Akapeea Koe te Rave Anga i te Au Ikianga te Rotai ra ki to te Atua Anoano?
KUA aere atu tetai tangata i Marike ki tetai pangika ma tetai tieki e $25,000. Tona akakoro anga kia akaruke ua i te moni i roto i te pangika no tetai tuatau akatauia. Inara, kua akakite atu te tangata o te pangika kia tuku aia i te reira ki roto i te makete moni, e i reira ra te karanga anga e, kare roa te makete moni e ruti ana i tona puapinga. Kua iki te tangata ra i te aru atu i te akakite anga. Kare i roa roa ana i muri mai, e maata te moni o tana iniveti i ngaro.
Te akatutu maira teia tupuanga e e akaaoanga te rave anga i te au ikianga pakari. Akapeea ra te au ikianga tukeke ta tatou ka aro atu i roto i te oraanga? Ka riro te au ikianga e manganui ei tuke anga i rotopu i te puapinga anga e te puapinga kore anga—e kare e roa atu me kare a muri maira, i rotopu i te ora e te mate. Akapeea, i reira, i papu ei kia tatou e kua rave tatou i te au ikianga pakari?
“Teia te Ara”
I te au ra ravarai, e rave ana tatou i te au ikianga no runga i ta tatou ka kai, ka aao, te ngai ka aere, e te vai atura. I te akara anga e meangiti ua etai au ikianga, inara penei ka tupu mai te au tumatetenga o te kino. Ei akaraanga, te ikianga kia tutungi i tetai avaava ka tai nei taime ra ka taki atu ki tetai peu no tetai tuatau roa no te kai avaava. Auraka rava e ngaropoina ia tatou te puapinga no te au ikianga akaraanga meangiti ua.
Ka akara tatou kiea no te aratakianga me rave i te au ikianga, noatu e akaraanga meangiti ua te reira? Mei teaa atura te umere i te reira kia rauka mai tetai tangata kite irinakiia kia akakite mai kia tatou me aro atu tatou i tetai ikianga ngata! Ka kiteaia e koe taua ako anga. Ko teia ta tetai puka taito ma tetai karere no teia tuatau i karanga mai: “Na to kotou taringa e akarongo i tetai manga tuatua i muri mai ia kotou, i te na ko anga, Teia te ara, e na reira te aere; kia anga kotou i te pae katau, e kia anga kotou i te pae kaui.” (Isaia 30:21) Naai teia au tuatua? E akapeea ra koe i papu ei e kia irinakiia tana aratakianga?
Te kiteaia ra te akapapuanga o runga akenei i roto i te Pipiria, ta te mirioni ua atu i apii ana e i kite mai e kua akauruia mai e te Atua ko Iehova, i Tei Anga maira. (2 Timoteo 3:16, 17) Kua kite a Iehova e akapeea tatou i te maaniia anga, no reira koia te tumu meitaki roa atu no te aratakianga. Ka kite katoa iaia i te tuatau ki mua, i te mea e koia oki “te akakite anga i te openga mei te muatangana mairai, e mei te au tuatau taito mairai i te au mea e kare i tupu ra: i te na ko anga e, Ko taku te tuatua te ka mou.” (Isaia 46:10) No reira, kua akakite tetai tata taramo i tona irinakianga i roto i te Tuatua a Iehova e: “E lamepa taau tuatua i toku nei vaevae, e turama no toku nei arataa.” (Salamo 119:105) Inara, akapeea a Iehova i te tauturu anga ia tatou i te arataki anga i to tatou aerenga ki te ora i roto i te au oraanga manamanata o teia ao i teia tuatau? Akapeea tatou i te rave anga i te au ikianga te rotai ra ki to te Atua anoano?
Taangaanga i te Au Kaveinga Pipiria
Kua oronga mai te Atua ko Iehova ki te au Kerititiano i te au kaveinga tu-Atua kia rauka ia ratou i te rave i te au ikianga tau. Te apii anga i te au kaveinga Pipiria e te taangaanga anga i te reira te akaaiteia ra ki te apii anga i tetai reo e te tuatua anga i te reira. Me kite mai ana koe i te reo, e maata te taime ka kite atu koe me rave tetai tangata i te au tarevake no te karama no te mea kare e tano tikai ana tana tuatua. Penei kare e rauka ia koe i te tou atu na roto i tetai au tuatua taka meitaki tikai o te karama e eaa te tarevake o te tuatua, inara kua kite ra koe e e tarevake. Me apii koe i te au kaveinga Pipiria i te akariro anga i te reira ei tuanga noou uaorai, ka kite koe e kare e tano ana tikai tetai ikianga, kare e rotai ana ki te au kaveinga tu-Atua.
E akamanako ana, ei akaraanga, i te ikianga a tetai tangata mapu ka aro atu i te ikianga no te tu o tona pakoti anga rauru. Kare a te Pipiria akauenga tikai no te akaapa anga i tetai tu pakoti anga rauru. Inara, e akamanako ana i tetai kaveinga Pipiria. Kua tata te apotetoro ko Paulo e: “E te au vaine ra oki, kia akamanea ia ratou uaorai i te kakau e tau ra, ma te akatietie kore, e te akono meitaki; auraka ma te rauru iri, e te auro, e te poe, e te kakau oko maata ra; Ma te tuatua meitaki ra, ko tei tau i te au vaine i mou i te akono i te Atua ra.” (1 Timoteo 2:9, 10) Te tata ra a Paulo i konei no runga i te au vaine, inara te tano ra te kaveinga no te au tane e no te au vaine. Eaa te kaveinga? Kia akaata to tatou tu i te tu tau e te manako tau. No reira ka ui te tangata mapu kiaia uaorai e, ‘Te akaata ra ainei toku tu pakoti anga rauru i te tu tau te tau ra ei Kerititiano?’
E eaa te kaveinga meitaki ka rauka i tetai tangata mapu i te kiriti mai mei te au tuatua te aru maira na te pipi ko Iakobo? “E te au akaturi tane, e te au akaturi vaine, kare kotou i kite e ko te anoano i teianei ao, e enemi ïa i te Atua ra? E teianei ko te anoano e ei oa aia no teianei ao, e enemi ïa tangata no te Atua.” (Iakobo 4:4) E reka kore ana te au Kerititiano i te manakoia anga mai ei oa no teianei ao, e enemi no te Atua. Ka akariro ainei te tu pakoti anga rauru ta tona au oa e reka ra ei akara anga e e oa aia no te Atua me kore e oa no teianei ao? Ka rauka i te tangata mapu te manako ra i te uianga no te tu pakoti anga rauru i te taangaanga i taua au kaveinga tei akatumuia ki runga i te Pipiria te rave anga i tetai ikianga pakari. Ae, te tauturu maira te au kaveinga tu-Atua ia tatou kia rave i te au ikianga. E me matau tatou i te rave i te au ikianga tei akatumuia ki runga i te au kaveinga tu akono i te Atua, ka ngoie ua i rave i te au taopengaanga pakari kare te au tupuanga papu kore.
E manganui te au kaveinga i roto i te Tuatua a te Atua ka kite tatou. E tika rai, penei kare e kitenaia mai e tatou tetai irava te akakite tikai maira i to tatou turanga. Noatu rai, ka rauka ia tatou i te tatau e akapeea etai au tangata i te akarongo anga ki te aratakianga tu-Atua e akapeea tetai i te kopae anga i te au akamatakiteanga tu-Atua. (Genese 4:6, 7, 13-16; Deuteronomi 30:15-20; 1 Korinetia 10:11) Te tatau anga i taua au papaanga e te kimikimi anga i te au tupuanga, ka kite tatou i te au kaveinga tu-Atua te ka tauturu mai ia tatou i te rave i te au ikianga te akamareka ra i te Atua.
E akamanako ana i tetai akaraanga i tetai tuatua poto ua ta Iesu Karaiti i tuatua ana ki tana apotetoro ko Petero. Kua ui atura te au tangata te akaputuputu ra i nga titerama moni e rua no te tero kia Petero e: “Te oronga nei aina to kotou orometua i te diderama?” Kua pau atura a Petero e: “A.” I muri ua ake, kua ui a Iesu kia Petero: “Ei iaai ra te ui ariki no teianei ao e umuumu atu ei i te apinga uipa e te telo? Ei ta ratou uaorai tamariki aina, e ei te tangata ke aina?” Te karanga atu anga a Petero e: “Ei te tangata ke,” kua akakite atu a Iesu kiaia e: “Kua ora mari te tamariki. E aere atura koe ki te pae roto, e titiri atu ei i tetai matau, ka uuti mai ei i te ika muatangana i kai ra; e kia aae koe i te vaa ra, e kitea ia koe tetai setatera, ko taau ïa e apai atu ia ratou na taua katoa, ko te kinokino mai aea ratou ia tatou nei.” (Mataio 17:24-27) Eaa te au kaveinga tu-Atua ta tatou e kite maira i roto i teia papaanga?
Na te uianga i te au tuanga no te au uianga ra, na Iesu i arataki i to Petero manako: Ei Tamaiti na te Atua, kare a Iesu e tutaki i te tero. Noatu e kare a Petero i marama ana i mua ana i taua tumu manako, kua tauturu meitaki atu a Iesu iaia kia marama i te reira. Me aro atu i tetai tarevake ta tetai e rave ra, penei ka iki tatou, i te aru ia Iesu, i te akono tangi aroa atu anga ia ratou kare e kia tou kino atu i to ratou tarevake me kore i te akaapa atu ia ratou.
I kite ei i reira a Petero i te tumu anga no te tutaki anga i te tero maata—auraka oki e turori ke atu i tetai ke. Ko teia tetai kaveinga ka apiiia mai tatou mei teia papaanga. Te akamanako anga i te akava ngakau o tetai ke e puapinga maata atuia i te maro anga i to tatou au tikaanga.
Eaa te akakeu ra ia tatou kia rave i te au ikianga te akaari ra i te ngateitei no te akava ngakau o tetai ke? E aroa i to tatou tangata tupu. Kua apii mai a Iesu Karaiti e te aroa anga i to tatou tangata tupu mei ia tatou uaorai ra ko te rua ia o te akauenga puapinga anake ra ki te aroa anga i te Atua ma to tatou meta katoa. (Mataio 22:39, NW) Inara, te noo nei tatou i roto i tetai ao te akatupu ra i te tu karapii, e te akakeu ra to tatou au tu ara kia karapii tatou. No reira me ka aroa tetai tangata i tona tangata tupu mei iaia uaorai, kia maani ua rai aia i tona manako.—Roma 12:2, NW.
E manganui tei rave i taua au taui anga, e te rave anga i te au ikianga ra te akamanako ra ratou i tetai ke, me e mea maata me kore e meangiti ua. Kua tata a Paulo: “I kapikiia oki kotou, e te au taeake, kia rauka te rangatira; auraka ra taua rangatira ra ei akatupu i ta te kopapa nei, ei kauraro aroa ra to kotou tetai ki tetai.” (Galatia 5:13) Akapeea tatou i te rave anga i te reira? E akamanako ana i tetai tamaine mapu tei neke atu ki tetai taoni i vao mai i te tauturu i te au tangata kia apii i te Tuatua a te Atua. Iaia e tuatua ra ki te au tangata, kua kite mai aia e ko tona au kakau, noatu e tau ua ki te au turanga no te kakau o te oire, kua riro mai ei tuatua anga na te taoni. E tau ua tona kakau e te akamanea anga, inara kua iki aia i te aao i te au kakau kare e karakara roa ana “kia kore e akakinoia te tuatua a te Atua.”—Tito 2:5.
Akapeea koe te ariu anga atu me ka aro atu koe i etai ikianga no runga i toou akamanea anga me kore no tetai tumu ke no taau uaorai e inangaro ra? Papu ia koe e ka mareka mai a Iehova me te akaata ra taau au ikianga i toou manako no te akava ngakau o tetai ke.
Rauka Anga Tetai Akara Anga Mamao
I te pae mai i te au kaveinga Pipiria e te akava ngakau o tetai ke, te rave anga i te au ikianga eaa ta tatou ka akamanako? Noatu e ngata e e o iti ua te mataara o te au Kerititiano, e maata te rangatira ta te Atua i oronga kia ratou i roto i te au kotinga tana i akanoo. (Mataio 7:13, 14) Te anoanoia ra tatou kia akamanako e akapeea ta tatou au ikianga i te akakeu anga i to tatou oraanga pae vaerua, te manako, te manako ngakau, e i to te kopapa no te tuatau ki mua.
Penei te manako ra koe i te ariki atu i tetai angaanga. Penei ake kare e apinga tau kore me kore kare e apinga tuke roa no runga i te tu o te angaanga. Ka tae atu koe ki te au uipaanga Kerititiano e te au uruoaanga. E maata atu te moni taau i tapapa atu ana. Akaperepere maata tikai te pu i toou kite e te inangaro ra i te taangaanga meitaki tikai ia koe. Pera katoa oki, e reka ana koe i te tu o te angaanga te o maira. Ka tapupu ainei tetai apinga ia koe i te ariki anga atu i te angaanga? I na, akapeea me kua kite ke ana koe e ka inangaro maata atu koe i te angaanga. Kua akakiteia mai kia koe e kare koe e maroia kia angaanga roa atu. Inara e oti ei tetai angaanga, ka inangaro ainei koe i te opara maata atu ia koe uaorai i taau e inangaro ra? Ka putuputu ainei taua angaanga roa atu? Ka apai ke ainei te reira ia koe mei toou ngutuare tangata e i te openga ra mei te au angaanga pae vaerua kare tikai koe e inangaro kia topa?
E akamanako ana e akapeea a Jim i te rave anga i tetai ikianga maata no runga i tana angaanga. Kua angaanga aia ma te kore e roiroi e kua neke atu ki runga i te taoonga teitei i roto i te kamupani. Kua riro mai i reira aia ei manitia akaaere no te au angaanga a tana kamupani i te Orieni, e opita akaaere maata no te reira manga opati i Marike, e e mema no te pupu tangata akaaere a te reira au angaanga i Europa. Inara, te tupu mai anga te taui anga i te pae moni i Tiapani, kua kite mai aia e mei teaa ra te puapinga kore te aruaru anga i te moni e te mana. Kua ngaro viviki tana moni i angaanga pakari ana aia. Kua ngaro iaia te akakoroanga i roto i tona oraanga. ‘Eaa taku ka rave e ngauru mataiti mei teia taime nei?’ tana i ui kiaia uaorai. Kua kite mai aia i reira e te akara mou ra tana vaine e te tamariki ki runga i te au akakoroanga puapinga maata tikai i roto i te oraanga. Tere atu te au mataiti, e taokotai ana ratou ki te Au Kite o Iehova. Kua inangaro a Jim kia piri atu ki te tu mataora e te marekaanga ta tona ngutuare tangata e rekareka ra. No reira kua akamata aia i te apii i te Pipiria.
Kare i roa ana kua kite mai a Jim e te arairai ra tona tu oraanga iaia i te aratakianga i tetai oraanga puapinga ei Kerititiano. E teretere putuputu aere ana aia mei Asia, i Marike, e i Europa, e kare e rava ana tona tuatau no te apii i te Pipiria e te taokotai atu ki te au taeake irinaki. Kua aro atu aia i tetai ikianga: ‘Ka rave ua ainei au i te arataki i te oraanga taku e noo ana no te 50 mataiti i topa, me kore ka aruaru ainei au i tetai tu oraanga ou?’ Kua akamanako aia na roto i te pure i te tupuanga mamao o tana ikianga e kua akaruke pouroa i tana au angaanga e tai ua rai kia rauka iaia te tuatau no te au aruaru anga i te pae vaerua. (1 Timoteo 6:6-8) Kua mataora mai aia no tana ikianga, te oronga anga kiaia i te tuatau kia angaanga maata i roto i te au angaanga Kerititiano.
Noatu e maata me kore e meangiti ua te reira, e puapinga maata taau au ikianga. Ko tetai ikianga taau ka rave i teia tuatau penei ka riro ei tukeanga i rotopu i te puapinga anga e te puapinga kore anga, i roto katoa i te oraanga e te mate i te tuatau ki mua. Ka rauka ia koe i te rave i te au ikianga pakari me akamanako ana koe i te au kaveinga Pipiria, te akava ngakau o tetai ke, e te tupuanga mamao o taau angaanga. E rave i te au ikianga te rotai ra ki to te Atua anoano.
[Tutu i te kapi 13]
Penei e au tupuanga kino te au ikianga akara anga meangiti ua
[Tutu i te kapi 14]
Akapeea te au kaveinga Pipiria i te tauturu anga iaia kia iki meitaki?
[Tutu i te kapi 15]
Kua tuatua tangi aroa atu a Iesu kia Petero