Akaoraia, Kare Na Roto i te Angaanga Ua, Mari Ra Na Roto i te Aroa Ua
‘I ora oki kotou i te akarongo . . . Kare oki to te angaanga, ko te akatietie aea tetai.’—EPHESIA 2:8, 9.
1. Akapeea te au Kerititiano i tuke ei mei te au tangata no runga i te au angaanga i oti iaia uaorai, e no teaa ra?
TE AKAPEREPERE maata nei te au tangata i teia tuatau i te au angaanga i oti ia ratou uaorai, e kua viviki ua ratou i te akatietie no runga i te reira. E tuke ra te au Kerititiano. Te kopae ra ratou i te akakite maata anga i ta ratou uaorai au angaanga i oti, pera katoa taua au mea te piri atura ki te akamori anga mou. Ia ratou e rekareka ra eaa tei akatupuia e te au tangata o Iehova ei pupu ra, kare ratou e akakite maata mai i ta ratou tuanga i roto i te au angaanga i oti. Kua kite ratou e i roto i ta Iehova angaanga, e puapinga maata atu te au akakoro anga tau i to te au angaanga i oti ia ratou uaorai. Ko tetai ua atu tangata te ka orongaia te apinga aroa no te ora mutu kore ra ka rauka mai te reira i te openga ra, kare e na roto i te au angaanga i oti iaia uaorai, mari ra na roto i te akarongo e te aroa ua o te Atua.—Luka 17:10; Ioane 3:16.
2, 3. Eaa ta Paulo e akatietie ra, e no teaa ra?
2 Kua kite meitaki te apotetoro ko Paulo i teia tika anga. I muri ake i te pure anga e toru taime no te akamaru anga mei ‘tetai tara i roto i te kopapa,’ kua rauka mai iaia ta Iehova pau anga: “Toku nei aroa ua, oti ra ua ïa taau: ei te apikepike e taka meitaki ravaʼi toku maroiroi.” Na te ariki akaaka anga i ta Iehova ikianga, kua tuatua a Paulo: “E teianei, e mea rekareka ïa iaku kia akatietie i toku nei paruparu, kia vai marie te maroiroi o te Mesia i runga iaku nei.” E mea tau kia inangaro tatou i te aru i to Paulo tu akaaka.—2 Korinetia 12:7-9.
3 Noatu e meitaki tikai a Paulo i te rave anga i te au angaanga Kerititiano, kua kite aia e te au akatupuanga nana ra kare no te mea e no tetai atu au tu tikai nana uaorai ra. Ma te tu mako, kua akakite aia: “Ko au nei rai, ko te iti rava i te iti i te aronga tapu ravarai, tei orongaia mai taua aroa ua nei, kia tutu aere au ki rotopu i te etene i te meitaki maata ope kore o te Mesia kia kimi ra.” (Ephesia 3:8) Kare e tu akatietie i konei kare katoa e tu ngakau parau tapu rava atu i tetai ra. “E patoi mai te Atua i te aronga nengonengo, e oronga maira i te aroa ua i te aronga akaaka.” (Iakobo 4:6; 1 Petero 5:5) Te aru ra ainei tatou i to Paulo akaraanga, i te manako taakaaka anga ia tatou uaorai e iti ake i to tatou au taeake?
“Te Manako Akameitaki Atu Tetai ki Tetai”
4. Eaa ra i ngata ai ia tatou i tetai taime i te akamanako atu i tetai ke ei teitei atu ia tatou ra?
4 Kua ako te apotetoro ko Paulo i te au Kerititiano: “Auraka takiri e mea e raveia ma te taumāro, e te akanengonengo puapinga kore; ei ngakau akaaka ra, i te manako akameitaki atu tetai ki tetai, auraka iaia uaorai.” (Philipi 2:3) Penei ka riro teia ei akaaoanga, mei tei roto tikai tatou i tetai turanga no te apainga. Penei ua ake ka tupu mai te manamanata no te mea kua akakeuia tatou, ma tetai turanga maata, e te tu taemoemo anga te tupu maata maira i roto i teianei ao i teia tuatau. Penei ua ake, ei au tamariki ra kua apiiia ana tatou kia taemoemo, ma to tatou ai taeake i te kainga me kare ki to tatou au oa i te apii. Penei kua maro putuputuia mai tatou kia tauta atu i te akangateitei anga kia riro mai ko tetai tangata oro meitaki roa atu i te apii me kore e tangata kite meitaki roa atu. E tika, te oronga anga i to tatou meitaki i roto i tetai ravenga tau e mea meitaki te reira. Inara, te rave ra te au Kerititiano i te reira, kare kia akamaata roa atu ia ratou uaorai, mari ra kia puapinga maataia mei te angaanga e penei ua ake kia puapinga katoaia tetai ke. Inara, e kino tikai te kimi ua anga kia akapaapaaia ei numero tai. Akapeea ra?
5. Me kare e akaaereia, eaa te ka taki atu ki tetai tu taemoemo anga?
5 Me kare e akaaereia, ka akatupu tetai tu taemoemo anga me kore te nengonengo kia riro mai tetai tangata ei tangata akangateitei kore e te ngakau parau. Penei ka vareae aia i te au tu e te au akameitaki anga o tetai ke. Te karanga ra a Maseli 28:22 e: “Te tangata mata noanoa, te rapurapu ra ïa kia maata te apinga; kare ra aia i kite e, ka rokoia mai aia e te putaua.” Penei ka itae ngakau parau katoa aia i te au taoonga kare aia i tau. Kia akatika i tana au ravenga, penei ka akamata aia i te koumuumu e ka akaapa i tetai ke—e au tu kia kopaeia e te au Kerititiano. (Iakobo 3:14-16, NW) Noatu eaa te tu, te akatupu ra aia i tetai tu ko au na mua ake.
6. Akapeea te Pipiria i te akamatakite anga mai i te tu taemoemo anga?
6 No reira, te raurau maira te Pipiria, i te au Kerititiano e: “Eiaa tatou e akateitei puapinga kore ua, i te akaongoongo anga tetai ki tetai, e te vareae anga tetai ki tetai.” (Galatia 5:26) Te tuatua ra te apotetoro ko Ioane no runga i tetai taeake Kerititiano i te akara anga kua topa atu ki roto i teia tu nei. “I tata na au i te tuatua i te ekalesia na,” i karanga ai a Ioane, “ko Dioterepe ra, ko tei akateitei iaia uaorai ki rungao ia ratou ra, kare aia e āriki mai ia matou. E teianei, kia tae atu au ra, kare e ngaro iaku tana e rave ra, i te tuatua aere anga ia matou i te tuatua akakino ra.” E turanga tangi tikai no tetai Kerititiano kia topa atu ki roto i te reira!—3 Ioane 9, 10.
7. Eaa ta tetai Kerititiano ka inangaro i te kopae atu i roto i te ngai angaanga taemoemo anga i teia tuatau?
7 E tika, e tika kore ua i te manako e ka rauka i tetai Kerititiano i te kopae takiri katoa i te au aruaru anga taemoemo anga. Ei akaraanga, penei ka o atu tana ngai angaanga ei taemoemo anga i te pae moni ma tetai aronga ke me kore e au pitiniti te maani ra i te au apinga aiteite me kore te oronga ra i te au angaanga te aiteite ra. Inara, noatu taua au akatauanga katoa ra, te inangaro ra tetai Kerititiano i te rave i tana pitiniti na roto i tetai tu ngateitei, te aroa, e te manakoanga. Ka kopae aia i te au ravenga tau kore me kore i te au ravenga kare i te Kerititiano e kia kopae i te riro anga mai ei tangata tei kite maataia no te taemoemo anga, e tu manako kore tikai. Kare aia e manako atu e te riro anga ei numero tai—noatu eaa te aruaru anga—ko te mea puapinga maata roa atuia i roto i te oraanga. Me e tika te reira no te au aruaru anga o te angaanga, mei teaa atura te tika i roto i te ngai no te akamori anga!
“Kare no te Akaaite Anga ki te Tangata Ke”
8, 9. (a) Eaa ra kare a te aronga pakari Kerititiano tumu anga kia taemoemo ki tetai e tetai? (e) Eaa ra a 1 Petero 4:10 i akatanoia ai ki te au tavini katoatoa a te Atua?
8 Kua akatakaia mai te tu ta te au Kerititiano ka rave i roto i ta ratou akamori anga i roto i teia au tuatua akauruia: “Kia akapapu ra te tangata ravarai i tana uaorai angaanga, e i reira e rauka ai iaia te tumu no te rekareka nona anake rai, e kare no te akaaite anga ki te tangata ke.” (Galatia 6:4, NW) Te angaanga piri vaitata e te taokotai ra te aronga pakari i roto i te putuputuanga, i te kite anga e kare ratou e taemoemo ana ma tetai e tetai ei pupu ra. Te rekareka ra ratou i te tauturu anga a tetai e tetai e raveia ra ki te oraanga katoa o te putuputuanga. Te kopae ra ratou i reira i te taemoemo tau kore e te akanoo anga i tetai akaraanga meitaki ma te taokotai no te toenga o te putuputuanga.
9 No te mataiti, te kite, me kore te au tu natura, penei e meitaki roa ake etai aronga pakari i tetai mai, me kore kua orongaia mai kia ratou te kite maata roa atu. Tei tupu mai, e tuketuke te au apainga a te aronga pakari i roto i ta Iehova akaaerenga. Kare oki e rave i te au akaaite anga, te akamanako ra ratou i te akoanga: “Ka oronga te tangata katoa i te meitaki no tetai, mei tei rauka mai iaia ra, mei te tiaki meitaki i te aroa ua tumatatini a te Atua ra.” (1 Petero 4:10) Te tika anga, te tano ra teia irava ki te au tavini katoatoa a Iehova, i tetai tu kua rauka i te katoatoa te apinga aroa no te kite tika tikai e kua rekareka te katoatoa i te akameitaki anga no te piri anga atu ki roto i te angaanga orometua Kerititiano.
10. Na roto i teea mataara ua e arikiia mai ei ta tatou angaanga tapu e Iehova?
10 Te mareka ua ra a Iehova i ta tatou angaanga tapu me orongaia te reira na roto i te aroa e te akamorianga, kare no te akateitei anga ia tatou uaorai i runga ake i tetai ra. No reira e mea puapinga kia rauka tetai manako tau no ta tatou angaanga i te turu anga i te akamori anga mou. Noatu e kare tetai papaki e akaapa tika tikai maira i te au akakoro anga a tetai ke, te “kimi matatio [nei a Iehova] i te ngakau.” (Maseli 24:12; 1 Samuela 16:7) No reira, e mea meitaki kia ui tatou kia tatou uaorai i tetai taime e tetai taime e, ‘Eaa ra toku akakoro anga i raveia ai te au angaanga no te akarongo?’—Salamo 24:3, 4; Mataio 5:8.
Akara Anga Tau no ta Tatou Angaanga
11. Eaa te au uianga no runga i ta tatou angaanga i roto i te angaanga orometua ka tau kia akamanakoia?
11 Me ko te au akakoro anga te au mea puapinga e rauka ai to Iehova tu mareka anga, mei teaa te pakari i reira to tatou manako no runga i ta tatou au angaanga no te akarongo ra? Me rave ua atu tatou i ta tatou angaanga orometua ma te akakoro anga tika, e mea tau ainei tikai kia akono i tetai papaanga eaa ta tatou ka rave e mei teaa te maata? E au uianga tau teia, no te mea kare tatou e inangaro i te tuku i te au tare anga numero na mua ake i te au angaanga o te akarongo me kore i te tuku anga i tetai ripoti meitaki kia riro mai ko te manako maataia no runga i ta tatou angaanga Kerititiano.
12, 13. (a) Eaa ra etai au tumu i akono ei tatou i tetai ripoti no ta tatou angaanga koro? (e) Eaa te au tumu i rekareka ai tatou me akarakara i te katoa anga o te ripoti no ta tatou angaanga tutu anga?
12 E akara ana eaa ta te puka Organized to Do Jehovah’s Will e karanga ra: “Kua akono te au pipi mua a Iesu Karaiti i te inangaro i roto i te au ripoti no te tere anga ki mua i roto i te angaanga tutu anga. (Mareko 6:30) Te akakite maira te puka Pipiria a Angaanga kia tatou e vaitata ki te 120 tangata tei tae mai i te riringiia anga mai te vaerua tapu ki rungao i te au pipi i Penetekote. Kare i roa ana kua maata mai te numero o te au pipi ki te 3,000 e oti ki te 5,000. . . . (Angaanga 1:15; 2:5-11, 41, 47; 4:4; 6:7) Mei teaa atura te akamaroiroi anga memeitaki ta te au nuti no teia au tupu anga maata i apainaia mai ki te au pipi ra!” No taua tumu rai, te tauta nei te Au Kite o Iehova i teia tuatau i te akono i te au rekoti tika tikai eaa tei akatupuia i te ao katoa i te akatupu anga i te au tuatua a Iesu e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) Te oronga maira taua au ripoti i tetai akara anga tika tikai eaa tei akatupuia i te ao katoa. Te akaari maira te reira e ko teiea te ngai e anoanoia ra te tauturu e eaa te au puka e eia o te reira e umuumuia ra kia akamaata atu i te angaanga tutu anga.
13 No reira, te ripoti anga i ta tatou angaanga tutu anga te tauturu ra ia tatou kia rave i ta tatou angaanga kia tutu aereia te tuatua meitaki o te Patireia ma te tau. Pera katoa, kare ainei tatou e akamaroiroiia nei me akarongo tatou no runga i te angaanga ta tatou au taeake e rave ra i tetai au tuanga o teianei ao? Te au nuti no te tupu anga e te akamaata anga i te ao nei te akakeu ra ia tatou ma te rekareka, te akakeu maata ra ia tatou kia rave i te angaanga, e te akapapu maira kia tatou i ta Iehova akameitaki anga. E mei teaa ra te rekareka i te kite anga e kua kapitiia ta tatou uaorai ripoti i roto i taua ripoti i te ao katoa! E iti ake ta tatou au ripoti me akaaiteia ki te katoa anga o te tareanga, inara te kite maira a Iehova i te reira. (Mareko 12:42, 43) Kia maara ra e, me kare aau ripoti, kare e oti meitaki te ripoti katoa.
14. I te pae mai i te tutu anga e te apii anga, eaa te kapitiia maira i roto i ta tatou akamori anga ia Iehova?
14 E tika, te maata anga o ta te Au Kite ravarai e rave ra i te akatupu anga i tana apainga ei tavini akatapuia no Iehova kare e mama mai i runga i tana ripoti. Ei akatauanga, kare te ripoti i kapiti mai ana i te apii putuputu uaorai i te Pipiria, te aere anga e te paupau anga i ko i te au uipaanga Kerititiano, te au angaanga a te putuputuanga, ei tauturu ki te au taeake irinaki me te anoanoia ra, te turu anga i te pae moni no te angaanga Patireia i te ao katoa, e te vai atura. No reira, noatu e mea puapinga ta tatou ripoti no te angaanga koro, te tauturu anga ia tatou kia tamou i to tatou maroiroi i te tutu aere anga e kia kopae i te tukutuku anga, e mea tau kia vai tatou i te reira i roto i te ngai tau. Kare ia e akamanakoia ei raitini i te pae vaerua me kore e patipoti, te akamanako anga e kua tau tatou no te ora mutu kore.
“Maroiroi i te Au Angaanga Memeitaki”
15. Noatu e kare ua te angaanga e akaora ia tatou, eaa ra te reira i anoanoia ai?
15 Te taka meitaki ra, noatu e kare ua te angaanga e akaora mai ia tatou, te anoanoia ra te reira. No reira i kapikiia ai te au Kerititiano “ei tangata tikai nona uaorai, e te maroiroi i te au angaanga memeitaki ra” e i akamaroiroiia ai ratou kia ‘akono marie rai tetai ki tetai, ka akamaroiroi atu ei kia maata te aroa, e i te angaanga memeitaki ra.’ (Tito 2:14; Ebera 10:24) Kia tau ki te tumu tikai, te karanga ua ra tetai tangata tata Pipiria, ko Iakobo e: “Mei te kopapa oki kia kore te vaerua, e mea mate ïa, koia katoa te akarongo kare e angaanga ra, e mea mate katoa ïa.”—Iakobo 2:26.
16. Eaa te mea puapinga maata roa atu i te au angaanga, inara eaa ta tatou ka matakite?
16 Noatu e eaa te puapinga maata te au angaanga meitaki uaorai ra, e puapinga maata roa atu te au akakoro anga i te rave anga i te reira. No reira e mea pakari no tatou i te akara i to tatou au akakoro anga mei tetai taime ki tetai taime. Inara, i te mea e kare e rauka i tetai tangata i te kite tikai i te au akakoro anga a tetai ke, kia matakite ra ratou i te akaapa anga i tetai ke. “Koai oki koe na, ka akaapa atu ei i to tetai ke ra tavini?” i uiia mai ei kia tatou, ma te pauanga tei kiteaia: “Tei tona uaorai pu tona mou e tona inga.” (Roma 14:4) Na Iehova, te Pu o te katoatoa, e tana Akava ikiia, ko Iesu Karaiti, e akava ia tatou, kare i runga ua i te tumu anga o ta tatou au angaanga mari katoa ra i runga i te tumu anga o to tatou au akakoro anga, to tatou au tuatau, to tatou aroa, e ta tatou akamori anga. Na Iehova anake raua ko Iesu Karaiti e akava tikai mai me kua rave ana tatou i ta te au Kerititiano i akoia kia rave, i roto i te au tuatua a te apotetoro ko Paulo: “E akamaroiroi kia vai meitaki rai koe ki mua i te aroaro o te Atua, ei rave angaanga kare e akama anga, e te tika oki i te tua i te tuatua-mou ra.”—2 Timoteo 2:15; 2 Petero 1:10; 3:14.
17. Ia tatou e tauta ra kia akamaroiroi rai tatou, eaa tatou ka akamanako ei ia Iakobo 3:17?
17 E maru ua a Iehova no tana e tapapa maira mei ia tatou. E tau ei kia Iakobo 3:17, “te pakari no runga maira,” kapiti atu ki tetai au mea ke atu, e “maru” ia. Kare ainei i te aerenga pakari, pera katoa te akaoti anga i te angaanga mou, kia aru tatou ia Iehova i roto i teia tu nei? No reira, auraka tatou e tauta i te akanoo i te tu tau kore ua e te au tapapaanga itae koreia no tatou uaorai me kare no to tatou au taeake.
18. Eaa ta tatou e akara nei ki mua me e manako tau to tatou no ta tatou au angaanga e te aroa ua o Iehova?
18 Me akono tamou ua atu rai tatou i te manako tau no ta tatou au angaanga no te akarongo e to Iehova aroa ua, ka akono rai tatou i te rekareka te riro ra ei akairo akataka anga no te au tavini mou a Iehova. (Isaia 65:13, 14) Ka rauka ia tatou te rekareka i roto i te au akameitaki anga ta Iehova e riringi maira ki rungao i tona au tangata katoa, noatu e mei teaa te maata ta tatou uaorai ka rave. Na te rave ua anga i te “pure, e te pati anga atu ma te akameitaki,” e pati akatenga tatou ki te Atua kia tauturu mai ia tatou kia akamaroiroi rai tatou. Ei reira, kare ekokoanga, “na te au o te Atua, ko tei maata ua atu i te kite tangata, e akamaroiroi mai i to [tatou] ngakau e to [tatou] manako i te Mesia nei ia Iesu.” (Philipi 4:4-7) Ae, ka rauka ia tatou te pumaana e te akamaroiroianga i te kite anga e ka akaoraia tatou, kare na roto i te angaanga ua, mari ra na roto i te aroa ua o Iehova!
Ka Rauka Ainei ia Koe te Akataka?
• Eaa te au Kerititiano i kopae ei i te akatietie anga no runga i te au angaanga i oti iaia uaorai?
• Eaa te au Kerititiano i kopae ei i te akaari i te tu taemoemo anga?
• Eaa te au Kerititiano i ripoti ei i ta ratou angaanga Kerititiano i roto i te angaanga orometua?
• Eaa te au Kerititiano i kopae ei i te akaapa atu i te au taeake Kerititiano?
[Tutu i te kapi 15]
“Toku nei aroa ua, oti ra ua ïa taau”
[Au Tutu i te kapi 16, 17]
Te rekareka ra te aronga pakari i te tauturu anga a tetai e tetai e raveia ra ki te oraanga katoa o te putuputuanga
[Au Tutu i te kapi 18, 19]
Me kare aau ripoti, kare e oti meitaki te ripoti katoa