Taangaanga Meitaki i Toou Oraanga Kare i Akaipoipo

‘E tika iaia kia āriki i teianei tuatua.’​—MATA. 19:12.

1, 2. (a) Eaa to Iesu, Paulo e tetai ke manako no te oraanga kare i akaipoipo? (e) Eaa ra tetai pae kare e manako ana i te oraanga kare i akaipoipo ei mea akaperepere?

PAPU e e apinga aroa akaperepere tikai te akaipoipo ki te au tangata ravarai no ko mai i te Atua. (Mase. 19:14) Inara, te mataora katoa ra te maataanga o te au Kerititiano kare i akaipoipo i tetai oraanga puapinga e te merengo tikai. Kua karanga a Harold e taeake e 95 ona mataiti kare rava i akaipoipo ana e: “Noatu e mataora ana au te kapiti ki tetai ke e te akaari i te takinga meitaki, kare ra au e maromaroa ana me ko au anake ua. Toku manako ka tau kia karangaia e tei iaku te turanga akaperepere kare i akaipoipo.”

² E tika, kua taiku a Iesu raua ko te apotetoro ko Paulo i te oraanga kare i akaipoipo, mei te akaipoipo rai, ei apinga aroa na te Atua. (E tatau ia Mataio 19:11, 12; 1 Korinetia 7:7.) Inara, ko te katoatoa kare i akaipoipo, kare i iki kia noo akapera ua. Tetai taime no te au turanga i ngata ei te kimi i tetai tokorua tau. Me kore muri ake te akaipoipo anga no te au mataiti, kua o atu tetai pae ki roto i te turanga ko ratou anake ua no te kopaeanga me kore kua mate to ratou tokorua. Teea tu i riro ei te oraanga kare i akaipoipo ei mea akaperepere? Akapeea ra te au Kerititiano me taangaanga meitaki i to ratou oraanga kare i akaipoipo?

Mea Akaperepere Puapinga Tikai

3. Eaa te au turanga puapinga te mataora nei te au Kerititiano kare i akaipoipo?

³ Maata atu te taime e te tu rangatira o te tangata kare i akaipoipo, i to te tangata kua akaipoipo. (1 Kori. 7:32-35) E au turanga puapinga tikai teia te ka rauka iaia kia akamaata atu i tana angaanga orometua, akamaora atu i te aroa ki tetai ke, e te akavaitata atu kia Iehova. Maata te au Kerititiano tei ariki rekareka i te au akameitakianga o te oraanga kare i akaipoipo e kua “āriki” i te reira no tetai tuatau. Kare tetai pae i parani ana kia noo ua kare i akaipoipo, te tauianga ra to ratou turanga, kua pure ratou ma te akamanako, e kua kite mai e ka tauturu a Iehova ia ratou kia mareka ua te ngakau. Kua ariki ratou te tauianga o te turanga e te oraanga kare i akaipoipo.​—1 Kori. 7:37, 38.

4. Eaa ra te au Kerititiano kare i akaipoipo i irinaki ei e te tavini ki katoa ra ratou i te Atua?

⁴ Kua kite te au Kerititiano kare i akaipoipo e kare ratou e anoanoia kia akaipoipo kia kitea mai e kia ariki rekarekaia mai e Iehova e tona akaaerenga. Te akamaora maira te Atua i tona aroa kia tatou tataki tai. (Mata. 10:29-31) Kare rava e tangata e tetai apinga, e akatakake ia tatou mei te aroa o te Atua. (Roma 8:38, 39) Me kua akaipoipo tatou me kare, e irinaki papu tikai tatou e te tavini ki katoa ra tatou i te Atua.

5. Eaa te anoanoia ra kia rauka te au akameitakianga maata no te kare i akaipoipo?

⁵ Mei te au tareni akatangi imene e te taemoemo rai, te oraanga kare i akaipoipo ka umuumuia kia taangaanga meitakiia e puapinga tikai ei. Akapeea te au Kerititiano kare i akaipoipo i teia tuatau me taangaanga meitaki i to ratou oraanga​—me e taeake, tuaine, mapu, pakarikari ake, tei iki kia kore e akaipoipo, me kore no te au turanga? Ka akamanako tatou i tetai au akaraanga akamaroiroi mei te putuputuanga Kerititiano mua e ta tatou ka kite mai mei te reira.

Oraanga Kare i Akaipoipo ei Mapu

6, 7. (a) Eaa te tikaanga ngateitei tei rauka i te au tamaine paretenia a Philipa no te tavinianga i te Atua? (e) Na teea au tu i taangaanga meitaki ei a Timoteo i tona mataiti kare i akaipoipo, akapeea aia te akameitakiia anga no te tavini puareinga anga ei mapu?

⁶ E a tamaine paretenia a Philipa e tangata apii evangeria, tei maroiroi mei to ratou metua tane rai i te angaanga evangeria. (Anga. 21:8, 9) Ko te totouanga tetai angaanga temeio a te vaerua tapu, e kua taangaanga teia au vaine mapu i te reira ei akatupu ia Ioela 2:28, 29.

⁷ E tamaiti mapu a Timoteo tei taangaanga meitaki i tona oraanga kare i akaipoipo. Mei tona tamariki anga kua apii tona metua vaine ko Eunike e tona tupuna vaine ko Loi iaia ki “te tuatua tapu i tataia ra.” (2 Timo. 1:5; 3:14, 15) Kua ariki ra raua i te Akonoanga Kerititiano i te tuatau o ta Paulo atoro mua anga i to raua oire ko Lusetera mei te mataiti 47 T.N. E rua mataiti i muri mai, penei e mapu ua a Timoteo me kore e 20 tuma ona mataiti te atoro atu anga a Paulo i te rua o te taime. Noatu te mapu ra e te ou ra rai aia i roto i te tuatua mou, kua ‘ripoti meitaki’ te aronga pakari Kerititiano i Lusetera e te au tangata i Ikonio no runga iaia. (Anga. 16:1, 2) No reira kua pati atu a Paulo ia Timoteo kia riro ei oa mitinari nona. (1 Timo. 1:18; 4:14) Kare i papu ia tatou me kua akaipoipo a Timoteo. Kua kite ra tatou e i tona mapu anga kua ariki rekareka aia i te patianga a Paulo, e no te au mataiti i muri mai, kua tavini mataora aia ei mitinari e ei akaaere kare i akaipoipo.​—Phili. 2:20-22.

8. Eaa tei tauturu ia Ioane Mareko kia aruaru i te au akakoroanga tuatua mou, e eaa te au akameitakianga tei rauka iaia?

⁸ Tona mapu anga, kua taangaanga meitaki a Ioane Mareko i tona au mataiti kare i akaipoipo. E au mema mua ratou ko tona metua vaine ko Maria, e tona katini ko Banaba no te putuputuanga o Ierusalema. Oraanga meitaki katoa to te pamiri o Mareko no te mea e kainga e e tavini to ratou i te oire. (Anga. 12:12, 13) Noatu teia au turanga meitaki, kare te tangata mapu ko Mareko i manako noinoi e i manako maata iaia uaorai; kare katoa aia i mareka ua i te noo e tai ngai e te aruaru i te oraanga puapinga. Tona pirianga mua ki te au apotetoro kua akatupu i te inangaro kia tavini ei mitinari. No reira kua piri mataora atu aia kia Paulo raua ko Banaba ki to raua tere mitinari mua ei tavini tauturu. (Anga. 13:5) Muri mai, kua teretere atu raua ko Banaba, muri katoa mai, kua tavini kapiti raua ko Petero i Babulonia. (Anga. 15:39; 1 Pete. 5:13) Kare tatou i kite eaa te roa to Mareko noo anga kare i akaipoipo. Inara, e rongo meitaki tona no te tavini puareinga i tetai ke e te rave maata anga i te angaanga a te Atua.

9, 10. Eaa te au ikianga i teia tuatau no te au mapu Kerititiano kare i akaipoipo kia akamaata atu i ta ratou angaanga orometua? Oronga mai tetai akaraanga.

⁹ Maata te au mapu o te putuputuanga i teia tuatau e taangaanga mataora ra i to ratou mataiti kare i akaipoipo kia akamaata atu i ta ratou tuanga i roto i te angaanga a te Atua. Mei ia Mareko e Timoteo, te rekareka ra e te akatika ra ratou i te oraanga kare i akaipoipo ‘kia akono i ta te Atu ma te iroirongata kore.’ (1 Kori. 7:35) E turanga meitaki tikai teia. Maata te au ikianga​—painia, tavini i te ngai anoano maataia te aronga tutuanga Patireia, apii i te reo ke, tauturu i te akatu i te Are Uipaanga Patireia me kore te opati manga, te aere anga ki te Apii Terenianga Orometua e te tavinianga i Betela. Me te mapu ra rai koe e kare i akaipoipo, te taangaanga meitaki ra ainei koe i taau ikianga?

¹⁰ Kua akamata tetai taeake ko Mareko i te painia i tona mapu anga, kua aere aia ki te Apii Terenianga Orometua, e kua tavini ana i te au ngai tukeke takapini teianei ao. Akamanakoanga i te tavini anga e 25 mataiti, kua karanga aia e: “Kua tauta au i te akamaroiroi i te katoatoa i roto i te putuputuanga, te kapitianga kia ratou i roto i te angaanga orometua, atoroanga ia ratou, patianga ia ratou ki te kainga no te kaikai, e te akanooanga i te au tamataora akamaroiroi. Mataora tikai au te rave i teia au mea.” Mei ta Mareko rai i tuatua, maata atu te mataora o te oraanga me oronga atu, e ka oronga mai te angaanga tamou te au atianga no te oronga anga ki tetai ke. (Anga. 20:35) Noatu eaa toou au inangaro, tu karape, e tei tupu mai i roto i te oraanga, maata te angaanga a te Atua ta te au mapu i teia tuatau ka rave.​—1 Kori. 15:58.

11. Eaa tetai au akameitakianga no te kore e rapurapu i te akaipoipo?

¹¹ E tika, maata te mapu e inangaro ra i te akaipoipo, e au tumu meitaki ra tetai kia kore e rapurapu i te akaipoipo. Akamaroiroi maira a Paulo i te au mapu kia tiaki “kia pakari” mai ratou kare te tuatau inangaro ainga e ririnui ana. (1 Kori. 7:36) Ka anoanoia te tuatau kia marama koe ia koe uaorai, e kia kite eaa te tupu ra i roto i te oraanga, kia rauka te iki i tetai tokorua tau. E ikianga puapinga tikai te tia akaipoipo, e ka vai e mutu kore ua atu.​—Kohe. 5:2-5.

Noo ua Kare i Akaipoipo i Muri Mai

12. (a) Akapeea te vaine takaua ko Ana te akakoromaki anga i tona turanga? (e) Eaa te tikaanga ngateitei tei rauka iaia?

¹² Kua maromaroa tikai a Ana, tei taikuia i roto i te Evangeria a Luka, te mate poitirere anga tana tane e itu mataiti te akaipoipo anga. Kare tatou i kite me e tamariki ta raua, me kore me kua manako ana aia i te akaipoipo akaou. Inara, kua akakite mai te Pipiria e e vaine takaua a Ana i tona 84 mataiti. Mei ta te Pipiria e tuatua ra, ka ariki tatou e kua taangaanga a Ana i tona au turanga tei taui, i te akavaitata atu ki te Atua. “Kare rava aia i akaruke i te iero, e tika ra i te akamori anga i te Atua, ma te pure e te akakoreanga kai i te po e te ao.” (Luka 2:36, 37) No reira, te mea puapinga roa atu kiaia, tana akamorianga i te Atua. Pakari tikai te aruaruanga e te tautaanga, e kua akameitaki maataia mai aia. Kua rauka iaia te tikaanga ngateitei te kite i te tamaiti mapu ko Iesu, e kua akakitekite aia ki tetai ke i te akaoraanga kare e roa atu ana na roto i te Mesia.​—Luka 2:38.

13. (a) Eaa te akakite maira e kua piri maroiroi a Doreka ki te putuputuanga? (e) Akapeea a Doreka te akameitakiia anga no tona tu meitaki e te takinga meitaki?

¹³ Te noo ra tetai vaine ko Doreka, me kore ko Tabita, i te oire ko Iopa e uapu taito i te tua tokerau opunga o Ierusalema. Kare te Pipiria i taiku mai i te tane, papu e kare aia i akaipoipo i taua taime ra. “Kua ki oki taua vaine ra [a Doreka] i te angaanga meitaki tana i rave ra, e te oronga oki i te apinga.” Maata tana au kakau i maani no te au vaine takaua e tetai ke, e kua akaperepere tikai ratou iaia. No reira, te maki e te mate poitirere anga aia, kua pati atu te putuputuanga katoa ia Petero kia akatu akaou mai i to ratou tuaine akaperepere. Totoa anga te nuti no tona tuakaouanga na roto ia Iopa, maata tei riro mai ei aronga irinaki. (Anga. 9:36-42) Na roto i tana au angaanga meitaki, penei kua tauturu ana a Doreka i tetai pae ia ratou.

14. Eaa te akakeu ra i te au Kerititiano kare i akaipoipo kia akavaitata atu kia Iehova?

¹⁴ Mei ia Ana e Doreka, maata i roto i te putuputuanga i teia tuatau tei noo ua kare i akaipoipo i muri mai. Kare tetai pae i kite mai i tetai tokorua akaipoipo tau. Kua kopae tetai pae me kore kua riro ei takaua. No te kare e tokorua akaipoipo ei uriuri manako, kua irinaki maata atu te au Kerititiano kare i akaipoipo kia Iehova. (Mase. 16:3) Kua kite mai a Silvia e tuaine kare i akaipoipo, tei tavini ana i Betela e 38 tuma mataiti i teia ei akameitakianga. “E roiroi ana au tetai taime te tauta kia maroiroi ua rai,” i akakite ei aia. “Kua manako mai au e, ‘Naai ra e akamaroiroi mai iaku?’” Kua tuatua katoa aia e: “Te irinaki anga e kua kite meitaki a Iehova i taku ka anoano, kua tauturu iaku kia akavaitata atu kiaia. E aere mai ana te akamaroiroi anga tetai taime, mei te au ngai tapapa koreia.” Me akavaitata atu tatou kia Iehova, ka ariu ua mai aia na roto i te tu maru e te papu tikai.

15. Akapeea te au Kerititiano kare i akaipoipo me ‘akamaora’ i to ratou aroa?

¹⁵ Te oronga maira te oraanga kare i akaipoipo i te atianga puapinga ‘kia akamaora atu’ i te aroa. (E tatau ia 2 Korinetia 6:11-13.) Kua tuatua a Jolene, e tuaine kare i akaipoipo tei tavini tamou ana e 34 mataiti e: “Kua tauta pakari au i te akatupu i te au pirianga vaitata, kare ki toku uki ua, mari ra ki te tangata ravarai. E atianga meitaki te oraanga kare i akaipoipo kia oronga kia Iehova, toou pamiri, toou au taeake e te au tuaine, e ki toou au tangata tupu. Iaku e pakari atura, maata atu toku mataora i toku oraanga kare i akaipoipo.” Te ariki rekareka nei te aronga pakarikari, makimaki, au metua okotai, au mapu, e tetai atu i roto i te putuputuanga i te turuturu puareinga a te aronga kare i akaipoipo. Tika rai, me akaari tatou i te aroa ki tetai ke, ka mataora tatou. Ka rauka ainei ia koe te ‘akamaora atu’ i toou aroa ki tetai ke?

Noo ua Kare e Akaipoipo

16. (a) Eaa a Iesu i noo ua ai kare i akaipoipo? (e) Akapeea a Paulo te taangaanga meitaki anga i tona oraanga kare i akaipoipo?

¹⁶ Kare a Iesu i akaipoipo ana; kua akapapa e kua rave tamou aia i tana angaanga orometua. Maata tana ngai i aaere, te angaanga anga mei te mamaiata e po ua atu, e i te openga kua akaatinga i tona uaorai oraanga. Kua tauturu tona oraanga kare i akaipoipo kia akatupu meitaki aia i tana angaanga. Tauatini ua atu maire te aere anga te apotetoro ko Paulo e te aro atu anga i te au turanga ngata tikai i roto i te angaanga orometua. (2 Kori. 11:23-27) Penei kua akaipoipo ana aia i mua ana, kua iki ra a Paulo i te noo ua kare i akaipoipo te ikiia anga aia ei apotetoro. (1 Kori. 7:7; 9:5) No te angaanga orometua, kua akamaroiroi a Iesu raua ko Paulo i tetai ke kia aru i to raua akaraanga i te ngai ka rauka. Noatu ra, kare raua i akanoo i te oraanga kare i akaipoipo ei umuumuanga no te au tavini.​—1 Timo. 4:1-3.

17. Akapeea tetai pae te aruanga i te akaraanga o Iesu raua ko Paulo, eaa i papu ei ia tatou te ariki rekareka ra a Iehova i tei rave i taua au atinga ra?

¹⁷ Kua iki katoa tetai pae i teia tuatau kia noo ua kare e akaipoipo kia aruaru meitaki i ta ratou angaanga orometua. Kua mataora tikai a Harold, tei taikuia i mua ana, te tavini i Betela e 56 tuma mataiti. “Taeanga ki te tai ngauru mataiti o toku tavinianga i Betela,” i tuatua ai aia, “maata te au tokorua akaipoipo taku i kite kua akaruke ia Betela no te maki me kore no te akono i te au metua pakarikari. Kua mate toku nga metua. Inara, no toku inangaro maata i te Betela kare au i inangaro kia ngere au i taua akameitakianga na te akaipoipoanga.” Te au mataiti i topa, kua akakite katoa a Margaret tei painia ana no te tuatau roa e: “Kua rauka ana tetai au atianga noku kia akaipoipo, inara kare oku manako no te akaipoipo. Kua taangaanga au i taua au tuatau kare i akaipoipo kia maata te angaanga orometua, e kua mataora tikai au.” Papu kare rava e ngaropoina ia Iehova tetai ua atu tei akaatinga puareinga iaia no te akamorianga mou.​—E tatau ia Isaia 56:4, 5.

Taangaanga Meitaki i Toou Au Turanga

18. Akapeea tetai pae me akamaroiroi e me turuturu i te au Kerititiano kare i akaipoipo?

¹⁸ Te au Kerititiano katoatoa kare i akaipoipo te rave maroiroi ra i te tavini ia Iehova, te tau ra kia akameitaki e kia akamaroiroi tatou ia ratou. Inangaro maata tatou ia ratou no to ratou tu e no ta ratou turuturu anga puapinga i te putuputuanga. Kare rava ratou e maromaroa me riro tikai tatou ei ‘au taeake, au tuaine, metua tane, metua vaine, e te tamariki’ no ratou.​—E tatau ia Mareko 10:28-30.

19. Eaa taau ka rave ei taangaanga meitaki i toou oraanga kare i akaipoipo?

¹⁹ Me kare koe i akaipoipo me kore no te au turanga, kia riro teia au Tuatua Tapu e te au akaraanga o teia tuatau ei akapapu anga kia koe e ka mataora e ka puapingaia toou oraanga. E tapapaia ana tetai au apinga aroa, kare ra tetai pae. E ariki rekareka vaveia ana tetai pae, tetai pae ra e akaperepereia ana i muri roa mai. Tei runga ra te reira i to tatou tu. Eaa taau ka rave ei taangaanga meitaki i toou oraanga kare i akaipoipo? Akavaitata atu kia Iehova, kia maata te rave anga i te angaanga a te Atua, e kia akamaora atu i toou aroa no tetai ke. Mei te akaipoipo rai, e akameitakianga te oraanga kare i akaipoipo me akamanako tatou i te reira kia tau ki to te Atua manako, e kia taangaanga meitaki i teia apinga aroa akaperepere.

Maara Ainei ia Koe?

• Na teea au tu i riro ei te oraanga kare i akaipoipo ei mea akaperepere?

• Akapeea te oraanga kare i akaipoipo i riro ei ei akameitakianga i te mapu anga?

• Eaa te au ikianga ka rauka i te au Kerititiano kare i akaipoipo kia akavaitata atu kia Iehova e kia akamaora atu i te aroa?

[Au Tutu i te kapi 18]

Taangaanga meitaki ra ainei koe i taau au ikianga i roto i te angaanga a te Atua?