Tua Oraanga

Akakoromaki Marie Anga Ei Toa no Karaiti

AKAKITEIA E YURII KAPTOLA

“I teianei te irinaki nei au e e akarongo tikai toou!” No ko mai teia tuatua i tetai tumu kare i manakoia ana​—e opita no roto i te nuku vaeau Toviete​—e kua akamaroiroi te reira iaku i te taime tau tikai. Te aro atu nei au i tetai utunga roa i roto i te are auri e kua pati akatenga au kia Iehova no tetai tauturu. Te aro atu nei au i tetai manamanata no tetai tuatau roa te ka anoanoia te akakoromaki e te manako maroiroi.

I ANAUIA au ia Okotopa 19, 1962, e kua maata mai au i te tua opunga o Ukarania. I taua mataiti ra, kua aravei toku metua tane, ko Yurii katoa tona ingoa, i te Au Kite o Iehova. Kare i roa ana kua riro mai aia ei tangata akamori ia Iehova i roto i to matou oire. Kare tana au angaanga i ngaro ana i te aronga mana tei patoi i te Au Kite o Iehova.

Inara, e akangateitei ana te maataanga i to matou au tangata tupu, i toku nga metua no to raua au tu Kerititiano e te manako oonu no etai ke. Kua taangaanga to matou nga metua i te au tuatau ravarai i te tuku i te aroa o te Atua ki roto iaku e toku au tuaine toko toru mei te meangiti anga mai, e kua tauturu teia iaku i te aro atu i te au akaaoanga e manganui taku i aravei atu i te apii. Kua tupu tetai i taua au akaaoanga ra i te umuumu angaia te tamariki apii ravarai kia aao i tetai pine ei akataka anga iaia e ko tetai o te Tamariki Okotopa a Lenin. No toku tu neutara Kerititiano, kare au i tamou ana i te pine e kua kite takarere uaia te tuke.​—Ioane 6:15; 17:16.

I muri mai, iaku i roto i te pupu toru, kua umuumuia te au tamariki apii katoatoa kia piri ki tetai akaaerenga mapu Komuniti tei kapikiia ko te Au Painia Mapu. I tetai ra kua apainaia atu to matou pupu ki vao no te angaanga tataanga ingoa. Kua mataku tikai au, i te manako anga e ka taitoitoia e ka karoia au. Kua apai mai te katoatoa i to ratou tatua muramura ou no te Painia mei te kainga mari ko au ua tei kore, e kua tu te tamariki apii ki roto i tetai pa roroa i mua i te puapii maata o te apii, te au puapii, e te au mema pupu teitei. I te akakite angaia ki te au mema pupu teitei kia tapeka i te au tatua ki runga i to matou kaki, kua tupou au i toku katu e kua akara ki raro, ma te manako anga e eiaa ua ake tetai tangata e akara mai iaku.

Apainaia ki te Au Are Auri Mamao

I te tae anga au ki te 18, kua akautungaia au e toru mataiti ki roto i te are auri no te tamou marie i te tu neutara Kerititiano. (Isaia 2:4) I te mataiti mua kua mouauri au i roto i te oire ko Trudovoye, i roto i te Tapere Vinnitskaya o Ukarania. I reira, kua aravei au mei te 30 Au Kite ke atu o Iehova. Kua tukuia matou tataki rua ki te au pupu angaanga takake, no te mea kare te aronga mana e inangaro kia kapiti matou ki tetai e tetai.

I roto ia Aukute 1982, kua tukunaia atu maua ko Eduard​—tetai Kite ke mai​—na runga i te rerue i roto i te au pia mouauri ki te tua tokerau o te au Maunga Ural e tetai pupu mouauri ke mai. E varu ra i to matou akakoromaki anga i te au turanga vera e te kononinoni ua e tae ua atu matou ki te Areauri Solikamsk, i te Tapere ko Permskaya. Kua tukunaia maua ko Eduard ki roto i te nga pia ke ke. E rua epetoma i muri mai, kua apainaia atu au ki te tua tokerau mamao roa atu ki Vels, i te tuanga o Krasnovishersky.

Kua tae atu to matou apinga akaoro i te turuaipo, e e poiri tangotango tikai. Noatu te poiri, kua otaia mai to matou pupu e tetai opita kia tikoti ki tetai tua mai i te kauvai na runga i te poti. Kare e kitea ana ia matou te kauvai me kore te poti! Noatu rai, kua aa aere ua matou e na te kitea roa anga ia matou te poti e, noatu oki te mataku, kua rauka rai ia matou i te tikoti ki tetai tua mai i te kauvai. I te tae anga ki uta, kua akatika atu matou ki ko i te mori e kiteaia atura i runga i tetai tuaivi vaitata ua mai, i reira kua kite matou i tetai au are puakapa. Ko teia to matou kainga ou. E noo ana au ki roto i tetai are puakapa maatamaata tau ua ma etai 30 mouauri ke mai. I te tuatau paroro, kua akakoromaki ua matou i te au vaito reva tei topa rava i tetai taime ki raro rava ake i te 40 tikiri Celcius, e kare oki e maana ana a roto i te are puakapa. Te angaanga maata a te au mouauri koia oki e paripari i te au tumu rakau ki raro, inara ko taku angaanga e akatu kapakapa no te au mouauri.

Taeria Mai to Matou Ngai Nooanga Mamao e te Kai Pae Vaerua

Ko au anake rai te Kite i roto i taua ngai nooanga ra; inara kare rava a Iehova i akaruke ana iaku. I tetai ra kua tae mai tetai kou mei ko mai i toku mama, e noo ra rai i te tua opunga i Ukarania. I te vai anga te kati i te kou, ko te apinga mua tana i kite koia oki e Pipiria meangiti ua. Kua taki aia i te reira ki runga e kua akamata i te uriuri i te au kapi. Kua tamata au i te akamanako eaa taku apinga ka tuatua kia paruru i teia apinga pae vaerua oko maata kia kore e raveia. “Eaa oki teia?” i ui poitirere ua mai ei te kati. I mua ake ka rauka ai iaku te akamanako i tetai pauanga, kua pau mai tetai tangata tutaka e tu ra i te pae mai e: “Aue taue! E tikitinari tena.” Kare au i tuatua atu ana. (Koheleta 3:7) Kua kimi aere te tangata tutaka na roto i te toenga o te kou e oti kua oake mai i te reira kiaku ma taua Pipiria akaperepereia ra. No toku aka mataora kua oake atu au i tetai au nati i roto i taku kou nana. I te tae anga mai teia kou, kua kite au e kare a Iehova i akangaropoina iaku. Kua oronga mauruuru ua mai aia i te tauturu e kua akono mai i toku au anoano pae vaerua.​—Ebera 13:5.

Tutu Anga ma te Tuku Kore

I etai au marama i muri mai, kua poitirere roa au i te tae anga mai tetai reta naku mei ko i tetai taeake Kerititiano tei akamouauriia mei te 400 kiro mita te mamao. Kua pati mai aia kiaku kia kimi i tetai tangata tei inangaro e penei tei roto i toku are puakapa. Kare te tata anga i tetai reta mei teia te tu i te mea pakari, no te mea te akarakaraia nei ta matou au reta. Kare rai i te mea poitirere, e kua porokiia mai au e tetai opita kia aere atu ki roto i tona opati e kua akamatakite pakariia mai au e auraka kia tutu aere. I reira kua ota mai aia iaku kia taina i tetai pepa i te akakite e kare au e akakite akaou i toku irinakianga ki etai ke. Kua pau atu au e kare au e marama ana eaa au ka taina ai i taua pepa ra, i na kua kite ua te katoatoa e ko au tetai o te Au Kite o Iehova. Kua taiku atu au e kua inangaro tetai au mouauri kia kite e eaa au i akamouauriia ai. Eaa taku ka akakite kia ratou? (Angaanga 4:20) Kua kite te opita e kare e rauka iaia i te tamatakutaku mai iaku, no reira kua iki aia kia akaatea iaku. Kua tukunaia atu au ki tetai puakapa ke.

Kua tauiia atu au ki te oire o Vaya, mei te 200 kiro mita te mamao. I reira e akangateitei ana te tangata akaaere i toku turanga Kerititiano e kua tukunaia atu au ki te angaanga kare na te vaeau​—te akamataanga ei kamuta, e oti ei tangata akono uira. Inara te oronga maira rai teia nga angaanga i ta raua uaorai au akaaoanga. I tetai atianga, kua akakiteia mai kiaku kia tiki i taku au apinga angaanga e kia aere ki ko i te karapu o te oire. I toku tae anga atu, kua rekareka te au vaeau i ko i te karapu i te kite anga mai iaku. Kare e rauka ana ia ratou i te maani i te au mori e akamanea ra i te au mea akatutu itoro kia angaanga meitaki. Kua inangaro ratou iaku kia tauturu ia ratou i te ripea i teia au apinga no te mea te akapapa ra ratou no te akamaaraanga i te Ra o te Nuku Vaeau Muramura. I muri ake i te akamanako anga na roto i te pure no runga i teia mea nei, kua akakite atu au kia ratou e kare e rauka iaku i te rave i taua tu angaanga ra. Kua oake au i taku au apinga angaanga kia ratou e kua akaruke. Kua ripotiia au ki te akatere tauturu, e ki toku poitirere kua akarongo aia ki te au akaapaanga noku e kua pau atu e: “Te akangateitei nei au iaia no te reira. E tangata akono kaveinga aia.”

Akamaroiroianga mei Tetai Tumu Kare i Manakoia Ana

Ia Tiunu 8, 1984, i muri ake i te toru mataiti tikai i roto i te are auri, kua tukuna mai au ki vao. I toku oki anga atu ki Ukarania, kua anoanoia au kia retita i ko i te vaeau ei tangata mouauri i mua ana. Kua akakite mai te aronga mana kiaku e ka akava akaouia au i roto i te ono marama e e meitaki ake kia akaruke takiri au i te tapere. I reira kua akaruke au ia Ukarania e i te openga kua rauka te ngai angaanga i Ratavia. No tetai tuatau kua rauka iaku i te tutu aere e te kapiti atu ki tetai pupu meangiti o te Au Kite e noo ra i roto e takapini aere i te oire maata, ko Riga. Inara, okotai ua mataiti i muri mai, kua ota akaouia mai au ki te angaanga vaeau. I ko i te opati tainaanga, kua akakite au ki te opita e kua patoi ana au i te angaanga vaeau i mua ana. I te pau mai anga, kua kapiki pu mai aia e: “Te kite tikai ra ainei koe eaa taau e rave nei? I na kia akara tatou eaa taau ka tuatua ki te rangatira!”

Kua arataki atu aia iaku ki tetai pia i te taua rua te reira oki te rangatira vaeau te noo ra i muri mai i tetai kaingakai roroa. Kua akarongo meitaki mai aia kiaku e akamarama atura i toku turanga i reira kua akakite mai aia kiaku e e taime rai toku i te akamanako akaou i taku ikianga i mua ake ka aravei ei i te kumiti o te tainaanga. Ia maua e akaruke ra i te opati o te rangatira vaeau, kua aaki mai te opita i karo ana iaku i mua ake e: “I teianei te irinaki nei au e e akarongo tikai toou!” I toku tu anga ki mua i te kumiti vaeau, kua ripiti akaou au i toku turanga neutara, e kua tuku ratou iaku kia aere, no taua taime ua ra.

I taua taime ra, kua noo au ki roto i tetai ngai tarau. I tetai aiai, kua akarongo au i te topapa maru ua i runga i te ngutupa. Kua vai mai au i te reira e kua kite atu i tetai tangata kua kakauia i roto i te pereue e te mou ra i tetai kiri. Kua akakite mai aia e koai aia, na te karanga anga mai e: “No ko mai au i te State Security. Kua kite au e e au manamanata toou e ka akava akaouia koe i roto i te akavaanga.” “Ae, e tika rai te reira,” i pau atu ei au. Kua tuatua akaou mai taua tangata ra e: “Ka rauka ia matou i te tauturu ia koe me akatika koe i te angaanga na matou.” “Kare, kare e tika,” i naku atu ei. “Ka vai tiratiratu rai au ki toku au irinakianga Kerititiano.” Kare i tauta akaou i te manono mai iaku, e kua aere atu aia.

Oki Akaou ki te Are Auri, Oki Akaou ki te Tutuanga

Ia Aukute 26, 1986, kua akautungaia au e te Akavaanga Enua o Riga e a mataiti ki te angaanga pakari, e kua apanaia atu au ki te Are Auri Maata i Riga. Kua tuku ratou iaku ki roto i tetai pia maatamaata ma tetai 40 aronga mouauri ke mai, e kua tamata au i te tutu atu ki te au mouauri ravarai i roto i taua pia ra. Te karanga ra tetai pae e te irinaki ra i te Atua; ko etai kua kata ua mai. Te kite atura au e te akapupu aere ra teia au tangata, e e rua epetoma i muri mai kua akakite mai te au arataki o teia au pupu kiaku e kare au e akatikaia kia tutu aere, no te mea kare au e aru ana i ta ratou au ture kare i tataia. Kua akamarama atu au e no taua tumu tikai ra oki au i mouauri ei​—e tuke taku au ture e akono nei.

Kua tutu atu rai au ma te matakite, e i te kitea anga e au tetai aronga tei inangaro i te au mea pae vaerua, kua rauka iaku i te apii atu i te Pipiria kia ratou toko a. Ia matou e uriuri ra, kua tata ratou i te au apiianga tumu o te Pipiria ki roto i tetai puka meangiti ua. Te au marama i muri mai, kua tonokia atu au ki te puakapa tiaki pakariia i Valmiera, te ngai i angaanga ai au ei tangata no te uira. I reira kua rauka iaku i te apii i te Pipiria ki tetai tangata ke mai no te uira tei riro mai ko tetai o te Au Kite o Iehova e a mataiti i muri mai.

Ia Mati 24, 1988, kua akanekeia atu au mei te puakapa tiaki pakariia ki tetai puakapa vaitata ua mai. E akameitakianga tikai teia, i te mea e te oronga maira te reira i te rangatiraanga maata atu kiaku. Kua tukunaia atu au ki te au ngai patuanga tukeke, e ka kimi ua rai au kia rauka tetai au tuatau no te tutu aere. Maata te taime, tei tetai ngai ke mai au mei te puakapa, i te tutu aere anga e taeria roaia te aiai, inara kare roa au e rokoia ana e te manamanata me oki atu au ki te ngai nooanga.

Kua akameitaki mai a Iehova i taku au tautaanga.Te noo ra tetai Au Kite i taua ngai ra, kareka ra i roto i te oire uaorai e tai ua i reira, ko Vilma Krūmin̗a​—e tuaine pakarikari. Kua akamata maua ko te tuaine Krūmin̗a i te rave i te au apii Pipiria e manganui ki te aronga mapu. I tetai au atianga, e aere mai ana te au taeake e te au tuaine mei Riga kia piri mai ki roto i te angaanga orometua, e kua aere katoa mai tetai au painia tamou mei Leningrad roa mai (teianei ko St. Petersburg). E maata rai ta matou au apii Pipiria i akamata, ma te tauturu a Iehova, e kare i roa i muri mai kua tomo atu au ki roto i te angaanga painia, te akapou anga e 90 ora i te marama ki roto i te angaanga tutu anga.

Ia Aperira 7, 1990, kua tae te taime no te akara akaou anga i taku utunga i roto i te Are Akavaanga o te Tangata i Valmiera. I te akamata anga te akavaanga, kua kite atu au e koai te roia akaapa. Koia tetai mapu tane i uriuri ana au i te Pipiria i mua ana! Kua kite katoa mai aia iaku e kua katakata mai inara kare i tuatua mai ana. Te maara nei rai iaku eaa ta te akavanui i akakite mai kiaku i taua ra ra: “E Yurii, ko te ikianga kia akamouauriia koe e a mataiti i topa akenei kare i tikaia e te ture. Tikaanga tikai kare ratou e akautunga ia koe.” E mea viviki roa, kua autu au!

E Toa no Karaiti

I roto ia Tiunu 1990, kua anoanoia au kia retita akaou i ko i te opati tainaanga kia rauka mai tetai pepa akatikaanga kia noo i Riga. Kua tomo atu au ki roto i taua opati rai ma te kaingakai roroa i taua ngai ra e a mataiti i topa akenei i akakite ei au ki te rangatira vaeau e kare au e tomo ki roto i te vaeau. Teia taime, kua tu aia ki runga i te aravei mai iaku, kua mou rima mai iaku, e te karanga mai e: “E mea akama tikai e kua na roto ana koe i teia au mea pouroa. Te tatara ara atu nei au no tei tupu.”

Kua pau atu au: “E toa oki au no Karaiti, e kua anoanoia kia akatupu au i taku angaanga. Ma te tauturu a te Pipiria, ka rauka katoa ia koe kia rekareka i ta Karaiti i taputou mai ki tana au pipi​—tetai oraanga mataora e tetai tuatau mutu kore ki mua.” (2 Timoteo 2:3, 4) Kua pau mai te rangatira: “Kare i roa akenei kua oko mai au i tetai Pipiria, e te tatau nei au i te reira i teianei.” Tei konei oki iaku te puka Ka Rauka ia Koe te Ora Mutukore i Paradaiso i te Enua Nei.a Kua eeu atu au ki tetai pene te uriuri ra i te akairo o te au ra openga e kua akaari kiaia e akapeea te piri anga o te totou Pipiria ki to tatou tuatau. Ma te arikianga oonu kua mou rima akaou mai te rangatira iaku e kua akamanuia mai iaku i roto i taku angaanga.

Tae mai ki teia taime kua teatea ua te mou o te koro no te kokotianga i Ratavia. (Ioane 4:35) I roto i te 1991, kua akamata au i te tavini ei tangata pakari no te putuputuanga. E rua ua rai nga tangata pakari akataoongaia i roto i te enua katoa! E tai mataiti i muri mai, kua veeia taua putuputuanga okotai ua ra i Ratavia ki roto i nga putuputuanga e rua​—e tai no te reo Ratavia e tetai no te reo Rutia. Kua akameitakiia au ki te tavini anga ma te putuputuanga Rutia. No te viviki roa i te tupu i terao mai mataiti kua vee akaouia to matou putuputuanga ki roto i te toru pupu! Kia oki au e akamanako, te taka meitaki ua ra e ko Iehova uaorai te arataki ra i tana mamoe ki tana akaaerenga.

I roto i te 1998, kua akataoongaia au kia tavini ei painia takake i Jelgava, tetai oire e 40 kiro mita i te tua apatonga opunga o Riga. I taua mataiti rai, ko au tetai o te aronga mua mei Ratavia tei patiia mai kia tae atu ki te Apii Terenianga Orometua tei raveia i roto i te reo Rutia i Solnechnoye, vaitata atu ki St. Petersburg, i Rutia. I te apii, kua rauka iaku te rekareka i te kite anga e mei teaa tikai te puapinga o te akaari i te tu aroa no te tangata kia puapingaia ai i roto i te angaanga orometua. Taku mea umere tikai, i runga roa atu e maata roa atu i te au apinga tei apiiia matou i roto i te apii, koia oki ko te aroa e te manako akaperepere tei akaariia mai kia matou e te pamiri Betela e e te au tangata ikuiku o te apii.

Kua taeria akaou iaku tetai tuanga puapinga i roto i toku oraanga i te 2001 i toku akaipoipo anga ia Karina, e vaine Kerititiano purotu. Kua piri mai a Karina kiaku i roto i te angaanga tamou takake, e i te au ra ravarai ka akamaroiroi uaia rai au me kite atu au i taku vaine e oki maira mei te angaanga koro ma te mataora. E tika rava, e e mea rekareka roa te tavini ia Iehova. Kua riro te au turanga kino tikai i raro ake i te tutaraanga a te Komuniti ei apii iaku kia irinaki akaope takiri ki roto iaia. Kare e akaatingaanga maata atu no tetai tei anoano i te tapu marie i to Iehova pirianga taeake e te turuturu i tona tu ngateitei. Kua riro te tauturu anga i etai ke kia kite no runga ia Iehova i te oronga mai i te akakoroanga i roto i toku oraanga. E akangateiteianga vavaria tikai noku kia tavini ia Iehova ei “toa meitaki [“no Iesu Karaiti ra,” NW].”​—2 Timoteo 2:3.

[Tataanga Rikiriki i Raro]

[Tutu i te kapi 11]

Kua akautungaia au e a mataiti ki te angaanga pakari i te Are Auri Maata i Riga

[Tutu i te kapi 12]

Maua ko Karina i roto i te angaanga orometua