E Tatanu i te Tu Oronga Ua

KARE tetai i anauia mai ma te tu oronga ua. Te inangaro natura o tetai pepe koia oki kia akamerengo uaia i tona uaorai au anoano, te manako kore anga no te au mea e inangaroia ra e tei akono ra. Inara, kare i roa ana, ka kite mai te tama e kare anake e koia ua tetai te umuumu ra i te tauturu. Kia akamanako katoaia tetai ke, e ka tau aia kia apii e kare anake i te rave mai e pera katoa i te oronga ua e te tua aere. Ka anoanoia te tu oronga ua kia tatanuia.

Te au tangata tataki tai e oronga ra​—noatu te maoraora​—kare te tu oronga ua. Penei ka iki etai i te oronga ki tetai akaaerenga tauturu e rauka ei i te akakitekite i to ratou uaorai au manako. Penei ka oronga ua tetai ke e rauka mai ei te au akapaapaaanga mei te tangata ra. Inara, ko te oronga ua te raveia ra e te au Kerititiano tikai e mea tuke ia. Eaa, i reira, te au tu o te oronga ua te akamaroiroiia ra e te Tuatua a te Atua? Na te akamanako poto ua anga i te ravenga oronga ua a te au Kerititiano o te anere mataiti mua e pau mai i tera uianga.

Au Akaraanga Oronga Ua o te Kerititiano

Ko te tu oronga ua a te Kerititiano, mei tei akatakaia mai i roto i te Pipiria, koia oki ko “te tua anga i te au apinga ki tetai ke” te umuumuia maira te reira. (Ebera 13:16, NW; Roma 15:26) Kare te reira e raveia ma te maro ua. Kua tata te apotetoro ko Paulo: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.” (2 Korinetia 9:7) Te oronga ua kare katoa te reira e raveia ma te akakoroanga o te akaariari anga. Kua rave a Anania raua ko Saphira i te mea akameamea e kua kokoti atura i te tumatetenga maata.​—Angaanga 5:1-10.

Kua tupu mai te umuumu anga no te oronga ua i te uipa anga mai te au ngati Iuda e manganui e te aronga poroteraita mei te au ngai mamao ki Ierusalema no te oroa o Penetekote i te 33 T.N. I reira kua ‘ki akera [ta Iesu au pipi] i te vaerua tapu, kua tuatua iora i te tuatua ke.’ Kua putuputu mai tetai aronga maata e kua akarongo atura i ta Petero ako anga akakeukeu no runga ia Iesu Karaiti. I muri mai, kua kite atu te tangata e i akapeea a Petero raua ko Ioane i te rapakauanga i tetai tangata pirikoki i te ngutupa o te iero, e kua rongo atu ratou ia Petero i te tuatua akaou anga no runga ia Iesu e te umuumu anga kia tataraara. E tauatini ua atu tei tataraara e kua papetitoia ei au pipi na Karaiti.​—Angaanga, pene 2 e te 3.

Kua inangaro te aronga tei akataui ouia i te noo ki Ierusalema e rauka maata atu ei te ikuikuanga no ko mai i te au apotetoro a Iesu. Inara ka akapeea e rauka ei i te au apotetoro i te akono i tei umuumuia e te au manuiri pouroa? Te akakite maira te tataanga a te Pipiria kia tatou: “E te aronga katoa oki e kainga to ratou e te are, oko atura ïa, e taoi maira i te oko i taua au mea i okoia ra, Tuku iora ki raro i te pae vaevae o te au aposetolo ra; e tuaia iora na ratou ravarai, e tau marie akera.” (Angaanga 4:33-35) E tikai, e tu oronga ua to te putuputuanga tei akanoo ouia i Ierusalema!

I muri mai, kua akaari katoa tetai au putuputuanga i taua tu oronga ua. Ei akaraanga, te au Kerititiano i Makedonia, noatu e aronga putaua, kua tauta i tei rauka ia ratou i te oronga ua i te tauturu ki te au taeake e umuumu maira i te tauturu i Iudea. (Roma 15:26; 2 Korinetia 8:1-7) Kua kitea te tu meitaki o te putuputuanga Philipi i te tauturu anga i ta Paulo angaanga orometua. (Philipi 4:15, 16) Kua tua ua te putuputuanga Ierusalema i te au ra i te kai ki te au vaine takaua e umuumu maira, e kua iki te au apotetoro e itu tangata tau kia akapapu e kare okotai vaine takaua i akangaropoinaia.​—Angaanga 6:1-6.

Kua viviki te au putuputuanga Kerititiano mua i te akono ua atu noatu te tapapaanga i te au tuatau ngata. Ei akaraanga, i te totou anga te peroveta ko Agabo no te onge maata e aere maira, ko te au pipi i roto i te putuputuanga i Anetioka i Suria “kua akakoro iora te au pipi e akau i te apinga, tona atu rai, tona atu rai, e tau iaia uaorai, ei turu atu i te au taeake i noo i Iudea ra.” (Angaanga 11:28, 29) Mei teaa te meitaki o te tu ta ratou i akaari i te tapapa ua anga i tei umuumuia e tetai ke!

Eaa tei akakeu i te au Kerititiano mua kia oronga ua e te aroa ua? E tikai, ka akapeea e rauka ei i tetai i te tu oronga ua? E maata ta tatou ka apii mai mei te akamanako poto ua anga i te akaraanga o te Ariki ko Davida.

Ta Davida Turuanga Oronga Ua no te Akamorianga Mou

Vaitata rai e 500 mataiti, ko te aruna koreromotu​—e pia tapu te akatutu maira i to Iehova vaianga​—kare o te reira ngai noo anga tamou. Kua tukunaia te reira ki roto i tetai puakapa, me kare tetai tapenakara, tei akanekeia mei tetai ngai ki tetai i te tuatau i ori aere ei to Iseraela i roto i te metepara e oti ki roto i te Enua Taputouia. Kua inangaro maata tikai te Ariki ko Davida i te apai i te aruna mei te puakapa te vaira te reira e kua akatu i tetai are tau no Iehova te ka mou i te aruna tapu. Te tuatua anga ki te peroveta ko Natana, kua tuatua a Davida: “I na, te noo nei au i roto i te are arezi, kareka te aruna koreromotu a Iehova te vai nei i roto i te paruru.”​—1 Paraleipomeno 17:1.

Inara, e tangata tamaki a Davida. No reira kua akaue a Iehova e na tana tamaiti na Solomona, i roto i tetai tutara anga poniaau, e akatu i te iero kia mou i te aruna koreromotu. (1 Paraleipomeno 22:7-10) Inara, kare teia i tapupu ana i to Davida tu oronga ua. Te akaaere anga i tetai angaanga maata, kua anoano atu aia i te oronga atu i te au apinga materia te ka taangaangaia no te akatu anga i te iero. Kua akakite mai aia i muri akera kia Solomona: “Kua kopî au i te apinga no te are o Iehova, okotai anere anga i te tausani i te taleni auro, okotai oki tausani anga i te tausani i te taleni ario; e te veo e te auri kare ïa e aite; kua maata rava oki: e te rakau katoa, e te toka, tei kopîia e au.” (1 Paraleipomeno 22:14) Kare i merengo ua i te reira, no roto mai i tei rauka iaia, kua oronga atu a Davida i te auro e te ario i teia tuatau te puapinga e $1,200,000,000. Pera katoa, kua oronga ua atu rai te au tamariki ariki. (1 Paraleipomeno 29:3-9) Papu tikai, kua akaari a Davida i te tu oronga ua!

Eaa tei akakeu ia Davida kia oronga ua? Kua ariki aia e pouroa tei rauka iaia e tei akatupuia kua tupu mai no te akameitakianga a Iehova. Kua akakite aia na roto i te pure: “E to matou Atua, e Iehova e, ko teia katoa nei au apinga, i uipaia e matou ei akatu i te are noou, no to ingoa tapu ra, no ko na mai i to rima na, ko koe uaorai te Pu. Kua kite oki au, e taku Atua, e unuunumou rai koe i te ngakau, e e mea mataora naau te tiratiratu. Kareka au nei, kua apai ua au i taua au mea katoa nei ma te tiratiratu o toku nei ngakau; e teianei, kua kite au ma te rekareka i to au tangata e noo nei, i te oronga ua anga i ta ratou kia koe ra.” (1 Paraleipomeno 29:16, 17) Kua akaperepere a Davida i tona pirianga kia Iehova. Kua kite aia i te puapinga i te tavini anga i te Atua “ma te ngakau tiratiratu, e ma te manako tika roa,” e kua kitea e ia te rekareka i te rave anga i te reira. (1 Paraleipomeno 28:9) Kua akakeu katoa teia au tu i te au Kerititiano mua kia akaari i te tu oronga ua.

Iehova​—Ko Tei Oronga Maata Roa Atu

I roto ua ia Iehova e kitea ei e tatou te akaraanga meitaki tikai no te oronga ua. No tona tu aroa ua e te manako ua e “te akaiti nei aia i tona rā ki rungao i te kino e te meitaki, e te akatopa mai nei aia i te ua ki runga i te tangata tuatua-tika e te tangata tuatua-tika kore.” (Mataio 5:45) Ki te au tangata ravarai te oronga mai nei aia “i te ora, e te aʼo, e te au mea katoa, ki te au mea ravarai.” (Angaanga 17:25) E tikai, mei tei akakiteia mai e te pipi ko Iakobo, “te au mea memeitaki i o maiia ra, e te au mea tika ravarai, no runga ïa, no runga mai i te Metua o te au mārama ra.”​—Iakobo 1:17.

Ko ta Iehova apinga aroa maata roa atu kia tatou koia oki ko te tuku anga mai i tana “Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Kare e rauka i tetai ua atu i te tuatua e kua tau no tera apinga aroa, “kua rave katoatoa oki i te ara, e kua ngere i te akameitaki a te Atua.” (Roma 3:23, 24; 1 Ioane 4:9, 10) Ko te oko o Karaiti te tumu e te mataara no ta te Atua “apinga aroa kare ra e rauka kia akatakaia,” koia oki, “no te rai i te aroa ua o te Atua.” (2 Korinetia 9:14, 15, NW) Kua ariki ua i ta te Atua apinga oronga, kua akariro a Paulo i te reira e ko tana angaanga i te oraanga ‘kia akakite ua atu i te evangelia o te aroa ua o te Atua.’ (Angaanga 20:24) Kua kite oki aia e e anoano ia no te Atua “i te tangata katoatoa kia ora, e kia rauka te kite i te tuatua-mou.”​—1 Timoteo 2:4.

I teia tuatau, te akatupuia nei teia e te angaanga tutuanga e te apiianga maata tei akatotoaia ki roto i te 234 enua takapini i te ao. Kua totou a Iesu i teia akatotoa anga i tona tuatua anga: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) Ae, “e na mua ra te evangelia nei i te akakiteia atu i to te pa enua ravarai e tikaʼi.” (Mareko 13:10) I te mataiti i topa akenei e tere atu i te ono mirioni tangata akakitekite o te tuatua meitaki tei akapou e 1,202,381,302 ora ki teia angaanga e kua rave e tere atu i te 5,300,000 apii Pipiria. I te mea te o maira te au oraanga, e ikuikuanga puapinga maata teia.​—Roma 10:13-15; 1 Korinetia 1:21.

E mirioni ua atu te au puka​—kapiti mai te au Pipiria, te au puka, e te au poroutia​—kua neneiia i te mataiti taki tai kia tauturu i te aronga e pongi ra no te tuatua mou Pipiria. Pera katoa, e tere atu i te pirioni kopi o te Punanga Tiaki e te Awake! makatini e neneiia ra. I te tangata e ariu maira ki te tuatua meitaki, e maata atu te au Are Uipaanga Patireia e te au Are Uipaanga Akaputuputuanga o te Au Kite o Iehova e akatuia ra, tei riro ei au ngai ikuikuanga Pipiria. Kua akanooia te au akaputuputuanga kotinga e te au ra akaputuputuanga takake, e pera katoa te au uruoaanga tapere, no te mataiti tataki tai. E angaanga tamou katoa te tereni anga i te au mitinari, te au akaaere tutaka, te aronga pakari, e te au tavini orometua. Te ariki meitaki nei matou ia Iehova no te akariro anga e kia rauka pouroa teia au apinga na roto i “te tavini akono meitaki e te pakari.” (Mataio 24:45-47) Papu e ka inangaro tatou i te akakite i to tatou tu ariki ua Kiaia!

Akaarianga i te Tu Ariki Ua kia Iehova

Mei te akatuanga o te iero e te akono anga i te au mea i anoanoia e te au putuputuanga Kerititiano i mua ana, te tutaki anga i teia au mea pouroa te rauka ra na roto i te moni oronga ua. Inara, kia akamaaraia, e kare e rauka i tetai i te akapuapinga ia Iehova, te Pu o te au mea ravarai. (1 Paraleipomeno 29:14; Hagai 2:8) E akairo, i reira, te moni oronga ua o to tatou inangaro ia Iehova e to tatou anoano i te akatotoa i te akamorianga mou. Teia au tu oronga ua, i na Paulo ei, te akatupu ra i te “akameitaki i te Atua.” (2 Korinetia 9:8-13) Te akamaroiroi ra a Iehova i taua tu oronga ua no te mea te akaari maira te reira e te ia tatou te tu tau e te ngakau meitaki kiaia. Te aronga oronga ua e te irinaki ra ki runga ia Iehova ka akameitakiia e ia e ka puapinga i te pae vaerua. (Deuteronomi 11:13-15; Maseli 3:9, 10; 11:25) Kua akapapu mai a Iesu kia tatou e ka tupu te mataora, i te na ko anga: “E mea meitaki i te oronga atu i te rave mai.”​—Angaanga 20:35.

Ko te au Kerititiano ma te tu oronga ua kare e tiaki kia tae ki te tuatau umuumu anga. Mari ra, te akara ra ratou i te au tuatau kia ‘rave i tei meitaki ra ki te katoatoa, inara ki te aronga tikai tei piri mai kia [ratou] i te akarongo.’ (Galatia 6:10, NW) Te akamaroiroi anga i te tu oronga ua kia tau i te Atua, kua tata a Paulo: “Kareka te takinga-meitaki e te oronga, eiaa rava ïa e akatopaia: te pereperekavana ra oki te Atua i te reira atinga.” (Ebera 13:16) Te taangaanga i ta tatou au apinga​—te tuatau, te maroiroi, te au moni​—i te tauturu i tetai ke e te akatotoa anga ki mua i te akamorianga mou e mea mareka anga ia ki te Atua ko Iehova. E tikai, te inangaro ra aia i te tu oronga ua.

[Pia/Tutu i te kapi 28, 29]

Au Ravenga ta Etai e Iki ra no te Oronga

AKAPUTUANGA NO TE ANGAANGA I TEIANEI AO

E manganui te akapae ra, me kore te akapapa ra, i tetai moni no te tuku ki roto i te au pia akaputuanga tei akairoia “Akaputuanga no te Angaanga i Teianei Ao​—Mataio 24:14.”

I te au marama katoatoa, e tuku ana te au putuputuanga i teia au moni ki te opati o te Jehovah’s Witnesses te akono tikai ra i to ratou au enua. Kia tuku tika katoaia te au moni tauturu tei oronga uaia ki te Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, me kore ki te opati manga e akono ra i toou enua. Te au tieki moni ra kia maaniia te tutaki anga ki te “Watch Tower.” Ka tau te au apinga akamanea me kore tetai atu au apinga puapinga kia oronga katoaia. Kia aru mai tetai reta poto ua i te au akaputuanga no te akakite i teia apinga aroa tikai.

AKANOOANGA I TE TURANGA NO TE TAUTURU

Penei ka orongaia te moni na roto i tetai akanooanga takake i roto i te reira, me ka pati mai te tangata oronga ra i te reira, ka akaokiia atu te moni oronga ua kiaia. No tetai akakite anga maata atu, e tata ki te Office of the Secretary and Treasurer i te atereti i akakiteia i runga ake nei.

PARANIANGA ORONGA UA

I te pae i te au moni aroa oronga ua e te au moni tauturu akaturangaia, te vaira tetai atu au ravenga orongaanga no te akapuapinga i te angaanga Patireia i teianei ao. Ka kapiti mai te:

Initurini: Penei kia tukuia te ingoa o te Taiate Punanga Tiaki e ko tei puapingaia mei tetai tika anga initurini ora me kore tetai akapapaanga akaangaroi anga/moni pakari.

Akapapaanga Pangika: Penei kia tukuia te au akapapaanga pangika, te au pepa tuku anga, me kore te au akapapaanga akaangaroi no tetai tangata ki roto i te tataanga irinakiia me kore tei maaniia kia tutakiia me mate ake ki te Taiate Punanga Tiaki, kia tau ki te au ikuikuanga a te pangika o te reira ngai.

Au Apinga Akaputuia e te Poni: Penei ka orongaia te au apinga akaputuia e te poni ki te Taiate Punanga Tiaki ei apinga aroa.

Enua: Penei ka orongaia te au enua e te au are ka rauka i te oko ei apinga aroa me kore, i roto i te turanga no te ngai noo anga, na te akono anga i tetai pepa koreromotu ki tei orongaia mai i te reira, te ka rauka iaia i te noo ki roto i te tuatau e ora ra aia. Kia araveiia atu te opati manga i toou enua i mua ake ka akamanaia ei tetai ua atu enua.

Moni Oronga ei Apinga Aroa: E akapapaanga te moni oronga ei apinga aroa i roto i te reira ka tuku atu tei oronga ra i te moni me kare te au apinga akaputuia ki te Taiate Punanga Tiaki. Ei tupau anga, ka rauka i tei oronga ra, me kare te aronga tei ikiia e tei oronga ra, i tetai tutaki anga moni oronga tei akatakaia i te au mataiti ravarai no te oraanga. Ka rauka i tei oronga ra tetai tero akameangitiia i te mataiti i akanooia ei te moni oronga ei apinga aroa.

Au Koreromotu e te Au Tataanga Irinakiia: Penei ka oronga tikaia te apinga me kore te moni ki te Taiate Punanga Tiaki na roto i tetai koreromotu tikaia e te tataia, me kore kia tukuia te ingoa o te Taiate Punanga Tiaki te ka puapingaia no tetai tataanga koreromotu irinakiia. Tetai tataanga irinakiia tei orongaia ki tetai akaaerenga akonoanga ka riro te reira ei au puapinga i te pae o te tero i tetai taime.

Mei ta te tuatua “paranianga oronga ua” e taiku ra, ka anoanoia kia paraniia teia au ravenga oronga moni tauturu i te tua o te tangata oronga. Ei tauturu i tetai te inangaro ra i te akapuapinga i te angaanga a te Au Kite o Iehova i te ao katoa na roto i tetai paranianga oronga ua, kua akapapa te Taiate i tetai poroutia reo Papaa e te reo Paniora te ingoa Charitable Planning to Benefit Kingdom Service Worldwide. Kua tataia te poroutia ei pau i te au uiui anga e manganui tei rauka no te au apinga aroa, au koreromotu, e te au tataanga irinakiia. Te kapiti katoa maira i tetai akakite anga puapinga no runga i te enua, pae moni, e te parani anga i te tero. Kua akanooia te reira ei tauturu i tetai i Marike te parani ra i te oronga i tetai apinga aroa takake i teianei me kore no te akaruke i tetai koreromotu i te mateanga kia iki i tetai ravenga meitaki rava e te mako i te manako anga i to ratou uaorai turanga e te pamiri. I muri ake i te tatauanga i te poroutia e te tukuanga ki ta ratou uaorai ture me kore ki te aronga e akono ra i te tero e ki te Charitable Planning Office e manganui te tauturu ra i te Au Kite o Iehova i teianei ao, e i taua taime rai, kua akamaata mai i te au puapinga o ta ratou tero no te akapera anga. Ka rauka tetai kopi o te poroutia na te pati tikai anga i tetai kopi no ko mai i te Charitable Planning Office.

No tetai atu akakiteanga, penei e aravei atu koe i te Charitable Planning Office, na te tataanga me kore na te terepaoni anga, i te atereti i tataia i raro ake nei me kare i ko i te opati o te Jehovah’s Witnesses e akono ra i toou enua.

Charitable Planning Office

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Telephone: (845) 306-0707

[Tutu i te kapi 26]

Eaa tei akakeu i te au Kerititiano mua kia oronga ua?