Puapinga Anga mei te Apiianga Meitaki Roa Atu te Vai ua Ra!

TE AKATAKA maira te Pipiria i te Atua ko Iehova e Tei Anga i te au mea ravarai, kapiti mai i te au tangata. (Genese 1:27; Apokalupo 4:11) Ei Pu Ikuiku Maata Rava Atu, nana i apii i nga tangata mua, ia Adamu raua ko Eva, e te teateamamao anga ia raua no te noo anga i roto i te kainga manea i Edene. Tona akakoroanga oki kia apii ua atu ia raua e kia akono ia raua e tuatau ua atu. (Genese 1:28, 29; 2:15-17; Isaia 30:20, 21, NW) E akamanako ana i taua manakonako anga!

Inara, ma te mii, kua kopae keia e nga tokorua mua te au mea ravarai. No to raua aerenga akarongo kore i akamata ai te kino anga i te pae akono tau e i te pae kopapa o te au tangata. (Genese 3:17-19; Roma 5:12) I te tou anga ki te aronga tei noo ana no tetai manga tuatau i muri ake i te angaia anga te tangata, te karanga ra te Pipiria e: “E kite akerā Iehova, e kino maata to te tangata i te enua nei, e kua kino anake te au manako katoa, e te akakoroanga katoa o to ratou ngakau i te au rā katoa ra.”​—Genese 6:5.

Vaitata rai e e 4,500 mataiti i topa i to Iehova manako anga e te inangaro ua atura te tangata i te tu kino, e te kino ua atura te turanga o te tangata i to mua ana. E e manganui kare e akama ana i te pikikaa, te keia ra, e te ta ra i tetai ke. Te tupu ua maira te au manamanata i te au ra ravarai, e te iti ua atura te manako anga i tetai taeake tangata. Kare ainei te maata anga o te au pirianga uaorai, kapiti anga mai te aronga i roto rai i te au ngutuare tangata, e tei roto tikai i te manamanata? Inara, kare rai te Atua i apa no te au turanga nei, kare katoa aia i akamutu ana i te akamanako mai no runga i te au manamanata i teia tuatau. Te manako ua maira rai a Iehova i te turanga o te tangata, e te papa ua ra aia i te apii i te aronga te akara atura kiaia no te aratakianga kia rauka tetai oraanga mataora. I etai 2,000 mataiti i topa akenei, kua tono mai aia i tana Tamaiti, ko Iesu Karaiti, ki te enua nei e kua akaari mai i Tona inangaro i te apii anga i te tangata te inangaro ra i te akapuapinga i to ratou oraanga. Kua akaruke mai a Iesu i tetai akaraanga no te apiianga tiama no te mea na te Pu Ikuiku Maata Rava Atu kua roa te tuatau i apii iaia.

Te Akonoanga Kerititiano Mou​—E Apiianga

Na Iesu Karaiti i akamata i te Akonoanga Kerititiano mou, e turanga oraanga tei akatumuia ki runga i te aroa. I roto i te reira, e mea tau kia rotai te au manako katoa e te au ravenga ki te anoano o te Atua, no te akakoroanga kia apai mai i te ngateitei e te kaka ki tona ingoa. (Mataio 22:37-39; Ebera 10:7) E turu ei i ta Iesu au apiianga no runga i teia mataara no te ora ko tona Metua, ko Iehova. Ka tatau tatou ia Ioane 8:29 no runga i te turu anga tei rauka mai ia Iesu no ko mai i te Atua: “Ko tei tono mai iaku nei, tei vaitata uaorai ïa iaku nei; kare te Metua i akaruke ua iaku nei ko au anake ra; kare oki au i tukumoe i te rave i te mea e mareka mai ei aia.” Ae, tei ia Iesu te turu anga e te aratakianga a tona Metua i roto i tana angaanga orometua. Kare ta Iesu au pipi mua i aro atu ana i te au akaaoanga o te oraanga ma te kore e aratakianga. Na Iehova i apii ia ratou na roto i tana Tamaiti. I to ratou aru anga i ta Iesu apiianga e te akaraanga i akariro ia ratou kia meitaki atu ei au tangata. E mea tika teia no tana au pipi i teia tuatau.​—Akara i te pia “Te Mana Akakeu Anga a Iesu e Tana Au Apiianga,” i roto i te kapi 6.

Ko tetai turanga taka meitaki no te Akonoanga Kerititiano mou koia oki te kapiti maira te reira i te apiianga te akakeu ra i te manako e te ngakau kia rauka oki i te taui i te tangata mei roto mai. (Ephesia 4:23, 24) E taiku ei i tetai akaraanga, e akamanako ana e eaa ta Iesu i apii ana no runga i te akarongo mou o to tetai tokorua: “Kua akarongo kotou e, i tuatuaia mai e te aronga taito ra e, ‘Auraka rava koe e akaturi:’ Te karanga atu nei ra au kia kotou, Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” (Mataio 5:27, 28) Ma teia au tuatua, te apii ra a Iesu i tana au pipi kia ma ua te ngakau, noatu e kare i raveia ake, penei ka tupu mai te au tumatetenga no te au manako e te au anoano tau kore. Kare ainei i te tika e ka taki atu te au manako kino ki te au ravenga te akariri ra i te Atua e te tamamae ra i tetai ke?

No reira, te oronga maira te Pipiria i teia akoanga: “E akamutu i te aru atu i te tu o teia akatereanga o te au mea nei, inara kia tauiia na te maani ua rai anga i to kotou manako, kia tika ia kotou uaorai i te anoano tiama e te meitaki e te tau o te Atua.” (Roma 12:2, NW) ‘Ka rauka tikai ainei i te maani ua rai i te manako na roto i te apiianga?’ ka ui ei koe. Maani ua anga i te manako te piri maira te akakeu anga i te reira i roto i tetai aerenga ke na te akaki anga i te reira ki te au kaveinga e te au ikuikuanga tei orongaia mai i roto i te Tuatua a te Atua. Ka tupu teia na te ariki anga i te apiianga ta te Atua i oronga mai na roto i tana Tuatua.

Akakeuia kia Taui

“E mea ora oki te tuatua a te Atua, e te ririnui.” (Ebera 4:12) Te tuku ra rai te reira i te akakeuanga ririnui ki runga i te au tangata tataki tai, i te akapapu anga e kare te reira i riro mai ei mea taito. Ka rauka i te reira i te oake ki tetai tangata te akakeuanga kia taui i tona aerenga, te ariki anga i te Akonoanga Kerititiano mou, e te riro anga mai ei tangata meitaki atu. Te akatutu maira te au akaraanga te aru maira i te puapinga no te apiianga i te Pipiria.

Te akakite maira a Emilia, tei taikuia mai i roto i te atikara i mua akenei, e: “Kare e rava ua te tauta anga naku uaorai kia akamako mai i te turanga i roto i toku kainga. I toku akamata anga i te apii i te Pipiria ma te Au Kite o Iehova, kua kite mai au e e manakonakoanga tetai e kua akamata i te taui i toku tu. Kua apiiia au kia akakoromaki e auraka e riririri atu. Kare i roa ana, kua piri mai taku tane ki roto i te apii. Kare i te mea mama iaia i te akamutu ua i te inuinu, inara kua rauka ra iaia i te akamutu. Kua oronga mai teia i tetai akamata anga ou no to maua akaipoipo. I teianei e nga Kerititiano mataora maua e te apii nei i ta maua tamariki i te au kaveinga memeitaki a te Pipiria.”​—Deuteronomi 6:7.

Te apiianga ta te Akonoanga Kerititiano mou e oronga ra ka rauka i te akarangatira i tetai tangata mei roto mai i te au tu kino e tetai tu oraanga tau kore. Kua kite a Manuela i te tika anga o teia. I te 13 mataiti ra, kua oro ke atu aia mei tona kainga e kua akamata i te kai i te maruana. Kare i roa ana, kua kai aia i te eroini. Kua rave aia i te ainga ma te au tane e te au vaine ei tutaki anga i te are e kia rauka te moni. I tetai au taime, na Manuel i turu katoa iaia uaorai na te keikeia anga i te tangata. Vaitata rai e tei raro ua aia i te akakeu anga a te au apinga akakona. E tuku putuputuia ana aia ki roto i te are auri no tona tu kino. E tai taime kua noo aia i roto i te are auri e a mataiti, e i roto i te reira ngai kua o atu aia i te taritari anga i te au apinga tamaki. I muri ake i tona akaipoipoanga, no to Manuel aerenga oraanga kua kokoti aia i te au tumatetenga. Kua karanga aia: “Kua noo maua i roto i tetai are e are no te moa i te taime mua. Te maara ua nei rai iaku te tunu kai anga taku vaine i runga i tetai au piriki. E kino tikai to maua au turanga e kua akamaroiroi toku uaorai kopu tangata i taku vaine kia akaruke iaku.”

Eaa ra tei taui i tona oraanga? Kua pau mai a Manuel: “Kua aere mai tetai oa ki to maua kainga i te tuatua mai no runga i te Pipiria. Kua ariki au i tana atoro anga ei akaari ua kiaia e kare tetai Atua tei manako maira i te tangata e vai ana. I toku manako kua riro au ei akapapu anga i te reira. Poitirere tikai au i te tu akakoromaki e te maru o taua Kite, no reira kua ariki atu au i te aere atu ki te au uipaanga i ko i te Are Uipaanga Patireia. Noatu e kua kite etai i toku turanga, kua aravei mai ratou iaku ma te tu oaoa. Kua akariro ratou iaku mei tetai ia ratou. E akapumaana anga maata teia. Kua akakeuia au kia iki atu i te akaruke i teianei ao no te au apinga akakona kia rauka mai tetai angaanga tau. E a marama i muri ake i te akamata anga taku apii Pipiria, kua piri atu au ma te tau ki roto i te angaanga tutu anga, e e a marama i muri mai i te reira, kua papetitoia au ko tetai o te Au Kite o Iehova.”

Eaa te aite anga o te Akonoanga Kerititiano mou kia Manuel e tona ngutuare tangata? “Me kare te apiianga Pipiria kua papu tikai iaku e kua mate takere au. Te mataara o te ora ta Iesu i apii mai kua oronga akaou mai kiaku nei toku ngutuare tangata. Kare taku nga tamariki e rua e kite i taku i kite ana ei mapu. Te akaparau nei au e te mareka tikai ra ia Iehova no te pirianga meitaki tei rauka ia maua ko taku vaine. Kua akameitaki mai toku au oa o mua ana iaku e kua akakite mai kiaku e i to ratou manako ko te mataara taku e aru ra i teianei ko te mataara meitaki rava te reira.”

I roto i te oraanga Kerititiano, te aru maira te tu ma i te ma i te pae kopapa. Ko John, tei noo i roto i tetai ngai tei ki i te putaua i Aperika Tonga, te marama ra i te reira. Kua akataka mai aia: “I tetai au taime kare ta maua tamaine e pai ana e tai epetoma, e ko tetai ia maua kare e kea atu ana.” Kua akakite mai tana vaine e e akara anga viivii tikai to ratou kainga. Inara ma te apiianga Kerititiano, kua mako mai te turanga. Kua akamutu a John i te kapiti atu ki tetai pupu keikeia i te motoka e kua akamata i te akono mai i tona ngutuare tangata. “Kua kite mai maua e ei au Kerititiano ra, kia ma ua rai to matou kopapa e te kakau. Kua reka au i te au tuatua a 1 Petero 1:16, tei ako mai ia matou kia vai tapu ua no te mea e Atua tapu a Iehova. I teianei te tauta katoa nei matou i te akamanea mai i to matou kainga ma te tau.”

Ka Kite Koe i te Apiianga Meitaki Roa Atu

Te au tupuanga tei taikuia mai i runga akenei kare i te au turanga tuke roa. Tei tupu mai no te apiianga tei akatumuia ki runga i te Pipiria, e tauatini ua atu tangata tei apiiia kia akono i te au oraanga meitaki atu. Na roto i te tiratiratu e te angaanga maroiroi, kua ariki rekarekaia ratou e to ratou au pu. Kua riro mai ratou ei au tangata tupu meitaki e ei au oa, i te akamanako anga i te oraanga o to ratou taeake tangata. Te tauta ra ratou i te kopae i te au ravenga kino e te au manako kopapa, no reira te akono meitaki ra ratou i to ratou uaorai oraanga i te pae kopapa, te pae manako, e i te pae manako ngakau. Kare i kaimoumou i ta ratou au apinga ki runga i te au ravenga kino, kua taangaanga ratou i te reira ei meitaki no ratou uaorai e ei meitaki no to ratou ngutuare tangata. (1 Korinetia 6:9-11; Kolosa 3:18-23) Kare ekokoanga, te au tupu anga no te apii anga ta Iehova i akanoo i roto i te Pipiria te akaari maira e te aru anga i te Akonoanga Kerititiano mou ko te mataara meitaki rava te reira i roto i te oraanga, te oronga anga mai i te apiianga meitaki roa atu te vai ua ra. Te akangateitei anga i tetai tangata tei akono rotai i te au ture a te Atua, te akakite maira te Pipiria e: “Ko tana katoa e rave ra, te meitaki ra ïa.”​—Salamo 1:3.

E akamaroiroi anga te reira i te kite e te inangaro ra te Atua Mana Katoatoa, ko Iehova, i te apii ia tatou. Te karanga ra aia no runga iaia uaorai: “Ko au toou Atua ra ko Iehova, ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra.” (Isaia 48:17) Ae, kua akaari mai a Iehova i te mataara na roto i te akaraanga e te au apiianga a tana Tamaiti, ko Iesu Karaiti. Kua rave tana au apiianga i te au tauianga tuke i roto i te oraanga o te manganui tei kite iaia iaia i te enua nei, e te tika ra te reira ki te manganui te aru ra i tana au apiianga i teia tuatau. Eaa ka kore ei e rave i te tuatau kia kite maata atu no runga i teia au apiianga? Te mataora nei te Au Kite o Iehova i te ngai e noo ra koe i te tauturu atu ia koe ki rauka mai taua apiianga puapinga.

[Tataanga Rikiriki i Raro]

[Pia/Tutu i te kapi 6]

Te Mana Akakeu Anga a Iesu e Tana Au Apiianga

I te taangaanga anga i tona taoonga ei tangata maata koi tero, kua riro mai a Zakaio ei tangata apinganui na te rave morimori anga i te moni e te keia anga i te au tangata noa ua. Inara kua taui aia i tona tu oraanga na te akonoanga i te au apiianga a Iesu.​—Luka 19:1-10.

Kua akamutu a Saula o Tareso i te takinokino i te au Kerititiano e kua ariki i te Akonoanga Kerititiano, te riro anga mai ko te apotetoro ko Paulo.​—Angaanga 22:6-21; Philipi 3:4-9.

Kua riro ana etai o te au Kerititiano i Korinetia ei ‘aronga kanga, akamori idolo, akaturi, akavaine, aronga sodoma, keia, noinoi apinga, konā kava, akakino, e te āru.’ Inara, i te apii anga no runga i te Akonoanga Kerititiano mou, kua ‘oreiia ratou, kua akatapuia, kua akatikaia, i te ingoa o te Atu ra o Iesu.’​—1 Korinetia 6:9-11.

[Tutu i te kapi 7]

Ka rauka i te Pipiria i te akaari atu kia koe e akapeea koe e puapinga ai