“Auraka e Mataku Auraka e Tumatetenga”

“Auraka e mataku auraka e tumatetenga. . . . tei ia kotou oki a Iehova.”​—2 PARALEIPOMENO 20:17.

1. Eaa te tupuanga no te tamatakuanga ki runga i te tangata, e eaa ra i tau ei to ratou mataku anga?

TAMATAKUANGA! Te akatupu ra taua tuatua i te mataku i roto i te ngakau, te akakeu anga mai i te au manako tinamou kore e te puapinga kore. Te akaoraora ra te reira i te au manako ngakau vinivini, taitaia, e te riri. E e tuatua ia te akataka maira e eaa ta te manganui e mataku ra e ka tamanamanata i te au tangata no te au mataiti ka aereia mai. Te tika e kua tamaki ana etai au enua no etai ngauru mataiti i te tamatakuanga e tona au tu e manganui ma te autu anga meangiti ua kua akapapu mai i te tumu ka mataku ei.

2. Akapeea te Au Kite o Iehova i te ariu anga atu ki te manamanata o te tamatakuanga, te arataki anga ki teea au uianga?

² Noatu rai, te vaira te tumu tau no te manakonakoanga. Ko te Au Kite o Iehova, te rave maroiroi nei i te tutuanga i roto i te 234 enua e tetai au ngai o te enua, te manako papu nei. Koi kore ei e mataku e kare rava te tamatakuanga e akakoreia, kua papu ia ratou e ka takoreia te reira​—e kare e roaia atu. E mea tika tikai ainei kia akono atu i to ratou manako papu? Koai ka manuia i te akamataraanga i te ao mei teia kino, e ka akapeea te reira me tupu? Mei te mea e kua akakino etai tu o te angaanga ta ua ia tatou katoatoa, ka meitaki i reira i te akara i te tumu o taua manako papu ra.

3. Eaa te au tumu no te mataku e vai nei, e eaa tei totouia no runga i to tatou tuatau?

³ I teia tuatau, te mataku e te tumatetenga nei te tangata no tetai au tumu tuketuke. Ka akamanako ana i te au tangata e manganui tei kore e rauka i te akono ia ratou uaorai no te ruaine anga, o te au tangata e paruparu atura i te au maki kare e rauka i te rapakauia, e te au ngutuare e tauta pakari ra i te pae moni kia rauka ei te au mea no te oraanga. Ko te tika, ka akamanako ana i te tu papu kore o te oraanga! Penei i te akaraanga e te tapapa ua maira te matenga viviki na roto i te uanga me kore te tumatetenga, te papa ua ra no te akapou i te au mea ta tatou e akaperepere ra. Kua akariro taua tu mataku anga e te taitaia, e pera katoa tetai atu au maroanga e manganui e te au mea maromaroa, i to tatou tuatau tikai i tei akatakaia e te apotetoro ko Paulo: “Ka tupu te kino maata i taua tuatau openga ra, kia kite mai koe. E riro te tangata nei ei akaperepere ia ratou uaorai, . . . ei aroa kore, ei akaatikau koreromotu ra, ei tapepe pikikaa, ei mako kore, ei rotoriri, ei akavaavaa i te tangata memeitaki ra.”​—2 Timoteo 3:1-3.

4. Eaa te au tu papu te vaira no te tutu kinokino tei akakiteia mai ia 2 Timoteo 3:1-3?

⁴ Noatu kua akataka mai teia irava i te tuatau kinokino, te akakite katoa maira te reira i tetai manakonakoanga. Ka akara ana e ka tupu te tuatau kino maata “i taua tuatau openga ra” o ta Satani akatereanga kino o te au mea nei. Teia te aiteanga e te vaitata mai nei te akamaruanga e kare e roaia atu ka tupauia te akatereanga kino o teianei ao e te tutaraanga a te Patireia apa kore o te Atua, no te reira kua apii a Iesu i tana au pipi kia pure. (Mataio 6:9, 10) Ko te reira Patireia e kavamani ia i te rangi no te Atua, te ka “kore rava e akakoreia,” i na te peroveta ei ko Daniela, mari ra “na te reira e akapueurikiriki e e akapou i taua au basileia [o te tangata] katoa ra, e ka vai rai te reira e tuatau ua atu.”​—Daniela 2:44.

Te Tu Neutara Kerititiano me ko te Tamatakuanga

5. Akapeea te pa enua i te ariu anga atu ki te takinga kino o te tamatakuanga i oti ua akenei?

⁵ No etai ngauru mataiti, kua tamate te tamatakuanga i te au tangata e tauatini ua atu. Kua maata mai te akamatakiteanga no teia kino takapini i te ao i muri mai i te tamaki angaia a New York City e Washington, D.C., ia Tepetema 11, 2001. No te maatamaata e te kite ateaia te tamatakuanga takapini i te koropu, kua akapupu viviki atu te pa enua takapini i te enua no te tamaki atu i te reira. Ei akaraanga, ia Titema 4, 2001, i na tetai ripoti nuti ei, “kua ariki te au minita enua ke mei te 55 enua i Europa, Marike Tokerau e te au enua i Asia Rotopu i tetai parani” tei akanoonooia kia akaau i ta ratou au angaanga. Kua akapaapaa tetai opita teitei o Marike i teia tautaanga e te oronga maira i te “mana ririnui” no te patoi i te au angaanga tamatakuanga. Ma te poitirere, kua piri atu e anere ua atu tangata ki roto i tei akatakaia e te The New York Times Magazine e ko “te akamataanga o tetai tamaki maata.” Mei teaa te puapinga o taua tautaanga ra ka tiaki e kiteaia ei. Inara, ko te au tupuanga o te reira tamaki patoi i te tamatakuanga, kua akatupu i te au manako ngakau matakutaku e te apiapi ki te manganui, inara kare ra i te aronga e irinaki ra ia Iehova.

6. (a) Eaa ra ka ngata ei i etai i te ariki i te turanga neutara Kerititiano tei akonoia e te Au Kite o Iehova? (e) Eaa te akaraanga no te angaanga poritiki ta Iesu i akanoo no tana au pipi?

⁶ Kua kiteaia te Au Kite o Iehova no to ratou tu neutara i te pae poritiki. Koi puareinga ei te maata anga o te tangata i te ariki i teia turanga i te au tuatau au, kare ratou e mareka ana me tupu mai te au turanga tuke ua akerai. E putuputu te taime, ko te mataku e te manako papu kore tei akatupuia mai e te tamaki kua akakeu i te au manako irinaki i te pa enua. Penei ka akariro teia e kia ngata no etai kia marama e eaa ra tetai ka emiemi ei i te turu i te au akapupuanga rongonui o te pa enua. Noatu rai, kua kite te au Kerititiano mou e kia akarongo ratou i ta Iesu akauenga “kare kotou i teianei ao.” (Ioane 15:19; 17:14-16; 18:36; Iakobo 4:4) Te umuumu ra teia e kia noo neutara ua ratou i roto i te au mea poritiki me kore i te au mea no te pirianga tangata. Kua akanoo mai a Iesu uaorai i te akaraanga tau. Te manako anga i tona tu pakari apa kore e te au tu meitaki roa, ka rauka ua iaia i te akamanako mai i te au angaanga a te tangata i tona tuatau. Inara, kua patoi aia i te kapiti atu ki roto i te angaanga poritiki. I te akamataanga o tana angaanga orometua, kua patoi aia ma te ngaueue kore i ta Satani oronga anga kia tutara ki rungao i te au patireia takapini i te ao. I muri mai, kua kopae papu tikai aia i te akanoonoo i tetai opati poritiki.​—Mataio 4:8-10; Ioane 6:14, 15.

7, 8. (a) Eaa ra e kare te aiteanga o te tu neutara poritiki tei akonoia e te Au Kite o Iehova, e no teaa ra? (e) Akapeea a Roma 13:1, 2 i te arai anga i te piri anga atu ki roto i te au angaanga ta ua i te kavamani?

⁷ Ko te turanga neutara tei akonoia e te Au Kite o Iehova auraka e kia manakoia e te turu ra ratou me kore te akatika ra ratou i te au angaanga ta ua. No ratou kia ariki i te reira te pikikaa ra ia i ta ratou e akakite ra e e au tavini no ‘te Atua aroa e te au.’ (2 Korinetia 13:11) Kua apii ratou i to Iehova manako no runga i te ta ua. Kua tata te tata taramo: “Te timata mairā Iehova i te tangata tuatua-tika: kareka te tangata kino, e tei inangaro i te takinga-kino, kua riri roa tona ngakau iaia.” (Salamo 11:5) Kua kite katoa ratou i ta Iesu i tuatua ki te apotetoro ko Petero: “Ka momono ana i taau koke ki roto i te vaî; ko tei rave i te koke ra, ka mate ïa i te koke.”​—Mataio 26:52.

⁸ Noatu kua akaari taka meitaki mai te tuatua enua e kua putuputu te taime e kua uri te au Kerititiano tutu ua ki “te koke,” kare te reira e tika ana ki te Au Kite o Iehova. Kua patoi ratou i taua angaanga katoatoa. Te akarongo tiratiratu ra te Au Kite o Iehova i te akoanga a Roma 13:1, 2: “Kia kauraro marie te tangata katoatoa i te aronga mana taoonga ra [te au arataki kavamani], Kare rava oki e mana mari ra no ko mai i te Atua ra; te aronga mana e noo nei, kua akonoia ïa e te Atua. E teianei ko tei māro atu ki te taoonga ra, kua māro aia i tei akonoia e te Atua ra: e te aronga i māro ra, ka rauka ïa te akaapa ia ratou uaorai.”

9. Na roto i teea nga mataara e rua te tamaki anga atu te Au Kite o Iehova i te tamatakuanga?

⁹ Inara, i te mea e kino tikai te tamatakuanga, kare ainei i te mea tau e kia rave te Au Kite o Iehova i tetai apinga ei tauturu i te patoi atu i te reira? Ae ka tika ratou kia rave i tetai apinga, e te rave ra ratou. Te mea mua, kua patoi ratou uaorai i te kapiti atu ki tetai o taua tu angaanga ra. Te rua, te apii ra ratou i te au kaveinga Kerititiano ki te tangata e mea aruia ka akakore i te ta ua e tona au tu katoatoa.a I te mataiti i topa akenei, kua akapou te Au Kite e 1,202,381,302 ora i te tauturu anga i te tangata kia apii i teia tu oraanga Kerititiano. Kare teia i te tuatau kaimoumouia, no te mea ei tupuanga no teia angaanga, e 265,469 tangata tei papetitoia ei Au Kite no Iehova, te akaari anga ki te tangata e kua patoi ratou i te angaanga ta ua.

10. Eaa te au manakonakoanga no te akakoreanga i te angaanga ta ua i teia tuatau?

¹⁰ Pera katoa, kua kite te Au Kite o Iehova e kare e rauka ia ratou uaorai i te takore i te kino mei te ao. No reira oki ratou i tuku ei i to ratou irinaki katoa ki roto iaia te ka rauka​—ko te Atua ko Iehova. (Salamo 83:18) Noatu te au angaanga ngakau tae, kare e rauka i te au tangata i te takore i te ta ua. Kua akamatakite te tata Pipiria tei akauruia ia tatou no runga i to tatou tuatau, “i taua tuatau openga ra,” e te karanga ra: “Ko te au tangata kikino e te aronga pikikaa ra, e tupu rai to ratou kino, e e maata atu, i te pikikaa ua anga atu, e te pikikaa angaia mai.” (2 Timoteo 3:1, 13) Me akaraia atu mei teia turanga nei, kare rava e rauka i tei manakonakoia e te au tangata kia autu i te tamaki anga i te kino. I tetai tua, ka rauka ia tatou i te irinaki ki runga ia Iehova kia akaatea takiri rava e te tinamou i te angaanga ta ua.​—Salamo 37:1, 2, 9-11; Maseli 24:19, 20; Isaia 60:18.

Mataku Kore Noatu e te Vaitata Mai Nei te Tamakianga

11. Eaa te au takainga tei akono ke ia e Iehova no te takore i te angaanga ta ua?

¹¹ I te mea te riri ra te Atua au i te ta ua, ka marama i reira tatou i te tumu i akanoo ei aia i te au takainga no te akapou i tona tumu tikai, ko Satani te Tiaporo. Ko te tika, kua akatupu ke ana Aia e kia mamae a Satani i tetai autuanga taakamaia i te nga rima o Mikaela te angera maata​—to te Atua Ariki akaterono ouia, ko Iesu Karaiti. Te akataka maira te Pipiria i te reira na teia mataara: “E e tamaki tei runga i te rangi: ko Mikaela e tana au angela, tamaki atura i te taae; e kua tamaki maira te taae e tana au angela, Kare ra i riro te re ia ratou; e kare rava atura o ratou e nooanga i runga i te rangi. Uriia atura oki te taae maata ki vao, ko taua ovi taito ra ïa, ko tei karangaia i te diabolo ra, e ko Satani oki, ko tei pikikaa i to te ao katoatoa nei, i uriia aia ki vao ki runga i te enua nei, e tana au angela katoa, kua uri katoaia ki vao.”​—Apokalupo 12:7-9.

12, 13. (a) Eaa te puapinga no runga i te mataiti 1914? (e) Eaa ta Ezekiela taputou e totou maira no te aronga e turu ra i te Patireia o te Atua?

¹² Kua tano katoa te akapapaanga a te Pipiria e te au tupuanga o te ao i te taiku anga mai i te mataiti 1914 e ko te tuatau ia i tupu ei te tamaki i runga i te rangi ra. Mei reira mai, kua kino marie ua te au turanga o te ao. Te akamarama maira a Apokalupo 12:12 i te tumu, i te na ko anga: “E teianei, kia rekareka, e te au rangi e, e ko kotou katoa oki ko tei noo i reira. E mate ra oki to te enua e to te tai! tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.”

¹³ Tei maramaia, kua akatikaia to te Tiaporo riri ki runga tikai i te aronga akamori akatainuia o te Atua e to ratou au taeake o te “mamoe ke atu.” (Ioane 10:16; Apokalupo 12:17) Kare e roaia atu ka tae teia patoianga ki tona take me rave te Tiaporo i tetai tamakianga pakari i te patoi anga i te aronga katoatoa e turu atura i te Patireia akanooia o te Atua e tei tuku i to ratou irinaki ki roto i te reira. Kua tuatuaia no runga i teia tamakianga i roto ia Ezekiela pene 38 e e tamakianga na “Goga i te enua o Magoga.”

14. Eaa te au tautaanga paruruia tei rekarekaia ana e te Au Kite o Iehova i te tuatau i topa, e ka pera ua ainei teia?

¹⁴ Mei to Satani titiri angaia mai mei te rangi ra, kua paruruia ana te iti tangata o te Atua i etai taime mei ta Satani au tamakianga na roto i te au angaanga a tetai akatereanga poritiki, tei akatakaia mai na roto i te au tuatua akatutu anga ia Apokalupo 12:15, 16. I tetai tua, te akakite maira te Pipiria i te tuatau o te tamakianga openga a Satani, kare roa te au akaaerenga o te tangata e paruru atu i te aronga tei tuku i to ratou irinaki ki roto ia Iehova. Ka akatupu ainei teia i te Kerititiano kia mataku me kore kia tumatetenga? Kare roa!

15, 16. (a) Ko ta Iehova tuatua akapapu ki tona iti tangata i te au ra o Iehosaphata te oronga maira i teea tumu e papu ei te au Kerititiano i teia tuatau? (e) Eaa te tu akaraanga tei akanooia e Iehosaphata e te iti tangata no te au tavini o te Atua i teia tuatau?

¹⁵ Ka turu te Atua i tona iti tangata mei tana turu anga i tona iti tangata i te tuatau o te Ariki ko Iehosaphata. Ka tatau tatou: “E kua tuatua maira aia, E akarongo mai ana, e Iuda katoatoa ra, e to Ierusalema, e te ariki e Iehosaphata: Te na ko mairā Iehova kia kotou, Auraka kotou e mataku, auraka oki e tumatetenga i teianei aronga maata: kare na kotou te tamaki, na te Atua ra. . . . Kare kotou e tamaki i tenana, e akamou ua kotou, e tu ua mai kotou, e e akara i te ora a Iehova i o kotou na; e Iuda, e Ierusalema katoa, auraka e mataku auraka e tumatetenga; apopo e aere ei ki vao ka aravei ia ratou; tei ia kotou oki a Iehova.”​—2 Paraleipomeno 20:15-17.

¹⁶ Kua akapapuia te iti tangata o Iuda e kare ratou e anoanoia kia tamaki atu. Pera katoa, me tamakiia te iti tangata o te Atua e Goga o Magoga, kare ratou e anoanoia kia rave i te au apinga tamaki ei paruru ia ratou uaorai. Mari ra, ka ‘tu ua mai ratou, e e akara i te ora a Iehova’ no ratou. E tika, kare te aiteanga o te tu ua e ka kore te angaanga , mei te iti tangata rai o te Atua i te tuatau o Iehosaphata kare i kore ana i te angaanga. Ka tatau tatou: “Kua tupou iora te mimiti o Iehosaphata ki raro te mata i te one: kua tipapa maira to Iuda katoatoa, e to Ierusalema, ki raro i mua i te aroaro o Iehova, ma te akamori ia Iehova. . . . E oti akera [ta Iehosaphata] tuatua anga ki te au tangata, kua akataka atura i te aronga imene kia Iehova, ei akameitaki ma te akangateitei tapu, ka aere ei ratou, na mua i taua nuku ra, ka tuatuaʼi e, E akameitaki ia Iehova, ka tu oki tona aroa e rimua.” (2 Paraleipomeno 20:18-21) Ae, noatu me aroia atu e te tamaki a te enemi, kua rave maroiroi ua atu te tangata i te akapaapaa ia Iehova. Kua akanoo mai teia i te au akaraanga no te Au Kite o Iehova kia aru me rave a Goga i te tamaki atu ia ratou.

17, 18. (a) Eaa te au tu papu tei rauka i te Au Kite o Iehova no te tamakianga atu ia Goga? (e) Eaa te au akamaaraaraanga tei oronga ua ia akenei ki te au mapu Kerititiano?

¹⁷ A te reira taime​—e i muri mai i te akamataanga ta Goga tamakianga​—ka rave ua atu rai te Au Kite o Iehova i te turu i to te Atua Patireia. Ka kimi ua atu ratou i te maroiroi e te paruruanga na te taokotaianga ma te tere atu i te 94,600 putuputuanga takapini i te ao. (Isaia 26:20) Mei teaa ra te tuatau tau kia akapaapaa ia Iehova ma te mataku kore! Kare, te tapapaanga i ta Goga tamaki anga kare e akakeu ana ia ratou kia unui ki muri ma te mataku. Mari ra, te akakeu ra te reira ia ratou kia akamaata atu i ta ratou atinga akapaapaa te ka rauka ia ratou i te rave.​—Salamo 146:2.

¹⁸ Kua akatutu maneaia teia tu papu e te tauatini ua atu mapu ou takapini i te ao tei akono i te angaanga orometua tamou. Ei akaketaketa maata i te meitaki no te ikianga i taua tu oraanga ra, kua tukunaia te aenga pepa Youths​—What Will You Do With Your Life? i te au uruoaanga tapere 2002. Te mareka nei te au Kerititiano, te aronga mapu e te aronga ruau, no te reira akamaaraara anga tau.​—Salamo 119:14, 24, 99, 119, 129, 146.

19, 20. (a) Eaa ra te tumu e kore ei te au Kerititiano e mataku me kore e tumatetenga? (e) Eaa ta te atikara apii e aru mai nei ka rave?

¹⁹ Noatu te au turanga o te ao, kare te au Kerititiano e anoanoia kia mataku me kore kia tumatetenga. Kua kite ratou e kare e roaia atu ka takore pu tikai te Patireia o Iehova i te ta ua e tona au tu katoatoa. Te kite katoa ra ratou i te pumaana i te kiteanga e ka akaoki akaou mai te tuakaouanga i te ora ki te manganui tei ngere i to ratou au oraanga na roto i te ta ua. I te mea e ka oronga teia ki etai i te tuatau mua no ratou kia apii no runga ia Iehova, ka akariro te reira i etai ke kia rave tamou ua atu i ta ratou angaanga akatapuia kiaia.​—Angaanga 24:15.

²⁰ Ei au Kerititiano mou, kua ariki tatou i te umuumuanga kia akono i te tu neutara Kerititiano e te tauta ra kia pera rai. Ka inangaro tatou i te mou i to tatou manakonakoanga meitaki no te rauka anga i te ‘tu ua mai, e e akara i te ora a Iehova.’ Ka akaketaketa te atikara e aru mai nei i to tatou akarongo na te akamatakiteanga mai kia tatou i te au tupuanga o teia tuatau e oronga marie maira i te kite oonu atu ki roto i te akatupuanga o te totou Pipiria.

[Tataanga Rikiriki i Raro]

Ka Rauka Ainei ia Koe te Akataka?

• Eaa ra te au tangata e manganui i teia tuatau i manako papu kore ei?

• Eaa ra i manako papu ei te Au Kite o Iehova no te tuatau ki mua?

• Eaa ta Iehova i rave ke ana no te tumu o te angaanga ta ua?

• Eaa ra i kore ei e tumu no tatou kia mataku i te tamaki a Goga?

[Tutu i te kapi 13]

Akanoo a Iesu i te akaraanga tau no te tu neutara Kerititiano

[Au Tutu i te kapi 16]

Kua rave rekareka te tauatini anga o te Au Kite mapu i te angaanga orometua tamou

[Akameitakianga no te Tataanga i te kapi 12]

UN PHOTO 186226/M. Grafman