“E Aere Mai Kotou Kiaku Nei, . . . Naku e Akaanga i to Kotou Roi”

Te Aronga Ou Mei te Topata Au Oraora Ra

KARE e ekoko anga e kua kapiti rai a Iesu Karaiti i tana au pipi ou i tana tuatua anga: “E aere mai kotou kiaku nei, . . . naku e akaanga i to kotou roi.” (Mataio 11:28) Te akamata anga te au tangata i te apai mai i ta ratou aronga ou kiaia, kua tauta tana au pipi i te tapu ia ratou. Inara kua karanga atura a Iesu: “Ka tuku mai ana i te tamariki mea riki, kia aere ua mai kiaku nei, auraka e akakoreia atu.” ‘Kua rave atura [a Iesu] ia ratou, kua ikiiki iora, akaora atura ia ratou.’ (Mareko 10:14-16) Kua manako ekoko kore a Iesu i te aronga ou ei mea akaperepere ra.

Te akakite ra te Pipiria i te au tangata e te au tamaine ou tiratiratu, e pera katoa te au mapu e te au tamariki mea riki, tei akono i te au akaraanga meitaki roa atu i te tavinianga i te Atua. Ko tetai “pupu o te au tane ou” mei te au topata au oraora ra te totouia ra i roto i te puka o Salamo. Kua akakite katoa te reira i te “au tangata ou” e te “au tamaine” i te akapaapaaanga i te ingoa o Iehova.​—Salamo 110:3, NW; 148:12, 13.

Te Ngai ka Tupu Ruperupe ei te Au Mapu

Kua tau te tuatua aiteite o te topata au, te kapiti ia ra te au ki te maata anga e te akameitakianga. (Genese 27:28) E maru te topata au e te akaoraoraanga. I teia tuatau o to Karaiti parutia, e maata te au Kerititiano mapu te oronga ra ia ratou uaorai ma te puareinga e te maroiroi. Mei te au topata au oraora rai, e manganui te au tangata e te au vaine ou te tavini rekareka ra i te Atua e te tauturu anga i to ratou au oa akamori ra.​—Salamo 71:17.

Kare te au mapu Kerititiano e oraora ua ki tetai ke; te kite oraora ra ratou ia ratou uaorai i roto i ta ratou angaanga. Kua oronga mai te akaaerenga a te Atua i tetai ngai te rauka ra ia ratou kia tupu ruperupe. Te tamouanga i te au tu akono tau teitei, te reka ra te au tangata e te au vaine ou i te pirianga vaitata ma te Atua. (Salamo 119:9) I roto i te putuputuanga, kua o katoa atu ratou ki roto i te au angaanga tau tikai e te kite anga i te au oa meitaki​—ko te au tumu te oronga maira i tetai oraanga reka e te puapinga tikai.

‘Te Ora e te Akaoraora Anga’

Te manako ra ainei te au mapu Kerititiano ia ratou uaorai mei te “au” rai? E aravei ia Tania, e vaine mapu tei piri maroiroi ki roto i te putuputuanga e te akono mataora ra e tere atu i te 70 ora i te marama i te angaanga orometua. Eaa tona manako? “Te manako oraora e te maroiroi nei au,” tana ia i tuatua mai. “Te raukaanga a Iehova e tana akaaerenga i te enua nei i roto i toku oraanga kua riroia ei ‘ora e te akaoraora anga’ kiaku.”​—Maseli 3:8, NW.

Ko Ariel, ko tetai orometua mapu tamou, te ariki ra i te akamatutu anga i te pae vaerua tei rauka iaia i roto i te putuputuanga. “Me aere au ki te au uipaanga Kerititiano, ki te au uruoaanga, e te au akaputuputu anga e kua rauka iaku te kaikai i ta Iehova kaingakai i te pae vaerua, te akaoraora tikai ra teia iaku i te pae vaerua,” tana ia i akakite mai. “E te akamaroiroi ra te reira iaku i te kite e takapini i te ao katoa nei, e au taeake angaanga toku.” Te akatakaanga i te tumu maata roa atu no te akaoraora anga, kua akakite mai aia: “E akaoraoraanga ia te riro anga a Iehova ei oa, i toku rongo tikai anga me kare te kite anga i te au tupu anga kino ta teia akatere anga e akatupu ra ki runga i te au tangata.”​—Iakobo 2:23.

Tae anga ki te 20 mataiti, kua tavini a Abishai ei tangata tutu evangeria tamou e ei tavini orometua i roto i te putuputuanga. Kua akataka mai aia i tona tupu anga i roto i teia au tuatua: “Kua oraora au no te mea kua kite au e akapeea i te akono anga i te au manamanata e manganui ta te aronga ou e aro atura i teia tuatau. Kua tauturu te tuatua mou mei te Pipiria ra iaku kia akara tamou atu ki taku e anoano ra i te rave e raukai i te tavini ia Iehova ma te meta katoa ra.”

I tona mataiti mapu anga, e viviki ana a Antoine i te riri. E tai taime kua rutuia e ia tetai oa apii ki te nooanga, e kua taangaanga aia i tetai penitara i te koputa atu i tetai. Kare roa a Antoine i te tangata akaoraoraanga! Inara na te apii anga mei te Pipiria i taui i tona tu. I teianei e 19 mataiti e te tavini ra ei tavini orometua tauturu e ei orometua tamou i roto i te putuputuanga, kua tuatua aia: “Kua akameitaki au ia Iehova no te akatikaanga iaku kia rauka te kite iaia e no te tauturuanga iaku kia kite i te anoano kia tamou i te akatere uaorai e te taui anga i taku ravenga. Na teia mataara, kua kopae ke au i te au manamanata e manganui.”

Te kite ra tetai ke i te tu akaoraoraanga o te au Kerititiano ou. Ko Matteo tetai Kite mapu i Itaria. Kua iki tona puapii e ko tetai ua atu tangata te ka tuatua i te au tuatua viivii i roto i te pupu apii ra ka tau kia tutaki i tetai manga moni akautunga. I tetai tuatau i muri mai, kua pati atu te tamariki ra e kia akakoreia atu te ture no te mea, kua na ko atura ratou, “e mea ngata me kare e tuatuaia te tuatua kino.” “Inara,” i akataka maira a Matteo, “te karanga ra te puapii e kare e akapera ana, e kua taangaanga aia iaku, ko tetai o te Au Kite o Iehova, ei akaraanga, i te akapaapaaanga iaku ki mua i te pupu apii katoa ra no te ma oki o taku tuatua.”

I roto i tetai pia apii mako kore i Thailand, kua kapiki atu te puapii ia Racha e 11 mataiti ki mua i te pupu apii e kua akameitaki atu iaia no tona tu, i te na ko anga e: “Eaa kotou katoatoa ka kore ei e akariro iaia ei akaraanga? E maroiroi aia i tana au apii e e mako meitaki te tu.” Kua tuatua katoa mai aia ki te aronga apii: “I toku manako ka tau kotou kia riro mai ko tetai o te Au Kite o Iehova, mei ia Racha rai, kia meitaki mai to kotou tu.”

E mea rekareka anga i te kite anga e tauatini ua atu o te au mapu Kerititiano te apii meitaki ra kia kite ia Iehova e te akono anga i tona ra anoano. Te akaari ra taua au mapu meitaki i te pakari i mua ake i to ratou maata anga. Ka rauka i te Atua i te tauturu ia ratou kia mako to ratou oraanga i te reira taime pera katoa te oronga anga i tetai tuatau kaka ki mua no ratou i te ao ou te aere mai nei. (1 Timoteo 4:8) I roto i te enua taneaia i te pae vaerua o teia akatere anga o te au mea, kua ki i te au mapu merengo kore e te taitaia, te akaari ra ratou i te akaoraoraanga tuke!