Au Uianga a te Aronga Tatau

Kare ainei te apotetoro ko Paulo i pikikaa ana i tona akarongo Kerititiano i tona tuatua anga i mua i te Tuneteri e: “E Pharisea au”?

Kia marama i te tuatua a Paulo, tei kiteaia ia Angaanga 23:6, ka inangaroia tatou i te akamanako i to te reira aerenga tuatua.

I muri ake i te pokia anga e te au ngati Iuda i Ierusalema, kua tuatua atu a Paulo ki te urupu. Kua karanga oki aia i tona “apii angaia i [Ierusalema i] te vaevae o Gamaliela, i apii uaia oki au i te ture a to tatou ai metua ra.” Noatu e kua akarongo atu te urupu i tana paruruanga no tetai tuatau ua, mavete atura ratou i te taopenga ra, te rangatira maata o te vaeau tei aru mai kua apai atu ia Paulo ki te au ngai o te vaeau. E te aere ra aia ka papaia, kua karanga a Paulo e: “E tau aina i te ture kia pāpā kotou i te tangata no Roma, kare i akaapaia ra?”​—Angaanga 21:27–​22:29.

Tera mai ra, kua apai atu te rangatira maata ia Paulo i mua i te akavaanga teitei o te ngati Iuda, te Tuneteri. Kua akara matariki atu a Paulo ia ratou e kua kite atu e kua ki te Tuneteri i te au Sadukea e te au Pharisea. Kua karanga atu aia i reira: “E tāma, e te au taeake, e Pharisea au, e tamaiti oki na te Pharisea: no te tapapa i te tuakaouanga o tei mate ra i akavaia mai ei au nei.” Tei tupu, kua tupu atura te taumaro i rotopu i te au Pharisea e te au Sadukea, “i karanga oki te Sadukea e, kare ua e tuakaouanga, kare oki e angela, kare oki e vaerua: kareka te Pharisea, e tuatua-mou katoa ïa ia ratou.” Tetai papaki tei kapiti atu ki te pupu o te au Pharisea kua maro ketaketa atura: “Kare rava akera i kitea ia matou te kino o teianei tangata.”​—Angaanga 23:6-10.

I te mea kua kiteia aia e e Kerititiano maroiroi tikai, kare i rauka ana ia Paulo i te akaariu i te Tuneteri i te irinaki e e tangata Pharisea akono rai aia. Kare rava te au Pharisea i reira e ariki atu i tetai tapikikaa anga me kore akakiteanga tarevake. No reira ta Paulo tuatuaanga e e Pharisea aia e au kotinga anga to te reira, e te au Pharisea i reira kua marama i ta Paulo au tuatua i roto i taua aerenga manako.

I te karanga anga e te akavaia ra aia no te manakonako anga o te tuakaou anga o te mate, te karanga taka meitaki ra a Paulo e i roto i teia turanga mei te au Pharisea rai aia. I roto i tetai ua atu taumaroanga no runga i teia tumu manako, kua akatakaia a Paulo ma te au Pharisea e kare ki te au Sadukea, kare oki e irinaki ana i roto i te tuakaou anga.

Ta Paulo i irinaki ei Kerititiano kare i patoi ana ki te au irinaki a te au Pharisea no runga i te au manako mei te tuakaou anga, te au angera, e tetai atu au tumu manako no te Ture. (Philipi 3:5) No reira i roto rai i teia au kotinga anga, kua rauka ia Paulo i te kapiti atu iaia uaorai ma te au Pharisea, e i roto i teia tu kotingaia i marama ai te aronga i reira i roto i te Tuneteri i tana au tuatua. Te taangaanga ra aia i reira i tona tupuanga i mua atu ana ma te akavaanga teitei rava o te ngati Iuda akaapa.

Inara, te akapapuanga maata rava atu e kare a Paulo i pikikaa ana i tona akarongo kua kiteaia i roto i tona rauka ua atu anga i to Iehova arikianga. Te po i muri ake i tuatua ai a Paulo i te tuatua te uiia ra, kua karanga a Iesu e: “E akamaroiroi, e Paulo: mei taau i akakite i te tuatua noku i Ierusalema nei, e akakite katoa oki koe i Roma e tikaʼi.” Mei te mea e kua rauka ia Paulo to te Atua arikianga, ka tau tatou kia taopenga e kare a Paulo i akapikikaa ana i tona akarongo Kerititiano.​—Angaanga 23:11.