“No Ko ia Iehova ra te Tauturu Iaku”

Me Riro Mai te Ruaine Anga “e Korona Kakā”

“KO TE oraanga meitaki roa atu ia,” i karanga ai a Muriel e 101 mataiti i te pakari. “E akameitaki anga tikai te reira!” i pera mai ei a Theodoros e 70 mataiti i te pakari i te tuku mai anga. “Kua taangaanga au i toku oraanga i roto i tetai mataara meitaki,” i karanga ai a Maria e 73 mataiti. Kua akapou ratou katoatoa i tetai tuatau oraanga i roto i te tavinianga ki te Atua ko Iehova.

Taua aronga pakari ra e tu matau kiteaia no te aronga akamori maroiroi e manganui o Iehova i te ao katoa. Noatu te aere ua atu anga i te mataiti, te au manamanata i te pae oraanga kopapa, e tetai atu au turanga kino, te tavini ra rai ratou i te Atua ma te ngakau katoa. I roto i te putuputuanga Kerititiano, e au akaraanga akangateiteiia taua aronga pakari tiratiratu no te akamori tau i te Atua. E akangateitei maata ana a Iehova i te angaanga a te aronga ruaine, noatu rai e kua kotingaia ratou e to ratou au turanga.a​—2 Korinetia 8:12.

Te akono ra te puka a Salamo i tetai akaraanga tau tikai no runga i te tu oraanga te ka rauka ia e te aronga pakari tiratiratu. Mei tetai tumu rakau manea e te takere rai ratou i te aiteanga te vai uua ra. No runga i te aronga pakari tiratiratu, kua imene te tata taramo e: “Ka ua rai ïa, e tae ua atu ki te ruaine anga ra; ka ki i te tapou, e e vai mata ua ra.”​—Salamo 92:14.

Te mataku ra tetai papaki e ka pae ke ia ratou e ka manako koreia atu me akamata mai te ruaine anga i te akameangiti mai i to ratou maroiroi. Kua pati akatenga atu a Davida i te Atua: “Auraka e akaruke iaku i te ruaine anga ra: me paruparu au ra, auraka e taka ke iaku.” (Salamo 71:9) Eaa te akono ra i te tuke i rotopu i te paruparu ra e te tupu ra i roto i te ruaine anga? Te tu akono tau i te Atua no te tuatua tika. “Ka ruperupe te tangata tuatua-tika mei te nu tamara ra,” i imene ei te tata taramo.​—Salamo 92:12.

Ko te aronga tei akaki i to ratou oraanga ma te tavinianga tiratiratu ki te Atua e manako maataia ana e ka uua ua atu rai i te ua meitaki i roto i to ratou ruaine anga. I te tikaanga, te au ua e manganui ta ratou i tatanu i roto i to ratou uaorai oraanga me kore i ta tetai ke atu kua tupu e kua mamaata mai ei kokotianga no te tu meitaki. (Galatia 6:7-10; Kolosa 1:10) Inara, te aronga tei kaimoumou i to ratou oraanga i roto i te au aruaruanga akatumuia ki runga ia ratou uaorai te kopae ra i ta te Atua au ravenga tei matauia e meangiti ua te puapinga tei kiteaia mai i to ratou pakari atu anga.

Te tuatua tika ei akamanea anga no te ruaine anga kua akamaata katoaia i roto i te puka Pipiria a Maseli. I reira ka tatau tatou: “E korona kakā te upoko inaina, kia rokoia atu tei te arataa tuatua-tika ra.” (Maseli 16:31) Ae, e akaariarianga te tuatua tika no te manea i roto roa. Te aruaruanga i tetai aereanga tuatua tika i te tuatau roa o te oraanga te apai maira i te akangateitei. (Levitiku 19:32) Te rouru inaina me kapitiia mai te pakari e te meitaki ka taki atu ki te akangateitei.​—Iobu 12:12.

Kia Iehova, tetai oraanga tu tika tikai tei akapouia i roto i tana angaanga e manea ia. Te karanga ra te au Tuatua Tapu e: “E ruaine ua atu rai kotou, ko au [Iehova] nei rai au; e tae ua atu ki te inaina anga o to kotou upoko naku kotou e apai; naku i anga, e maranga kotou iaku; naku ra oki kotou e apai, e naku e akaora.” (Isaia 46:4) Mei teaa tikai te pumaana i te kiteanga e kua taputou mai to tatou Metua aroa i te rangi kia akaora e kia turuturu i tona aronga tiratiratu i roto i to ratou ruaine anga!​—Salamo 48:14.

Mei te mea e ko tetai oraanga akapouia i roto i te angaanga tiratiratu kia Iehova e e manea ia mei tona turanga, kare ainei e te akatupu katoa ra i te akangateitei mei tetai ke ra? I te akamanako anga i to te Atua akamanakoanga, e akaperepere ana tatou i te au taeake ruaine irinaki. (1 Timoteo 5:1, 2) E tuku i reira kia akara tatou i te au mataara tau kia akaari i te aroa Kerititiano i te akonoanga i to ratou au umuumuanga.

Ki Runga i te Arataa Tuatua Tika i te Oraanga i Muri roa Mai

“Tei te arataa tuatua-tika ra te ora,” i akapapu mai ei a Solomona ia tatou. (Maseli 12:28) Kare te pakari anga o te mataiti e arai ana i tetai mei te aere atu anga ki runga i teia arataa i te oraanga i muri roa mai. I Morotova, ei akatauanga, tetai tangata e 99 mataiti i te pakari kua akapou i tona mapu anga i te akamaroiroi anga i te au manako Komuniti. Kua ngakau parau aia e kua rauka iaia uaorai i te au pukapukaanga ma te au arataki Komuniti rongonui, mei ia V. I Lenin rai. Inara, ma te topaanga e te inga anga o te tutaraanga Komuniti, kua ngaro te akakoroanga e te aratakianga o te oraanga o teia tangata ruaine. Inara i te akaari anga te Au Kite o Iehova e ko te Patireia o te Atua ua te pauanga tikai ki te au manamanata a te tangata nei, kua ariki aia i te tuatua mou Pipiria e kua riro mai ei tangata apiipii maroiroi no te au Tuatua Tapu. Na te mate ua i arai iaia mei te riro mai anga ei tavini papetitoia no Iehova.

I te kite mai anga no runga i ta te Atua au umuumuanga no te tu akono tau, kua kite mai tetai vaine e 81 mataiti i te pakari i Ungari e ka umuumuia aia kia akaipoipo ki te tane tana i noo kapiti atu no te au mataiti e manganui. Kua tamou marie te vaine i tona maroiroi katoa e kua akakite atu ki tona tokorua i tona akaraanga manako tei akatumuia ki runga i te Pipiria. Ki tona aka poitirere e te rekareka, kua akatika aia i te akaipoipo iaia. I muri ake i akamanaia ai to raua pirianga, kua akono viviki aia i te tereanga ki mua i te pae vaerua. I roto i te au marama e varu i muri ake i te akamataanga o tana apii Pipiria, kua riro mai aia ei papuritia kare i papetitoia, e kua papetitoia aia kare i roa ana i muri mai. Mei teaa tikai te tika e ka rauka i te tuatua tika i te akakorona i te aronga pakari ma te manea tikai!

Ae, ka papu te au Kerititiano pakari tiratiratu i to te Atua inangaro i roto ia ratou. Kare roa a Iehova e akaruke i te aronga tei vai tiratiratu kiaia. Mari ra, kua taputou aia e ka arataki, ka turuturu, e ka akaora katoa ia ratou i te ruaine anga. E kua akatika ratou ki te au tuatua a te tata taramo: “No ko ia Iehova ra te tauturu iaku.”​—Salamo 121:2.

[Tataanga Rikiriki i Raro]

[Tataanga i te kapi 9]

“E korona kakā te upoko inaina, kia rokoia atu tei te arataa tuatua-tika ra.”​—MASELI 16:31

[Pia i te kapi 8]

TE AKONO RA IEHOVA I TANA AU TAVINI PAKARI

“E tu koe ki runga ki mua i te aroaro o te upoko inaina, e akangateitei koe i te tangata metua.”​—Levitiku 19:32.

“E ruaine ua atu rai kotou, ko au nei rai au; e tae ua atu ki te inaina anga o to kotou upoko naku kotou e apai.”​—Isaia 46:4.