Ariki Anga i te Akakoroanga o te Akoanga

EAA taau e manako ra me akarongo koe i te tuatua “akoanga”? Te akataka maira tetai tikitinari i te akoanga e ko “te rave anga no te akariro i te tangata kia akarongo i te au ture me kore te au kaveinga no te tu, e te akautunga anga ia ratou me kare ratou e rave akapera.” Noatu e kare e ko teia te aiteanga i ariki uaia, e manganui te tangata i teia tuatau te taiku maira i tetai aiteanga papu kore no te akoanga.

Inara, te akaari maira te Pipiria i tetai aiteanga tuke no te tuatua akoanga. “Auraka koe e akavaavaa, e taku tamaiti, i te ako a Iehova,” i tata ei te ariki pakari ko Solomona. (Maseli 3:11) Te taiku ra teia au tuatua, kare no te ako anga noa ua, mari ra ki “te ako a Iehova,” koia oki, te akoanga tei akatumuia ki runga i te au kaveinga teitei a te Atua. Ko taua akoanga anake e mea meitaki ia e te puapinga i te pae vaerua​—te anoano katoaia ra. Ei tukeanga, ko te akoanga tei akatumuia ki runga i te manako o te tangata te patoi ra i ta Iehova au kaveinga teitei e putuputu te taime e mea akakino e te akamamae ua. Na te reira i akamarama mai i te tumu i manako papu kore ei te manganui i te akoanga.

Eaa ra tatou i raurauia mai ei kia ariki i ta Iehova akoanga? I roto i te au Tuatua Tapu, kua akatakaia mai te akoanga tu-Atua ei akakiteanga i to te Atua aroa i tana au tangata i anga ra. No reira, kua tuatua a Solomona: “Ko tei akaperepereia e Iehova ra, ko tana ïa e pāpā mai; mei te metua i te tamaiti, tana i akaperepere ra.”​—Maseli 3:12.

Akoanga me e Utunga​—Ko Teea?

Ko te akoanga tei akakiteia mai i roto i te Pipiria e maata tona au tu​—e aratakianga, e ikuikuanga, e terenianga, e apiianga, e akatikatikaanga, e pera e akautunga. Inara, i roto i nga tuanga tataki tai, kua akakeuia ta Iehova akoanga e te aroa, e ko tana akakoroanga koia oki kia akapuapinga i tei rauka atura. Kare rava ta Iehova akoanga no te akatikatika e ko te akautunga te akakoroanga.

I tetai tua, ta te Atua rave anga i te akautunga kare i akakoroia no te akatikatika me kore no te apii anga i te ka rauka ra. Ei akaraanga, mei te ra tikai i ara ei a Adamu raua ko Eva, kua akamata raua i te mamae i te au tupuanga no to raua akarongo kore. Kua tuaru a Iehova ia raua mei te aua kainga parataito o Edene, e kua tuku uaia raua ki te au tupuanga o te tu ara ua, te maki, e te ruaine anga. I muri ake i te au anere mataiti o te vaianga mamae ua, kua mate ua atu raua. Pouroa teia e akautunga tu-Atua ia, inara kare i te akoanga akatikatikaanga. Kua rave akakoro e kare i tataraara ana, kare a Adamu raua ko Eva e rauka i te akatikatikaia.

Tetai atu au tataanga o ta Iehova au angaanga akautunga te kapiti maira i te Vaipuke o to Noa tuatau, te akapouanga o Sodoma raua ko Gomora, e te takoreanga o te vaeau Aiphiti i te Tai Muramura. Teia au angaanga na Iehova kare i akakoroia kia oronga mai i te aratakianga, te ikuikuanga, me kore te terenianga no tei rauka ra. No runga i taua au angaanga akautunga na te Atua, kua tata te apotetoro ko Petero: “E kare i akaperepere i to te ao taito ra, akaora iora ra ia Noa i te tangata i ako i te tuatua-tika ra, ma etai e tokoitu ra, ka apai mai ei aia i te nina-anga ki teianei ao akono kore i te Atua ra; E akariro atura i nga oire ra ko Sodoma e Gomora, ei reu ai, uripu takiri atura ia ratou i te akaapa anga atu, akariro atura oki ei akaraanga na te aronga e tāpu i te akono kore i te Atua a muri ake.”​—2 Petero 2:5, 6.

Na roto i teea tu i “akariro atura oki [teia au angaanga akautunga] ei akaraanga na te aronga e tāpu i te akono kore i te Atua a muri ake”? I roto i ta Paulo reta ki to Tesalonia, kua akakite mai aia no runga i to tatou tuatau e ko te taime e apai mai ei te Atua, na roto i tana Tamaiti, ko Iesu Karaiti, “ma te ai mura ra, i te tuku anga mai i te mate i te aronga kare i kite i te Atua, e tei kore i akarongo i te evangelia.” Te karanga ra a Paulo: “Ko te ka akautungaia mai ïa i te mate mutu kore.” (2 Tesalonia 1:8, 9) Ma te papu, kare i akanooia taua akautunga no te apii atu me kore no te akatano ua i te aronga e rauka ra te reira. Inara, me pati mai a Iehova i tana aronga akamori kia ariki i tana akoanga, kare aia e taiku ana no te akautunga anga o te aronga ara tataraara kore.

E mea puapinga e kare te Pipiria i akataka maata mai ia Iehova ei peretana akautunga. Mari ra, kua akataka putuputuia aia ei puapii aroa ua e ei peretana tereni tamou marie ra. (Iobu 36:22; Salamo 71:17; Isaia 54:13) Ae, ko te akoanga tau i te Atua te orongaia ra ei akakoroanga no te akatikatika te kapiti uaia maira e te aroa e te tamou marie. Na te marama anga i te akakoroanga o te akoanga, tei roto te au Kerititiano i te turanga meitaki no te ariki e te oronga i te akoanga ma te tu tau.

Te Akoanga a Nga Metua Aroa Ua

I roto i te ngutuare tangata e i roto i te putuputuanga Kerititiano, te anoanoia ra te katoatoa kia marama i te akakoroanga o te akoanga. Te tika ra teia ki te aronga tei roto i te au turanga akaaere, mei te au metua. Te karanga ra a Maseli 13:24 e: “Ko tei vaoo ua i te pāpā ra, kua riri ïa i tana tamaiti: ko tei aroa ra iaia, e ako ïa iaia i reira ra.”

Akapeea te au metua i te oronga anga i te akoanga? Te akamarama maira te Pipiria: “E kotou, e te au metua tane, auraka e akariri atu i ta kotou tamariki, inara e rave atu i te utuutu mai ia ratou i te ako anga e te akatikatikaanga manako a Iehova.” (Ephesia 6:4, NW) Kua tuatua akaouia teia akakiteanga na roto i teia au tuatua: “E te au metua ra, auraka e akariri atu i ta kotou tamariki, ko te taitaia aea ratou.”​—Kolosa 3:21.

Ko te au metua Kerititiano te marama ra i te akakoroanga o te akoanga kare ia e akono ma te akariri. Te kaveinga tei akakiteia mai ia 2 Timoteo 2:24 te tau ra ki te tu e oronga ra te au metua i te akoanga. Kua tata a Paulo: “Kare oki te tavini o te Atu nei e tika kia māro; kia maru ra aia i te tangata katoa nei, e te tau oki kia apii ia etai ke.” Te riri akatere koreia, te avaava anga, e te au tuatua akakino me kore te au tuatua viivii kare te reira e tau no te akoanga aroa ua e kare o te reira ngai i roto i te oraanga Kerititiano.​—Ephesia 4:31; Kolosa 3:8.

E maata te o maira ki roto i te akatikatikaanga a nga metua i te oronga anga i te akautunga ma te viviki e te papu tikai. Te anoano ra te maata anga o te tamariki i te akakiteanga ripiti ua i mua ake ka akatikatika ei i to ratou manako. No reira, kia akapou te au metua i te taime, akono i te tu tamou marie, e te akamanako i te tu i oronga ei ratou i te akoanga. Ka tau ratou kia akamanako e kia utuutu ia mai te tamariki “i te ako anga e te akatikatikaanga manako a Iehova.” Teia te aiteanga ko tetai terenianga ka roa no tetai au mataiti.

Ako te Au Tiaki Kerititiano ma te Maru

Te tau katoa ra te au kaveinga ki te aronga pakari Kerititiano. Ei au tiaki aroa ua, te tauta ra ratou i te akamaroiroi i te anana na te oronga anga i te ikuikuanga, te akaaerenga, e te akoanga me anoanoia. Te raveanga i te reira, te akamanako ra ratou i te akakoroanga tikai o te akoanga. (Ephesia 4:11, 12) Me manako ua ratou i te oronga anga i te akautunga, ka tuku ua ratou i te kino i tei rave tarevake ra e ka akaruke ua i te reira. Te maata atura te o maira ki roto i te akoanga tu-Atua. Akakeuia e te aroa, ka akono ua atu te aronga pakari i te rave i ta ratou akoanga. No te mea te manako tikai maira ratou, e putuputu te taime ka akapapa ratou i tetai au atianga o te akamaroiroianga e te terenianga.

Kia tau ki te akoanga te kitea ra ia 2 Timoteo 2:25, 26, noatu te akono anga i te aronga kare e ariki ua i te akoanga, ka ikuiku te aronga pakari ma te “maru marie.” Te akakite maira i reira te irava i te akakoroanga o te akoanga: “Peneiake ko te oronga mai te Atua i te tataraara kia āriki i te tuatua-mou ra; Kia ora ratou i te ereere a te diabolo ra.”

I tetai taime, e mea anoanoia kia akatakake i tetai tei rave i te kino ma te kore e tataraara mei te putuputuanga. (1 Timoteo 1:18-20) E pera i taua rave anga ka tau kia manakoia ei akoanga, kare ei utunga. Mei tetai taime ki tetai, ka tauta te aronga pakari i te atoro i te au tangata tataki tai tei akatakakeia tei kore e rave putuputu ana i te tarevake. I roto i taua au atoroanga, ka angaanga rotai te aronga pakari ma te akakoroanga tikai o te akoanga na te akapapa anga mai i te au takainga tei anoanoia no tetai tangata kia oki mai ki te putuputuanga Kerititiano.

Ko Iehova te Akavanui Apa Kore

Te au metua, te au tiaki Kerititiano, e tetai ke e mana tau to ratou ki te Tuatua Tapu kia oronga i te akoanga ka tau kia akono ma te pakari i taua apainga. Auraka ratou e manako kia akava i tetai ke e kare e rauka i te akatikatikaia. No reira, auraka ta ratou akoanga e kia akono i te tu ka tutaki me kore te utunga kino.

Ae, te taiku ra te Pipiria no runga ia Iehova e ko tetai te ka oronga i te utunga pakari e te openga. E tika, te karanga ra te au Tuatua Tapu e “e mea mataku maata kia rokoia e te rima o te Atua ora ra.” (Ebera 10:31) Inara auraka tetai tangata e tauta i te akaaite iaia uaorai kia Iehova na teia tu me kore na tetai ua atu tu. E kare o tetai tumu kia manako e e mea kino kia o atu ki roto i nga rima o te au metua me kore tetai tangata pakari i roto i te putuputuanga.

Ka rauka ia Iehova te akono i te parani apa kore me oronga i te akoanga. Kare e rauka i te au tangata. Ka rauka i te Atua i te tatau i te ngakau e te akataka e kare rava tetai e rauka i te akatikatika ia e no reira te tau ra kia akautungaia ma te papu e ei mea openga ra. I tetai tua, kare e rauka i te au tangata i te tuku i taua utunga. No te reira tumu, me anoanoia e kia orongaia te akoanga, te aronga e turanga to ratou kia rave i te reira ka tau kia pera ma te akakoroanga kia akatikatika.

Ariki Anga i ta Iehova Akoanga

Ka anoano tatou katoatoa i ta Iehova akoanga. (Maseli 8:33) Ko te tika, ka tau tatou kia anoano i te akoanga tei akatumuia ki runga i ta te Atua Tuatua. Ia tatou e apii atura i te Tuatua a te Atua, ka rauka ia tatou i te ariki i te akoanga te aere tika maira mei ia Iehova na roto i te au Tuatua Tapu. (2 Timoteo 3:16, 17) Inara, i tetai taime, ka rauka ia tatou te akoanga mei te au taeake Kerititiano. Te kiteanga i te tu i orongaia mai ei te akoanga ka tauturu ia tatou i te ariki i te reira ma te puareinga.

Kua akakite te apotetoro ko Paulo e: “Kare rava oki e ako e riro ei mea rekareka i reira ra, e mea aue ra.” E oti kua akakite mai: “Kareka i muri ake, ko te meitaki ra ïa, koia rai te tuatua-tika te tupu i taua ako ra, i te aronga i akamātauia i te reira.” (Ebera 12:11) E akakitekiteanga ta Iehova akoanga i tona aroa oonu no tatou. Me ka rauka ia tatou me kore ka oronga i te akoanga, kia akamanako tatou i te akakoroanga o te akoanga tu-Atua e kia akono i ta te Pipiria tuatua pakari: “E mou piri tikai i te ako; auraka roa e tukua: e tāpu marie i te reira; ko toou ïa ora.”​—Maseli 4:13.

[Au Tutu i te kapi 21]

Rauka i te aronga ara tataraara kore te utunga akava a te Atua, kare i tana akoanga akatikatika

[Au Tutu i te kapi 22]

Akakeuia e te aroa, ka akapou te aronga pakari i te tuatau no te kimikimianga e te tauturu i te aronga i rave i te tarevake

[Au Tutu i te kapi 23]

Ma te tamou marie e te aroa ua ka oronga te au metua i te “ako anga e te akatikatikaanga manako a Iehova”