Tatanu i te Akarongo i te Vaitata Anga Mai te Openga

“[Kia Silo ra] ta te pa enua e akarongo.”​—GENESE 49:10.

1. (a) I te tuatau i topa, eaa tei o putuputu i roto i te akarongo anga ia Iehova? (e) Eaa te totou no te akarongo ta Iakoba i akakite?

E PUTUPUTU te akarongo anga kia Iehova ra te o atura ki te akarongo anga ki te aronga komono iaia ra. Kua kapiti mai teia i te au angera, te au pateriareka, te au akava, te kau taunga, te au peroveta, e te au ariki. Kua karanga katoaia te terono o te au ariki o Iseraela ra e ko te terono o Iehova. (1 Paraleipomeno 29:23) Inara, ma te mii ra, e manganui to Iseraela au tutara kua akarongo kore i te Atua ra, te apaianga mai i te tumatetenga ki runga ia ratou uaorai e to ratou au tangata oki. Inara kare a Iehova i akaruke i tona aronga tiratiratu ma te kore te manakonakoanga; kua akapumaana atu aia ia ratou ma tetai taputou kia akanoo atu i tetai Ariki pikikaa kore, ta te aronga tuatua tika ka mareka atu i te akarongoanga. (Isaia 9:5, 6) Kua totou ra te pateriareka te aere ra ka mate ko Iakoba no teia tutara a te tuatau ki mua, te na koanga: “Kare te sepeta e taka ke ia Iuda, e te akava i roto i ona vaevae, e tae ua mai te Silo ra; e koia ta te pa enua e akarongo.”​—Genese 49:10.

2. Eaa te aiteanga o “Silo,” e eaa ta tona tutara ariki ka rave?

² A “Silo” e tuatua Epera ia te aiteanga “Koia Nona Ra Ia,” me kare “Koia Nona ra Te Reira.” Ae, ka akatuangaia te tika anga kia Silo kia tutara, mei tei akatutuia maira e te tepeta, e te mana kia akaue, mei tei akatutuia mai e te akava. Pera katoa, ka takave tana tutara anga tiratiratu, kare anake i te uanga a Iakoba, mari ra i te “pa enua” katoatoa. Te rotai ra teia ki te taputou a Iehova kia Aberahama: “Ka rauka te ngutupa oire o to ratou au enemi i toou ra uanga; E ka meitaki te pa enua katoa o te ao nei i toou ra uanga.” (Genese 22:17, 18) Kua akapapu maira Iehova i te akatakaanga o teia “uanga” i te 29 T.N. i te akatainuanga aia ia Iesu o Nazareta ra ma te vaerua tapu.​—Luka 3:21-23, 34; Galatia 3:16.

To Iesu Patireia Mua

3. Eaa te tutara anga tei rauka ia Iesu i tona kake anga ki te rangi?

³ I to Iesu kake anga ki te rangi, kare aia i rave vave i te tepeta no te tutara anga ki rungao i te au tangata o te ao katoa. (Salamo 110:1) Inara, kua rauka iaia tetai “patireia” ma te au tangata tei akarongo kiaia. Kua akataka mai te apotetoro ko Paulo i taua patireia i tana tata anga: “Ko [te Atua] tei akaora ia tatou [te au Kerititiano akatainuia e te vaerua] i te mana o te poiri, e kua akaumu ia tatou ei roto i te basileia o tana Tamaiti akaperepere.” (Kolosa 1:13) Kua akamata mai teia akaora anga ia Penetekote 33 T.N. i te riringi angaia mai te vaerua tapu ki runga i te au pipi tiratiratu a Iesu.​—Angaanga 2:1-4; 1 Petero 2:9.

4. Na roto i teea au tu te akakite anga ta Iesu au pipi mua i to ratou akarongo, e akapeea ta Iesu akataka anga ia ratou ei pupu?

⁴ Ei ‘karere na te Mesia,’ kua akamata akarongo ua te au pipi akatainuia e te vaerua i te akaputu atu i etai ke te ka riro ei “au taeake tavini” ki roto i taua patireia vaerua ra. (2 Korinetia 5:20; Ephesia 2:19, NW; Angaanga 1:8) Kapiti katoa, kua tau teia aronga kia vai ‘kapiti marie ra ma te ngakau okotai e te manako okotai’ kia raukai ia ratou te rekareka i te marekaanga a to ratou Ariki ko Iesu Karaiti ra. (1 Korinetia 1:10) Ei pupu, kua riro ratou ei “tavini akono meitaki e te pakari,” me kare te akaaere pikikaa kore ra.​—Mataio 24:45; Luka 12:42.

Akameitakiia no te Akarongoanga i te “Akaaere” a te Atua

5. Mei te tuatau taito, akapeea ta Iehova apii anga i tona au tangata?

⁵ Kua oronga ua mai ana a Iehova i te aronga apii no tona au tangata. Ei akatauanga, i muri ake i te oki maianga te au ngati Iuda ra mei Babulonia, kare a Ezera e etai atu aronga tau ra i tatau ua i te Ture a te Atua ra ki te au tangata, kua tatau “taka meitaki” ra ratou i taua ture ra, te ‘akakiteanga i te ariteanga, e kite akera’ i te Tuatua a te Atua ra.​—Nehemia 8:8.

6, 7. Akapeea te pupu tavini i te oronga anga mai i te kai vaerua tau na roto i te Pupu Akaaere, e eaa ra i tau ei te kauraro anga ki te pupu tavini?

⁶ I te anere mataiti mua ra, i te tu mai anga te maro anga no te peritome anga i te 49 T.N., kua uriuri te pupu akaaere o taua pupu tavini mua ra na te pure anga i taua tumu ra e kua rauka mai te taopenga anga tau ki te Tuatua Tapu. I ta ratou akakite anga i ta ratou ikianga na te reta, kua akarongo te au putuputuanga i te arataki anga tei orongaia maira e kua rekareka i te akameitakianga apinganui o te Atua ra. (Angaanga 15:6-15, 22-29; 16:4, 5) Pera katoa i teia tuatau nei, kua akataka mai te tavini akono meitaki na roto i tona Pupu Akaaere i te au maroanga puapinga mei te tu neutara Kerititiano, te tapu o te toto, e te kaianga i te au apinga akakona e te avaava. (Isaia 2:4; Angaanga 21:25; 2 Korinetia 7:1) Kua akameitaki a Iehova i tona au tangata no to ratou akarongo ki tana Tuatua e te tavini akono meitaki.

⁷ Na te kauraroanga ki te pupu tavini, te akaari katoa ra te au tangata o te Atua i to ratou kauraro anga ki te Pu, kia Iesu Karaiti. Kua puapinga maata atu taua kauraro anga i teia tuatau no te mea kua akamaataia atu te mana o Iesu, mei tei totouia mai i ta Iakoba totou anga i tona roi mate anga ra.

Kua Riro a Silo ei Tutara Tau Tikai no te Enua

8. Akapeea e aea e akatotoaia ei to Karaiti mana?

⁸ Kua akakite mai ta Iakoba totou e ka akaue oki a Silo i ta “te pa enua e akarongo.” Te taka meitaki ra, e ka akatotoaia ta Karaiti tutara anga kia maata atu i ta Iseraela vaerua ra. Eaa ta te reira ka takave? Te pau maira Apokalupo 11:15 e: “Ko te au basileia o teianei ao, kua riro ïa ei au basileia no to tatou Atu e no tana Mesia; e e vai rai te au iaia e tuatau e tuatau ua atu.” Te akakite maira te Pipiria e kua rauka mai ia Iesu taua mana ra i te openga o te “itu ua atu tuatau” tei totouia maira​—“e kia ope tikai to te etene tuatau”​—i te 1914.a (Daniela 4:16, 17; Luka 21:24) I taua mataiti ra, kua akamata mai to Karaiti “parutia” akara koreia ei Ariki Mesia, mei tona tuatau “e ariki oki koe i rotopu i [tona] au enemi ra.”​—Mataio 24:3; Salamo 110:2.

9. Eaa ta Iesu i rave i te rauka anga iaia tona Patireia, e eaa te tupuanga o teia ki runga i te au tangata, ki runga tikai i tana au pipi?

⁹ Ta Iesu angaanga mua i muri ake i te raukaanga te mana ariki koia oki ko te uri mai anga i te peretana akarongo kore​—ko Satani​—ma tana au temoni “ki runga i te enua nei.” Mei reira mai, kua akatupu teianei au vaerua kikino i te mate ki te au tangata, i te pae atu i te akamaataanga i tetai reva te akariro ra i te akarongo kia Iehova ei akaaoanga. (Apokalupo 12:7-12; 2 Timoteo 3:1-5) Ko te tika, ko te takete maata o ta Satani tamaki anga i te pae vaerua ko te aronga akatainuia o Iehova ra, “ko tei akono i te au akauenga a te Atua ra, i tei mou marie i te tuatua-akakite a Iesu,” e to ratou au oa te “mamoe ke atu.”​—Apokalupo 12:17; Ioane 10:16.

10. Ko te tupu anga o teea au totou Pipiria te akapapu ra kare e puapinga ta Satani tamaki anga i te au Kerititiano mou?

¹⁰ Inara, ka topa a Satani ki te puapinga koreanga, no te mea ko “te rā o te Atu ra” teia, e kare e rauka i tetai apinga i te arai ia Iesu mei te ‘aere anga ma te upokotu atu.’ (Apokalupo 1:10; 6:2) Ei akatauanga, ka akapapu aia i te akairoanga openga o te 144,000 Iseraela vaerua ra. Ka paruru katoa aia i te “aronga maata rava, kare takiri e pou kia tatau, no te pa enua ravarai, e te au kopu ravarai, e te au iti-tangata ravarai, e te au reo katoa oki.” (Apokalupo 7:1-4, 9, 14-16) Inara, kare mei to ratou au oa akatainuia ra, ka riro teia aronga ei au tangata akarongo kia Iesu i te enua nei. (Daniela 7:13, 14) Ko to ratou vai anga ki runga i te enua nei i teia tuatau te oronga maira i te akapapu anga tika e ko Silo tikai te Tutara i rungao i “te au basileia o teianei ao.”​—Apokalupo 11:15.

Ko Teianei Oki te Tuatau kia “Akarongo i te Evangelia”

11, 12. (a) Koai ma anake ka ora atu i te openga o teia akatereanga o te au mea nei? (e) Eaa te tu o te tangata te ka tupu ki roto i te aronga te tauru ra i “te vaerua o te ao nei”?

¹¹ Te aronga katoatoa te inangaro ra i te oraanga mutu kore kia apii i te akarongo, no te mea te akataka meitaki maira te Pipiria e ko “te aronga kare i kite i te Atua, e tei kore i akarongo i te evangelia o to tatou Atu o Iesu Mesia” kare rava e ora i te ra riri anga o te Atua. (2 Tesalonia 1:8) Inara, ko te reva rave kino i teia tuatau nei e tona vaerua meameaau i te au ture e te au kaveinga a te Pipiria te akariro ra i te akarongo anga i te evangeria ei akaaoanga.

¹² Te akataka maira te Pipiria i teia vaerua meameaau i te Atua ei ‘vaerua o teianei ao.’ (1 Korinetia 2:12) I te akatakaanga i tana akatupu anga ki runga i te au tangata, kua tata te apotetoro ko Paulo ki te au Kerititiano o te anere mataiti mua i Ephesia, i te na koanga: “Ko to kotou ïa aerenga i muatangana ra ta to teianei ao ra, ta te ariki mana o te reva ua nei, te vaerua e angaanga ririnui nei i roto i te aronga akarongo kore; Ko tatou katoa oki te kapiti katoa anga i roto ia ratou i muatangana i te anoano o te kopapa nei, i te akatupu anga i ta te kopapa e ta te ngakau i inangaro ra; e mei te tangata ravarai nei oki, i anau mai ei tamariki ririia.”​—Ephesia 2:2, 3.

13. Akapeea e rauka tikai i te au Kerititiano i te arai atu i te vaerua o teianei ao, e eaa te au tupuanga puapinga?

¹³ Ma te mataora, kare te au Kerititiano Ephesia i vai ana ei au tavini no taua vaerua akarongo kore ra. Mari ra, kua riro mai ratou ei tamariki akarongo na te Atua na te kauraroanga ki tona vaerua e te kokotianga i tona au ua maata e te meitaki. (Galatia 5:22, 23) Mei te reira i teia tuatau, ko te vaerua o te Atua​—te mana ririnui maata i te ao katoa e pini ua ake​—te tauturu nei i te au mirioni ua atu kia akarongo kia Iehova, ma te tupu anga e ka rauka ia ratou, “te irinaki kite pu tikai e tae ua atu ki te openga.”​—Ebera 6:11; Zekaria 4:6.

14. Akapeea ta Iesu akamatakite anga i te au Kerititiano katoatoa te ora ra i te tuatau openga ki te au apinga te ka timata i to ratou akarongo?

¹⁴ E akamanako, katoa, e tei ia tatou te turuanga ririnui a Silo, tei kapiti atura ma tona Metua kare rava e tuku i tetai enemi​—temoni me kare tangata​—kia timata i to tatou akarongo kia maata i te ka rauka ia tatou kia akakoromaki. (1 Korinetia 10:13) Ko te tika, ei tauturu ia tatou i ta tatou tamaki anga pae vaerua, kua akataka mai a Iesu i etai au manamanata ta tatou ka aro atu i teia tuatau openga nei. Kua rave aia i teia na roto i nga reta e itu, tana i oronga na roto i te orama ki te apotetoro ko Ioane. (Apokalupo 1:10, 11) Kia papu, kua ki ratou i te akoanga puapinga maata no te au Kerititiano i taua taime ra, inara ko to te reira taangaanga te tau maata ra ki “te rā o te Atu ra,” mei te 1914 mairai. No reira, mei teaa ra te tau, e kia akamanako tatou i teia au tuatua!b

Kopae Ke i te Inangaro Kore, te Akaturi, e te Noinoi Apinga

15. Eaa tatou i tikai kia paruru i te manamanata tei tupu ra ki te putuputuanga i Ephesia, e akapeea e raukai ia tatou kia rave i te reira? (2 Petero 1:5-8)

¹⁵ Ta Iesu reta mua kua tataia ki te putuputuanga i Ephesia ra. I muri ake i te akameitakianga i te putuputuanga no tona akakoromaki anga, kua tata atura Iesu: “Te vai nei ra taku akaapa anga ia koe, i te mea kua vaoo koe i to inangaro mua ra.” (Apokalupo 2:1-4) I teia tuatau, tetai papaki au Kerititiano maroiroi i mua ana kua ngere i te inangaro maata tei rauka ia ratou i mua ana no te Atua. Ka rauka i taua ngereanga ra kia akaparuparu i te pirianga o tetai ma te Atua e ka tika kia rapurapu i te akatikatika anga. Akapeea e raukai kia akamaroiroi akaouia taua inangaro ra? Na te apii anga putuputu i te Pipiria, te aerenga ki te uipaanga, te pure, e te tamanakoanga. (1 Ioane 5:3) E tika, ka anoanoia te “akamaroiroi ua,” inara e mea tau tikai ia. (2 Petero 1:5-8) Me akakite mai te akaraanga matatio ia koe uaorai e kua paruparu toou inangaro, i reira kia viviki te akatikatika anga i taua turanga ra, i te akarongo anga ki ta Iesu akamaroiroi anga: “Ka maara i toou inga anga, e tataraara, e rave i te angaanga mua ra.”​—Apokalupo 2:5.

16. Eaa te au mana vaerua kino tei vai ana i nga putuputuanga i Peregamo e Tuatira ra, e eaa ta Iesu au tuatua kia ratou i tau ei i teia tuatau?

¹⁶ Kua akameitakiia te au Kerititiano i Peregamo e Tuatira no to ratou tiratiratu, te akakoromaki anga, e te maroiroi. (Apokalupo 2:12, 13, 18, 19) Inara, kua akakeuia ratou e tetai aronga te akaari ra i te vaerua kino o Balaama e Iezebela, no te ainga tau kore e te akamori anga ia Baala kua akono ei mana taviivii i roto ia Iseraela i taito ra. (Numero 31:16; 1 Ariki 16:30, 31; Apokalupo 2:14, 16, 20-23) Inara akapeea to tatou tuatau nei​—“te rā o te Atu ra”? Te vai maira ainei taua au mana kikino ra? Ae, no te mea ko te akaturi te tumu maata rava atu no te akaateaanga i roto i te au tangata o te Atua ra. No reira, mei teaa ra te puapinga e kia kopae tatou i te kapitianga ma te aronga katoa​—i roto e i vao i te putuputuanga​—e mana taviivii tau kore ra to te reira! (1 Korinetia 5:9-11; 15:33) Te aronga katoatoa te anoano ra kia akarongo atu kia Silo ei au tangata nona ka kopae katoa i te au tu tamataora anga tau kore e pera katoa i te au puka akatupu ainga neneiia e te Internet.​—Amosa 5:15; Mataio 5:28, 29.

17. Akapeea te manako e te tu akono a taua aronga i to Saradi e Laodikea i te akaaiteite anga ma to Iesu ra manako anga no to ratou turanga pae vaerua?

¹⁷ Ma tetai tokoiti ua, kare te putuputuanga Saradi i akameitakiia ana. Kua rauka te “ingoa,” me kare te akara anga, e te ora ra, inara kua mou atu te vaerua inangaro kore kiaia e kia Iesu “kua mate ra.” Ko te akarongo anga i te au evangeria e akameamea ua. Mei teaa ra tetai akaapa! (Apokalupo 3:1-3) Te aiteite katoa ra taua turanga i roto i te putuputuanga i Laodikea ra. Kua akaparau te reira i te apinganui, i te na koanga, “e apinga maata taku,” inara kia Karaiti “e mate maata toou, e mei te mea e aroaia ra, e te puapinga kore, e te matapo, e te putaua.”​—Apokalupo 3:14-17.

18. Akapeea e raukai i tetai kia kopae ke i te riroanga kia maanaana ua i nga mata o te Atua i te pae vaerua?

¹⁸ I teia tuatau, kua topa katoa tetai papaki au Kerititiano i tiratiratu ana ki roto i taua tu akarongo kore ra. Penei kua tuke ratou i te vaerua o teianei ao kia takore atu i te tu rapurapu i to ratou oraanga, na reira te akatupuanga i tetai tu akono maana ua i te apiianga Pipiria, te pure, te au uipaanga Kerititiano, e te angaanga orometua. (2 Petero 3:3, 4, 11, 12) Mei teaa ra te puapinga maata e kia akarongo taua aronga ra kia Karaiti na te orongaanga i te au apinganui pae vaerua​—ae, “e oko mai [ia Karaiti] nei i te auro tamāia ki te ai ra”! (Apokalupo 3:18) Ko taua apinganui tika tikai ra te kapiti ra i te ‘apingaia ra i te angaanga meitaki ra, kia maata atu te oronga aere.’ Na te orongaanga ki teianei au apinga okomaata, ka ‘akaputu marie tatou uaorai i te tumu meitaki a muri atu, kia rave tatou i te ora mutu kore.’​—1 Timoteo 6:17-19.

Akameitakiia no to Ratou Akarongo Anga

19. Eaa nga akameitaki anga e te au akamaroiroi anga ta Iesu i oronga ki te au Kerititiano i Semurina e Philadelaphia?

¹⁹ Kua meitaki roa nga putuputuanga i Semurina e Philadelaphia ei akatauanga i te akarongo anga, no te mea kare te ako anga i roto i te au reta a Iesu kia ratou. Ki te aronga i Semurina, kua tuatua aia: ‘Kua kite au i toou tumatetenga, e toou ngere,​—e apinga maata ra toou.’ (Apokalupo 2:9) Mei teaa ra te tuke anga ki te aronga i Laodikea, tei akaparau ra i te apinganui i teianei ao mari ra kua akangereia! Inara, kare te Tiaporo i mareka i te akara anga i tetai ua atu tei akaari ra i to ratou tiratiratu e te akarongo anga kia Karaiti. No reira, kua akamatakite mai a Iesu: “Auraka koe e mataku i te au mea ravarai e rokoia mai ei koe: i na, e uri te diabolo i tetai pae o kotou ki roto i te are tapekaanga, ei timata anga ia kotou; po ngauru kotou i te mate anga; kia mou marie ra koe e tae ua atu ki te matenga, e naku e oronga atu i te korona ora noou.” (Apokalupo 2:10) Mei te reira katoa, kua akameitaki a Iesu i te aronga i Philadelaphia, i te na koanga: “Kua tāpu tamou rai koe i taku tuatua [me kare, kua akarongo mai iaku], e kare akenei i uuna i toku nei ingoa. I na, te aere vave atu nei au; e mou tikai i tei rauka ia koe na, auraka taau korona e riro ia etai ke.”​—Apokalupo 3:8, 11.

20. Akapeea te au mirioni ua atu i teia tuatau i te mou anga i ta Iesu tuatua, e noatu ra eaa te au turanga?

²⁰ I “te rā o te Atu ra,” tei akamata mai mei te 1914 ra, e toenga tiratiratu e to ratou au oa mamoe ke, kua itae to ratou numero ki te au mirioni ua atu, kua tamou marie i ta Iesu ra tuatua na te rave totomapu anga i te angaanga orometua e na te mouanga ngaueue kore i to ratou tiratiratu. Mei to ratou au taeake i te anere mataiti mua ra, kua tamamaeia tetai papaki no to ratou akarongo anga kia Karaiti, e kua titiriia ki roto i te au are tapekaanga e te au puakapa tamamae anga. Etai atu kua tamou marie i ta Iesu tuatua na te tamou anga i te ‘mata meitaki,’ noatu rai e te koropiniia ra e te apinga maata e te noinoi. (Mataio 6:22, 23) Ae, i roto i etai ua atu reva e i roto i te au turanga ravarai, te au Kerititiano mou, na roto i to ratou ra akarongo anga, te tamou ua atu ra i te akarekareka anga i te ngakau o Iehova ra.​—Maseli 27:11.

21. (a) Eaa te apainga pae vaerua ta te pupu tavini ka akatupu ua atu? (e) Akapeea e raukai ia tatou i te akaari e te anoano tika ra tatou kia akarongo atu ia Silo?

²¹ Ia tatou e vaitata atu nei ki te mate maata, te vai tamou ra “te tavini akono meitaki e te pakari” i te akatika anga kia kore e akakore i te akarongo anga ki te Pu, kia Karaiti. Te kapiti maira teia i te teateamamaoanga i te kai pae vaerua tau no te ngutuare o te Atua ra. No reira e ariki ua atu tatou i ta Iehova ra akaaerenga teokaratiki e tana e oronga maira. Na roto i teia tu, ka akakite tatou i to tatou kauraro anga kia Silo, nana ra e tutaki mai i tona au tangata akarongo katoatoa ma te ora mutu kore.​—Mataio 24:45-47; 25:40; Ioane 5:22-24.

[Au Tataanga Rikiriki i Raro]

Maara Ainei ia Koe?

• Eaa te tuanga ta Iesu ka rave mei tei akakiteia maira i te totou a Iakoba i tona roi matenga ra?

• Akapeea tatou i te akakite anga ia Iesu e ko Silo, e eaa te tu kia kopae ke tatou?

• Eaa te akoanga tau no to tatou tuatau te vaira i roto i nga reta ki te au putuputuanga e itu o Apokalupo?

• Na roto i teea au tu e raukai ia tatou te aru i te aronga i roto i nga putuputuanga taito o Semurina e Philadelaphia?

[Au Tutu i te kapi 18]

Akameitaki a Iehova i tona au tangata no te akarongoanga i te “akaaere” pikikaa kore

[Tutu i te kapi 19]

Te mana anga a Satani te akariro ra i te akarongo ki te Atua ei akaaoanga

[Au Tutu i te kapi 21]

Ka tauturu te pirianga maroiroi ma Iehova ia tatou kia akarongo kiaia