Kia Pakari​—Kia Mataku i te Atua!

“Ko te akamataanga o te pakari ra, ko te mataku ïa ia Iehova.”​—MASELI 9:10.

1. Eaa ra te manganui i manako ei e e mea kimingata te manako no te mataku i te Atua?

E TUATAU tetai i manakoia ana e e akameitakiangaia i te akataka anga i tetai tangata ei tangata mataku i te Atua. I teia ra, e manganui tei kite maira i te manako i te mataku i te Atua e e manako taitoia e te manako kimingata. ‘Me ko te Atua te aroa,’ ta ratou ka ui mai, ‘eaa au ka mataku atu ei iaia?’ Kia ratou, e manako papu kore te mataku, e e akaparuparu katoa anga i te manako ngakau. Inara, e tuke roa te aite anga i te mataku tikai i te Atua mei ta tatou ka kite mai, kare i te manako ua e kare katoa i te manako oonu ua.

2, 3. Eaa te kapiti maira ki te mataku tikai i te Atua?

² I roto i te tuatua a te Pipiria e e manako papu tikai te mataku i te Atua. (Isaia 11:3) E tu tapu e e tu akangateitei tikai te reira i te Atua, e kia anoano pakari kia kore e akamareka kore iaia. (Salamo 115:11) Te kapiti maira te reira i te ariki anga e te aru tau anga i te au turanga tau a te Atua e te anoano kia akono i ta te Atua e karanga ra e ko te mea tika e te tarevake. Te tou maira tetai tataanga e te akakite maira taua mataku tau tikai “i tetai tu manako puapinga maata ki te Atua te taki atura ki te tu pakari e te kopae anga i te au kino ravarai.” Tei tau, te akakite maira te Tuatua a te Atua kia tatou e: “Ko te akamataanga o te pakari ra, ko te mataku ïa ia Iehova.”​—Maseli 9:10.

³ E tikai, te kapiti maira te mataku i te Atua ki te au tu e manganui no te angaanga a te tangata. Te kapiti maira te reira kare ki te pakari ua kareka katoa ra ki te rekareka, te au, te apinganui, te akaroa anga i te puke ra, te manakonakoanga, te irinaki anga, e te manako matutu. (Salamo 2:11; Maseli 1:7; 10:27; 14:26; 22:4; 23:17, 18; NW; Angaanga 9:31) Kua kapiti vaitataia ki te akarongo e te aroa. Ko te tika, te o maira to ratou pirianga ki te Atua e ki te au taeake tangata. (Deuteronomi 10:12; Iobu 6:14; Ebera 11:7) Te mataku i te Atua te kapiti maira i te irinaki anga oonu e te manako maira to tatou Metua i te rangi ia tatou e te papa ua ra i te akakore mai i ta tatou au ara. (Salamo 130:4) Ko te aronga kino kare i tataraara e tumu tau to ratou kia mataku i te Atua.a​—Ebera 10:26-31.

Apii Anga kia Mataku ia Iehova

4. Eaa te ka tauturu ia tatou kia ‘apiiia kia mataku ia Iehova’?

⁴ No te mea e e puapinga maata te mataku i te Atua i te rave anga i te au ikianga pakari e te rauka anga mai ta te Atua au akameitakianga, akapeea tatou e ‘apiiia ai kia mataku tau tikai ia Iehova’? (Deuteronomi 17:19) E manganui te au akaraanga no te au tangata e te au vaine tei mataku i te Atua tei tataia i roto i te au Tuatua Tapu “kia kite tatou.” (Roma 15:4) E tauturu ei ia tatou kia marama e eaa tikai te aiteanga kia mataku i te Atua, e akamanako ana tatou i taua au akaraanga no te oraanga o tetai tangata, ko te Ariki ko Davida o Iseraela taito.

5. Akapeea te tiaki anga mamoe i te tauturu anga i te apii ia Davida no runga i te mataku anga ia Iehova?

⁵ Kua kopae ke a Iehova i te ariki mua o Iseraela, ia Saula, no tona mataku i te au tangata kare ra aia i mataku ana i te Atua. (1 Samuela 15:24-26) I tetai tua, no to Davida oraanga e tona pirianga vaitata kia Iehova te akataka maira iaia ei tangata mataku tikai i te Atua. Mei te akamata anga mai o tona oraanga, e maata te taime e tiaki ana a Davida i te mamoe a tona metua. (1 Samuela 16:11) Papu e kua tauturuia a Davida kia kite i te mataku ia Iehova i tona tiaki anga i te mamoe i raro ake i te au etu i te au po ravarai e manganui. Noatu e meangiti ua ta Davida tuanga i kite no te maata o te ao e pini ua ake, kua iki ra aia i te manako tau​—kia oronga i ta tatou akangateitei anga e te akamori anga ki te Atua. “Kia akara au i to au rangi i te angaanga a to maikao-rima na; te marama e te au etu taau i anga ra,” i tata ei aia i muri mai, “eaa te tangata nei, i manako mai ei koe iaia? e ta te tangata nei tamaiti, i akono mai ei koe iaia?”​—Salamo 8:3, 4.

6. Eaa to Davida manako i te kite anga aia i to Iehova tu maata tikai?

⁶ Umere tikai a Davida i tona akaaite anga i tona tu meangiti ki te atea ke o te au rangi. Kare i tamataku ana iaia, na teia kite i akakeu iaia kia akapaapaa ia Iehova e te na ko anga e: “Te tuatua nei te au rangi i te kakā o te Atua; e te akakite nei te reva i te angaanga a tona rima.” (Salamo 19:1) Kua akapiri vaitata atu teia akangateitei anga i te Atua ia Davida kia Iehova e kua akariro ia Davida kia inangaro i te kite e te aru i Tana au arataa apa kore. E akamanako ana i to Davida manako i tona imene anga kia Iehova e: “E maata oki koe, e te angaanga taka ke taau e rave ra: ko koe te Atua, ko koe anake ra. E apii mai koe, e Iehova, i toou ra arataa, kia aere au i taau ra tuatua-mou; kia tavaitai toku ngakau i te mataku anga i to ingoa.”​—Salamo 86:10, 11.

7. Akapeea a Davida i te tauturuia anga kia tamaki atu kia Golia no te mataku anga i te Atua?

⁷ Te tomo anga te Philiseti ki roto i te enua o Iseraela, kua tuatua akavaavaa atu to ratou tumutoa ko Golia e iva e te apa tapuae i te roroa, i te ngati Iseraela, i te karanga anga e: ‘E iki i tetai tangata kia tata maua! Me re aia, ka tavini matou ia kotou.’ (1 Samuela 17:4-10) Kua mataku a Saula e tona vaeau katoa​—ko Davida ra, kare. Kua kite aia e ko Iehova te ka matakuia, kare ko te tangata, noatu e eaa to ratou ririnui. “Te aere atu nei ra au kia koe ma te ingoa o Iehova Sabaota ra,” i akakite ei a Davida kia Golia, “e ka kite teianei aronga maata katoa ra e, e tika ia Iehova kia akaora, auraka ua atu ei koke, auraka ei korare: na Iehova oki te tamaki.” Ma tana maka e te toka okotai​—e ma ta Iehova tauturu​—kua ta iora a Davida i te tuputupua.​—1 Samuela 17:45-47.

8. Eaa ta te au akaraanga o te Pipiria no te aronga tei mataku i te Atua e apii maira kia tatou?

⁸ Penei ka aro atu tatou i te au arai anga me kore i te enemi kino roa atu mei ta Davida i aro atu ana. Eaa ta tatou ka rave? Ka rauka ia tatou i te akono i te reira mei te tu rai ta Davida e ta tetai aronga akarongo mou taito i rave ana​—ma te mataku i te Atua. Ka autu te mataku i te Atua i te mataku i te tangata. Kua raurau te tavini akarongo mou a te Atua ko Nehemia i tona au taeake Iseraela, tei raro ake i te taomi anga a te aronga patoi e: “Auraka kotou e mataku ia ratou: e akamaara [ia Iehova], i te maata e te matakuia ra.” (Nehemia 4:14) Ma ta Iehova turu anga, kua autu a Davida, a Nehemia, e tetai au tavini akarongo mou o te Atua i te rave i ta ratou au tukuanga angaanga tei orongaia mai e te Atua. Ma te mataku i te Atua, ka rauka katoa ia tatou.

Aro Atu Anga i te Au Manamanata ma te Mataku i te Atua

9. I raro ake i teea au turanga i akaari ei a Davida i te mataku i te Atua?

⁹ I muri ake i te ta anga a Davida ia Golia, e maata ta Iehova autu anga i oronga kiaia. Inara, kua na mua a Saula vareae i te tauta rapurapu e te kikite, e i te openga iora ma tetai pupu vaeau i te tamate ia Davida. Noatu e kua akapapu a Iehova kia Davida e ka riro aia ei ariki, e maata te au mataiti kua oro ke atu, kua tamaki, e kua tapapa a Davida i to Iehova tuatau tau kia akariro iaia ei ariki. I roto i teia au mea i tupu, kua akaari a Davida e te mataku ra aia i te Atua mou.​—1 Samuela 18:9, 11, 17; 24:2.

10. Akapeea a Davida i te akaari anga i te mataku i te Atua i te aro atu anga i te kino?

¹⁰ I tetai atianga, kua kimi a Davida i te akapuanga kia Akisa, te ariki o te oire o Philiseti o Gata, te kainga o Golia. (1 Samuela 21:10-15) Kua akaapa te tavini o te ariki ia Davida e e enemi aia no to ratou enua. Akapeea a Davida i te akara atu anga i tera turanga kino? Kua pure akatenga aia kia Iehova. (Salamo 56:1-4, 11-13) Noatu e kua akapikikaa maki auouo aia kia ora mai aia, kua kite a Davida e ko Iehova tikai tei akaora mai iaia na te akameitakianga i tana au tauta anga. No te irinaki ngakau katoa o Davida kia Iehova e te manako matutu i roto iaia ra te akaari maira e e tangata mataku tikai a Davida i te Atua.​—Salamo 34:4-6, 9-11.

11. Akapeea tatou i te akaari anga i te mataku i te Atua i raro ake i te timata anga, mei ia Davida rai?

¹¹ Mei ia Davida rai, e akaari tatou i te mataku i te Atua na te irinaki anga ki runga i tana taputou kia tauturu mai ia tatou kia akakoromaki ua tatou i to tatou au manamanata. “E uri atu i to aerenga ki runga ia Iehova; e irinaki iaia, e nana e akatupu i te reira,” i karanga ai a Davida. (Salamo 37:5) Kare te aite anga o teia e kia oronga ua tatou i to tatou au manamanata kia Iehova e kare tatou i rave ana i tetai ravenga no runga i te reira e te tapapa atu anga iaia kia akatikatika mai i to tatou au manamanata. Kare a Davida i pure ua ana i te tauturu ki te Atua e oti kua akaruke ua atu i te reira. Kua taangaanga aia i te au tu maroiroi e te au tu karape ta Iehova i oronga kiaia kia akatikatika i tona au manamanata. Inara, kua kite a Davida e kare te au tauta anga anake ra a te tangata e puapingaia. Pera katoa rai kia tatou. I te rave anga i te au mea ravarai ta tatou ka rauka i te rave, e akaruke ra tatou e na Iehova e rave i te toenga. Ko te tika, e maata te taime kare e rauka ia tatou i te rave i tetai au mea mari ra kia irinaki kia Iehova. Ko teia te taime e akaari ei tatou i to tatou uaorai tu mataku i te Atua. Ka akapumaanaia tatou i ta Davida tuatua ngakau tae e: “Te tuatua-muna a Iehova ra, tei te aronga ïa i mataku iaia ra.”​—Salamo 25:14.

12. No teaa ra i anoanoia ai kia akamanako pakari tikai tatou i ta tatou au pure, e eaa ra te tu manako kare tatou e aru?

¹² No reira, e akamanako ana tatou i ta tatou au pure e to tatou pirianga ki te Atua ei mea puapinga. Me pure tatou kia Iehova, kia irinaki tatou e “koia tei tutaki mai i te aronga i kimi tikai iaia.” (Ebera 11:6; Iakobo 1:5-8) E me tauturu mai aia ia tatou, ‘kia mareka oki tatou,’ mei ta te apotetoro ko Paulo i ako mai kia tatou. (Kolosa 3:15, 17) Auraka roa tatou kia riro mai mei te aronga tei akatakaia mai e tetai Kerititiano akatainuia ma te kite pakari: “E manako ana ratou i te Atua mei tetai tavini i te rangi,” i karanga ai aia. “Me inangaro ratou i tetai apinga, ka patangi ua ratou i to ratou mangamanga rima kia aere mai aia. E me rauka ia ratou ta ratou e inangaro ra, inangaro ratou iaia kia akaatea atu.” Te akaari maira te reira tu manako e kare e mataku i te Atua.

Te Ngaro Anga te Mataku i te Atua

13. I naea ra a Davida i akaari akangateitei kore ei i te Ture a te Atua?

¹³ I te kite anga i ta Iehova tauturu i te tuatau tumatetenga kua akaoonuia to Davida mataku i te Atua e kua akaketaketaia tona irinaki anga kiaia. (Salamo 31:22-24) Inara, e toru atianga kitea meitakiia, kua ngaro te mataku o Davida i te Atua, i te taki anga atu ki te au tumatetenga kino pakari. Te mea mua tei tupu, i te akapapa anga aia kia apainaia te aruna koreromotu a Iehova kia Ierusalema na runga i tetai pereoo, e kare kia amoia na runga i te pakuivi o te au puke tangata ngati Levi, tei akaueia e te Ture a te Atua. Te mou anga atu a Uza, koia te arataki i te pereoo, i te Aruna kia kore e ngaueue, mate atura aia i reira no tana “apa.” Ae, e ara kino tikai ta Uza i rave, inara ko te mea maata roa atu, kare a Davida i akono tamou ana i te akangateitei i te Ture a te Atua no reira i tupu ei taua tumatetenga ra. Te aite anga i te mataku i te Atua ko te rave anga i te au mea te tau ra ki tana i akanoonoo.​—2 Samuela 6:2-9; Numero 4:15; 7:9.

14. Eaa tei tupu mai i to Davida tare anga ia Iseraela?

¹⁴ I muri mai, kua akakokoia mai a Davida e Satani, kia tare aia i te au tangata tamaki o Iseraela. (1 Paraleipomeno 21:1) I te rave anga i te reira, te akaari maira e kua ngaro to Davida mataku i te Atua, tei tupu mai e 70,000 ngati Iseraela tei mate. Noatu e kua tataraara a Davida i mua i te aroaro o Iehova, e maata te mamae tei tupu kiaia e ki te au tangata.​—2 Samuela 24:1-16.

15. Na teaa i akatupu ia Davida kia rave i te ara no te ainga?

¹⁵ Te ngaro poto ua anga to Davida mataku i te Atua e kua taki atu iaia kia piri atu ki roto i tetai pirianga tau kore kia Bate-seba, te vaine a Uria. Kua kite a Davida e e tarevake te akaturi me kore te morimori anga i te vaine a tetai tangata ke. (Exodo 20:14, 17) Kua akamata mai te manamanata i te kite atu anga a Davida ia Bate-seba e pai ra. Tikaanga tikai na te mataku i te Atua e akakeu viviki ia Davida kia anga ke atu i tona nga mata e tona manako ki tetai ngai ke. Inara, i te “akara ua atu” anga a Davida iaia kua akatupuia te inangaro ua atu kia autu atu i tona mataku i te Atua. (Mataio 5:28; 2 Samuela 11:1-4) Kua ngaropoina ia Davida to Iehova pirianga vaitata i roto i tona oraanga.​—Salamo 139:1-7.

16. Eaa te au tumatetenga ta Davida i kite mai no tana au angaanga tarevake?

¹⁶ Te pirianga tau kore o Davida kia Bate-seba kua anauia mai tetai tamaiti. Kare i roa ana i muri mai, kua tono atu a Iehova i tana peroveta ko Natana kia akaari pu ua atu i ta Davida ara. Kua rako tangata mai aia, e kua rauka akaou mai to Davida mataku i te Atua e kua tataraara. Kua pati akatenga aia kia Iehova e auraka e tuaru me kore e akaatea i Tona vaerua tapu mei iaia. (Salamo 51:7, 11) Kua akakore a Iehova i ta Davida ara e kua akamama mai i te utunga, inara kare Aia i paruru ana ia Davida mei te au tumatetenga ravarai o te kino no tana au angaanga. Kua mate ta Davida tamaiti, e mei reira mai kua tupu te mamae ngakau e te tumatetenga ki tona ngutuare tangata. E tutaki anga maata tikai te reira no te ngaro anga tona mataku i te Atua!​—2 Samuela 12:10-14; 13:10-14; 15:14.

17. E akatutu mai i te mamae ngakau ta te au angaanga a te ara e akatupu ra.

¹⁷ I teia tuatau, te mataku kore anga i te Atua i roto i tetai au manako akono tau penei ka kino atu e te roa te tupu anga te kino o te au tumatetenga. E akamanako ana i te mamae ngakau o tetai vaine mapu i te kite anga aia e kare tana tane Kerititiano i tiratiratu ana kiaia i tona angaanga anga i tetai enua ke. Kua opuku poitirere e ma te mii, kua tapoki aia i tona mata ki tona nga rima e kua aue. Eaa ra te roa e rauka akaou mai ei i tana tane tona irinaki anga e te akangateitei anga? Ka rauka taua au tumatetenga kino tikai i te kopaeia na te mataku tikai anga i te Atua.​—1 Korinetia 6:18.

Te Mataku i te Atua te Tapu nei ia Tatou kia Kore e Rave i te Ara

18. Eaa ta Satani akakoroanga e te au ravenga angaanga?

¹⁸ Te takore viviki tikai nei a Satani i te au tu puapinga no te tu akono tau o teianei ao, e te inangaro tikai ra aia i te akakino i te au Kerititiano mou. E rave ei i te reira, te taangaanga ra aia i te mataara te aere tika ra ki to tatou ngakau e te manako​—na roto i to tatou tu kopapa, e to tatou nga mata e te nga taringa. (Ephesia 4:17-19) Akapeea koe i te ariu anga atu me aro poitirere atu koe i te au tutu tau kore, te au tuatua tau kore, me kore i te au tangata tau kore?

19. Akapeea te mataku i te Atua i te tauturu anga i tetai Kerititiano kia autu i te timataanga?

¹⁹ E akamanako ana i to Andréb turanga, e tangata Kerititiano pakari, e metua tane e e taote vairakau i Europa. Ia André e angaanga ra i te po i roto i te are maki, kua tapiripiri te au taeake vaine angaanga i te au aenga pepa​—tei akamaneaia ki te au tutu pukuatu​—ki runga i tona pute urunga, i te pati anga iaia kia piri atu kia ratou i roto i te ainga. Kua patoi pakari tikai a André i te akamanako atu i ta ratou akameamea anga. Tei maata atu, kia akaatea mai iaia uaorai mei te ngai kino, kua kimi aia i tetai angaanga i tetai ngai ke. Te mataku anga i te Atua kua riro mai ei mea pakari tikai e kua taki atu ki te au akameitakianga, i teia ra te angaanga ra a André i tetai taime i roto i te opati manga o te Au Kite o Iehova i tona enua.

20, 21. (a) Akapeea te mataku i te Atua i te tauturu anga ia tatou kia kore e rave i te ara? (e) Eaa te ka akamanakoia i roto i te atikara e aru mai nei?

²⁰ Ka taki atu te manakonako anga i te au manako tarevake ki tetai turanga o te manako te inangaro anga tetai tangata i te akaruke i tona pirianga akaperepere ma Iehova kia taui atu ki tetai apinga kare ona tika anga. (Iakobo 1:14, 15) I tetai tua, me mataku tatou ia Iehova, ka akaatea mai tatou​—ka aere ke mai​—mei te au tangata, te au ngai, te au angaanga, e te tamataoraanga te ka akatupu ia tatou kia akakore i to tatou tu matakite no te tu akono tau. (Maseli 22:3) Noatu eaa ua atu te tu akama me kore te akaatinga te ka o mai, e meangiti ua te reira me akaaiteia ki te ngere anga i te mareka anga o te Atua. (Mataio 5:29, 30) Te kapiti tikai maira te mataku anga i te Atua e auraka rava e akatuera atu ia tatou uaorai ki tetai mea tau kore, kapiti anga mai te ravenga ainga viivii i roto i tetai tu, kareka ra te ‘akaariu ke anga i to tatou mata kia kore e akara i te mea puapinga kore.’ Me rave tatou i te reira, ka rauka ia tatou i te irinaki kia Iehova kia ‘akamaroiroi ia tatou’ e te oronga anga mai i te au mea ravarai ta tatou e anoano tikai ra.​—Salamo 84:11; 119:37.

²¹ E tikai rai, e aerenga pakari ia te mataku tikai anga i te Atua. Ko te tumu katoaia no te mataora mou. (Salamo 34:9) I roto i te atikara e aru mai nei ka akamarama meitakiia mai teia.

[Au Tataanga Rikiriki i Raro]

Ka Rauka Ainei ia Koe te Akataka?

• Eaa te au tu Kerititiano ta te mataku i te Atua e kapiti maira?

• Akapeea te mataku i te Atua i te akakore anga i te mataku i te tangata?

• Akapeea tatou i te akaari anga e e manako tau to tatou no te pure?

• Akapeea te mataku i te Atua i te tapu anga ia tatou kia kore tatou e rave i te ara?

[Tutu i te kapi 23]

Kua apiiia a Davida i te mataku i te Atua na te akara anga ki ta Iehova angaanga

[Tutu i te kapi 24]

Akapeea koe i te ariu anga atu me aro poitirere atu koe i tetai turanga timata anga?