Peea te Meitaki te Autu Anga i te Kino

E tangata meitaki te Ariki ko Davida. E aroa oonu tona no te Atua, te inangaro anga i te tuatua tau, e e aroa no te au tangata akaaka. Inara, kua rave teia ariki i te akaturi ki te vaine a tetai tangata irinakiia nana. E i muri ake i te kite anga a Davida e kua nui iaia ra te vaine ra, ko Bate-seba ra, kua akakoro iora aia i te tamate i tana tane. Kua akaipoipo i reira aia ia Bate-seba i te tauta anga i te uuna i tana au angaanga kino.​—2 Samuela 11:1-27.

I TE akara anga ka rauka i te au tangata i te rave i te meitaki. No teaa ra, i reira, i apa ai ratou no te kino maata? Te akataka maira te Pipiria i te au tumu anga maata e manganui. Te akaari katoa maira te reira e akapeea ra te Atua na roto ia Iesu Karaiti te takore anga i te kino e tuatau ua atu.

Manako no te Kino

Kua akataka mai te Ariki ko Davida e e tai tumu no te au angaanga kino. I muri ake te akakiteia mai anga tana au ara, kua ariki pu tikai aia i te apainga no tana au angaanga. Kua tata tataraara i reira aia e: “I na, i anau mai au ma te ara! e i toia au e taku metua vaine ma te kino.” (Salamo 51:5) Kare e to te Atua ia akakoroanga kia to mai te au metua vaine i te tamariki ma te ara. Inara, te iki anga a Eva raua ko Adamu i te akameameaau i te Atua ra, kua ngere ia raua te mana i te anau mai i te tamariki ara kore. (Roma 5:12) Te maata mai anga te au tangata apa, kua kiteaia mai e e “kino uaorai te manako o te ngakau tangata mei tona tamariki mea riki anga mai.”​—Genese 8:21.

Me kare e akatereia, ka akatupu mai te manako no te kino i te “akaturi, . . . te makitakita, te tamaki, te akarere, te riri, te karo, te pae ke, te tuatua tarevake, Te vareae,” e tetai atu tu kino ta te Pipiria e akataka maira ko te “au angaanga a te kopapa.” (Galatia 5:19-21) I roto i te turanga o te Ariki ko Davida, kua akatika aia i te tu paruparu o te kopapa e kua rave i te poneia, tei akatupu mai i te kaitamaki. (2 Samuela 12:1-12) Ka rauka ua iaia i te patoi i tona manako tau kore. Kareka ra, na te akamanako ua anga i tona inangaro ia Bate-seba, kua aru a Davida i te akaraanga tei akakiteia mai i muri mai e te pipi ko Iakobo: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore. E kua to ta te anoano tika kore ra, anau maira tana ko te ara; e kia rave akaopeia te ara ra, anau maira tana ko te mate.”​—Iakobo 1:14, 15.

Te maata anga o te au ta anga, te au kukumi anga vaine, e te akataneaia anga tei taikuia i roto i te atikara i mua akenei e au akaraanga pakari e eaa te ka tupu mai me tuku te au tangata i te au anoano tarevake kia arataki i ta ratou au angaanga.

Akaketaketaia te Kino e te Kite Kore

Te akakite maira te tupuanga o te apotetoro ko Paulo te rua o te tumu anga i rave ei te au tangata i te au mea kino. Tae atu anga ki te tuatau ka mate ei aia, kua rauka ia Paulo te tu ei tangata maru e te aroa. Kua oronga karapii kore aia iaia uaorai i roto i te angaanga no tona au taeake e te au tuaine Kerititiano. (1 Tesalonia 2:7-9) Inara, i roto i tona oraanga i mua ake na, kua kiteaia aia ma te ingoa ko Saula, “te maata ua ra ïa tana tuatua akamataku e te ta” i teia pupu tangata nei. (Angaanga 9:1, 2) Eaa ra a Paulo i akatika ai e i o ei ki roto i te au angaanga kino tei raveia ki runga i te au Kerititiano mua? “No te mea kua pera kite kore ua au,” i karanga ai aia. (1 Timoteo 1:13) Ae, i muatangana e “maroiroi to [Paulo] i ta te Atua, kare ra i te maroiroi kite.”​—Roma 10:2.

Mei ia Paulo rai, e manganui te au tangata ngakau tae tei piri ana i roto i te au angaanga kino no te kore oki i kite tika tikai i to te Atua ra anoano. Ei akaraanga, kua akamatakite atura a Iesu i tana au pipi e: “E kua vaitata oki te ora, e manako ei te tangata e ta ia kotou na e, kua akamori i te Atua.” (Ioane 16:2) Te kite nei to Iehova Au Kite o teia tuatau i te tuatua mou o ta Iesu au tuatua. I roto i te au enua e manganui, kua takinokinoia ratou e kua taia e te au tangata te karanga ra e te tavini ra i te Atua. I te akara anga, kare taua maroiroi tei arataki keia i akamareka i te Atua mou.​—1 Tesalonia 1:6.

Tei Akamata i te Kino

Kua akataka mai a Iesu i te tumu maata i vai ua ai te kino. Te tuatua anga ki te au arataki akonoanga te inangaro ra i te tamate iaia, kua tuatua aia: “Ko te diabolo to kotou metua, i akatikaʼi kotou i te anoano o to kotou metua ra. E ta tangata aia mei ito mairai.” (Ioane 8:44) No tetai au tumu karapii ra na Satani i akavare ia Adamu raua ko Eva kia meameaau i te Atua. Kua akatupu mai taua meameaau ra i te ara​—e i reira te mate​—ki te tangata ravarai.

Kua akatueraia mai ta Satani ravenga ta na roto i tetai mataara tana i rave kia Iobu. Te oronga anga a Iehova i te tika anga kiaia kia timataia to Iobu tiratiratu, kare a Satani i mareka ua i te akakore mei ia Iobu ra i tana au apinga. Kua ta katoa aia i tana tamariki tino ngauru. (Iobu 1:9-19) I te rau ngauru mataiti ua akenei, kua kitea mai e te au tangata e te tupu maata maira te kino no te tu apa e te kite kore o te tangata ra e no ta Satani tamanamanata anga maata katoa i roto i te au angaanga a te tangata. Te akaari maira te Pipiria e kua “uriia [te Tiaporo] ki vao ki runga i te enua nei, e tana au angela katoa, kua uri katoaia ki vao.” Kua akakite tika tikai mai taua totou e te tapekaia anga a Satani ka tupu maata mai te ‘mate i te enua.’ I te mea e kare e rauka ia Satani i te maro atu i te au tangata kia rave i te au mea kino, e pu oki aia no “tei pikikaa i to te ao katoatoa nei.”​—Apokalupo 12:9, 12.

Akakore Anga i te Manako Kino

Me ka akakore tinamouia te kino mei te taiate tangata, e mea tau kia akakoreia rai te manako kino o te tangata, tona kite kore tikai, e ta Satani akakeu anga. Te mea mua, akapeea ra e rauka ai i te akakore i te manako kino o te tangata nei mei roto mai i tona ngakau?

Kare e rauka i tetai taote me kore i te vairakau a te tangata ra i te rave i taua angaanga. Inara, kua akapapa mai te Atua ko Iehova, i tetai rapakau anga no te ara akatuangaia mai e te tu apa ki te aronga katoatoa te inangaro ra i te ariki i te reira. Kua tata te apotetoro ko Ioane e: “Te mā nei tatou i ta tatou au ara ravarai i te toto . . . o Iesu Mesia.” (1 Ioane 1:7) Te oronga ua mai anga te tangata apa kore ra a Iesu i tona oraanga, tei “maranga iaia uaorai ta tatou ara i tona uaorai kopapa ki runga i te [“rakau tamamae,” NW], kia akono tatou, ko tei matara mai i te ara ra, i te tuatua-tika.” (1 Petero 2:24) Na roto i to Iesu mate akaatinga e akakore atu i te au mea i tupu no ta Adamu ravenga kino. Kua akakite mai a Paulo e kua riro mai a Iesu Karaiti ei “oko i te tangata katoa.” (1 Timoteo 2:6) Ae, kua akatuera mai to Karaiti matenga i te mataara no te au tangata katoa kia rauka akaou mai te tu apa kore tei ngaro ia Adamu.

Inara, penei ka ui koe e, ‘Me ka rauka i to Iesu matenga i etai 2,000 mataiti i topa akenei i te akaoki akaou mai ki te au tangata ra te tu apa kore, eaa ra te kino e te mate i tupu ua ai?’ Te kite anga i te pau anga ki taua uianga ka rauka i te akakore i te rua o te tumu anga no te kino​—te kite kore anga te tangata i te au akakoroanga a te Atua.

Akaketaketaia te Meitaki e te Kite Tika Tikai

Te rauka anga mai te kite tika tikai e eaa ta Iehova raua ko Iesu e rave ra i teianei i te akakore anga i te kino ra penei ka tapuia tetai tangata ngakau tae i te ariki anga i te au angaanga kino ma te kore i kite, me kare tei kino roa atu, te riro anga mai ei tangata patoi i te “tamaki atu ki te Atua.” (Angaanga 5:38, 39) Kare te Atua ko Iehova e akono i te au tarevake o mua ana tei raveia no te kite kore. Te tuatua anga i Atene, kua karanga te apotetoro ko Paulo e: “Kare atura te Atua i akono i taua au tuatau kite kore ra; e teianei ra, te akaue mai nei aia i te tangata ravarai e tataraara, auraka ei ngai toe: No te mea kua akonoia e ia te ra e akava mai ei aia i to te ao katoa nei ma te tuatua-tika, na te tangata i akonoia e ia ra; ko tana i akakite ua mai ki te tangata katoatoa nei, koia i akatu akaou mai iaia mei te mate maira.”​—Angaanga 17:30, 31.

Kua kite mata a Paulo e kua akatuia mai a Iesu mei te mate, no te mea kua tuatua a Iesu tei akatuia mai kia Paulo e kua tapu atura iaia i te takinokino anga i te au Kerititiano mua. (Angaanga 9:3-7) Te rauka anga mai ia Paulo te kite tika tikai no te au akakoroanga a te Atua, kua taui e kua riro tikai mai aia ei tangata meitaki i te aru anga ia Karaiti. (1 Korinetia 11:1; Kolosa 3:9, 10) Kapiti mai, kua tutu aere a Paulo ma te maroiroi i “te evangelia o te basileia nei.” (Mataio 24:14) Vaitata atu ki te 2,000 mataiti mei to Iesu matenga e te tuakaouanga, kua iki a Karaiti mei roto mai i te au tangata ravarai i te aronga, mei ia Paulo rai, kia tutara i te pae iaia i roto i tona Patireia.​—Apokalupo 5:9, 10.

I te anere mataiti i topa akenei e tae ua mai ki teia tuatau, te akatupu maroiroi nei te Au Kite o Iehova i ta Iesu akauenga e: ‘E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te vaerua tapu; Ma te apii atu ia ratou, kia akono i te au mea katoa taku i akaue atu kia kotou.’ (Mataio 28:19, 20) Te aronga tei ariu mai ki teia karere nei ka rauka te manakonako anga no te noo anga e tuatau ua atu ki runga i te enua i raro ake i te kavamani o Karaiti i te rangi ra. Kua tuatua a Iesu e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Te tauturu anga i tetai tangata kia akono i teia kite e meitaki roa atuia i ta tetai tangata ka rave ki tetai ke.

Te aronga tei ariki i teia tuatua meitaki o te Patireia te akaari ra i taua au tu mei te ‘inangaro, te rekareka, te au, te akakoromaki, te takinga-meitaki, te meitaki, te pikikaa kore, te maru, te akono meitaki,’ noatu e te koropiniia ra ratou e te au kino. (Galatia 5:22, 23) I te aruanga ia Iesu, ‘auraka ratou e tutaki atu ki te kino i te tangata ravarai nei.’ (Roma 12:17) Ki te tangata tataki tai, ka tauta ratou ‘kia mate ra te kino i te meitaki.’​—Roma 12:21; Mataio 5:44.

Autu Maata Anga i te Kino

Me ko ratou uaorai, kare e autu i te au tangata te tumu anga maata no te kino, ko Satani te Tiaporo. Inara, kare e roa atu, ka taangaanga a Iehova ia Iesu kia akaparuparu i to Satani mimiti. (Genese 3:15; Roma 16:20) Ka akaue katoa a Iehova ia Iesu Karaiti kia “akapueurikiriki e e akapou” i te au akatereanga porotiki katoa, te maata anga te akatupu ra i te kino maata i roto i te tuatua enua. (Daniela 2:44; Koheleta 8:9) I roto i teia ra akautunga anga te aere maira, ko te aronga katoatoa “kare i kite i te Atua, e tei kore i akarongo i te evangelia o to tatou Atu o Iesu Mesia . . . ka akautungaia mai ïa i te mate mutu kore.”​—2 Tesalonia 1:8, 9; Zephania 1:14-18.

Me takoreia a Satani ratou ko te aronga tei turu iaia ra, na Iesu mei te rangi maira e tauturu i te aronga tei ora mai kia akaou i te enua ki to te reira turanga i muatangana. Ka akatu katoa a Karaiti i te aronga te tau ra i te noo i runga i te enua akaouia. (Luka 23:32, 39-43; Ioane 5:26-29) I te rave anga i te reira, ka tieni aia i etai au tupu anga o te kino te tamamae ra i te au tangata.

Kare a Iehova e maro i te au tangata kia akarongo ki te tuatua meitaki no runga ia Iesu. Inara, ka oronga aia i te tuatau ki te au tangata kia akono i te kite te arataki atura ki te ora. E puapinga maata kia akono koe i teia i teia tuatau! (Zephania 2:2, 3) Me rave koe i te reira, ka kite koe e akapeea i te akakoromaki anga i tetai ua atu kino te akakino ra i toou oraanga. Ka kite katoa koe e akapeea a Karaiti te arataki autu maata anga i te kino.​—Apokalupo 19:11-16; 20:1-3, 10; 21:3, 4.

[Tutu i te kapi 5]

Kua akatika a Saula i te au ravenga kino no te mea kare ona kite tika tikai

[Tutu i te kapi 7]

Te tauturu anga i tetai tangata kia akono i te kite tika tikai i te Atua e meitaki roa atuia ta tetai tangata ka rave ki tetai ke