Au o te Manako i Roto i Tetai Totaiete Tarere

“KO TE tangata i anoano e, ei mua aia,” i ako ei a Iesu Karaiti ki tana au apotetoro, “ei akaopenga rava aia e tikaʼi, e ei tavini no ratou ravarai.” Te taumaro ra te au apotetoro e koai i roto ia ratou tei maata rava atu. Kua kite ratou e e rikarika ana a Iesu i te reira tu. Kare rava aia i tuku i tana au pipi kia taumaro ki tetai e tetai ei mataara akakiteanga kia tere atu ki mua i te pae vaerua.​—Mareko 9:33-37.

I mua ake ka aere mai ki runga i te enua nei, kua piri a Iesu Karaiti i roto i te anga anga o nga tangata mua e kua kite e akapeea raua i te maani angaia. (Kolosa 1:15, 16) Kua angaia te nga tangata mua ma te tuanga kia tere ki mua ma te kore e tarere aroa kore ua ki etai ke. Kare oki e anoanoia te au tangata kia ta i rotopu ia ratou uaorai i te akataka anga e koai to ratou upoko, kare katoa ratou i tarere atu ma te au animara i roto i tetai putoto anga no te ora.​—Genese 1:26; 2:20-24; 1 Korinetia 11:3.

Akamata Anga o te Vaerua Tarere

Akapeea, i reira, tetai vaerua tarere kino i riro mai ei mana maata i roto i te totaiete o te tangata? Te oronga maira te akaraanga mua o te ta tangata i roto i te tuatua enua o te tangata i tetai akakite anga. Kua arataki atu te vaerua tarere i te tuanga o Kaina, te tamaiti mua a te nga tangata mua ra, ki te tumatetenga. Kua tamate atu a Kaina i tona teina ia Abela no te mea kua mareka te Atua i ta Abela atinga, koi koreʼi ta Kaina. E te tuatua maira te Puka Tapu e ko Kaina “no taua vaerua kino ra aia, e tamate rava atura i tona teina.”​—1 Ioane 3:12; Genese 4:4-8.

Ae, ko tei kino ra, ko Satani te Tiaporo, koia te akamataanga e tei akakeu maata i te vaerua tarere. Noatu rai e e tamaiti angera aia na te Atua ma te au akameitaki anga teitei, kua inangaro aia kia maata atu. (Akaaite Ezekiela 28:14, 15.) I te pikikaa anga aia kia Eva, kua akaari mai aia i tona anoano. Kua karanga aia na te kaianga i te ua rakau tei tureia, ka riro mai aia “mei te Atua ra te tu.” (Genese 3:4, 5) Te tikaanga tikai, ko Satani tei inangaro kia riro mai mei te Atua ra te tu, te taemoemoanga kia Iehova. Na te vaerua tarere ki te Atua i akakeu iaia kia meameaau.​—Iakobo 1:14, 15.

E vaerua piri ua teia. I raro ake i ta Satani akakeuanga, kua ngaro ke atu te au tei orongaia e te Atua ra no te akamataanga o te akataka anga pamiri. (Genese 3:6, 16) Mei te tuatau o tona meameaau anga i te Atua, te tutara nei a Satani te Tiaporo i te au tangata, te akonoanga i tetai vaerua tarere, pera katoa te pikikaa anga i te tangata e te vaine i te irinakianga e ko te tarere kino ko teia te taviri ki te puapinga anga. Inara, te akamarama maira te Puka Tapu e: “Te vai ra oki te vareae, e te tauetono, tei reira katoa te oripu ua e te au tuatua kikino katoa ra.” (Iakobo 3:14-16) E no reira kua keia a Satani i te mataora e te au o te manako mei te tangata.

Puapinga ma te Kore e Tarere

Ei tuke anga i ta Satani au akakeu anga, te oronga maira te Puka Tapu i te au akaraanga no te puapinga takake mei te tarere. Tei kite atea uaia koia oki to Iesu Karaiti. Noatu rai e te vaira i te tu o te Atua, kare rava aia i manako e kia aiteite aia ki te Atua inara kua rave atu i te tu o te tavini e kua aere mai ki te enua nei. Maata atu ki te reira, kua taakaaka aia iaia uaorai e kua akarongo e tae ua atu ki te mate i runga i te rakau tamamae. Ko teia tu akarongo, tei ngere i etai vaerua no te taumaro, kua arataki atu ki tona reanga i te mareka anga tu-Atua. “I akateitei rava atu ei te Atua iaia, e kua oronga mai i te ingoa i maata ua atu i te teitei i te au ingoa ravarai nei nona.” (Philipi 2:5-9) Eaa atu te maata o te puapinga te ka rauka mai i tetai mea ora? Kua akamareka aia i tona Metua i te mamao tei kore i rauka i tetai ua atu mea ora i te rave, e ko teia kua rave aia ma te kore e vaerua taumaro me kore tarere.​—Maseli 27:11.

Kua akaari katoa te au angera tiratiratu maata i te rangi ra i teia tu. Noatu rai ko Iesu, koia te arataki o te au angera ra, kua riro mai ei meangiti ake ia ratou i tona aere anga mai ki te enua nei, kua puareinga ua ratou i te rave i tona au anoano. Te marama ra, kare ratou i akaari ana i te manako i te raveanga i te meitaki o te turanga e te tautaanga i te mono atu iaia te Angera Maata.​—Mataio 4:11; 1 Tesalonia 4:16; Ebera 2:7.

To ratou uri ke anga ki te au tu tarere te kitea maata uaia ra me akamanako tatou i te mataara i ariki ei ratou ki to te Atua akakoroanga no te akateitei anga i etai au tangata apa ki te oraanga vaerua mate kore, i te turanga e ka “akava i te au angela.” (1 Korinetia 6:3) E maata atu ta te au angera i kite no te tavinianga ia Iehova e e maata atu te kiteanga no te akatupu i te meitaki i te ka rauka i te au tangata apa ra. Inara, te tavini mataora ua ra te au angera i te aronga akatainuia i te enua nei, kare rava i vareae no ta ratou ka rauka mai. (Ebera 1:14) No to ratou tu tarere kore e te meitaki kua rauka ia ratou te rave tamou i te tavinianga i mua i te terono o te Atu Ngateitei ra ko Iehova.

E akamanako katoa i te au tavini tiratiratu taito ra o te Atua te ka akatuakaouia mai i te enua nei. Ko Aberahama tetai akaraanga kite atea uaia no te akarongo e kua kapikiia “ei metua no te peritome kore ravarai i akarongo ra.” (Roma 4:9, 11) Kua tuku a Iobu i te akaraanga tau tikai o te akakoromaki. (Iakobo 5:11) Ko Mose, ‘e tangata maru maata i to te tangata ravarai o te ao katoa nei,’ kua arataki atu i te iti tangata o Iseraela ki te tu rangatira. (Numero 12:3) Koai i rotopu i te au tangata apa ra tei tuku i tetai akaraanga meitaki atu no te akarongo, te akakoromaki, e te maru mei teia au tangata ra? Inara, tei roto ratou i te raini no te nooanga i te enua nei i raro ake i ta te Atua Patireia. (Mataio 25:34; Ebera 11:13-16) Ko ratou, mei ia Ioane Papetito, ka akapapaia i raro “ko te iti rava i te basileia o te ao ra.” (Mataio 11:11) Ka manako ainei ratou i te kopekope, te rai maroanga e ko to ratou akarongo, akakoromaki, me kore maru te aiteite ra me kore i tetai au taime te maata atura i to te aronga te orongaia ra te oraanga i te rangi? Papu tikai e kare! Ka riro ratou ei aronga mataora i raro ake i te Patireia o te Atua.

I teia tuatau nei rai, ko te au tangata ma te kore e tu tarere e aronga marekaia kia kiteia. Ko Yasuo, tei taikuia i roto i te atikara mua, kua o oonu atu i roto i te kaiou no te tamanako anga i te auro e kua ruti atu i tana au apinga. Kua akaruke tona “au oa” iaia. I te mea e kua akamata tana vaine i te apii i te Puka Tapu ki te Au Kite o Iehova, kua aere atu aia ki ta ratou au uipaanga mei roto i te manako tu tangi no te mamaeanga tana i akatupu ki tona pamiri. I te openga iora, kua akaatea iaia uaorai mei te tarereanga e kua riro mai e ko tetai o te Au Kite o Iehova. Teia taime te mataora nei aia i te takapini angaia e te au oa Kerititiano, te tu te puareinga ua ra i te tauturu iaia i roto i te tuatau taitaia.

Akapeea me Tamou i te Au o te Manako

Kare oki i te mea ngoie ua i te tamou i te au o te manako i roto i te totaiete tu tangi kore e te tarere. Te tau meitaki ra tatou i te kite e te akakino ra te Puka Tapu i “te makitakita, te tamaki, te akarere, te riri, te karo, te pae ke, te tuatua tarevake, te vareae” ei “au angaanga a te kopapa” tei arai i te tangata kia kore e noo i te Patireia o te Atua. Pouroa teia au angaanga te aere kapiti ra ma te vaerua tarere. No reira rai te apotetoro ko Paulo i akamaroiroi ei i to Galatia e: “Eiaa tatou e akateitei puapinga kore ua, i te [“tarere anga,” NW] tetai ki tetai, e te vareae anga tetai ki tetai.”​—Galatia 5:19-21, 26.

I roto i teia akapapaanga, kua akaari te reta a Paulo i te taviri no te autu anga atu i te tarere akapaapaa. Kua karanga aia e: “Kareka ta te Vaerua e akatupu, ko te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, te maru, te akono meitaki: kare ua e ture e akakore i te reira.” (Galatia 5:22, 23) Te tauturu ra te ua a te vaerua ia tatou kia akakore atu i te taumaro i to tatou au manako. Ei akaraanga, e tamanako ana, i te tu aroa. “Kare te aroa e vareae,” i akamarama ei a Paulo. “Kare e akapaapaa, kare e akaparau, kare e akamoupuku, kare e akara i tona uaorai au inangaro, kare e ope i te riri.” (1 Korinetia 13:4-7, NW) Na te tatanuanga i te aroa, ka rauka ia tatou i te opara ke atu i te vareae, e akaoroanga ririnui i roto i te vaerua tarere. Tetai atu au ua o te vaerua te tauturu katoa ra ia tatou i te tamaki atu mei to tatou au ngakau e te au manako i etai au akairo e vai ua ra, no te vaerua tarere kino. No teaa, ma te akatere-uaorai etai ua atu umuumu anga ka tupu mai no te tarere ki tetai ke kia re atu, noatu e eaa te tumatetenga ka tupu mai ka rauka vave ua i te akakoreia!​—Maseli 17:27.

Inara e raukaʼi i te tatanu i teia au tu, ka tau tatou kia akatika i to te Atua vaerua kia angaanga ki runga ia tatou. Ka rauka ia tatou i te akamaroiroi i teia tu maroiroi e te angaanga viviki o te vaerua tapu na te tauta pakarianga i te pure e te patianga i to te Atua vaerua kia tauturu ia tatou. (Luka 11:13) Ei arikianga ki ta tatou pure, eaa ra ta te Atua ka oronga mai kia tatou? Te pau maira te Puka Tapu e: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.”​—Philipi 4:6, 7.

Kua kiteaia teia i tei tupu i te au apotetoro a Iesu. Noatu i muri mai i to Iesu akamata anga i te Kaikai Anga Aiai a te Atu i tona po openga ma tana au apotetoro, te taumaro ra rai ratou e koai ia ratou tei akaraanga maataanga atu. (Luka 22:24-27) I tetai atu au atianga tukeke kua tauta ana a Iesu i te tauturu ia ratou kia akatano i to ratou au manako, inara ko teia tu tarere kua vai oonu rava i roto ia ratou. (Mareko 9:34-37; 10:35-45; Ioane 13:12-17) Inara, i te rauka anga ia ratou te vaerua tapu i tetai 50 au ra i muri mai te reira tauetono anga, kua taui to ratou tu. Kare oki e taumaro anga e koai te ka komono atu ia ratou i te tuatua anga ki te urupu maata te inangaro ra i te kite, tei putuputu mai i te reira ra o te Penetekote.​—Angaanga 2:14-21.

Kare rava e ngai no tetai tangata i te tutara atu ki rungao i te putuputuanga Kerititiano. Me ka akatikatika ratou i tetai manamanata no runga i te peritome, ko Iakobo, kare i te pipi i te taime o to Iesu matenga, kua akatere atu ki rungao i te reira uipaanga puapinga maata. Kare oki e akairo no te tauetono anga e koai te ka arataki i roto i te reira uipaanga a te pupu akaaere o te putuputuanga Kerititiano. Mei teaa tikai te taui mei te taime kua tarepoia te au apotetoro i te vaerua tarere! Ma te tauturu a te vaerua tapu, kua rauka ia ratou i te akamanako atu i te au apiianga a Iesu e kua rauka i te marama atu i te aiteanga o tana au apiianga.​—Ioane 14:26.

Ka aiteite katoa te reira no tatou. Ma te tauturu a te vaerua tapu, ka rauka ia tatou i te takore atu etai atu umuumu anga e vaira no te tarere atu ki tetai ke e kia tere atu i te ngere anga. Mari ra, ka rauka ia tatou te au o te manako tei akateitei i te manako pouroa. Te akapapu maira te Puka Tapu kia tatou e ko te tumu o te tarere kino, ko Satani te Tiaporo, kare e roa atu ana ka tapekaia, ka akangaroia. (Apokalupo 20:1-3) Te taumaro i rotopu i te au tangata tupu kare ia e tupu akaou. Ka tupu ainei ei totaiete ma te kore etai atu tereanga? Kare ia! Ka tu te au tangata ki te tu apa kore, kare na roto i etai tarere anga i rotopu ia ratou uaorai, inara na roto i te taangaanga anga i te atinga oko o Iesu kia ratou.​—1 Ioane 2:1, 2.

Ko Keinosuke, tei taikuia i mua ake, koia i tetai taime ra tei kite i te kaka i te puapinga o teianei ao na te okoanga i tetai rekoti no te maata o te motoka, kua akaparuparu iaia uaorai i te pae manako e te pae kopapa, inara i te openga iora kua akaruke aia i tana angaanga. “I teia taime, te ki nei toku oraanga i te rekareka tika tikai,” i tuatuaʼi aia. Kua rauka iaia i te kite e eaa ra te puapinga tika tikai i akairo i to Iesu oraanga. Te rauka nei iaia i te kite i te akaangaroi anga i roto i tetai ua atu apinga tana ka rauka i te rave i roto i te putuputuanga a te Atua i te ao nei. E no reira te akapapaia nei aia no te ao ou, i reira kare e tarere. Ka rauka katoa ia koe i te akara atu i teia totaiete ao ou na te atoroanga atu i tetai o te au Are Uipaanga Patireia i toou ngai e te taokotaianga atu ma te Au Kite o Iehova.

[Tutu i te kapi 7]

Ka rauka te au e te taokotai anga i te rekarekaia e te totaiete tangata i roto i ta te Atua ao ou