanga i te au apinga tei apiiia kia rauka ia tatou te puapinga maata tikai mei te apii anga teokaratiki.—Philipi 4:9.
Mei teaa rai to tatou rekareka i te akarongo anga i te tuatua “Te Au Apinga Ou no to Tatou Tere Anga ki Mua i te Pae Vaerua”! Kua rekareka tatou i te akarongo anga e kare e roa atu ana ka neneiia tetai puka ou te tumu tuatua Benefit From Theocratic Ministry School Education. Te inangaro ra tatou i te tapapa i ta te vaa tuatua i akakite mai no te au mea i roto i te reira. No runga i te tuanga o te puka te vaira tetai numero no te au tumu tuatua no te ako anga, te karanga ra aia: “Kare teia puka ou e rave i tetai akaraanga i tetai puka kare i te Pipiria, te orongaanga i te au tu e 53 ra no te tatau meitaki anga, te tuatuaanga, e te apiianga. Kua akatumuia te akaraanga ki runga i te au kaveinga Tuatua Tapu.” Te akaari ra te puka e akapeea te au peroveta, a Iesu, e tana au pipi i te akaari anga i te au tu karape no te apii meitaki. Ae, ka tauturu tikai teia puka e te au apinga ou o te Apii Orometua Teokaratiki ia tatou kia riro ei aronga apii meitaki roa atu i te Tuatua a te Atua.
Ra Toru—Ei Aronga Apii te Manako ra no te Tuatau
I muri ake i te uriuri anga i te tia o te ra openga ra, kua akarongo meitaki atu te katoatoa ki te tuatua kapipiti openga o te uruoaanga, “Te Akapapa Maira te Totou a Malaki ia Tatou no te Ra o Iehova.” Kua totou a Malaki e vaitata ki te anere mataiti i muri ake i te oki mai anga te ngati Iuda mei Babulonia. Kua oki akaou ratou ki roto i te angaanga apoteiti e te ravenga kino, te akangateitei kore anga i te ingoa o Iehova na te kopaeanga i tana au ture tuatua tika ra e na te apai mai anga i te au manu matapo, te pirikoki, e te maki ei atinga. Pera katoa, kua akatakake mai ratou mei ta ratou au vaine ou anga ra, penei te akaipoipo anga i te au vaine peikani.
Te akapapu maira te totou a Malaki pene tai ia tatou i to Iehova aroa no tona iti tangata. Te akakite maira i te anoano e kia mataku ngateitei i te Atua e pera katoa kia ariki i te au mea tapu. Te inangaro ra a Iehova ia tatou kia oronga tatou i tei meitaki kiaia, te akamorianga iaia ma te aroa noinoi kore. Ka tau ta tatou angaanga tapu kia kore ei tu akatutu ua, e ka tau tatou kia aaki ki te Atua.
Te taangaangaanga i te pene rua o Malaki ki to tatou tuatau, kua ui te rua o te vaa tuatua o te tuatua kapipiti e: “Te matakite ra ainei tatou e ‘kare oki e kino i kitea i roto i to tatou ngutu’?” (Malaki 2:6) Ko te aronga te arataki ra i roto i te apiianga ka tau kia papu e ko ta ratou e tuatua ra kia akatumu meitakiia ki runga i te Tuatua a te Atua. Ka tau tatou kia makitakita i taua tu pikikaa i te raveanga i te au akatakake anga kare i tika.—Malaki 2:14-16.
Te tuatuaanga no runga i te tumu tuatua “Koai ma te ka Ora i te Ra o Iehova?” kua tauturu mai te vaa tuatua openga o te tuatua kapipiti kia akapapa tatou no te ra o Iehova. “Mei teaa te pumaana no te au tavini o Iehova kia kite e ko Malaki pene 3, irava 17, te kiteaia ra tona akatupu anga maata i rungao ia ratou!” i akakite mai ei te vaa tuatua. “Te karanga ra te reira: ‘“E ka riro ratou noku, te tuatua mairā Iehova Sabaota ra, i te rā i akatakaia e au ra, ei apinga meitaki rava ra; e naku e akaperepere ia ratou, mei te tangata e akaperepere i tana uaorai tamaiti kia tavini atu kiaia ra.”’”
Ko tetai akakite anga o te uruoaanga ko te nuku ma te kakau tau “E Akangateitei i to Iehova Mana,” te akatutu maira i te tamariki tamaroa a Kora. Noatu rai te tu meameaau o to ratou metua tane kia Mose raua ko Aarona, kua vai tiratiratu ratou kia Iehova e tona au komono ra. Ko Kora e te aronga i aru iaia kua tamateia, ko te tamariki tamaroa a Kora kua ora mai. Te tuatua tei aru mai, “Kia Kauraro Tiratiratu ki te Mana Tu-Atua,” te tou maira te tuatua o te nuku kia tatou tataki tai. Kua akamatakite mai te vaa tuatua e ono ngai tei poka a Kora e te aronga tei aru iaia: te kore anga i turu tiratiratu i to Iehova mana; te akatika anga i te tu akaparau, te noinoi, e te autu anga te tu vareae ia ratou; i te akaraanga i te au tu ara o te aronga tei ikiia e Iehova; te akatupuanga i tetai tu akaapa anga; te merengo kore anga i ta ratou au akameitaki anga no te angaanga; e te akatika anga i te piri anga oa me kare te au piri anga ngutuare i runga ake i te tiratiratu anga kia Iehova.
“Koai Ma te Apii ra i te Pa Enua Ravarai i te Tuatua Mou?” ko te tumu tuatua ia o te akakite anga ki te katoatoa. Te tuatua mou tei uriuriia, kare ia e ko te tuatua mou tei matauia, mari ra te tuatua mou no runga i to Iehova akakoro anga ta Iesu Karaiti ia i akakitekite. Kua akamanako te vaa tuatua i te tuatua mou te piri atura ki te au irinaki anga, te tuatua mou te o atura ki te tu o te akamori anga, e te tuatua mou no runga i to tatou tu akono. Na te akaaite anga i te au Kerititiano o te anere mataiti mua ra ki te Au Kite o Iehova i teia tuatau, kua akaketaketa tika ia to tatou irinaki anga e ‘tei rotopu tikai te Atua ia tatou.’—1 Korinetia 14:25.
I muri ake i te akara anga i te atikara apii o te Punanga Tiaki no te epetoma, kua akakeuia te aronga apii katoatoa o te tuatua a te Atua kia rave i te angaanga na roto i te tuatua openga, “Te Akatupu Rapurapu Anga i ta Tatou Apiianga no te Angaanga.” Te akara poto akaou anga i te porokaramu kua akakite mai i te puapinga maata no te taangaanga anga i te au Tuatua Tapu i roto i te apiianga, te au mataara e riro mai ei tatou ei aronga apii tau, e te anoano kia irinaki i te tuatua mou ta tatou e apii ra ia etai ke. Kua ako mai te vaa tuatua ia tatou kia maani ‘kia kitea to tatou tupu anga’ e ‘kia matakite tatou, e ta tatou e apii ra.’—1 Timoteo 4:15, 16.
Mei teaa te kaikai vaerua ta tatou i rekareka “Ei Aronga Apii i te Tuatua a te Atua” i te Uruoaanga Tapere ra! Kia aru tatou i to tatou Pu Ikuiku Maata Rava Atu, ia Iehova, e to tatou Puapii Maata, ko Iesu Karaiti, i te apiianga ia etai ke i te tuatua a te Atua.
[Pia/Au Tutu i te kapi 28]
E au Puka Ou te Akamerengo ra i te au Anoano Takake
Kua oronga maoraoraia atu ki te au tereketi i te Uruoaanga Tapere “Ei Aronga Apii i te Tuatua a te Atua” e rua nga puka te ka tauturu maata i te apiianga i te tuatua mou o te Tuatua Tapu ra ki te au tangata i roto i tetai au tuanga o te ao. Ko te tumu tuatua o te aenga pepa E Vaerua Mate Kore Ainei Toou? e apinga meitaki ia no te akamataanga i te au tuatua ma te aronga te noo ra i te au enua kare te reo o reira e kite i te tuke i rotopu i te “meta” e te “vaerua.” Te akaari meitaki ra te aenga pepa ou e e tuke tetai mana vaerua mei tetai mea ora vaerua e kare te au tangata e riro mai ei au mea ora vaerua me mate ratou.
Kua tukunaia mai te poroutia A Satisfying Life—How to Attain It i te openga o te uruoaanga i te rua o te ra. Kua akapapaia teia poroutia no te akakoroanga i te akamataanga i te au apii Pipiria ma te aronga kare e manako atu ana i Tei Anga ra ma te tu e no tetai puka akauru tu-Atua ra. Kua rauka ainei ia koe i te taangaanga i teia au puka ou i roto i taau angaanga orometua?
[Au Tutu i te kapi 26]
I Milan, Itaria, e i te au uruoaanga takapini i te ao, e anere ua atu tei papetitoia
[Tutu i te kapi 29]
Kua akakeuia te aronga akarongo e te nuku “E Akangateitei i to Iehova Mana”