Tua Oraanga

Kua Rauka Iaku ‘Ta Toku Ngakau e Anoano Ra’

AKAKITEIA E DOMINIQUE MORGOU

I te openga iora, i roto ia Titema 1998, kua tae au ki Aperika! I teianei kua tupu tikai tetai moemoea mei te tamarikianga mai. E mataora ua ana rai au me akamanako i te au ngai ateatea ua o Aperika e te oraanga umeremere o te manu taae. I teianei ra tei reira tikai au! I taua taime rai, kua tupu tika tikai tetai moemoea ke mai. E vaine tutu evangeria tinamou au e tavini nei i te enua ke. Ki te maataanga, penei i te akaraanga kare tikai paa teia e rauka. Kua kino pakari oki toku mata kare e kite meitaki ana, e aere ana au na te au mataara oneone o te au oire o Aperika ma te tauturu a tetai puakaoa tiaki matapo tei tereniia no te au mataara o te au oire mamaata o Europa. Ka akakite atu au e akapeea i rauka ai iaku kia tavini i Aperika e akapeea a Iehova i te oronga anga mai i ‘ta toku ngakau i anoano ra.’​—Salamo 37:4.

KUA anauia au i roto ia Tiunu 9, 1966, i te pae apatonga o Varani. Ko au te mea openga o te itu tamariki​—e rua nga tamaroa e e rima tamaine​—utuutuia matou katoatoa e nga metua aroa. Inara, e tai ia mea taitaia tei tupu i roto i toku oraanga mapu. Mei toku mama ruau, toku mama, e tetai o toku tuakana, mei te anauanga mai kua tuia au e tetai maki te ka taopenga mai ki te matapo takiri anga.

Ei mapu ou, kua aro atu ana au i te tu iriiri tangata, te akavaavaa, e te pikikaa, tei riro ei akakeu iaku kia patoi i te taiate tangata. No teia tuatau ngata nei i neke atu ei matou ki te tuanga ngai o Hérault. I reira, kua tupu tetai apinga umere roa.

I tetai popongi Tapati, kua aere mai e rua nga Kite o Iehova ki to matou ngutupa. Kua kite to matou mama ia raua e kua pati atu ia raua ki roto. Kua ui tetai o nga vaine kia Mama e me te maara ra iaia e kua taputou ana aia e a tetai ra ka ariki aia i tetai apiianga Pipiria. Kua maara rai ia Mama e kua ui atu e, “Aea tatou e akamata ai?” Kua akatika ratou kia aravei i te au popongi Tapati katoatoa, e na roto i teia mataara nei i akamata ai toku mama i te apii i “te tuatua-mou o te evangelia nei.”​—Galatia 2:14.

Rauka Anga te Marama

Kua tauta maroiroi tikai a Mama kia marama e kia maara i tana e apii ra. No te matapo oki, kua tamou ngakau aia i te au apinga katoatoa. E aka akakoromaki tikai to te nga Kite iaia. Ko au ra, me aere mai nga Kite, kua pipini au ki roto i toku pia e me aere raua kua aere mai au ki vao. Inara, i tetai avatea aiai, kua aravei mai a Eugénie iaku, koia tetai o te Au Kite, e kua tuatua mai kiaku. Kua akakite mai aia kiaku e ka akaope te Patireia o te Atua i te pikikaa, te makitakita, e te akavaavaa i roto i teianei ao. “Tei te Atua anake ua te ravenga,” i tuatua mai ei aia. Me ka inangaro ainei au i te kite maata atu? I tera mai ra, kua akamata au i taku apiianga Pipiria.

Te au apinga katoatoa taku i apii ei e mea ou anake kiaku. Kua marama au i teianei e te akatika poto ua nei te Atua i te kino i runga nei i te enua no tetai au tumu puapinga. (Genese 3:15; Ioane 3:16; Roma 9:17) Kua kite katoa mai au e kare a Iehova e akaruke ua ia tatou ma te kore e manakonakoanga. Kua oronga mai aia kia tatou i tana taputou umere no te ora mutu kore i roto i tetai enua parataito. (Salamo 37:29; 96:11, 12; Isaia 35:1, 2; 45:18) I roto i taua Parataito ra, ka kite akaou toku nga mata, i te mea te po ua atura oki toku mata.​—Isaia 35:5.

Rave Anga i te Tavinianga Tamou

Ia Titema 12, 1985, kua papetitoia au ei akairo i toku akatapuanga kia Iehova, i te kapiti anga atu ki toku tuakana ko Marie-Claire, ko tei apai ke ana i taua takainga ra. Kare i roa i muri mai kua aru mai toku tungane ko Jean-Pierre, e pera katoa toku mama.

I roto i te putuputuanga taku e piri atura, e maata rai te au painia tamou, me kore te aronga tutu evangeria tamou. Kua akapumaanaia tikai au e to ratou tu rekareka e te oraora no te angaanga orometua. Pera rai a Marie-Claire, tei tuia e te maki mata e tei roto tetai vaevae i tetai apinga paruru ivi, kua piri katoa ki te angaanga tavinianga tamou. E tae mai ki teia ra te oronga ua mai nei rai aia i te akamaroiroianga pae vaerua kiaku. Kua riro te au painia takapini iaku i roto i te putuputuanga e te pamiri ei tauturu iaku i te akatupu maroiroi i te anoano kia piri atu au uaorai ki roto i te tavinianga tamou. No reira i roto ia Noema 1990, kua akamata au i te tavini ei painia i Béziers.​—Salamo 94:17-19.

Akakoromaki Anga i te Tu Akamaroiroi Kore

I roto i te angaanga orometua, kua riro tikai te akonoanga maroiroi a tetai au painia ei tauturu iaku. Noatu e, mei tera taime ki tera taime, e rokoia ana au e te manako akamaroiroi kore no toku au tu apikepike e e inangaro ua ana e e maata atu taku ka rauka i te rave. Inara, kua akamaroiroi mai a Iehova iaku na roto i taua au taime akamaroiroi kore ra. Kua rave au i te kimikimianga i roto i te Watch Tower Publications Index, i te kimi i te au tua oraanga o te au painia mei iaku rai te kino i te mata. Kua umere tikai au e e maata tikai! Kua apii mai teia au papaanga tau e kua akamaroiroi mai iaku kia akaperepere ma te rekareka i taku e rauka ra i te rave e kia ariki i toku au tu apikepike.

Ei akono i toku au anoano, e rave angaanga tama ana au ma etai Au Kite ke i te au are toa mamaata. I tetai ra kua kite atu au i toku au oa angaanga e tama akaou ra i te ngai tei oti ua akenei iaku i te tama. Te taka ua ra e, e maata rai taku ngai repo kare e kite ana. Kua aravei atu au ia Valérie, koia te painia e akaare ana i to matou pupu tama, e kua pati au kiaia kia akakite tika mai kiaku e kia akakite mai e me te akamaata atu ra au i te angaanga a te katoatoa. Kua vaoo mai aia naku rai e iki me manako ake au e kare e rauka akaou iaku i te rave i te angaanga. I roto ia Mati 1994, kua akaruke au i taku ngai angaanga tama.

I reira kua rokoia akaouia au e te manako puapinga kore ua. Kua pure akatenga au kia Iehova, e kua kite au e kua akarongo mai aia i taku au patianga. I reira akaou, kua riro te apiianga Pipiria e te au puka Kerititiano ei tauturu maata tikai. Noatu rai, te apikepike atura toku mata, ko toku anoano ra kia tavini ia Iehova kua tupu ketaketa roa atu te reira. Eaa ra taku ka rave?

Mea Mua Tetai Papaanga no te Tiaki, e Oti Tetai Ikianga Viviki

Kua pati atu au no tetai terenianga i ko i te Ngai Tauturu no te Matapo e no te Mata Kino i Nîmes e kua akatikaia mai kia noo ki reira e toru marama. Kua puapinga meitaki tikai taua taime ra. Kua marama atu tikai au i te maata o toku maki e kua apii i te akatano kia tau ki te reira. Kua riro te piri anga atu ki te au tu aronga pakipakitai ei tauturu iaku kia kite i te puapinga maata o toku manakonakoanga Kerititiano. E ngari ake oki au e akakoroanga tetai e e apinga puapinga tetai i te rave. Kapiti katoa mai, kua apiiia au i te tatau Braille i te reo Varani.

I toku oki anga atu ki te kainga, kua kite tikai toku pamiri i te tauturu maata tei rauka iaku mei te terenianga. Inara, e tai apinga, kare roa au i inangaro ana koia oki ko te rakau ka anoanoia au kia taangaanga. E ngata tikai iaku te ariki i taua “rakau” ra. E meitaki ake tetai apinga tauturu ke mai​—penei mei te puakaoa tiaki.

Kua tuku atu au i tetai patianga no tetai puakaoa inara kua akakiteia mai e e roroa te papaanga no te tiaki. Tetai katoa, ka rave roa te akaaerenga i tetai akarakaraanga. Kare te puakaoa tiaki e oake uaia ana ki tetai ua atu tangata. I tetai ra kua akakite mai tetai vaine e tauturu ana i te akatere i tetai taokotaianga no te matapo e te aere ra tetai karapu teniti i reira ka oronga i tetai puakaoa tiaki ki tetai matapo me kore ki tetai tangata kare e kite meitaki ana e noo ra i to matou ngai. Kua akakite mai aia e kua manako mai aia iaku. Me ka ariki ainei au? Kua kite au i te rima o Iehova i roto i teia mea nei e kua ariki atura i te apinga aroa. Noatu rai, kua anoanoia rai au kia tiaki atu no te puakaoa.

Te Manakonako nei rai ia Aperika

Iaku e tiaki ra, kua uri atu toku manako ki tetai ngai ke mai. Mei tei taikuia i mua akenei, mei toku tamarikianga mai te vai ua anga tetai inangaro oonu no Aperika. Noatu e te kino ua atura toku mata, e ketaketa roa atu ra taua inangaro ra, i toku kite anga tikai e e manganui ua atu te tangata i Aperika e inangaro ra i te Pipiria e i te tavini ia Iehova. I tetai taime i mua atu ana, kua taiku ua atu ana au kia Valérie e ka inangaro au i te aere ki Aperika. Me ka inangaro ainei aia i te aru mai iaku? Kua akatika aia, e kua tata atu maua ki tetai au manga tuatua reo Varani o te Au Kite o Iehova i Aperika.

Kua tae mai tetai pauanga mei Toko. Toku aka rekareka, kua pati au kia Valérie kia tatau mai i te reira kiaku. E akamaroiroi anga tikai te reta, no reira kua karanga mai a Valérie: “I na, kore oki taua e aere?” I muri ake i te tata anga ki te au taeake i ko i te opati manga, kua akakiteia mai kiaku kia tata atu kia Sandra, e painia i Lomé, te oire maata. Kua akanoo maua i te ra ka aere ei maua no Titema 1, 1998.

E aka tuke tikai, inara e mataora! I muri ake i te tae anga ki Lomé, kua akaruke maua i te pairere e kua kite tikai maua i te vera o Aperika mei te mea ra e te tapokiia maira maua ki te parangikete. Kua tae mai a Sandra i te aravei ia maua. Kare roa matou i kite ana i tetai e tetai i mua ana, inara i reira rai mei te mea rai e kua matau takere ana matou. I mua poto ua ake i to maua tae atu anga, kua akamanaia a Sandra e tona tokorua, ko Christine, ei nga painia takake i Tabligbo, e oire meangiti ua i uta i te enua. I teianei kua rauka ia maua te akameitakianga o te aru anga ia raua ki ta raua tukuanga angaanga ou. Kua noo maua mei te rua marama, e i to maua akaruke anga, kua kite au e ka oki akaou mai rai au.

Mataora Tikai kia Oki Akaou Mai

I Varani, kua akamata vave ua au i te akapapa no te rua o toku tere ki Toko. Ma te tauturu a toku pamiri, kua rauka iaku i te rave i tetai au akanoonooanga kia noo ki reira e ono marama. No reira i roto ia Tepetema 1999, tei runga akaou au i te pairere e aere atura ki Toko. Inara, i teia taime, ko au anake rai. Akamanako ua ana mei teaa ra te manako o toku pamiri ia ratou e akara maira iaku e aere ra ko au anake rai noatu toku maki! Inara kare e tumu tau kia manamanata. Kua akapapu atu au ki toku nga metua e ko toku au taeake, tei riro mai mei te pamiri rai kiaku, te tiaki maira iaku i Lomé.

Kare aiteia te mataora kia oki akaou ki tetai ngai e manganui tikai te tangata i reira e akaari maira i te inangaro i roto i te Pipiria! Kare i te mea tuke ake rai i te kite i te tangata e tatau ra i te Pipiria i te pae mataara. I Tabligbo ka kapiki mai te tangata ia koe kia aere atu no tetai uriurianga Pipiria. E akameitakianga tikai ra kia noo kapiti ma te nga tuaine painia takake e rua i roto i tetai ngai nooanga tau ua! Kua rauka iaku kia kite i tetai peu ke, tetai mataara tuke i te akara atu anga no runga i tetai au mea. Te mea mua e tei maata roa atu, kua kite au e te tuku ra to tatou au taeake e te au tuaine Kerititiano i te au inangaro o te Patireia ko te mea mua i roto i to ratou oraanga. Ei akaraanga, kare te aaere ua anga no te au kiromita e manganui ki te Are Uipaanga Patireia e tapu ana ia ratou mei te aere anga ki te au uipaanga. E maata katoa taku au apiianga i kite mai mei to ratou tu pumaana e te maoraora.

I tetai ra i te oki anga mai mei te angaanga koro, kua akakite atu au kia Sandra e te mataku ra au i te oki anga ki Varani. Kua kino roa atu toku mata. Kua akamanako ua au i te au mataara apiapi e te turituri i Béziers, i te au ngai kakekake anga i roto i te au are apatimani, e te au apinga ke atu e manganui te ka akangata roa atu i te oraanga no tetai tangata kare e kite meitaki ana. Te tuke, i te au mataara i Tabligbo, noatu kare i patuia, e muteki ua ra​—kare e urupu maata e kare e maata ana te au apinga akaoro. Ka akapeea ra e rauka ai iaku i te noo meitaki ua i Varani i na kua matau ua au ia Tabligbo i teianei?

E rua ra i muri mai kua ringi mai toku mama i te akakite mai e te tiaki maira te apii no te puakaoa tiaki iaku. E Labrador tikitiki ou ua tetai ko Océane te ingoa kua papa kia riro ei “arataki” iaku. I na, kua akono akaouia toku au anoano e kua akakoreia toku au manako apiapi. E ono marama i muri ake i te tavini anga mataora i Tabligbo, te oki atura au ki Varani i te aravei ia Océane.

I tetai au marama i muri ake i te terenianga, kua orongaia mai a Océane kiaku kia akono. I te akamataanga, kare i te mea ngoie. Kua anoanoia maua kia kite meitaki tikai i tetai e tetai. Inara, kua kite marie ua mai au, e ka anoano maata tikai au ia Océane. Ko te tika tikai, ko Océane tetai tuanga oku i teianei. Eaa ra te tu o te tangata i Béziers i te kite anga mai iaku e aere atura ki to ratou ngutupa ma te puakaoa? E maata tikai te tu akangateitei e te takinga meitaki taku e kite ana. Kua riro a Océane ei “toa” no tera ngai. I te mea e tukatau kore ana te tangata me tuatua ki tetai tangata maki, kua riro te puakaoa ei tauturu kia rauka iaku i te tuatua no runga i toku tu apikepike na roto i tetai mataara natura ua. E maru ua te tangata e kua akarongo mai kiaku. E tika rava e, kua riro ko Océane te mea meitaki roa atu i te akamata i tetai pukapukaanga.

I Aperika ma Océane

Kare i ngaropoina iaku a Aperika, e i teianei te akapapa nei au no te toru o toku tere. Teia taime, kua aru mai a Océane. Kua aru katoa mai tetai nga tokorua mapu iaku, ko Anthony raua ko Aurore, e toku taeake ko Caroline​—e au painia pouroa mei iaku rai. I roto ia Tepetema 10, 2000, kua tae atu matou ki Lomé.

I te akamataanga, e maata te aronga e mataku ana ia Océane. Tokoiti ua te au tangata i Lomé tei kite ana i tetai puakaoa maatamaata mei teia, no te mea e mearikiriki ua te maataanga i te au puakaoa i Toko. I to ratou kite anga i tona tapeka, kua manako tetai papaki e e manu kino aia e ka anoanoia kia tapekaia. Ko Océane ra, e tu manako paruru tona, kua papa ua i te paruru iaku mei tetai ua atu apinga tei manako aia e te tamataku maira. Noatu rai, kare i roa ana kua varenga ua a Océane i roto i teia ngai ou. Me aao aia i te tapeka, te angaanga ra aia​—mako meitaki tikai, rauka kia irinakiia, te noo ua ki te pae iaku. Me tataraia ra aia, e apinga tikai aia i te kangakanga, i tetai taime ra kare e akarongo mai. E mataora ua ana maua i te noo kapiti.

Kua pati katoatoaia mai matou kia noo ki ko ia Sandra raua ko Christine i Tabligbo. Ei tauturu i te au taeake e te au tuaine i reira kia matau kia Océane, kua pati matou ia ratou kia atoro mai ia matou e i te akamarama i te angaanga a te puakaoa tiaki, te tumu i anoano ei au i tetai, e mei teaa ta ratou au peu kiaia. Kua akatika mai te aronga pakari e e kia aru mai a Océane iaku ki ko i te Are Uipaanga Patireia. No te mea kare teia i te akanoonooanga rave matauia i Toko, kua raveia tetai akakiteanga i te akamarama i taua mea ra ki te putuputuanga. No te angaanga orometua, e aru mai ana a Océane me oki au i te atoro e i te rave i te au apiianga Pipiria​—e au turanga te ka marama uaia e eaa tana angaanga i reira.

Kua tupu ua atu rai te mataora i te tutu anga i roto i teia ngai. E tukia ua ana rai au i te manako meitaki o teia iti tangata maru, tei akaariia mai na roto i te au angaanga takinga meitaki, mei to ratou tu inangaro kia oake mai i tetai nooanga noku. I roto ia Okotopa 2001, kua aru mai toku mama iaku i te a o toku tere ki Toko. E toru epetoma i muri mai kua oki atu aia ki Varani, ma te pumaana e te mataora.

Te akameitaki oonu tikai nei au ia Iehova e kua rauka iaku kia tavini i roto ia Toko. Te irinaki nei au e ka oronga ua mai rai a Iehova i ‘ta toku ngakau e anoano ra’ iaku e taangaanga ua atura i te katoatoa o taku ka rauka i roto i tana angaanga.a

[Tataanga Rikiriki i Raro]

[Au Tutu i te kapi 10]

E mataora ua ana rai au me akamanako i te au ngai ateatea ua o Aperika e te oraanga umeremere o te manu taae

[Tutu i te kapi 10]

E aru mai ana a Océane ki te au atoroanga

[Tutu i te kapi 11]

Kua ariki te aronga pakari e kia apai mai au ia Océane ki te au uipaanga