“No Ko ia Iehova ra te Tauturu Iaku”

Takaua e te Rekareka ua ra i Roto i ta Iehova Angaanga

“E MANGANUI matou te mataora ua ra noatu e kare matou i akaipoipo,” i karanga ai tetai vaine Kerititiano i Paniora. Eaa ra te tumu o tona rekareka ua anga? “E rekareka ana matou e kua rangatiraia mei te au apiapi e manganui e rauka ai ia matou i te tavini maata atu, i to tatou Atua, ko Iehova.”

Taua au manako ra te rotai ra ki ta te Tuatua a te Atua e akakite maira no runga i te tu takaua. I te uriurianga te apotetoro ko Paulo i te au mea te o maira no runga i te akaipoipo, kua oronga aia i teia kite pakari akauruia: “Teia taku tuatua ki te aronga takaua, te tane e te vaine: E mea meitaki ia ratou kia noo ua mei iaku katoa nei.” Ia Paulo kare oki aia i akaipoipo ana. Inara eaa tana tumu i oronga atu ei no te akamaroiroi anga i te tu takaua? Kua tou mai aia e te mavete ra te tangata akaipoipo ra, kareka te tangata me kore te vaine kare i akaipoipo ra te “akono ra ïa i ta te Atu.” (1 Korinetia 7:8, 32-34) Ko te tavini anga ia Iehova te apinga maata te maani ra tetai tangata takaua kia mataora e kia rekareka ua.

Tu Takaua ma Tetai Akakoroanga Ngateitei

Penei ka marama koreia te au tuatua a Paulo ki te au tu akonoanga te tuku maata ra i te akaketaketaanga ki runga i te akaipoipo e te utuutu anga i tetai pamiri. Inara, ia Iesu Karaiti​—kare uaorai i akaipoipo ana inara te mataora ua ra e te rekareka ua ra​—kua taiku mai i tetai akakoroanga ngateitei no te au Kerititiano te vai takaua ra. Kua karanga aia: “I akaeunuka oki tetai aronga ia ratou uaorai no te basileia o te ao ra. Ko te tika iaia kia āriki i teianei tuatua, nona ïa.”​—Mataio 19:12.

Tika rava atu ki taua au tuatua ra, e manganui tei kite mai e te akatika ra te tu takaua ia ratou i te tavini i te Atua ma te kore e arairaianga tei matauia ki te oraanga akaipoipo. (1 Korinetia 7:35) E au tauatini ua atu Kerititiano te mataora ra i te akamori ia Iehova ma te kore e tokorua akaipoipo, e te kite ra ratou i te rekareka i te tauturu maroiroi anga i tetai ke.a

E manganui te au Kerititiano kare i akaipoipo tei kite mai e kare te tu mataora e kitea ua ia ana e te au tangata akaipoipo e kare te tu maromaroa e kitea ua ia ana e te au tangata takaua katoatoa. I nga pupu roa ai, e kite mai ana tetai papaki i te mataora e pera katoa i te taitaia. Ko te tika, te akakite tika maira te Pipiria e te apai maira te akaipoipo i to te reira ‘pekapeka i te kopapa nei.’​—1 Korinetia 7:28.

Takaua no te Turanga

E manganui te vai takaua ua ra kare mei te mea e e ikianga ia mari ra no te au turanga. Penei te inangaro ra ratou i te pumaana, te akataeake anga, e te inangaro te kiteaia ra i roto tikai i te akanoonooanga no te akaipoipo. Inara, no tetai ke ra, penei no te pae o te moni, me kore tetai atu au akamanakoanga kare e rauka i teia taime nei i te akaipoipo. Tetai au Kerititiano​—manganui ia ratou e au tuaine pae vaerua akaperepere maata ra​—kua noo takaua ua no te mea kua pakari to ratou manako i te akono i te ako a te Pipiria kia akaipoipo “kia tau ra i te Atu.” (1 Korinetia 7:39) Te kimi tiratiratu ra ratou i tetai tokorua akaipoipo i roto anake ua i te aronga akamori papetitoia no Iehova.

I tetai au taime, e maromaroa ana tetai o teia au aronga nei. I muri mai i te akatika anga e e manako akapera ana aia, kua karanga mai tetai Kerititiano takaua e: “Kua kite matou i ta Iehova ture e kare roa matou e inangaro ana i te akamareka kore atu ia Iehova na roto i tetai ua atu tu. Penei te inangaro ra matou i te akataeake anga o tetai tokorua, inara noatu eia taime e tauta ana te au tangata i te ao nei i te ‘akapiri atu ia matou,’ ka vai ngaueue kore ua atu rai matou. Kare matou e inangaro atu ana i te piri kapiti atu ki te au tane e te au vaine kare i roto i te akarongo.” Ka tau taua au Kerititiano kia akameitakiia no te akono anga i te ako a te Pipiria e te tamou marie anga i te au turanga teitei no te tu akono tau e rauka ai i te akamareka ia Iehova noatu tetai ua atu taitaia ta ratou e kite maira i te pae manako.

Tauturu Takinga Meitaki a te Atua

Te tiratiratu ra a Iehova ki te aronga te akaari ra i to ratou tiratiratu kiaia i roto i te au mea aere mei te kopae anga i te akaipoipo i te au tangata kare e tavini ana iaia. Mei tona uaorai kite anga, kua rauka i te Ariki ko Davida i te akapapu mai: “I te tangata e aroa ua ra, e aroa ua katoa koe [Iehova].” (Salamo 18:25) E ki te aronga te akarongo tiratiratu ra iaia, te taputou ra te Atua: “Kare rava au e akaruke atu ia koe, kare oki au e taka ke ia koe, kare, kare rava atu.” (Ebera 13:5) I te aru anga ia Iehova, ka rauka ia tatou i te oronga aroa ua i te akameitakianga ki te au Kerititiano takaua katoatoa e tuketuke te au mataiti tei akamou tiratiratu ki te Tuatua a te Atua. Ka rauka katoa ia tatou i te pure kia akamaroiroi a Iehova ia ratou i te akono i to ratou au akaaoanga.​—Te Au Akava 11:30-40.

E manganui te au Kerititiano takaua tei kite mai e te piri tikai anga ki roto i te angaanga apii Pipiria te akamerengo ra i to ratou oraanga ma te puapinga. Ei akaraanga, e akamanako ana ia Patricia, e vaine kare i akaipoipo ana i roto i tona 30 e ara mataiti e e painia oki, me kore e orometua tamou. Kua karanga oki aia: “Noatu e te kite katoaia ra te au timataanga no te tu takaua, kua rauka te reira iaku i te atianga kia riro mai ei painia tamou. Mei te mea oki e tangata takaua ua au, ka rauka ngoie ua taku akapapaanga i te tauiia, ka rauka maata i reira te taime no te apii. Kua kite katoa mai au i te irinaki maata ki runga ia Iehova, i te au tuatau ngata tikai.”

Kua akatumuia taua au manakoanga ki runga i te taputou papu tikai a te Pipiria: “E uri atu i to aerenga ki runga ia Iehova; e irinaki iaia, e nana e akatupu i te reira.” (Salamo 37:5) E tikai, pouroa te aronga akamori tiratiratu no Iehova ra, tei akaipoipo me kore te vai takaua ua ra, ka kite mai i te pumaana e te maroiroi i roto i te au tuatua akauruia: “No ko ia Iehova ra te tauturu iaku.”​—Salamo 121:2.

[Tataanga Rikiriki i Raro]

[Tataanga i te kapi 9]

“Te tangata kare i akaipoipoia te manako ra aia i te au apinga a te Atu, e akapeea e raukai iaia te mareka anga o te Atu ra.”​—1 KORINETIA 7:32, NW.

[Pia i te kapi 8]

AKARIRO ANGA TE TU TAKAUA KIA PUAPINGA TIKAI

Ia Iesu, kare roa i akaipoipo ana, kua tuatua ei: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.”​—Ioane 4:34.

Te anau tamariki tamaine e a a Philipa kare i akaipoipo ana kua angaanga ua i te angaanga ‘totou anga.’​—Angaanga 21:8, 9.

Te au tuaine Kerititiano takaua te akakitekite ra i te karere Patireia e tuanga ia no tetai ‘nuku maata o te au vaine te akakitekite ra i te tuatua meitaki.’​—Salamo 68:11, NW.