“E Akavaitata Atu ki te Atua, e Nana e Akavaitata Mai kia Kotou Na”

I Mua e i Muri Ake​—Kua Angaanga te Tuatua a te Atua

ME KUA aravei ana koe ia Tony i tona mataiti mapu anga, penei kua kite koe i tetai tamaiti marikonga kore e te kino te atoro putuputu ra i etai au tuanga kare e tau ana i Sydney, Autireria. Kua kapiti mai aia i te au mema pupu ei oa nona. Kua piri putuputu ana ratou ki roto i te au keikeia, te tamaki anga pupu, e te pupuianga i runga i te mataara.

Kua akamata a Tony i te kai avaava e iva rai mataiti. Tae anga ki te 14, kua kai putuputu ana aia i te maruana e te akono ra i tetai oraanga tau kore. Te tuatau i tae ei aia ki te 16, e tamaiti kai heroin aia, e kua taki atu teia i te kaianga i te kokaine, te LSD​—“ko te tika, ko tetai ua atu apinga te ka rauka i te akataero iaku,” i akataka mai ei a Tony. Kua akanoo aia i reira i te au akaaravei anga no te okookoanga i te apinga akakona ki nga pupu tangata kino maata roa atu e rua. Kare i roa ana kua kiteaia mai a Tony e ko tetai tangata okooko i te apinga akakona irinaki maataia i te pae tai itinga o Autireria.

Ta Tony peu no te kai heroin e te maruana kua pou iaia i rotopu i te $160 (U.S.) e te $320 (U.S.) i te ra. Inara e maata atu tei akangereia e tona ngutuare i to te reira. “Ko maua ko taku vaine,” i karanga mai ei aia, “kua touia mai te au pupui e te au matipi kia maua i te au atianga e manganui e te aronga kino te kimi ra i te au apinga akakona e te moni tei ia maua i to maua ngai.” I muri ake i te noo anga i roto i te are auri e toru taime, kua akakeuia a Tony kia akara e te aere nei tona oraanga kiea.

Noatu e i aere ana aia ki te pure, kua manako taka ke a Tony mei te Atua tei manakoia e te tutungiia ra te au tangata ara i roto ia era e tuatau ua atu ei utunga anga. Inara, i te atoro mai anga e rua Au Kite o Iehova, kua poitirere a Tony i te kite e kare te Atua e akapera ana. E kua rekareka a Tony e ka rauka tikai iaia i te akatikatika i tona oraanga e kia rauka mai te au akameitakianga mei te Atua. Kua akakeuia a Tony e ta Iesu Karaiti tuatua: “Kare rav[a] e mea e kore ei e tika i te Atua.” (Mareko 10:27) Kua akakeu tikai ia a Tony e te au tuatua akamaroiroianga: “E akavaitata atu ki te Atua, e nana e akavaitata mai kia kotou na.”​—Iakobo 4:8.

Kua aro atura a Tony i teianei i te akaaoanga no te apai mai anga i tona oraanga kia rotai ma te au turanga Pipiria. Kua tuatua aia: “Te apinga mua taku i akaruke ko te kai avaava, ko tetai apinga kare e rauka iaku i te rave i mua ana, noatu e kua tauta ana au i te au taime e manganui. Ma te mana mei ia Iehova, kua rauka iaku i te akaruke i te kai i te heroin e te maruana, te au peu akakona tei akatere iaku e 15 mataiti i mua ana. Kare roa au i manako ana e ka rauka i te akamutu i teia au peu.”

Kare e mataku i tetai Atua te tamamae ra i te au tangata e tuatau ua atu i roto ia era​—e apii anga kare i kiteaia i roto i te Pipiria​—kua ariki mai a Tony raua ko tana vaine i te manakonako no te ora mutu kore ki runga i tetai enua parataito. (Salamo 37:10, 11; Maseli 2:21) “E maata te tuatau te angaanga pakari anga au kia apai mai i toku oraanga kia rotai ki te au turanga a te Atua,” kua akatika mai a Tony, “inara ma ta Iehova akameitakianga kua autu au.”

Ae, kua riro mai teia tangata kai i te apinga akakona i mua ana ei Kerititiano. Te orongaanga i to raua taime e te au apinga, kua akapou aia e tana vaine e tauatini ua atu ora i roto i te angaanga apii anga Pipiria. Te angaanga katoa ra raua i te utuutuanga i nga tamariki e rua kia mataku i te Atua. Kua rauka teia taui anga maata na roto i te mana maata o te Tuatua a te Atua, te Pipiria. E tikai, mei ta te apotetoro ko Paulo e karanga ra, “e mea ora oki te tuatua a te Atua, e te ririnui.”​—Ebera 4:12.

Noatu taua au akaraanga meitaki, kua maro tau kore tetai papaki i te angaanga apii anga a te Au Kite o Iehova tei akatumuia ki runga i te Pipiria te takinga kino ra i te au ngutuare e te akakore ra i te au turanga tau i roto i te au mapu. Kua patoi tikai to Tony turanga i taua manako.

Mei ia Tony rai, e manganui te kite ra e ka rauka kia autuia te au apinga akakona kino. Akapeea? Na te akarongoanga ki te Atua e te irinakianga kiaia e tana Tuatua, pera katoa na roto i te turu anga a te au taeake Kerititiano te manako maira e te aroa maira. Kua taopenga mataora a Tony: “Kua kite ana au e akapeea te au kaveinga o te Pipiria i te paruru anga i taku tamariki. Kua akaora te au apiianga Pipiria i toku akaipoipo. E te moe maru nei toku au tangata i te pae mai no te mea kare au e tamatakutaku akaou ia ratou.”

[Tataanga i te kapi 9]

‘Ma te mana mei ia Iehova, kua rauka iaku i te akaruke i te peu akakona tei akatere iaku e 15 mataiti’

[Pia i te kapi 9]

Kua Angaanga te Au Kaveinga Pipiria

Kua tauturu te au kaveinga Pipiria tukeke i te aronga kai i te apinga akakona e manganui kia akaruke i teia peu akaparuparu. I roto i teia au kaveinga te aru maira e:

“E tamā ua tatou ia tatou uaorai i te au viivii katoa o te kopapa e te vaerua, ma te akaope marie i te akonoanga tapu i te mataku anga atu i te Atua.” (2 Korinetia 7:1) Te kaianga i te au apinga akakona te patoi ra i te ture a te Atua.

“Ko te akamataanga o te pakari ra, ko te mataku ïa ia Iehova: e te kite i te au mea tapu ra, ko te kite ïa.” (Maseli 9:10) Te akangateiteianga ia Iehova kua akatumuia ki runga i te kite tikai iaia e kua tauturu tona au arataa i te manganui kia akarangatiraia mei te mana o te au apinga akakona.

“E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” (Maseli 3:5, 6) Te au peu kino ka rauka i te aatiia na te irinaki ngakau tae ki te Atua e te irinaki ki katoa anga ki runga iaia.