Au Uianga a te Aronga Tatau

Ka tau ainei tatou kia manako mei ia Apokalupo 20:8 e e maata ua atu te numero o te au tangata ka pikikaaia e Satani i te timata anga openga?

Te akataka maira Apokalupo 20:8 i ta Satani tamaki anga openga ki runga i te au tangata te ora ra i runga i te enua i te openga o te tutara anga tauatini mataiti o te Patireia o te Mesia. Te tuatuaanga no runga ia Satani, te na ko ra te irava: “E aere aia e pikikaa aere i te tangata i nga kotinga e a o te ao nei, ia Goga e ia Magoga, e akaputuputu mai ia ratou ki te tamaki: e e riro ratou mei te one taatai i te maata kia tatau.”

Noatu te au tere anga ki mua i roto i te au ravenga taineti e te apinga angaanga, te vai kitea koreia ra te maata anga me kore te numero o “te one taatai.” No reira, te tuatuaia ra e te akatutu maira taua tuatua ra i tetai numero kitea koreia, akataka koreia. Inara te karanga ra ainei te reira i tetai numero maata roa atu tikai, me kare ra e numero kitea kore ua inara e aka ua?

I roto i te Pipiria, te taangaangaia ra te tuatua “mei te one taatai” i roto i te au mataara e manganui. Ei akaraanga, ia Genese 41:49, ka tatau tatou: “Uipa marie akera te sitona ia Iosepha mei te onetea i taatai ra, e kare atura aia i tatau i taua kai ra i te maata anga, kare akerai e tika kia tatau.” Te manako anga i konei tei runga i tona tatau kore anga. Pera katoa, kua akakite maira a Iehova: “Mei te nuku o te rangi kare e ope kia tatau ra, e te one taatai kare e tika kia aite ra: mei te reira toku akamaata anga i te uanga o toku tavini ra o Davida.” Mei te au etu i te rangi ra e te one taatai ra kare i tatauia, mei ia Iehova rai i te akatupu anga i tana taputou kia Davida.​—Ieremia 33:22.

E putuputu te taime te taikuia ra te tuatua “te one taatai” ki tetai apinga maata tikai e te umere tikai. Kua manamanata maata tikai te au Iseraela i Gilagala i te akaputuputu mai anga to Philiseti vaeau i Mikemasa, “mei te one taatai ra te maata.” (1 Samuela 13:5, 6; Akava 7:12) E “kua oronga mai te Atua i te karape, e te kite, kia Solomona, e mea maata roa, e te maoraora maata o te ngakau, mei te one taatai ra.” (1 Ariki 4:29) Noatu e ko tei tuatuaia ra i roto i nga tuanga tataki tai e e maata tikai ia, te rimitiia ra rai te reira.

“Te one taatai” te tu katoa ra no tetai numero kitea koreia, ma te kore e manako atu i tona maata anga. Kua akakite a Iehova kia Aberahama: “E akamaata rava au i toou uanga, mei te etu o te rangi ra, e mei te onetea i taatai ra.” (Genese 22:17) I te ripitianga i teia taputou ki te mokopuna a Aberahama ko Iakoba, kua tuatua a Iehova i te tuatua “te ungaunga-one o te enua nei,” ko ta Iakoba ia i tuatua akaou e mei “te onetea i taatai.” (Genese 28:14; 32:12) Tei tupu maira, i te pae atu ia Iesu Karaiti, te numero o te “uanga” o Aberahama e 144,000, ko ta Iesu i kapiki e ko te “anana iti.”​—Luka 12:32; Galatia 3:16, 29; Apokalupo 7:4; 14:1, 3.

Eaa ta tatou i kite mei teia au akaraanga? Kare te aite anga o te tuatua “mei te one i taatai” ra e no tetai numero ope kore, maata roa atu tikai; kare i taangaanga ua ia ana i te akataka i tetai apinga maatamaata umere tikai. E putuputu te taime te akatutu maira te reira i tetai numero kitea koreia inara e aka ua. No reira, e mea tau kia irinakiia e ko te urupu meameaau te turu ra ia Satani i roto i tana tamaki anga openga ki runga i te iti tangata o te Atua ra, kare e maata roa ana, inara e aka ua e e maata ua i te akatupu anga i tetai akakoko anga. Inara, te vai kitea koreia ra te numero i teianei.