“E Akarongo Mai i te Ako, Kia Pakari”

1. Akapeea e kitea ai e tatou te pakari, e akapeea te reira te tauturu anga ia tatou?

NO KO mai te pakari ia Iehova, e ka oronga ua mai aia i te reira ki te katoatoa. Tatau tatou ia Iakobo 1:5: “Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai ma te patoi kore.” Okotai mataara e kitea ai e tatou te pakari na te āriki anga i te akoanga a te Atua. Ka paruru te reira ia tatou mei te au mea tarevake e ka akapiri vaitata ia tatou kia Iehova. (Maseli 2:10-12) E ka rauka te manakonakoanga mataora o te ora mutu kore.—Iuda 21.

2. Akapeea tatou me apii kia inangaro i te akoanga a te Atua?

² No te mea e tu apa kore to tatou, e penei no te tu i utuutuia ai tatou, i tetai taime e ngata i te āriki i te akoanga e te kite i te reira ei mea meitaki. Inara me puapingaia to tatou oraanga mei te akoanga a te Atua, ka mārama tatou e te aroa maira aia ia tatou. Akakite mai a Maseli 3:11, 12: “Auraka koe e akavaavaa, e taku tamaiti, i te ako a Iehova.” Karanga katoa te reira: “Ko tei akaperepereia e Iehova ra, ko tana ïa e pāpā mai.” Ka papu ia tatou e te inangaro maira a Iehova i te meitaki no tatou. (E tatau ia Ebera 12:5-11.) No te mea kua kite meitaki te Atua ia tatou, ka tau ua rai tana akoanga e ka anoano tatou i te reira. I roto i teia atikara, ka uriuri tatou e a tuanga o te akoanga: (1) te ako ia tatou uaorai, (2) te ako ta te au metua ka oronga ki ta ratou tamariki, (3) te ako tei orongaia mai na roto i te putuputuanga e te (4) te apinga tei kino roa atu i tetai ua atu mamae no te akoanga.

EAA I RAUKA AI TE PAKARI ME AKO TATOU IA TATOU UAORAI?

3. Akapeea tetai tamaiti me kite i te ako iaia uaorai? Oronga mai i tetai akaraanga.

³ Me ako tatou ia tatou uaorai, ka akatere tatou i ta tatou ka rave e te manako. Kare tatou i anauia mai ma te kite i te ako ia tatou uaorai, inara ka anoanoia tatou kia apii i te reira. Ei akaraanga, me apii tetai tamaiti i te akaoro i te patikara takatakai, ka mou tona metua i te patikara ki runga. Inara, kare e roa, ka apii te tamaiti i te akaoro i te patikara, e ka akaruke te metua iaia no tetai manga taime. Me papu i te metua e ka mako ua te tamaiti i te akaoro i te patikara, ka akaruke aia iaia kia aere. Mei tera katoa, me tereni te au metua i ta ratou tamariki e kia “apii ra ia ratou kia pakari ma te ako a te Atu,” te tauturu ra ratou i te tamariki kia apii ia ratou uaorai ma te pakari.—Ephesia 6:4.

4, 5. (a) Eaa ra te tu ako ia koe uaorai ka riro ei ei tuanga puapinga no te tu “akatangata ou”? (e) No teaa tatou ka kore ei e taitaia me rave i te tarevake?

⁴ Pera katoa te aronga tei kite ia Iehova me mamaata mai ratou. Noatu e ka kite ratou i te ako ia ratou uaorai, kare ratou i te au Kerititiano pakari. Inara me akamata ratou i te “akatangata ou” e kia aite kia Karaiti, kua pakari mai ïa ratou. (Ephesia 4:23, 24) Ka riro te ako ia tatou uaorai ei tauturu kia “kopae tatou i te akono kore i te Atua, e te anoano o teianei ao, kia noo tatou ma te tau meitaki, te tuatua-tika, e te akono i te Atua, i teianei ao.”—Tito 2:12.

⁵ Inara, e aronga ara pouroa tatou. (Koheleta 7:20) No reira me rave tatou i te tarevake, ko te aiteanga ainei kare e rava ana ta tatou ako anga ia tatou uaorai e penei kare tatou e kite? Kare. Ka apii tatou mei ia Maseli 24:16: “Kia taki itu ua atu te inga anga o te tangata tuatua-tika, e tu akaou mai aia.” Eaa te ka tauturu ia tatou kia “tu akaou mai”? Kare i to tatou uaorai maroiroi, mari ra i te vaerua o te Atua. (E tatau ia Philipi 4:13.) I roto i te ua o te vaerua ka kapiti mai te tu akatere ia koe uaorai, tei aiteite ki te tu ako ia koe uaorai.

6. Akapeea tatou me riro mai ei aronga meitaki atu i te apii i te Tuatua a te Atua? (Akara i te tutu mua.)

⁶ Ka tauturu katoa te pure, te apii Pipiria, e te akamanako oonu ia tatou kia kite i te ako ia tatou uaorai. Inara akapeea me e ngata ia koe te apii i te Pipiria e kare koe e reka ana i te apii i te reira? Auraka e taitaia. Me ka āriki koe, ka tauturu a Iehova ia koe “kia kaki tikai” i tana Tuatua. (1 Petero 2:2) E pati kia Iehova kia tauturu ia koe kia kite i te ako ia koe uaorai e rauka ai tetai tuatau kia apii i te Pipiria. Penei ka rauka ia koe i te akamata na te apiianga no tetai manga taime. Aere ua rai, ka māmā ake e ka mataora atu taau apii. Ka reka koe i te au tuatau muteki taau e akapou ra no te akamanako oonu no runga i to Iehova au manako akaperepere.—1 Timoteo 4:15.

7. Akapeea te tu ako ia tatou uaorai me tauturu i te itae i to tatou akakoroanga no te tavini ia Iehova?

⁷ Ka riro te tu ako ia tatou uaorai kia rauka te au akakoroanga no te tavini ia Iehova. Ei akaraanga, kua kite mai tetai metua tane e te ngaro atura tona tu maroiroi, no reira kua akanoo aia i tetai akakoroanga kia riro mai ei painia tamou. Akapeea te tu ako iaia uaorai te tauturu anga iaia? Kua tatau aia i te au atikara i roto i ta tatou makatini no te au painia e kua pure no te reira. Na te rave anga i teia, i ketaketa ai tona pirianga kia Iehova. Kua painia tauturu katoa aia i tetai taime. Kare aia i akatika ana i tetai apinga kia tāpu iaia; mari ra, kua akamou ua aia ki runga i tona akakoroanga. I muri ake i tetai tuatau, kua riro mai aia ei painia tamou.

E UTUUTU I TAAU TAMARIKI NA ROTO I TE AKOANGA A IEHOVA

8-10. Eaa te ka tauturu i te au metua kia utuutu i ta ratou tamariki kia tavini ia Iehova? Oronga mai i tetai akaraanga.

⁸ Kua oronga mai a Iehova i te apainga ki te au metua, kia utuutu i ta ratou tamariki kia “apii ra ia ratou kia pakari ma te ako a te Atu ra.” (Ephesia 6:4) E ngata tikai teia i te rave i teia tuatau. (2 Timoteo 3:1-5) Me anauia mai te tamariki, kare ratou i kite i te tika mei te tarevake, e kare to ratou akava ngakau i tereniia. No reira ka anoanoia te akoanga ei tereni ia ratou. (Roma 2:14, 15) Akamārama mai tetai tangata kite i te Pipiria e ko te aiteanga o te tuatua Ereni “akoanga,” koia oki kia “apii i te tamariki” me kore kia utuutu i te tamariki kia riro mai ei aronga mamaata meitaki.

⁹ Me ako te au metua i ta ratou tamariki ma te aroa, ka kite ratou i te paruru anga meitaki. Ka kite ratou kua kotingaia te tu rangatira e me rave ratou i te au mea ravarai i te oraanga, kua kite ratou eaa te ka tupu. No reira, e mea puapinga tikai no te au metua Kerititiano kia irinaki ki runga i to Iehova pakari ei tauturu ia ratou kia utuutu i ta ratou tamariki. E tuke te au manako no runga i te utuutu anga i te tamariki i te ngai e nooia ra, e ka taui ua teia au manako. Inara, ko te au metua tei akarongo ki te Atua, kare ratou e manako ua i te rave me kore te irinaki ki te tu karape e te manako o te tangata.

¹⁰ Ka apii tatou mei te akaraanga o Noa. Te akakiteanga a Iehova kiaia kia akatu i te araka, kare a Noa i kite akapeea. Kua anoanoia aia kia irinaki ia Iehova, e me tatau tatou e ko tana ïa i “rave marie,” e ta Iehova ïa i akakite kiaia. (Genese 6:22) Eaa tei tupu? Kua akaora te araka ia Noa e tona ngutuare tangata! Kua autu katoa a Noa ei metua tane. Eaa te tumu? No te mea kua irinaki pu tikai aia ki runga i te pakari o te Atua. Kua apii meitaki a Noa i tana tamariki e kua riro ei akaraanga meitaki no ratou, mei te mea kare i te mea māmā i te reira tuatau kino i mua ake i te Vaipuke.—Genese 6:5.

11. Eaa ra te au metua ka angaanga pakari ei i te tereni i ta ratou tamariki?

¹¹ Me e metua koe, akapeea koe me “rave marie” i te reira? E akarongo kia Iehova. E tuku e nana e tauturu ia koe kia utuutu i taau tamariki. E taangaanga i te ako anga mei tana Tuatua e tana akaerenga. A muri akera, papu e ka akameitaki mai taau tamariki ia koe no te rave i te reira! Tata tetai taeake: “Rekareka tikai au i te utuutu anga mai toku nga metua iaku. Kua tauta tikai raua i te itae i toku ngakau.” Karanga aia e na tona nga metua i tauturu iaia kia akavaitata kia Iehova. E tika, noatu me ka rave te au metua i te ka rauka ia ratou i te apii i ta ratou tamariki, penei ka akaruke rai te tamariki ia Iehova. Inara ko te metua tei tauta tikai, ka rauka te akava ngakau meitaki e ka akamanako atu e ka oki mai tana tamaiti kia Iehova a tetai rā.

12, 13 (a) Me kua akaateaia tetai tamaiti mei te putuputuanga, akapeea te au metua me akaari e te akarongo ra ratou ki te Atua? (e) Akapeea tetai ngutuare tangata te puapinga anga mei te akarongo o te nga metua kia Iehova?

¹² Ki tetai au metua, ko tetai timata anga ngata roa atu, me akaateaia ta ratou tamariki mei te putuputuanga. Akakite tetai tuaine te akaruke anga tana tamaine tei akaateaia, i tona kainga: “Ka kimi au i roto i ta tatou au puka kia rauka te kotoeanga no te akapou i tetai taime ki taku tamaine e taku mokopuna tamaine.” Inara kua tauturu maru tana tane iaia kia kite e kare te tamaine i te apainga akaou na raua, e ka anoanoia raua kia vai tiratiratu kia Iehova.

¹³ I tetai au mataiti i muri mai, kua akaokiia mai te tamaine ki roto i te putuputuanga. Karanga te metua vaine: “I teianei ka taniuniu mai aia e ka tuku karere mai i te au rā ravarai! Te akangateitei tikai ra aia ia maua ko taku tane no te mea kua kite aia e te akarongo ra maua i te Atua. E pirianga mataora to matou.” Me kua akaateaia taau tamaiti me kore tamaine mei te putuputuanga, ka tuku ainei koe i toou “irinaki kia Iehova ma to ngakau katoa”? Ka akaari ainei Kiaia e kare koe “e irinaki ki toou uaorai kite”? (Maseli 3:5, 6) E akamaara, te akaari maira te akoanga a Iehova i tona pakari e tona inangaro maata ia tatou. Auraka e akangaropoina e kua oronga mai aia i tana Tamaiti ki te tangata katoatoa, pera katoa taau tamaiti me kore tamaine. Ka inangaro te Atua i te katoatoa kia rauka te ora mutu kore. (E tatau ia 2 Petero 3:9.) No reira e te au metua, e irinaki ua rai e e tika te akoanga e te arataki anga a Iehova, noatu e ka tupu te mamae me akarongo ki te reira. E akarongo ki te akoanga a te Atua, auraka e patoi atu i te reira.

I ROTO I TE PUTUPUTUANGA

14. Akapeea tatou e puapinga ai mei te apiianga a Iehova ta te “akaaere pikikaa kore” i oronga mai?

¹⁴ Kua taputou mai a Iehova kia akono, kia paruru, e te apii i te putuputuanga Kerititiano. E maata tana au ravenga i te rave i teia. Ei akaraanga, kua akataoonga aia i tana Tamaiti ei akono i te putuputuanga, e kua tuku a Iesu i te “akaaere pikikaa kore” kia oronga mai i te kai pae vaerua ei tauturu ia tatou kia vai tiratiratu. (Luka 12:42) Te oronga maira te reira “akaaere” i te apiianga puapinga me kare te akoanga. Penei ka maara ia koe tetai akoanga me kore tetai atikara i roto i ta tatou makatini tei tauturu ia koe kia taui i toou manako e taau ka rave. Ka mataora koe no tei rave i teia au taui anga, no te mea te akatika ra koe ia Iehova kia ako ia koe.—Maseli 2:1-5.

15, 16 (a) Akapeea tatou e puapingaia ai mei te angaanga a te aronga pakari? (e) Akapeea tatou te akariro anga i te angaanga a te aronga pakari kia mareka ratou i te reira?

¹⁵ Kua oronga katoa mai a Karaiti i te aronga pakari kia akono aroa i te putuputuanga. Kapiki te Pipiria i teia au taeake e ko “te meitaki i te tangata nei.” (Ephesia 4:8, 11-13) Akapeea tatou e puapinga ai mei te angaanga a te aronga pakari? Ka rauka ia tatou i te aru i to ratou akarongo e te akaraanga meitaki, e ka rauka ia tatou i te aru i te akoanga ta ratou i oronga mai mei te Pipiria. (E tatau ia Ebera 13:7, 17.) Te inangaro ra te aronga pakari ia tatou e kia akavaitata atu tatou ki te Atua. Me akatau tatou i te au uipaanga e kua ngaro to tatou maroiroi, ka viviki ua ratou i te tauta i te tauturu ia tatou. Ka akarongo mai ratou e ka oronga mai i te akamaroiroianga aroa e te akoanga pakari mei te Pipiria. Te kite ra ainei koe i ta ratou tauturu ei akapapu anga i to Iehova aroa ia koe?

¹⁶ E akamaara e kare i te mea māmā ua no te aronga pakari kia oronga i te akoanga. Eaa toou manako te anoanoia anga a Natana kia tuatua ki te Ariki ko Davida i muri ake i tona tauta anga i te uuna i tana ara kino? (2 Samuela 12:1-14) Eaa te manako o te apotetoro ko Paulo te anoanoia anga aia kia ako ia Petero, koia tetai o te 12 apotetoro, no tei akono i te au Kerititiano ngati Iuda e kua akavaavaa i te aronga kare i te ngati Iuda? Kua anoanoia te tu ngakau toa o Paulo kia rave i te reira. (Galatia 2:11-14) No reira akapeea koe te akamāmā anga i te apainga a te aronga pakari me oronga mai ratou i te akoanga? Kia akaaka, kia akameitaki, e kia māmā ia ratou i te tuatua atu. E āriki i to ratou tauturu ei akapapu anga i to te Atua aroa. Ka puapingaia koe, e ka rekareka te aronga pakari i te rave i ta ratou angaanga.

17. Akapeea te aronga pakari te tauturu anga i tetai tuaine?

¹⁷ Karanga tetai tuaine, no tei tupu tetai au mea i te tuatau i topa, kua ngata iaia i te inangaro ia Iehova, e kua tupu te taitaia. Karanga aia: “Kua kite meitaki au e ka anoanoia au kia tuatua ki te aronga pakari. Kare ratou i akakino mai ana iaku e kare i akavaavaa mai iaku, inara kua akamaroiroi meitaki iaku. I muri ake i te au uipaanga katoatoa, noatu e te angaanga ua ra ratou, ka ui mai tetai ia ratou peea ua au. No toku tu i mua ana, kua ngata iaku i te kite i to te Atua aroa. Inara, e maata te tuatau, kua taangaanga a Iehova i te putuputuanga e te aronga pakari no te akapapu mai i tona aroa iaku. E pure ua ana au kare rava au e akaruke iaia.”

EAA TE MEA TEI KINO ATU I TE MAMAE ME AKOIA MAI?

18, 19 Eaa te mamae tei kino roa atu i te akoanga? Oronga mai i tetai akaraanga.

¹⁸ Penei ka riro te akoanga ei mea mamae, inara na te kopae anga i te akoanga a te Atua, ka mamae kino atu te reira. (Ebera 12:11) Ka apii tatou mei te akaraanga kino o Kaina e te Ariki ko Zedekia. Te kite anga te Atua e te rikarika ra a Kaina i tona teina e ka inangaro i te tamate iaia, kua akamatakite aia ia Kaina: “Eaa koe i riri ei? E eaa oki i akatumatumaʼi toou mata na? Kia rave koe i te meitaki ra, kare ainei koe e kiteia mai? E kare i meitaki ra, kare ainei te vai ra te tarangaara i te ngutupa na? E kauraro ra aia ia koe, e ei runga ake koe iaia.” (Genese 4:6, 7) Kua kopae a Kaina i te akoanga a Iehova, kua tamate i tona teina, e kua mamae i te au kino tei tupu kiaia i te katoa anga o tona oraanga. (Genese 4:11, 12) Naringa a Kaina i akarongo ki te Atua, kare rai aia e kite i te mamae.

¹⁹ E tu paruparu e te kino to te Ariki ko Zedekia. I tona tutara anga, tei roto te iti tangata o Ierusalema i te turanga kino. Kua akamatakite ua rai te peroveta ko Ieremia ia Zedekia e ka anoanoia aia kia taui. Inara kua kopae te ariki i te akoanga a Iehova, e kua tupu te kino kiaia. (Ieremia 52:8-11) Kare a Iehova e inangaro ia tatou kia mamae!—E tatau ia Isaia 48:17, 18.

20. Eaa te ka tupu ki te aronga tei āriki i te akoanga a te Atua e te aronga tei kopae i te reira?

²⁰ I teia tuatau, e manganui i teianei ao te aviri ra i te akoanga a te Atua e te kopae ra i te reira. Inara kare e roa atu ana, ko te aronga tei kopae i te akoanga a te Atua, ka tupu te mamae kino kia ratou. (Maseli 1:24-31) No reira ka anoanoia tatou kia “akarongo mai i te ako, kia pakari.” Mei ta Maseli 4:13 e karanga ra, “e mou piri tikai i te ako; auraka roa e tukua: e tāpu marie i te reira; ko toou ïa ora.”