E Oronga e Kino ua Atu

“KA KAPIKI ua mai koe iaku ei tangata patipati; kare au e manata i te reira. Te patipati nei au no Iesu.” Te akakite maira taua au tuatua a tetai orometua Porotetani i te taumaro anga pakari no runga i te tutaki anga i roto i te au akonoanga. I te akaraanga te vai ua ra tetai ekaretia akanooia ma te tauturu maata i te pae moni. Te anoanoia ra te au moni kia tutakiia, te anoanoia ra te au iero kia akatuia e kia akonoia, te anoanoia ra te au oro anga evangeria kia tutakiia. Akapeea e raukai te au moni te anoanoia ra?

No te au ekaretia e manganui, te pau anga ko te tuanga ngauru.a “Ko te oronga anga i te tuanga ngauru e ravenga ia na te Atua no te tutakianga i Tona patireia i te enua nei,” i maro ei tetai tangata tutu evangeria ko Norman Robertson. “Ko Tana akapapa anga i te pae moni te akariro ra i te Evangeria kia tutu aereia.” Kare i akama i te akamaara atu i tana au pipi no ta ratou apainga kia oronga ua, kua akakite pakari atu aia: ‘Kare te oronga anga i te tuanga ngauru e ko tetai apinga te rave ra koe no te mea ka rauka ia koe te reira. E rave anga akarongo ia. Me kare koe e oronga i te tuanga ngauru te taka meitaki ra te aati ra te reira i ta te Atua akauenga. E rave anga pikikaa ia.’​—Tithing​—God’s Financial Plan.

Papu e ka akatika koe e ka tau te orongaanga ei tuanga no te akamori anga Kerititiano. Inara, te manata ra ainei koe i te putuputu o te patipati anga moni, penei e mea tau koreia? Kua akaapa te tangata apii akonoanga Brazil ko Inácio Strieder i te au ekaretia no te ariu anga ki te oronga anga i te tuanga ngauru kia “akatikatika i to ratou au manamanata i te pae akaaerenga” e kua tapa i taua au angaanga ra e mea “tureia, pikikaa, e te aere ke ra mei te angaanga evangeria.” Tei tupu, i akakite ei aia, kua “taopenga te aronga kare e angaanga, te aronga takaua, te aronga noo putaua, e te aronga kare e manako meitaki ana e kua akaruke te Atua ia ratou e kua umuumuia ratou kia oronga maata ki ‘te tangata tutu aere’ e kua mate to ratou uaorai ngutuare tangata i te pongi.”

Penei ka umere koe: ‘Te taangaanga tika ra ainei te au ekaretia te maro ra i te oronga anga i te tuanga ngauru i te Tuatua Tapu? Me kare te akatupu ra ainei etai au akonoanga i te mataku i te Atua e raukai te moni mei te anana? E tikai, te tapapa ra ainei te Atua ia tatou kia oronga e kino ua atu, mei ta tetai e karanga ra?’

[Tataanga Rikiriki i Raro]