E Ao to te Aronga Tei Tavini i “te Atua Mataora”

1. No teaa ra te Au Kite o Iehova i mataora ua ai? (Akara i te tutu mua.)

E ITI tangata mataora ua te Au Kite o Iehova. Me noo kapiti ratou, i te uipaanga, te akaputuputuanga, tetai kaikai anga, te pukapuka ra ratou e te kata ua ra. Eaa ratou i mataora ai? Te tumu, kua kite tikai ratou ia Iehova, “te Atua mataora.” Te tavini ra ratou iaia e te tauta ra i te aru i tona tu. (1 Timoteo 1:11, NW; Salamo 16:11) Ko Iehova te Tumu o te mataora, no reira te inangaro maira aia kia mataora tatou, e te oronga maira aia i te au tumu kia rekareka tatou.—Deuteronomi 12:7; Koheleta 3:12, 13.

2, 3. (a) Eaa te aiteanga e kia mataora? (e) No teaa ra ka ngata ei kia mataora ua?

² Akapeea koe? Te mataora ra ainei koe? Te aiteanga o te tu mataora, kia manako meitaki, kia mareka i toou oraanga e kia rekareka ua. Te akakite maira te Pipiria e ko te aronga tei akameitakiia e Iehova te mataora tikai ra. Inara no teaa ka ngata ei kia mataora i teia tuatau?

³ Ka ngata rai kia mataora me tupu mai te au turanga taitaia, me takake atu tetai tei akaperepereia me kore tei akaateaia ki vao i te putuputuanga, me tatara to tatou oraanga akaipoipo, e me ngere i te ngai angaanga. Ka ngata katoa kia mataora me kare e ‘au i te ngutuare no te maata o te taumaro, me aviri mai te au oa angaanga me kore au oa apii ia tatou, e me takinokinoia e me tiriaia ki roto i te areauri no tei tavini ia Iehova. Penei ka apikepike te oraanga kopapa, penei ka tupu te maki kino, me kore ka tupu te maki taitaia. Inara e akamaara ia Iesu Karaiti, “tei mataora e Tei Mana anake ra,” me kore Tutara, kua mareka aia i te akapumaana i te tangata kia mataora ua. (1 Timoteo 6:15, NW; Mataio 11:28-30) I te Akoanga i te Maunga, kua taiku a Iesu i tetai au tu te ka tauturu ia tatou kia mataora noatu te manamanata no te mea te noo nei tatou i to Satani ao.

ME KARE A IEHOVA KARE TATOU E MATAORA

4, 5. Eaa ta tatou ka rave e mataora ai e kia noo mataora ua?

⁴ Te mea mua ta Iesu i taiku ko te mea puapinga rava atu ïa. Karanga aia: “E mataora to te aronga tei manako i to ratou anoano i te pae vaerua, no ratou oki te patireia o te au rangi ra.” (Mataio 5:3, NW) Me manako ua tatou i to tatou anoano i te pae vaerua, te anoanoia ra kia kite tatou i te Atua e ka anoanoia tona tauturu e te arataki anga. Akapeea tatou me akaari i te reira? Na te apiianga i te Pipiria, me akarongo ki te Atua, e te akariro i tana akamorianga ei apinga puapinga rava atu i to tatou oraanga. Me rave tatou i teia au mea ka mataora tatou. Ka ketaketa atu to tatou akarongo te kite anga e e tika te au taputou a te Atua. E ka riro “te manakonako anga mataora” i roto i te Pipiria ei akamaroiroi ia tatou.—Tito 2:13, NW.

⁵ Me ka inangaro tatou kia mataora tatou noatu eaa te tu o te oraanga, kia akamatutu ua atu tatou i to tatou pirianga oa kia Iehova. Tata te apotetoro ko Paulo: “E rekareka i te Atu ra, aua e tivata, e te tuatua akaou atu nei au, Kia rekareka rai kotou.” (Philipi 4:4) Ei oa piri no Iehova, ka anoanoia te tu pakari o te Atua. Karanga te Tuatua a te Atua: “E ao to te tangata i kitea iaia te pakari, e te tangata i rauka iaia te kite ra. Ko te rakau ora aia i te aronga e opu iaia; e ko tei tāpu iaia, e ao tona.”—Maseli 3:13, 18.

6. Eaa atu ta tatou ka rave kia noo mataora ua?

⁶ Inara kia noo mataora ua, e mea puapinga tikai kia taangaanga ua atu i ta tatou e apii maira mei te Pipiria. Kua akakite a Iesu i teia puapinga i tona karanga anga: “E ao to kotou, te aronga i kite i teianei au tuatua, kia akono kotou i te reira.” (Ioane 13:17; e tatau ia Iakobo 1:25.) E mea puapinga teia me ka inangaro tatou i te akamerengo i to tatou anoano i te pae vaerua e kia noo mataora. Inara akapeea tatou e mataora ai me e au apinga tetai te ka takore i to tatou mataora? Ka akara tatou eaa ta Iesu i tuatua i tana Akoanga i te Maunga.

TE AU TU E MATAORA AI TATOU

7. Akapeea te aronga te mii ra e mataora ai?

⁷ “E ao to tei aue: e tarekarekaia ratou.” (Mataio 5:4) Penei ka manako tatou, ‘Akapeea te aronga e mii ra e mataora ai?’ Kare a Iesu e tuatua ra no te katoatoa e mii ra. E maata te au tangata kino e mii ra, me kore te maromaroa ra, no te mea te kite ra ratou i te au manamanata kino i teia “tuatau openga” e te “kino maata.” (2 Timoteo 3:1) Inara te manako ua ra ratou ia ratou uaorai e kare ia Iehova, no reira kare ratou e akatupu i tetai pirianga oa kiaia, e kare rai ratou e mataora ana. Te tuatua ra a Iesu ki te aronga tei kite i to ratou anoano i te pae vaerua. Te mii ra ratou no te mea te kite ra ratou e e maata te tangata te kopae ra i te Atua e kare e inangaro i te oraanga ta Iehova e anoano ra no ratou. Kite katoa ratou e e tu ara ua to ratou, e te kite ra i te au mea kino e tupu ra i teianei ao. Te kite katoa ra a Iehova i te aronga te mii tikai ra, ka akapumaana ia ratou na roto i tana Tuatua, e ka oronga i te mataora e te oraanga.—E tatau ia Ezekiela 5:11; 9:4.

8. Akapeea toou tu maru me tauturu ia koe kia mataora?

⁸ “E ao to tei maru: e riro ia ratou te enua.” (Mataio 5:5) Akapeea te tu maru me tauturu ia koe kia mataora? E maata te au tangata tu kino e te riririri, te ka akatupu i te au manamanata. Inara me apii ratou i te tuatua mou, ka taui e ka “akatangata ou” ia ratou. E oti “ka akangakau aroa ua e te takinga-meitaki, te akaaka, te maru, te akakoromaki maata.” (Kolosa 3:9-12) Tei tupu mai, e tu au to ratou, e pirianga meitaki to ratou ki tetai ke, e te mataora. Pera katoa, te taputou maira te Tuatua a te Atua e “e riro ia ratou te enua.”—Salamo 37:8-10, 29.

9. (a) Eaa te aiteanga te karanga anga a Iesu e ‘e riro te enua’ i te aronga maru? (e) No teaa ra te aronga “tei pongi, e tei kaki i te tuatua-tika” ka mataora ai?

⁹ Eaa te aiteanga te tuatua anga a Iesu e ‘e riro te enua’ i te aronga maru? E riro te enua i te aronga akatainuia me tutara ratou ki rungao i te reira ei au ariki e te kau taunga. (Apokalupo 20:6) E mirioni ua atu aronga kare to ratou manakonakoanga no te rangi, ka noo ratou i te enua nei me ka akatikaia ratou kia ora e tuatau ua atu. E aronga apa kore ratou ma te ‘au e te mataora. Ko teia katoa te aronga ta Iesu i karanga: “E ao to tei pongi, e tei kaki i te tuatua-tika: e akakiia ratou.” (Mataio 5:6) Ka akamerengoia to ratou anoano no te tuatua tika me takore a Iehova i te au tu kino ravarai. (2 Petero 3:13) I roto i te ao ou, ka mataora te aronga tuatua tika e kare rava ratou e mii akaou no te kino a te aronga kino e rave ra.—Salamo 37:17.

10. Eaa te aiteanga o te tu akaaroa?

¹⁰ “E ao to tei aroa ia etai ke ra: e aroa katoaia mai ratou.” (Mataio 5:7) Kia aroa ua, tona aiteanga kia pumaana, maru, e kia tangi, koia oki kia akaaroa i te aronga e mamae ra. Inara, e maata atu te ō maira ki te tu akaaroa. Te apii maira te Pipiria e na te raveanga i tetai apinga no te tauturu i tetai ke, ko te tu akaaroa te reira.

11. Eaa ta te akatutuanga o te tangata Samaria meitaki e apii maira ia tatou?

¹¹ E tatau ia Luka 10:30-37. Te akatutu ra ta Iesu akatutuanga no te tangata Samaria meitaki i te aiteanga tikai, o te tu aroa ua. Kua tangi tikai te tangata Samaria e kua akaaroa i te tangata tei takinokinoia e kua akakeuia aia kia tauturu i te reira tangata. I muri ake i to Iesu oronga anga i te reira akatutuanga, karanga aia: “Ka aere koe, e akapera katoa.” Penei ka ui tatou kia tatou uaorai: ‘Te pera ra ainei au? Te akapera ra ainei au mei ta te tangata Samaria?’ Me te mamae ra tetai aronga, ka rauka ainei iaku i te tauturu ia ratou? Ka rauka ainei iaku i te tauturu atu? Ei akaraanga, ka rauka ainei iaku te tauturu i te aronga pakarikari i roto i te putuputuanga, te takaua, me kore te tamariki kare to ratou metua e tavini ana ia Iehova? Ka rauka ainei iaku te “akapumaana atu i te ngakau taitaia” ma te akamaroiroi ia ratou?’—1 Tesalonia 5:14; Iakobo 1:27.

12. No teaa tatou ka mataora ai me akaari tatou i te tu akaaroa?

¹² No teaa tatou ka mataora ai me akaari tatou i te tu akaaroa? Me akaaroa tatou i tetai ke, te oronga ua ra tatou, e kua karanga a Iesu e ka tupu te mataora me oronga ua tatou. Tetai atu tumu koia oki kua kite tatou e te akamareka ra tatou ia Iehova. (Angaanga 20:35; E tatau ia Ebera 13:16.) Karanga te Ariki ko Davida no tei akaari aia i te tu akaaroa: “Na Iehova aia e tiaki, e akaora oki iaia, e akameitakiia aia i te enua nei.” (Salamo 41:1, 2) Me akaari tatou i te tu akaaroa e te tu tangi ki tetai ke, ka akaaroa katoa mai a Iehova ia tatou e ka mataora tatou e tuatau ua atu.—Iakobo 2:13.

TE TUMU KA MATAORA AI “TEI MĀ TE NGAKAU”

13, 14 No teaa ra i puapinga ai kia “mā te ngakau”?

¹³ Karanga a Iesu: “E ao to tei mā te ngakau: e kite oki ratou i te Atua.” (Mataio 5:8) E rauka ai te ngakau mā, kia akono tatou i te au manako e te au anoano meitaki e te mā. E mea puapinga teia me ka inangaro tatou ia Iehova kia āriki mai i ta tatou akamorianga.—E tatau ia 2 Korinetia 4:2; 1 Timoteo 1:5.

¹⁴ Ka rauka i te aronga ngakau mā, tetai pirianga meitaki kia Iehova, tei karanga e: “E mataora to te aronga tei orei i to ratou kakau.” (Apokalupo 22:14, NW) Eaa te aiteanga kia “orei [ratou] i to ratou kakau”? Te aiteanga no te au Kerititiano akatainuia, te akara ra a Iehova ia ratou ei aronga mā, e oraanga mate kore to ratou i te rangi, e ka mataora ratou e tuatau ua atu. Te aiteanga no te urupu maata, tei manakonako atu i te noo i te enua nei, ka inangaro a Iehova ia ratou ei au oa nona no te mea e aronga tuatua tika ratou. Te karanga ra te Pipiria “kua orei [ratou] i to ratou kakau, e kua akateatea i te toto o te Punua-mamoe ra.”—Apokalupo 7:9, 13, 14.

15, 16 Akapeea te aronga tei mā te ngakau ‘e kite ei i te Atua’?

¹⁵ Karanga a Iehova: “Kare rava oki tetai tangata e ora kia akara mai iaku.” (Exodo 33:20) Akapeea, i reira, te aronga tei mā te ngakau ‘e kite ei i te Atua’? Te tuatua Ereni tei uriia “kite,” tona aiteanga, kia akamanako, kia mārama, e kia kite. (Ephesia 1:18) No reira ‘e kite ei i te Atua,’ tona aiteanga, kia mārama i Tona tu e kia akaperepere i tona au tu. (Ephesia 1:18) Kua aru meitaki a Iesu i te au tu o te Atua, i reira e rauka ai iaia i te karanga: “Ko te akara mai iaku nei, kua akara ïa i te Metua.”—Ioane 14:7-9.

¹⁶ Pera katoa, ka ‘kite tatou i te Atua’ me kite tatou i tona tauturu i roto i to tatou oraanga. (Iobu 42:5) Ka “kite” katoa tatou, me kore ka akamou ki runga i te au mea umere ta Iehova i taputou mai no te aronga tei vai mā ua e te tavini tiratiratu iaia. E ka kite tikai te aronga akatainuia ia Iehova me akatuia ratou kia aere ki te rangi.—1 Ioane 3:2.

KA MATAORA UA TATOU NOATU TE MANAMANATA

17. No teaa ra te aronga akamoeau ka mataora ai?

¹⁷ Karanga akaou a Iesu: “E ao to tei akamoeau.” (Mataio 5:9) Me akamata tatou i te akatupu i te ‘au ki tetai ke, ka mataora ua tatou. Tata te pipi ko Iakobo e: “E ruruia oki te tuatua-tika ma te au na te aronga e akatupu i te tuatua au ra.” (Iakobo 3:18) No reira me te ngata ra ia koe i te akaoa atu ki tetai i roto i taau putuputuanga me kore i toou ngutuare, e pati akatenga kia Iehova kia tauturu ia koe kia akatupu i te ‘au. I reira, ka oronga mai a Iehova i tona vaerua tapu, te ka tauturu ia koe kia akaari i te au tu Kerititiano, e ka mataora atu koe. Kua akakite a Iesu i te puapinga kia akamata i te akatupu i te ‘au i tona karanga anga: “E teianei, kia apai koe i taau apinga oronga ua ki te atarau, e kua manako iora koe i reira e, e ara ta to taeake ia koe na: Vaio atu i to apinga i mua i te atarau, e akamata i te aere e ongi i to taeake, ka aere ei ka apai i taau apinga.”—Mataio 5:23, 24.

18, 19 No teaa te au Kerititiano ka rekareka ai noatu me takinokinoia?

¹⁸ “E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei.” Eaa te aiteanga o ta Iesu tuatua? Karanga aia: “E rekareka kotou, e kia rere ua i te rekareka; e tutaki maata oki ta kotou i te ao ra: i pera oki ratou i te takinga-kino i te aronga peroveta, ko mua ïa ia kotou.” (Mataio 5:11, 12) Te pāpāia anga e te akaueia anga te au apotetoro auraka e tutu aere, “aere atura ratou mei te aroaro atu o te Sunederi, ma te rekareka.” E tika, kare ratou i mareka ana i te reira. Inara kua mataora ratou “i te mea, no tona ingoa i manakoiaʼi ratou e tau ia ratou taua takinga-kino ra” no te ingoa o Iesu.—Angaanga 5:41.

¹⁹ I teia tuatau, te akakoromaki katoa ra te iti tangata o Iehova ma te rekareka me takinokinoia ratou no to Iesu ingoa. (E tatau ia Iakobo 1:2-4.) Mei te au apotetoro, kare tatou e mareka ana i te tamamae anga me kore te takinokino anga. Me vai tiratiratu ra tatou kia Iehova, ka oronga mai aia i te tu ngakau toa tei anoanoia kia akakoromaki. E akamanako ana i tei tupu kia Henryk Dornik e tona taeake. Ia Aukute 1944, kua tukuia raua ki roto i te puakapa tamamae anga. Karanga te aronga tei takinokino ia raua: “E ngata tikai i te akakeu ia raua kia rave i tetai apinga. Rekareka raua i te mate no to raua akarongo.” Akataka a Henryk e: “Noatu e kare oku anoano kia mate no toku akarongo, kua rekareka au i te mamae ma te ngakau toa e te ngateitei no toku tiratiratu kia Iehova.” Karanga aia: “Kua piri vaitata au kia Iehova na roto i taku au pure akatenga, e kua riro mai aia ei Tauturu irinakiia noku.”

20. No teaa tatou ka mataora ai i te tavini i “te Atua mataora”?

²⁰ Me mareka a Iehova “te Atua mataora” ia tatou, ka mataora rai tatou noatu me takinokinoia, me patoi mai te kopu tangata, me rokoia tatou e te maki, e me ruaine tatou. (1 Timoteo 1:11, NW) Ka mataora katoa tatou no te mea kua taputou mai to tatou Atua “ta te kore e tika kia pikikaa” i tana au taputou manea no tatou. (Tito 1:2) Me akatupu a Iehova i tana au taputou, kare to tatou au manamanata i teianei e maara akaouia. Te tika, kare rai e rauka ia tatou i te akamanako atu i te oraanga manea i roto i te Parataito e mei teaa atura to tatou mataora! Ae, “ka rekareka [tatou] i te maata o te au ra.”—Salamo 37:11.