“E Akara Matariki ia Kotou Uaorai”

“E kimi matatio ia kotou uaorai i to kotou akarongo; e akara matariki ia kotou uaorai.”​—2 KORINETIA 13:5.

1, 2. (a) Akapeea te tu papu kore no runga i to tatou au irinakianga i te akakeu anga ia tatou? (e) Eaa te turanga i Korinetia i te anere mataiti mua penei tei akatupu i te ekoko ki tetai pae e ka na teea mataara te aaere anga?

KUA tae atu tetai tangata e aere ra na te tua o te enua ki tetai ngai manga o te mataara. No te papu kore e teea te mataara ki te ngai e akakoro ra aia, kua pati atu aia ki tetai tangata e aere ra no tetai aratakianga inara e tuke rai te akakiteanga i rauka mai. No te taka kore, kare i rauka iaia i te aere ua atu. Ka akatupu katoa te au tu ekoko no runga i to tatou irinakianga i tetai tu mei teia kia tatou. Ka tamanamanata taua tu papu kore ra i to tatou tu kite i te rave i te au ikianga, i te akatupu anga i te ekoko kia tatou e na teea mataara te aaere.

² Kua tupu tetai turanga penei tei akakeu i taua tu ra ki tetai au tangata i roto i te putuputuanga Kerititiano i te anere mataiti mua i Korinetia, i Ereni. Kua akaao te “au aposetolo mamaata” i te mana o te apotetoro ko Paulo, i te karanga anga e: “E mea teimaa tana leta e te maroiroi, kareka te tu o tona kopapa, e mea apikepike, e te reo tarevakaua.” (2 Korinetia 10:7-12; 11:5, 6) Penei kua akatupu taua tu manako ra i te ekoko ki tetai pae i roto i te putuputuanga i Korinetia e ka akapeea te aaere anga.

3, 4. No teaa te akoanga a Paulo ki to Korinetia ka tau ei ei manakoanga na tatou?

³ Kua akatumu a Paulo i te putuputuanga i Korinetia i tona aere anga ki reira i te 50 T.N. Kua noo aia ki Korinetia “okotai mataiti e e ono marama, i te apii anga i te tuatua a te Atua ki o ratou ra.” E tikai oki e, “e manganui katoa to Korinetia i kite, kua akarongo, e bapetizoia iora.” (Angaanga 18:5-11) Te manako oonu ra a Paulo i te oraanga o te au taeake akarongo i Korinetia. Pera katoa, kua tata atu to Korinetia kia Paulo no tetai tauturu no runga i tetai au mea. (1 Korinetia 7:1) I na kua oronga atu aia i te akoanga meitaki tikai kia ratou.

⁴ “E kimi matatio ia kotou uaorai i to kotou akarongo,” i tata atu ai a Paulo, “e akara matariki ia kotou uaorai.” (2 Korinetia 13:5) Kua riro te taangaanga anga i teia akoanga ei paruru i te au taeake i Korinetia mei te tu papu kore e ka na teea mataara te aaere anga. Ka akapera katoa te reira ia tatou i teia tuatau. Akapeea, i reira, tatou i te aru anga i te akoanga a Paulo? Akapeea tatou i te kimi matatio anga ia tatou uaorai i to tatou akarongo? E eaa te o maira ki te akara matatio anga ia tatou uaorai?

“E Kimi Matatio ia Kotou Uaorai i to Kotou Akarongo”

5, 6. Eaa to tatou turanga no te kimi matatio anga ia tatou uaorai i to tatou akarongo, e no teaa te reira turanga i riro ei ei mea tau tikai?

⁵ I teia mea e kimi matatio, tei matauia e tangata me kore e apinga te ka kimi matatioia, e e vaito me kore e turanga tetai no te kimi matatio anga. I roto ra i teia tu, kare ko te akarongo te apinga e kimi matatioia ra​—te au irinakianga ta tatou i ariki. Ko tatou ei au tangata tataki tai taua apinga ra. E turanga apa kore tikai to tatou, no te rave anga i te kimi matatio. Te akakite ra tetai imene tei atuia e te tata taramo ko Davida: “Ko te ture a Iehova kare e apa, i te akaariu anga i te vaerua; te tuatua-akakite a Iehova, e mea mou ïa, e pakari ei te kamakura. Te akonoanga a Iehova, e mea tika ïa, e rekarekaʼi te ngakau; te akauenga a Iehova, e mea viivii kore ïa, e maramaʼi te mata nei.” (Salamo 19:7, 8) Tei roto i te Pipiria ta Iehova au ture apa kore e tana au akonoanga tika, tana au tuatua akakite mou e te au akauenga viivii kore. Ko te karere i roto i reira te turanga tau tikai no te kimi matatio anga.

⁶ No runga i taua karere akauruia ra a te Atua, te karanga ra te apotetoro ko Paulo: “E mea ora oki te tuatua a te Atua, e te ririnui, e kokoi maata oki to te reira i to te koke matarua ra, e te koputa mama takiri anga oki e taka ke ua atu te vaerua e te ngakau, e te paunga e te uo ivi ra; e te akara matariki oki i te manako e te vananga o te ngakau ra.” (Ebera 4:12) Ae, ka rauka i te Tuatua a te Atua i te kimi matatio i to tatou ngakau​—e eaa tikai to tatou tu i roto. Akapeea ra tatou i te taangaanga anga i teia karere kokoi maata e te ririnui ei puapinga no tatou? Kare roa te tata taramo i ekoko ana e eaa te anoanoia maira no teia. Kua imene aia: “E ao to te tangata . . . tei inangaro ra i te ture a Iehova; e tei tana ture tona manako anga i te po e te ao.” (Salamo 1:1, 2) Ka kiteaia “te ture a Iehova” ki roto i te Tuatua a te Atua i tataia, koia oki te Pipiria. Kia rekareka tatou i te tatau anga i te Tuatua a Iehova. E tika rai e, kia akataka tatou i tetai taime no te tatau ma te akamanako anga i te reira, me kore kia eumiumi i te reira. Ia tatou e rave ra i teia, ka anoanoia tatou kia akatuera ia tatou uaorai​—te tangata e kimi matatio ra​—ki tei tataia i reira.

7. Eaa te mataara maata roa atu no te kimi matatio anga ia tatou uaorai i to tatou akarongo?

⁷ Ko te mataara maata roa atu i reira, no te kimi matatio anga ia tatou uaorai i to tatou akarongo, koia oki kia tatau e kia eumiumi no runga i te Tuatua a te Atua e te akara matatio me te rotai ra to tatou tu ki ta tatou e apii ra. Kia rekareka tatou e e maata tikai to tatou tauturu kia marama i te Tuatua a te Atua.

8. Akapeea te au puka a “te tavini akono meitaki e te pakari” i te tauturu anga ia tatou kia kimi matatio ia tatou uaorai i to tatou akarongo?

⁸ Kua oronga mai a Iehova i te au apiianga e te ikuikuanga na roto i te au puka a “te tavini akono meitaki e te pakari,” i te akamarama mai i te au Tuatua Tapu. (Mataio 24:45) Ei akaraanga, e akamanako ana i te pia “Au Uianga Akamanako Anga” i te openga o te maataanga o te au pene i roto i te puka Akavaitata Atu kia Iehova.a E au tuatau meitaki tikai ta teia tuanga o te puka e oronga maira no te manakonako uaorai! E manganui te au tumu manako i roto i ta tatou au tianara, Te Punanga Tiaki e te Awake!, te ka tauturu katoa ia tatou kia kimi matatio ia tatou uaorai i to tatou akarongo. No te au atikara no runga i te puka o Maseli i roto i Te Punanga Tiaki, kua akakite tetai vaine Kerititiano: “Kiaku e tau tikai teia au atikara. Kua tauturu te reira iaku kia akara matatio e me te rotai tikai ra taku tuatua, taku peu, e toku tu ki to Iehova au turanga tuatua tika.”

9, 10. Eaa ta Iehova au apinga i oronga mai ei tauturu ia tatou kia kimi matatio ia tatou uaorai i to tatou akarongo?

⁹ E maata katoa te aratakianga e te akamaroiroianga e rauka maira ia tatou i ko i te au uipaanga a te putuputuanga, te au akaputuputuanga, e te au uruoaanga. Tei roto teia i te au apinga pae vaerua ta te Atua e oronga maira no te aronga ta Isaia e totou maira: “E riro kia tae ki te au rā openga ra, e akatinamouiaʼi te maunga ra o te are o Iehova ki runga i te take o te au maunga ra; e akateiteiia ïa ki rungao i te au tuaivi ra; e putuputu ua mairai te au etene katoa ra ki reira. E manganui te tangata e aere ma te tuatua e, Aere mai, ka aere tatou ki runga i te maunga o Iehova, . . . e nana e apii mai ia tatou i tona au aerenga; e ka aere tatou na tona ra au arataa.” (Isaia 2:2, 3) E akameitakianga tikai kia apiiia no runga i to Iehova au arataa.

¹⁰ Auraka e akangaropoina i te akoanga a te aronga tei tau te tu i te pae vaerua, tei kapiti mai i te aronga pakari Kerititiano. No runga ia ratou, te karanga maira te Pipiria: “E te au taeake, noatu e ka rave tetai tangata i te takainga tarevake i mua ake ka kite ei aia, ko kotou ko te aronga e tu tau to kotou i te pae vaerua e tauta i te akatikatika i taua tangata ra i te vaerua maru, ma te matakite ia kotou, ko te timataia mai aea kotou.” (Galatia 6:1, NW) Mei teaa ra to tatou rekareka no teia apinga oronga ua ei akatikatika ia tatou!

11. Eaa te ka o mai i te kimi matatio anga ia tatou uaorai i to tatou akarongo?

¹¹ Ta tatou au puka, au uipaanga Kerititiano, au tangata akamanaia​—e au apinga oronga meitaki tikai teia no ko mai ia Iehova. Inara, i te kimi matatio anga ia tatou uaorai i to tatou akarongo, ka o mai te akara matatio anga uaorai ia tatou. No reira me tatau tatou i ta tatou au puka me kore me akarongo ki te akoanga Tuatua Tapu, ka anoanoia tatou kia ui kia tatou uaorai e: ‘Te akataka maira ainei teia iaku? Te rave ra ainei au i teia? Te akarongo ra ainei au ki te au irinakianga Kerititiano?’ To tatou tu ki te akakiteanga e rauka maira ia tatou na roto i teia au apinga oronga ua nei e akakeuanga katoa ta te reira ki runga i to tatou turanga pae vaerua. ‘Kare ra te tangata e akono i ta te kopapa nei e āriki mai i ta te vaerua e te Atua ra: e mea neneva ïa iaia,’ e karanga maira te Pipiria. ‘Kareka ko tei akono i ta te vaerua ra, te kite ra aia i te au mea katoa.’ (1 Korinetia 2:14, 15) Kare ainei i te mea tau kia tauta tatou i te akono marie i te tu rekareka pae vaerua, no ta tatou e tatau ra i roto i ta tatou au puka, au makatini, e etai atu au puka e no ta tatou e akarongo ra i ko i ta tatou au uipaanga e mei ko i te aronga pakari?

“E Akara Matariki ia Kotou Uaorai”

12. Eaa te o maira i te akara matariki anga ia tatou uaorai?

¹² Ko te akara matariki ia tatou uaorai ka o mai te akara meitaki anga ia tatou uaorai. Ae, penei tei roto tatou i te tuatua mou, inara eaa ra te tu tikai o to tatou turanga pae vaerua? Ko te akara matariki anga i to tatou tu ka o mai te oronga anga i te akapapuanga no te tu pakari e te arikianga rekareka no te au apinga oronga ua i te pae vaerua.

13. Kia tau kia Ebera 5:14 (NW), eaa te ka riro ei akapapuanga tikai no to tatou tu pakari?

¹³ Eaa te akapapuanga tikai no te tu pakari Kerititiano ta tatou ka akara i roto ia tatou uaorai? Kua tata te apotetoro ko Paulo: “Inara ko te kai maro na te aronga pakari ia, na te aronga tei taangaanga i rauka ai to ratou kite ngakau kia tereniia i te kite i te tika e te tarevake.” (Ebera 5:14, NW) Ka oronga tatou i te akapapuanga tikai no te tu pakari na te tereni anga i to tatou kite ngakau. Mei te au uaua kopapa o te tangata tarekareka e anoanoia ra kia tereniia na roto i te taangaanga putuputu anga i te reira i mua ake ka tau meitaki ei aia no tana tarekareka, kia tereniia to tatou kite ngakau na roto i te taangaanga anga i te au kaveinga o te Pipiria.

14, 15. No teaa i tau ei kia tauta pakari atu rai tatou i te apii i te au apinga oonu no te Tuatua a te Atua?

¹⁴ Inara, i mua ake ka tereni ei tatou i to tatou kite ngakau, ka anoanoia kia rauka mai ia tatou te kite. No teia, e mea puapinga kia apii maroiroi tatou uaorai. Me rave putuputu tatou i te apiianga na tatou uaorai​—i te au apinga oonu tikai o te Tuatua a te Atua​—ka maata roa atu to tatou kite ngakau. I te au mataiti i aereia mai ana, e manganui te au tumu manako tei uriuriia i roto i Te Punanga Tiaki. E akapeea ana tatou me kite tatou i te au atikara e uriuri ra i te au tuatua mou oonu? Ka kopae ainei tatou i te reira no te mea ua ra e “e mea kimingata oki”? (2 Petero 3:16) I tetai tua ra, kia tauta pakari atu rai tatou kia marama i te mea e tuatuaia maira.​—Ephesia 3:18.

¹⁵ Akapeea me te ngata ra i te rave i te apiianga na tatou uaorai? E mea puapinga kia tauta tatou kia rauka me kore kia akatupu i te kaki no te reira.b (1 Petero 2:2) Kia tupu ki te pakarianga ka anoanoia kia rauka mai ia tatou te meitaki mei roto i te kai pakari, te au tuatua mou oonu o te Tuatua a te Atua. Me kare, ka meangiti ua rai to tatou kite ngakau ka rauka mai. Inara, i te akapapu anga tikai i te tu pakari, e maata atu te ka o mai i to te kite ngakau ua. I te au ra o te oraanga ka anoanoia tatou kia taangaanga i te kite tei rauka mai ia tatou na roto i te apiianga maroiroi uaorai.

16, 17. Eaa te akoanga ta te pipi ko Iakobo i oronga mai no runga i te riro mai anga ei ‘tangata rave i te tuatua’?

¹⁶ Ka kitea katoaia te akapapuanga tikai ia tatou uaorai i roto i ta tatou akaarianga i te arikianga rekareka no te tuatua mou​—ta tatou au angaanga akarongo. I te rave anga i tetai akatutuanga ririnui i te akataka i teia tuanga o te akara meitaki anga ia tatou uaorai, kua karanga te apotetoro ko Iakobo: “Ei aronga rave oki kotou i te tuatua nei, auraka ei aronga akarongo ua, i te pikikaa ua anga ia kotou uaorai. Ko te tangata oki e akarongo ua i te tuatua, e kare aia i rave, e tau aia i te tangata e akara ua i tona uaorai mata ki roto i te io ra: Te akara ra aia iaia uaorai, e aere atura, ngaropoina ua iora tona tu iaia uaorai i reira ra. Ko te akara ra ki roto i te ture tika rava o te rangatira ra, ma te tamou tikai, no te mea kare aia i te tangata akangaropoina ua i te tuatua kia akarongo, e tangata rave ra aia i taua angaanga ra, e akameitakiia ïa aia i te rave anga.”​—Iakobo 1:22-25.

¹⁷ Te karanga ra a Iakobo e: ‘Akara ki roto i te io o te tuatua a te Atua, e ka akara meitaki ei ia koe uaorai. Tamou tikai i te rave i teia, e ka tirotiro matatio ei ia koe uaorai ki te marama o te tuatua a te Atua taau i kite. E oti, auraka e akangaropoina viviki ua i taau i kite. E rave i te au akatikatikaanga ka anoanoia.’ Penei ka ngata te aru anga i teia akoanga i tetai au taime.

18. No teaa ra te aru anga i te akoanga a Iakobo i riro ei ei mea ngata?

¹⁸ Ka akamanako ana, ei akaraanga, i te umuumuanga kia piri ki te angaanga tutuanga o te Patireia. “Ki te ngakau ra te taangaanga ra te tangata i te akarongo no te tuatua tika,” i tata ai a Paulo, “kareka te vaa ra ko tei akakite ia ki te katoatoa i te ora.” (Roma 10:10, NW) E maata te au akatikatikaanga ka anoanoia no te akakite anga i te ora ki to tatou vaa. Kare te rave anga i te angaanga tutuanga e tupu natura ua mai ki te maataanga ia tatou. Kia riro ei aronga maroiroi e te tuku anga i te angaanga tutuanga ki te ngai mua i roto i to tatou oraanga e maata te au tauianga e te au akaatingaanga ka anoanoia. (Mataio 6:33) Inara me riro ana tatou ei aronga rave i teia angaanga na te Atua, ka mataora tatou no te akameitakianga ta te reira ka apai mai kia Iehova. No reira, e aronga akakitekite maroiroi ainei tatou, no te Patireia?

19. Eaa te o maira ki roto i ta tatou angaanga o te akarongo?

¹⁹ Eaa te maata ka o mai ki ta tatou angaanga o te akarongo? Kua akakite a Paulo: “I te au mea oki ta kotou i kite ra, ta kotou i āriki, ta kotou i akarongo, e ta kotou i kite mai iaku ra, ka rave ïa: e e noo te Atua au ra ki o kotou.” (Philipi 4:9) Te akapapu ra tatou ia tatou uaorai na te rave anga i ta tatou i kite, i ariki, i akarongo, e i kite ana​—te katoaanga o te akatapuanga Kerititiano e te riro anga ei pipi. “Teia te ara, e na reira te aere,” kua ikuiku atura a Iehova na roto i te peroveta ko Isaia.​—Isaia 30:21.

20. Eaa te au tu tangata e riro ra ei akameitakianga maata ki te putuputuanga?

²⁰ Te au tane e te au vaine tei riro ei aronga apii maroiroi i te Tuatua a te Atua, ei aronga tutu maroiroi i te tuatua meitaki, ei aronga apa kore i to ratou tu tiratiratu, e ei au tangata turuturu tiratiratu i te Patireia kua riro mai ei akameitakianga maata tikai ki te putuputuanga. Kua riro ratou ei akaketaketa i te putuputuanga e piri ra ratou. Kua riro ratou ei tauturu maata, no te mea e maata tikai oki te aronga ou ka akonoia. Me tamou ngakau tatou i te akoanga a Paulo ‘kia kimi matatio ia tatou uaorai i to tatou akarongo; e akara matariki ia tatou uaorai,’ ka riro katoa tatou ei akakeuanga meitaki ki etai ke.

Kia Rekareka i te Rave Anga i te Anoano o te Atua

21, 22. Akapeea tatou i te rekareka anga i te rave i te anoano o te Atua?

²¹ “E mea [“rekareka,” NW] naku i te rave i toou anoano, e taku Atua,” i imene ei te Ariki ko Davida o Iseraela i taito, “te vai nei oki taau ture tei roto i toku nei ngakau.” (Salamo 40:8) E mea rekareka roa na Davida i te rave i te anoano o te Atua. No teaa ra? No te mea ko te ture a Iehova tei roto ia i te ngakau o Davida. Kare roa a Davida i ekoko ana e na teea mataara te aaere.

²² Me vai te tuatua a te Atua ki roto i to tatou ngakau, kare roa tatou e ekoko e na teea mataara te aaere. Ka rekareka roa tatou i te rave i te anoano o te Atua. Ma te maroiroi maata, i reira, ‘e uapou ua atu tatou uaorai’ ia tatou e tavini ra ia Iehova ma te ngakau katoa.​—Luka 13:24.

[Au Tataanga Rikiriki i Raro]

Maara Ainei ia Koe?

• Akapeea tatou i te kimi matatio anga ia tatou uaorai i to tatou akarongo?

• Eaa te o maira ki te akara matariki anga ia tatou uaorai?

• Eaa te akapapuanga ta tatou ka oronga no te tu pakari Kerititiano?

• Akapeea ta tatou au angaanga no te akarongo i te tauturu anga ia tatou kia akara meitaki ia tatou uaorai?

[Tutu i te kapi 23]

Kua kite ainei koe i te mataara maata roa atu i te kimi matatio anga ia tatou uaorai i to tatou akarongo?

[Tutu i te kapi 24]

Ka oronga tatou i te akapapuanga no to tatou tu pakari Kerititiano na te taangaanga anga i to tatou kite ngakau

[Au Tutu i te kapi 25]

Ka akapapu tatou ia tatou uaorai na te riro anga mai ‘kare i te tangata akangaropoina ua i te tuatua kia akarongo, e tangata rave ra aia i taua angaanga ra’