TUA ORAANGA

Apii Au i Tetai ke Noatu e Tangata Turi Au

Akakiteia e Walter Markin

Kua papetitoia au i te mataiti 1941 i toku 12 mataiti. Tae roa ki te mataiti 1946 i mārama tikai au i te tuatua mou. Te tumu? Ka akakite atu au i toku tua.

I TE mataiti 1910, kua neke toku nga metua mei Georgia ki te tua opunga o Kanata, ki tetai are vaitata mai kia Pelly, Saskatchewan. Anauia au i te mataiti 1928, toko ono ia matou, ko au te openga. Kua mate toku metua tane e ono marama i mua ake ka anauia au, e kua mate toku metua vaine i toku rikiriki anga. Kare i roa atu, kua mate toku tuaine ko Lucy i tona 17 mataiti. No reira na te tungane o toku metua vaine ko Nick i akono mai ia matou.

I toku rikiriki anga, kua kite mai toku ngutuare tangata iaku i te uuti anga i te iku o te oroenua. Mataku tikai ratou e ka tuʼeia au e te oroenua, e kua ava mai ratou iaku. Kare ra oki au i rongo ana. Manuia kare te oroenua e tuʼe mai iaku. Inara ko te rā tikai te reira i kite ei toku ngutuare tangata e e turi au.

Akakite mai tetai tangata e e meitaki atu kia apai iaku ki tetai apii e maata te aronga turi. No reira kua apai toku Angakara ko Nick iaku ki tetai apii no te aronga turi i Saskatoon, Saskatchewan. Mamao roa teia apii mei toku ngutuare tangata e kua mataku tikai au no te mea e rima oku mataiti i tera taime. Ka atoro ua au i toku ngutuare tangata i te tuatau ua o te orote. Kare i roa ana, kua kite au i te tuatua reo akairo e kua reka au i te kanga kapiti ki te tamariki.

KITE I TE TUATUA MOU

I te mataiti 1939, kua akaipoipo toku tuaine ko Marion ia Bill Danylchuck, e na raua i akono ia maua ko toku tuaine ko Frances. Ko raua tei na mua i roto i toku ngutuare tangata i te apii i te Pipiria ki te Au Kite o Iehova. Me oki au ki te kainga no te orote, ka tauta pakari raua i te apii iaku kia kite no runga i te Pipiria. Kua ngata iaku i te tuatua kia raua no te mea kare raua e kite i te tuatua reo akairo. Inara kua kite raua e ākā inangaro toku i te kite no runga ia Iehova. Kua mārama au e te rotai ra ta raua apiianga ki ta te Pipiria, no reira kua aru au ia raua ki te angaanga tutu evangeria. I muri poto mai, kua papetitoia au i roto ia Tepetema 5, 1941, e na Bill i papetito iaku i roto i tetai tāpu vai. Koia tikai te anu!

Toku oki anga ki te kainga no te orote i te mataiti 1946, kua aere matou ki tetai uruoaanga i Cleveland, Ohio, i Marike. I te rā mua o te uruoaanga, kua tata toku tuaine i te au manako kia mārama au i te akoanga. I te rā rua o te uruoaanga, kua mataora tikai au i te kite e e pupu reo akairo tetai. Teianei, kua mārama au i te uruoaanga, e no te taime mua kua mārama au i te au apiianga a te Pipiria!

APII ATU I TE TUATUA MOU

I tera tuatau, koi akamutu ua akera te Tamaki II o te Ao e te akangateitei ra te tangata i to ratou enua. Toku oki anga ki te apii, e ākā inangaro toku kia vai akarongo mou kia Iehova. Kua akamutu au i te akangateitei i te reva, te imene akaepaepa enua, e te piri atu ki te au peu enua. Kua akamutu au i te aru i toku au oa apii ki te pure. Kare te au puapii e mataora ana i taku i rave, no reira kua akamata ratou i te akakino e te tuatua pikikaa mai kiaku kia taui i toku manako. Kua kite mai toku au oa apii, e kua riro teia ei atianga meitaki noku kia tuatua kia ratou no runga i te Pipiria. Tetai o toku au oa apii ko Larry Androsoff, Norman Dittrick, e Emil Schneider, tei āriki mai i te tuatua mou, e te akamori nei rai ratou ia Iehova i teia tuatau.

Me aere au ki tetai oire ke, inangaro tikai au i te akakite i te tuatua mou ki te aronga turi i reira. Tetai akaraanga, i Montreal, kua atoro au i tetai ngai e akaputuputu ana te aronga turi. I reira, kua tuatua au ki tetai tane mapu ko Eddie Tager, e mema aia no tetai pupu akatupu pekapeka. E tae ua atu ki tona mateanga i te mataiti i topa, tei roto aia i tetai putuputuanga reo akairo i Laval, Quebec. Kua aravei katoa au ia Juan Ardanez. Mei te aronga Berea rai i taito, kua rave aia i te kimikimianga ei akapapu e te rotai ra tana e apii ra ki ta te Pipiria. (Angaanga 17:10, 11) Kua riro mai aia ei Kite no Iehova, e kua riro katoa ei tangata pakari i Ottawa, Ontario, e tae ua atu ki tona mateanga.

I te mataiti 1950, kua neke au ki Vancouver. Noatu e reka ana au i te tuatua ki te aronga turi, te maara nei iaku te tuatua anga ki tetai vaine rongo ko Chris Spicer tona ingoa. Kua inangaro aia i te tatau i te au Punanga Tiaki, e kua inangaro aia kia aravei au i tana tane ko Gary. Kua aere au ki to raua kainga, e kua tuatua matou na roto i te tata reta. Kare matou i aravei akaou ana e tae roa atu ki tetai au mataiti i muri mai, ma te poitirere kua aere mai raua i te aravei iaku i ko i tetai uruoaanga i Toronto, Ontario. Kua papetitoia a Gary i ko i tera uruoaanga. Kua apii mai teia iaku i te puapinga kia tutu aere ua rai, no te mea kare roa tatou e kite me ka āriki mai te tangata ta tatou ka tuatua atu i te tuatua mou.

Kare i roa atu, kua oki au ki Saskatoon. Kua aravei au i tetai vaine e kua pati mai aia iaku kia apii i te Pipiria ki tana nga tamaine turi ko Jean raua ko Joan Rothenberger. Kua aere ana raua ki taua apii rai i aere ana au no te aronga turi. Kare i roa, kua akakite raua ki te au oa apii no runga i te Pipiria. Tei tupu mai, e rima au tamariki tei riro mai ei Au Kite no Iehova. Tetai ia ratou ko Eunice Colin. Aravei ana au ia Eunice i toku mataiti openga i te apii. I tera taime, kua oake mai aia i tetai raore e kua pati mai iaku kia riro ei oa nona. Kua riro mai aia ei tokorua akaperepere noku!

Te kite anga te mama o Eunice e te apii ra aia i te Pipiria, kua pati aia ki te puapii maata kia mārō ia Eunice kia akamutu i tana apii. Noatu tana tauta anga e kua rave aia i tana au puka apii, kua vai akarongo mou a Eunice kia Iehova. Te inangaro anga aia i te papetito, kua karanga tona nga metua kiaia e, “Me inangaro koe kia riro ei Kite no Iehova, e akaruke koe i teia ngutuare!” No reira i tona 17 mataiti, kua noo aia ki tetai ngutuare tangata e Kite ratou no Iehova. Kare aia i akamutu ana i tana apii Pipiria e kua papetitoia aia. To maua rā akaipoipo i te mataiti 1960, kare tona nga metua i aere mai. Tera ra, i te au mataiti i aereia, kua āriki mai raua ia maua no ta maua irinakianga e te tu i utuutu ei i ta maua tamariki.

AKONO MAI A IEHOVA IAKU

Ei nga metua turi, e ākā angaanga i te utuutu e itu tamariki tamaroa rongo. Inara kua akapapu maua e kua kite ratou i te reo akairo e rauka ai ia maua i te tuatua e te apii i te tuatua mou kia ratou. Kua tauturu mai te au taeake e te au tuaine i roto i te putuputuanga ia matou. Tetai akaraanga, kua tata mai tetai metua kia maua e te tuatua viivii ra ta maua tamaiti i roto i te Are Uipaanga Patireia. Kua akatikatika maua i ta maua tamaiti i te reira taime tikai. Te ā o ta maua au tamariki ko James, Jerry, Nicholas, e Steven, kua riro mai ei aronga pakari e te tavini nei ratou ia Iehova ma to ratou uaorai au ngutuare tangata. Ko Nicholas e tona tokorua ko Deborah, tei roto raua i te pupu uri reo akairo i te opati Betela i Peritane, e ko Steven raua ko tona tokorua ko Shannan, tei roto raua i te pupu uri reo akairo i te opati Betela i Marike.

Te mea mii, kua tu a Eunice i te maki cancer e kua mate aia e tai marama i mua ake to maua 40 mataiti ei nga tokorua akaipoipo. I taua tuatau ngata, kua maroiroi aia no tona irinaki i roto i te tuakaouanga. Te tapapa mataora nei au i te rā ka aravei akaou maua.

Ia Peperuare 2012, kua patere au e kua ati toku ivi kaokao. Kua kite mai au e ka inangaroia te tauturu, no reira kua noo au i ko i te ngutuare o taku tamaiti e tona tokorua. I teianei tei roto matou i te Putuputuanga Reo Akairo Calgary, e te tavini nei au ei tangata pakari. Ko te tika, ko te taime mua teia noku i roto i tetai putuputuanga reo akairo! Akapeea au te akaketaketa anga i toku pirianga kia Iehova i teia au mataiti i roto i tetai putuputuanga reo Papaa? Na te tauturu a Iehova. Kua taputou mai aia i te akono i te aronga matiroeroe. (Salamo 10:14) Te akameitaki nei au i te aronga tei tata i te au tataanga noku, tei apii i te reo akairo, e tei uri ki roto i toku reo kia mārama au.

Tetai taime kare roa au e mārama ana eaa te tuatuaia ra e kua manako au e kare tetai tangata i kite ka akapeea me tauturu i te aronga turi. Me manako akapera au e kua inangaro i te akamutu, kua akamanako au i ta Petero i tuatua kia Iesu e: “E te Atu, ka aere tika matou kiaai ra? tei ia koe te tuatua o te ora mutu kore.” (Ioane 6:66-68) Mei te au taeake e te au tuaine turi rai kua roa i roto i te tuatua mou, kua apii katoa au i te akatupu i te tu akakoromaki. E pera katoa i te irinaki i roto ia Iehova e tana akaaerenga, e kua apai mai teia i te au akameitakianga e manganui. I teianei e maata te au puka i roto i toku uaorai reo, e te mataora nei au i te aere ki te au uipaanga e te au uruoaanga i roto i te Reo Akairo o Marike. Riro teia ei tikaanga manea tikai noku i te tavini ia Iehova, to tatou Atua ngateitei.

[Tataanga i te kapi 32]

Taku au tamariki tamaroa ko James, Jerry, e Steven e to ratou au tokorua, te turuturu ra i te angaanga tutuanga reo akairo

[Tutu i te kapi 30]

Tetai pupu reo akairo i ko i te uruoaanga i Cleveland, Ohio, mataiti 1946

[Tutu i te kapi 30]

Tutu evangeria i te pae mataara i te au mataiti 1950

[Au Tutu i te kapi 31]

Maua ko Eunice i te mataiti 1960 e te 1989

[Tutu i te kapi 31]

Ko taku tamaiti ko Nicholas e tona tokorua ko Deborah i ko i te opati Betela i London

[Au Tutu i te kapi 32]

Faye raua ko James, Jerry raua ko Evelyn, Shannan raua ko Steven

[Tutu i te kapi 31]

I ko i te apii painia reo akairo, e 79 oku mataiti