Ripoti a te Aronga Tutu Patireia

Te “Rongo” ra Ratou i te Tuatua Patireia i Paratiri

E RAUKAI te tutu aere i te tuatua meitaki o te Patireia i roto i te ngai tangata Turi, e manganui te Au Kite o Iehova kua ariki i te angaanga ngata no te apiianga i te Reo Akairo Paratiri. Te akatupu ra to ratou au tu maroiroi i te au tupu anga memeitaki, mei tei akatutuia mai e te au tupu anga e aru mai nei.

Kua akamata a Eva,a e vaine turi i São Paulo, i te apii i te reo akairo i muri mai i te neke anga aia e tana tamariki e toru ki roto i te are o tetai tangata turi. I te are toa maatamaata, kua aravei atu a Eva raua ko tana tane i tetai pupu aronga turi e Au Kite e kua patiia atu kia aere mai ki tetai uipaanga i te Are Uipaanga Patireia. Kua ariki raua, te manakoanga e e ngai oaoa anga te reira.

No te meangiti i tona kite i te reo akairo, e meangiti ua ta Eva i marama i tei tuatuaia i te uipaanga. I muri maira, kua pati atu tetai Au Kite iaia ki to ratou kainga kia kaikai. Te taangaangaanga i te au tutu i roto i te poroutia Kia Rekareka i te Oraanga ki runga i te Enua e Tuatau Uatu!, kua akamarama ratou i ta te Atua taputou no tetai enua parataito i te tuatau ki mua. Kua reka a Eva i tana i kite mai e kua akamata i te aere putuputu ki te au uipaanga.

Kare i roa i muri mai, kua akaruke a Eva i tana tane e raukai i te akono i te au turanga Pipiria. Noatu te patoi anga pakari mei tona pamiri, kua tere ua atu aia ki mua e kua papetitoia i te 1995. E ono marama i muri mai, kua tata atu a Eva kia riro ei painia, me kare ei vaine tutu tamou i te Patireia. Kua rauka iaia mei te reira taime mai i te tauturu e a aronga turi e tae ua atu i te akatapu anga e te papetito anga.

Kua anauia a Carlos ma te turi. Mei tona tamariki anga kua rave atu aia i te au apinga akakona, te oraanga tau kore, e te keia anga. Kua tamatakuia e tetai au mema pupu taemoemo, kua oro atu aia ki São Paulo e kua noo raua ko João no tetai tuatau. Ko João, mei ia Carlos rai, e tangata turi katoa e kua akono i tetai oraanga marikonga kore.

I etai au mataiti i muri mai, kua apii atu a Carlos i te tuatua Patireia, te akakeuanga iaia kia akatikatika i tona oraanga e ka akatika kia tau tona akaipoipo anga ki te ture. I muri ake i te akonoanga i te au umuumu anga Tuatua Tapu, kua papetitoia a Carlos ei akatutu i tona akatapu anga kia Iehova. I taua taime rai, kare a Carlos i kite, kua matau katoa a João i te tuatua meitaki, e kua rave katoa aia i te au taui anga maata i roto i tona oraanga. I te kiteanga mai e kare a Iehova e mareka ana i te taangaanga anga i te au itoro, kua titiri a João i tana au putunga “itoro.” I muri mai i te akarukeanga i tona tu oraanga i mua ana, kua papetito katoaia a João.

Mei teaa to Carlos raua ko João rekareka anga i te aravei anga raua ki tetai Are Uipaanga Patireia e kua kite atu i te au taui anga tei raveia e raua! E nga upoko ngutuare tau raua i teianei e te tavini ra ei nga tangata tutu aere i te Patireia.

I Paratiri, te vaira e 30 putuputuanga reo akairo e e 154 pupu, ma te au papuritia e tere atu i te 2,500, i etai e 1,500 aronga turi. I te Uruoaanga Tapere “Ei Aronga Apiipii i te Tuatua a te Atua” 2001 i Paratiri no te aronga turi, e maata atu i te 3,000 tei tae atu, e e 36 tei papetitoia. Ma ta Iehova akameitakianga, te manakoia ra e manganui atu te aronga turi ka ariki mai i te tuatua Patireia.

[Tataanga Rikiriki i Raro]