Eaa Tikai te ka Umuumuia kia Rauka ai te Mataora

KO IEHOVA, “te Atua Mataora,” e Iesu Karaiti, “tei mataora e Tei Mana anake,” tei kite maata roa atu eaa te ka umuumuia kia rauka ai te mataora. (1 Timoteo 1:11; 6:15, NW) No reira, kare i te mea poitirere e ko te taviri ki te mataora te kiteaia ra ki roto i te Tuatua a te Atua, te Pipiria.​—Apokalupo 1:3; 22:7.

I roto i tana Tuatua rongonui i runga i te Maunga, te akataka ra a Iesu eaa te ka umuumuia kia rauka ai te mataora. Kua akakite aia: “E mataora to te aronga” to (1) tei manako i to ratou anoano i te pae vaerua, (2) tei aue, (3) tei maru, (4) tei pongi e te kaki ra i te tuatua tika, (5) tei akaaroa, (6) tei ma ra te ngakau, (7) tei akamoeau, (8) tei takinga kinoia no te tuatua tika, e (9) tei akakinoia mai e kia takinga kinoia mai noku nei.​—Mataio 5:3-11, NW.a

Te Au Tuatua a Iesu te Tika Tikai ra Ainei?

No te tika tikai o tetai au tuatua a Iesu e meangiti ua rai te akamaramaanga ka anoanoia. Koai ia te ka akakore e ka mataora atu tetai tangata maru, akaaroa, e te akamoeau tei akakeuia e te ngakau ma i tetai tangata riririri, tauetono, akaaroa kore?

Inara, penei ka umere tatou e, akapeea te au tangata tei pongi e te kaki ra i te tuatua tika me kore tei aue ka karangaia ai e e mataora. E akaraanga tika tikai to taua au tangata ra i te au turanga o teianei ao. Te ‘aue ra e te kapiki ua ra i te au mea viivii katoa e raveia ra’ i to tatou nei tuatau. (Ezekiela 9:4) Kare te reira uaorai e akamataora ia ratou. Inara, i to ratou kite anga i to te Atua akakoroanga kia apai mai i te au turanga tuatua tika ki te enua nei e te tuatua tau ki tei tamamaeia, to ratou rekareka kare e openga anga mai.​—Isaia 11:4.

Te inangaro i te tuatua tika ka akatupu katoa i te au tangata tataki tai kia aue no te putuputu i to ratou uaorai puapinga kore i te rave i te mea tika. Ko ratou i reira te manako ra i to ratou anoano i te pae vaerua. Taua au tangata ra te inangaro ua ra i te akara ki te Atua no te aratakianga no te mea te kite ra ratou e koia anake rai te ka rauka i te tauturu i te tangata kia autu i to ratou au tu paruparu.​—Maseli 16:3, 9; 20:24.

Te au tangata e aue ra, e pongi ra e te kaki ra i te tuatua tika, e te manako ra i to ratou anoano i te pae vaerua te kite ra i te puapinga o te rauka anga tetai pirianga meitaki ma Tei Anga mai. Te pirianga meitaki ki te au tangata nei ka akatupu i te mataora, e maata katoa atu ra ta te pirianga meitaki ki te Atua. Ae, te aronga manako pakari tei anoano i te mea tika, e inangaro tikai ra i te ariki i te aratakianga tu-Atua, ka rauka tika tikai kia karangaia e e mataora.

Tera ra, penei ka ngata ia koe te irinaki e ka rauka i tetai tei takinga kinoia e tei akakinoia kia mataora. Inara, ka tika rai te reira, i te mea kua tuatua tikai a Iesu uaorai i te reira. No reira, ka akapeea tikai te marama atu anga i tana au tuatua?

Takinga Kinoia Inara e Mataora —Akapeea Ake te Reira?

Akara e kare a Iesu i karanga ana e i arataki atu te akakino e te takinga kino uaorai ki te mataora. Kua akataka aia: “E mataora te aronga tei takinga kinoia ana no te tuatua-tika, . . . me akakinoia mai kotou e me ka takinga kinoia mai kotou e te tangata . . . noku nei.” (Mataio 5:10, 11) No reira ka tupu anake ua mai te mataora mei te mea e akakinoia mai tetai tangata no te riro anga ei pipi na Karaiti e no te akatano anga i tona oraanga na muri i te au kaveinga tuatua tika ta Iesu i apii.

Te akatutuia maira teia e tei tupu ana ki te au Kerititiano mua. Te au mema o te Tuneteri, te akavaanga teitei o te ngati Iuda, kua “akaokiia maira e ratou te au aposetolo ra ki roto, pāpā atura, e oti akera, kua akaue atura ia ratou, auraka rava e tuatua ma te ingoa o Iesu, e kua tuku atura ia ratou.” Eaa ta te au apotetoro i rave? “Aere atura ratou mei te aroaro atu o te Sunederi, ma te rekareka, i te mea, no tona ingoa i manakoiaʼi ratou e tau ia ratou taua takinga-kino ra. E kare e rā i tukua ia ratou, i te apii anga atu e te tuatua anga atu ia Iesu Mesia, ki roto i te iero ra, e i tera are i tera are.”​—Angaanga 5:40-42; 13:50-52.

Kua oronga mai te apotetoro a Petero i tetai marama ke atu no runga i te pirianga i rotopu i te akakino e te mataora. Kua tata aia: ‘Kia akakinoia kotou i te ingoa o te Mesia ra, [“mataora oki kotou,” NW]; no te mea te noo ra te vaerua kakā, te vaerua o te Atua, ki runga ia kotou: kua akakinoia aia e ratou, kua akameitakiia ra e kotou.’ (1 Petero 4:14) Ae, te mamae anga ei Kerititiano no te rave i te mea tika, noatu e mareka kore taua mamaeanga ra, ka apai mai i te mataora e rauka maira mei te kite anga e ka rauka i tetai te vaerua tapu o te Atua. Akapeea te vaerua o te Atua i piri atu ei ki te mataora?

Au Angaanga a te Kopapa me ko te Ua o te Vaerua?

Te vaerua tapu o te Atua te noo ra ki runga anake rai i te aronga e akarongo ra i te Atua ei tutara. (Angaanga 5:32) Kare a Iehova e oronga i tona vaerua ki te aronga e rave ra i “te au angaanga a te kopapa.” Taua au angaanga ra e “moeaana, te akaturi, te tuatua viivii ra, e te kanga, Te akamori idolo, te purepure, te makitakita, te tamaki, te akarere, te riri, te karo, te pae ke, te tuatua tarevake, Te vareae, te ta tangata, te konā kava, te kariei, e mei te reira te tu.” (Galatia 5:19-21) E tika, i roto i te ao o teia tuatau “te au angaanga a te kopapa” te kite pu ia nei. Kareka, te aronga e rave ra i te reira kare e rekareka ana i te mataora tika tikai e te tinamou. Mari ra, te takino ra te rave anga i taua au apinga ra i te pirianga ma te au kopu tangata, te au taeake, e te au oa. Tei runga ravao, te akakite ra te Tuatua a te Atua e ko te aronga “e rave i te reira au peu, kare ratou e noo i te basileia o te Atua.”

I tetai tua, te oronga ra te Atua i tona vaerua ki te aronga e tatanu i “te ua o te vaerua.” Te au tu o teia ua nei koia oki ko te “aroa, te rekareka, te au, te akakoromakianga roa, te takinga meitaki, te meitaki, te akarongo, te maru, te akatere-uaorai.” (Galatia 5:22, 23, akaaite ia NW) Me akaari tatou i teia au tu nei, te akatupu ra tatou i te au turanga no te rauka mai anga te au pirianga akamoeau ma etai ke e ma te Atua, te ka akatupu i te mataora tika tikai. (Akara i te pia.) Puapinga maata atu, na te akaari anga i te aroa, te takinga meitaki, te meitaki, e etai atu au tu akono i te Atua, te akarekareka ra tatou ia Iehova e ka rauka te manakonakoanga mataora o te ora mutu kore i roto i to te Atua ao ou o te tuatua tika.

Te Mataora e Ikianga Ia

I te akamata anga a Wolfgang raua ko Brigitte, e nga tokorua e noo ra i Tiamani, i te apii i te Pipiria ma te maroiroi, kua rauka ia raua te au apinga materia maata ta te tangata e manako ra e ka anoanoia kia mataora ai. E nga mapu ou ua raua e te maroiroi. E aoao kakau oko maata ana raua, e kua noo ana i roto i tetai kainga tau rekareka te akamanea anga, e kua rauka te pitiniti puapingaia. E maata to raua taime tei akapouia ki te aruaru anga kia maata atu te au apinga materia, inara kare te reira i oronga i te mataora tika tikai no raua. Inara, i muri mai, kua rave a Wolfgang raua ko Brigitte i tetai ikianga puapinga tikai. Kua akamata raua i te akapou maata atu i te taime e te tautaanga ki te aruaru anga i te au tu puapinga i te pae vaerua e kua kimi i te au mataara kia akapiri vaitata atu kia Iehova. Ta raua ikianga kua arataki vave atu ki tetai tauianga i roto i to raua tu, tei, aru mai, kua akakeu ia raua kia akamama mai i to raua oraanga e kia tavini ei nga painia, me kore e aronga apii evangeria tamou o te Patireia. Teia tuatau, te tavini nei raua ei nga tauturu i te opati manga o te Au Kite o Iehova i Tiamani. Tetai katoa, te apii nei raua i te reo Asia kia rauka i te tauturu i te au manuiri kia apii i te tuatua mou tei kiteaia i roto i te Tuatua a te Atua, te Pipiria.

Kua kiteaia ainei e teia nga tokorua te mataora tika tikai? Kua karanga a Wolfgang: “Mei to maua piri maata atu anga ki te aruaru anga i te au apinga i te pae vaerua, kua mataora atu maua e kua kite i te merengoanga maata atu. Te tavini anga ia Iehova ma te ngakau katoa kua akaketaketa katoa i to maua akaipoipoanga. E mataora to maua akaipoipoanga i mua ana, inara e au apainga e te au akakoroanga ke to maua tei puto ia maua na te au mataara tuke tuke. Teianei te rotai nei maua i te aruaru anga i taua akakoroanga okotai rai.”

Eaa te ka Umuumuia kia Rauka ai te Mataora?

I te tuatua poto ua: Kopae i “te au angaanga a te kopapa,” e kia tatanu i “te ua o te vaerua [o te Atua].” Kia rauka ai te mataora, ka anoanoia tetai kia inangaro tikai kia rauka tetai pirianga vaitata ma te Atua. Tetai tangata e ropi ra kia rauka teia ka tau ki ta Iesu akatakaanga no tetai tangata mataora.

No reira, auraka e taopenga tarevake ua e kare e rauka ia koe te mataora. E tika, i teianei penei te ngere ra koe i te oraanga kopapa meitaki me kore penei e au manamanata katoa toou i roto i toou akaipoipoanga. Penei paa kare i rauka ia koe te au akameitakianga ei metua, me kore te ropi ra rai koe i te kimi i tetai ngai angaanga puapinga meitaki. Penei ake kare e ki roa ana taau kiri moni mei tei mua ana. Noatu rai, kia toa; kare e tumuanga noou kia taitaia! Ka akatikatika te tutaraanga Patireia a te Atua i teia au manamanata e te au anere ua atu. E tika rava e, kare e roa atu ka akatupu te Atua ko Iehova i tana taputou tei tuatuaia e te tata taramo: “Ko toou ra basileia, e basileia mutu kore ïa, . . . T[e] oora nei koe i to rima, e te akamerengo nei i te kaki o te au mea ora katoa nei.” (Salamo 145:13, 16) Mei ta te au mirioni au tavini o Iehova takapini i teia ao ka akakite papu mai, te tamanako marie anga i teia taputou akapumaana a Iehova ka riro ei tauturu maata ki toou mataora i teia tuatau nei.​—Apokalupo 21:3.

[Tataanga Rikiriki i Raro]

[Pia/Tutu i te kapi 6]

Au Tumu te ka Tauturu i te Mataora

Te aroa ka akakeu i etai ke kia aroa mai ia koe.

Te rekareka ka oronga mai i te maroiroi kia rauka ia koe i te akono i te au manamanata.

Te au ka tauturu ia koe i te akono marie i toou au pirianga kia kore e manamanata.

Te akakoromakianga roa ka tauturu ia koe kia vai mataora ua noatu me tei raro koe i te timataanga.

Te takinga meitaki ka akapiri mai i etai ke kia koe.

Te meitaki i toou tua ka akakeu i etai ke kia tauturu mai me anoano koe i te tauturu.

Te akarongo ka akapapu mai i ta te Atua aratakianga aroa ia koe.

Te maru ka apai mai i te au o te ngakau, o te manako, e te kopapa noou.

Me akatere-uaorai tera te aiteanga ka iti mai toou au tarevake.

[Au Tutu i te kapi 7]

Kia rauka ai te mataora, ka anoanoia koe kia akamerengo i toou au anoano i te pae vaerua