Kia Mataku ia Iehova​—Kia Mataora!

“E ao to te tangata i mataku ia Iehova.”​—SALAMO 112:1.

1, 2. Eaa ta te mataku ia Iehova ka oronga mai?

KARE te mataora e rauka ngoie ua mai. Tei runga te mataora tika tikai i te rave anga i te au ikianga tau, te rave anga i te mea tika, e te anga ke mai anga mei te tarevake. Kua oronga mai Tei Anga mai ia tatou, a Iehova, i tana Tuatua, te Pipiria, ei apii ia tatou e akapeea tatou e rekareka ai i te mataara meitaki roa atu o te oraanga. Na te kimi anga e te aru anga i ta Iehova akauenga, e te akaari anga i te mataku i te Atua, ka mareka e ka mataora tikai tatou.​—Salamo 23:1; Maseli 14:26.

² I roto i teia atikara, ka akamanako ana tatou i te au akaraanga Pipiria e te au akaraanga o teia tuatau, te akaari maira e akapeea te mataku tikai i te Atua i te oronga anga mai i te maroiroi, kia patoi atu i te taomianga i te rave i te tarevake e te maroiroi kia rave i te mea tika. Ka kite tatou e ko te mataku i te Atua te oronga maira i te mataora kia tatou na te akakeu anga ia tatou kia akatikatika i tetai aerenga tarevake, mei ta te Ariki ko Davida i rave ana. Ka kite katoa tatou e te mataku ia Iehova ra e tuanga akaperepereia ta te nga metua ka oronga atu ki ta ratou tamariki. E tika rai, te akapapu maira te Tuatua a te Atua kia tatou e: “E ao to te tangata i mataku ia Iehova.”​—Salamo 112:1.

Akatupu Akaou Anga i te Mataora Tei Ngaro

3. Eaa tei tauturu ia Davida kia akaoraia mai mei tana au ara?

³ Mei tei akamanakoia ana i roto i te atikara i mua akenei, e toru atianga kitea meitakiia kare a Davida i akaari ana i te mataku i te Atua e kua ara aia. Inara, i tona ariu anga ki ta Iehova ako anga kua akaariia mai e e tangata mataku tikai aia i te Atua. No tona tu tapu e te akangateitei anga i te Atua i akakeu ei iaia kia akakite i tana apa, te akatikatika anga i tona aerenga, e te akatumu akaou anga i tetai pirianga meitaki ma Iehova. Noatu e kua apai mai tana au tarevake i te mamae ki runga iaia e ki tetai ke, no tona tu tataraara papu tikai kua rauka mai ta Iehova turuanga e te akameitakianga. Ka rauka i to Davida akaraanga i te tuku papu mai i te maroiroi ki te au Kerititiano i teia tuatau te ka rave i te au ara kino pakari.

4. Akapeea te mataku i te Atua i te tauturu anga i tetai tangata kia rauka akaou mai te mataora?

⁴ E akamanako ana i to Sonja turanga.a Noatu e kua tavini ana ei vaine tutu evangeria tamou, kua o atu a Sonja ki roto i tetai kapiti anga kino, kua piri atu ki roto i tetai tu kare e tau ana ei Kerititiano, e kua akaateaia mai mei te putuputuanga Kerititiano. Kua rako tangata maira, kua rave a Sonja i te au mea ravarai tei tau kia akatikatika akaou i tona pirianga kia Iehova. Kare i roa ana, kua akaoki akaouia mai aia ki roto i te putuputuanga. I roto i teia turanga katoa, kare roa a Sonja i akaruke ana i tona anoano i te tavini ia Iehova. I te openga iora, kua tomo akaou atu aia ki roto i te angaanga orometua tamou. I muri mai, kua akaipoipo aia i tetai tangata pakari e Kerititiano memeitaki, e te tavini mataora ra raua i teianei i roto i te putuputuanga. Noatu kua tataraara a Sonja no tona aere ke anga mei te arataa Kerititiano, mataora aia no tona mataku i te Atua e kua tauturuia aia kia oki akaou mai.

Kia Mamae Auraka ra kia Ara

5, 6. E akamarama mai e akapeea e no teaa ra a Davida i kore ei e ta ia Saula e rua taime.

⁵ Ae, e meitaki atu te mataku i te Atua i te tauturu anga i tetai kia kopae ke i te rave i te ara kino pakari. Tano rai teia kia Davida. I tetai tuatau i topa, te arumakiia anga a Davida e te pupu vaeau e tauatini ua atu, kua tomo atu a Saula ki roto i tetai ana​—i roto i te ana ta Davida e pipini ra e tona au pupu tangata. Kua maro atu te au tangata o Davida iaia kia ta ia Saula. Kare ainei e te oronga mai nei a Iehova i to Davida enemi kino roa atu ki roto i tona nga rima? Kua totoro marie atu a Davida ki ko ia Saula e kua tipu i tona tapa kakau. No to Davida mataku i te Atua, noatu e kare e kino roa ana taua angaanga ra kua akakinokinoia tona akava ngakau. Kua tuaru atura a Davida i tona au tangata taitaia, i te karanga anga e: “Kia akakore mai oki a Iehova, auraka au kia pera ki toku pu, ki to Iehova ra tangata i akatainuia ra, auraka toku rima kia rave ua atu iaia, ko tei akatainuia oki aia e Iehova ra.”b​—1 Samuela 24:1-7.

⁶ I tetai atianga i muri mai, kua akatu a Saula i te puakapa i te po, koia e tona au tangata ra kua “moe tinainai no ko mai ia Iehova.” Kua aere atu a Davida raua ko tana nepeu mataku kore ko Abisai ki rotopu i te puakapa e kua tu ki mua ia Saula iaia e moe ra. Kua inangaro a Abisai i te tamate atu ia Saula. Kua tapu ra a Davida ia Abisai, i te ui anga e: “Koai ïa tangata kare e ara kia tāki i tona rima ki runga e ta i to Iehova tangata i akatainuia ra?”​—1 Samuela 26:9, 12.

7. Eaa tei tapu ia Davida kia kore e ara?

⁷ No teaa ra i kore ei a Davida i ta ia Saula e rua taime? No te mea e maata atu tona mataku ia Iehova i tona mataku ia Saula. No tona mataku tau i te Atua, kua ariki a Davida i te mamae, me te anoanoia ra te reira, auraka ra kia ara. (Ebera 11:25) Kua irinaki tikai aia e ka akono a Iehova i Tona au tangata e iaia katoa. Kua kite a Davida e te akarongo anga e te irinaki anga ki te Atua ka orongaia mai te mataora e te au akameitakianga e manganui, inara te kopae anga i te Atua ka tupu mai to te Atua mareka kore ki runga iaia. (Salamo 65:4) Kua kite katoa aia e ka akatupu te Atua i Tana taputou kia akariro ia Davida ei ariki e ka akaatea aia ia Saula i te tu i tana ka rave e i Tona uaorai tuatau.​—1 Samuela 26:10.

Mataku Anga i te Atua te Oronga Maira i te Mataora

8. Akapeea to Davida tu i raro ake i te taomianga i riro ei ei akaraanga?

⁸ Ei au Kerititiano, ka kite tatou i te tu avirianga, te takinokino anga, e tetai atu au timataanga. (Mataio 24:9; 2 Petero 3:3) I tetai au taime, penei ka kite tatou i te au turanga ngata te kapiti maira i te au taeake akamori. Inara, kua kite tatou e te kite maira a Iehova i te au mea ravarai, e i te tuatau tau, ka akatikatika aia i te au tumu ravarai kia tau ki tona anoano. (Roma 12:17-21; Ebera 4:16) No reira, kare e mataku atu i te aronga e patoi maira ia tatou, kia mataku ra tatou i te Atua e kia akara atu kiaia kia akaora mai ia tatou. Mei ia Davida rai, kare tatou e akaoko ia tatou uaorai, kare katoa tatou e akaoko i te au kaveinga tika kia kopae ke atu i te mamae. I te openga iora, te oronga maira teia i te mataora. Ka akapeea ra?

9. E oronga mai i tetai akaraanga e i akapeea te mataku i te Atua i te akatupu anga i te mataora noatu te takinokinoanga.

⁹ “E akamanako ana au i tetai mama e tana tamaine mapu tei patoi i te oko mai i te au kati a te poritiki no to raua tu neutara ei Kerititiano,” i akakite mai ei tetai mitinari kua roa te tavini anga i Aperika. “Kua takinokino tikai ia raua e tetai pupu tane e kua akakiteia atu e kia oki raua ki te kainga. Ia raua e aere ra, kua tauta te mama i te akapumaana i tana tamaine e aue ra, te tauta ra kia marama e eaa teia i tupu ei kia raua. Kare raua i rekareka ana i tera taime, inara e akava ngakau ma to raua. I muri mai, kua mataora tikai raua e kua akarongo raua ki te Atua. Naringa raua i oko mai i te au kati, ka rekareka taua pupu tangata ra. E au moina vai venevene ta te au tangata ka oake atu kia raua e ka uraura takapini aere i te pae ia raua e tae ua atu ki te kainga. Inara, me kite te tamaine e tona mama e kua akatika ua atu raua, riro mai raua ko tetai nga tangata maromaroa rava atu i teianei ao.” Kua paruruia raua no to raua mataku i te Atua.

10, 11. Eaa te au tupuanga meitaki tei rauka mai i tetai vaine no te mataku i te Atua?

¹⁰ I te akaari anga i te mataku i te Atua ka tupu katoa te mataora me aroia atu te au timataanga te o maira te akangateiteianga no te tu tapu o te oraanga. Te nui anga a Mary i te toru o tana tamariki, kua maro te taote kia titiri aia i te pepe. “E kino tikai toou turanga,” i karanga ai aia. “A tetai ua atu tuatau ka tupu te manamanata kia koe e ka mate koe i roto i te 24 ora. Ka mate katoa te pepe. Noatu eaa te turanga, kare e papu e ka meitaki ua te pepe.” E apii ana a Mary i te Pipiria ma te Au Kite o Iehova inara kare i papetitoia ake. “Noatu rai,” i karanga ai a Mary, “kua iki au i te tavini ia Iehova, e kua tauta au i te akarongo ua atu kiaia, noatu e eaa te ka tupu mai.”​—Exodo 21:22, 23.

¹¹ I te tuatau o tona nui anga, kua apii pakari a Mary i te Pipiria e te akono anga i tona ngutuare tangata. I te openga iora kua anauia mai te pepe. “E manga ngata rai te anau anga mai i to te nga tamariki o mua ake, inara kare e maata roa ana te au manamanata i tupu mai,” i akakite ei a Mary. No te mataku i te Atua i tauturu ei ia Mary kia akono i tetai akava ngakau meitaki, e kare i roa ana kua papetitoia aia. Te maata anga mai te pepe, kua apii katoaia aia kia mataku ia Iehova, e te tavini ra aia i teianei i ko i tetai o te au opati manga o te Au Kite o Iehova.

‘E Akamaroiroi ia Koe Uaorai na Roto ia Iehova’

12. Akapeea te mataku i te Atua i te akamaroiroi anga ia Davida?

¹² Kare to Davida mataku ia Iehova i tapu ua iaia kia kore aia e rave i te tarevake. I raro ake i te au turanga ngata kua akaketaketaia aia kia iki papu tikai ma te pakari. Okotai mataiti e a marama, kua akaruru a Davida e tona au tangata mei ia Saula i Zikelaga i vao ake ia Philiseti. (1 Samuela 27:5-7) I te aere ke atu anga te au tane, kua tutungiia te oire e te pupu ta tangata ngati Amaleka e kua apaina keia atu ta ratou au vaine, te au tamariki, e te au manu. Te oki mai anga ratou e te kite anga eaa tei tupu, kua aue a Davida e tona au tangata. Kua taui atu to ratou aue anga ki te riri, e kua tuatua to Davida au tangata e kia pepeiia aia ki te toka. Noatu te manamanata, kare a Davida i taitaia ana. (Maseli 24:10) No tona mataku i te Atua i akakeu iaia kia anga kia Iehova, e ‘kua akamaroiroi aia iaia uaorai na roto ia Iehova.’ Ma te tauturu a te Atua, kua peke ia Davida e tona au tangata te autu i te ngati Amaleka e kua rauka akaou mai te au apinga ravarai.​—1 Samuela 30:1-20.

13, 14. Akapeea te mataku i te Atua i te tauturu anga i tetai Kerititiano kia rave i te au ikianga meitaki?

¹³ Te aro katoa nei te au tavini o te Atua i teia tuatau i te au turanga te umuumuia ra te irinaki anga ki runga ia Iehova e te maroiroi kia iki papu tikai. E akamanako ana ia Kristina ei akaraanga. I tona mapu mai anga, kua apii ana a Kristina i te Pipiria ma te Au Kite o Iehova. Inara kua inangaro aia kia riro mai aia ko tetai tamaine akatangi piano i te ngai tamataoraanga, e kua rave aia i tetai aka tauta anga kia meitaki atu no runga i te reira. Tei maata atu, kua manako emiemi aia no runga i te tutu aere anga e no reira kua mataku aia i te ariki atu i te au apainga te ka rauka mai i muri ake i te papetitoanga. Ia Kristina e rave ua ra i te apii i te Tuatua a te Atua, kua akamata aia i te kite mai i te akakeu anga a te reira. Te apii ra aia i te mataku ia Iehova, e kua kite mai aia e te inangaro maira a Iehova i tona au tavini kia aroa iaia ma to ratou ngakau, te manako, te vaerua, e te ririnui katoa. (Mareko 12:30) Na teia i akakeu iaia kia akatapu iaia uaorai kia Iehova e kia papetitoia.

¹⁴ Kua pati a Kristina i te tauturu kia Iehova kia tere atu aia ki mua i te pae vaerua. “Kua kite au e i roto i te oraanga o tetai tangata akatangi piano e o mai ana te aere putuputu anga ki tetai ngai e tei koreromotuia kia rave i te akatangi anga e tere atu ki te 400 ngai akatangi anga i te mataiti okotai,” ta Kristina i akamarama mai. “No reira kua iki au kia riro au ei puapii kia rauka oki i te turu iaku uaorai i te pae o te moni e te tavini anga ei vaine tutu evangeria tamou.” I taua taime, kua akapapa takereia a Kristina kia rave i tana akatangi anga mua i te are uipaanga tamataoraanga tei kitea meitakiia i tona enua. “Kua riro mai taku akatangi anga mua ko taku akatangi anga opengaia,” i akakite mai ei aia. Kua akaipoipo a Kristina i teianei ki tetai tangata pakari Kerititiano. Te tavini kapiti ra raua i teianei i ko i tetai au opati manga o te Au Kite o Iehova. Te mataora nei aia e kua oronga mai a Iehova i te maroiroi kia rave aia i te au ikianga tau e ka rauka iaia i teianei i te taangaanga i tona taime e tona maroiroi i roto i ta Iehova angaanga.

Tetai Tuanga Akaperepereia

15. Eaa ta Davida e inangaro ra i te oronga atu ki tana au tamariki, e akapeea aia i te rave anga i te reira?

¹⁵ “E aere mai ana, e te au tamariki ra, e akarongo mai iaku,” i tata ei a Davida. “Ka apii au ia kotou kia mataku ia Iehova.” (Salamo 34:11) Ei metua ra, kua tauta a Davida i te oronga ki tana au tamariki i tetai tuanga akaperepereia​—te mataku tikai, te mataku tau, te mataku katoa ia Iehova. Na roto i te au tuatua e te au angaanga, kua akatutu mai a Davida ia Iehova, kare i te Atua maro e te rikarika, te tapapa ra i te kimi i tetai apa no runga i Tana au ture, mari ra ei Metua aroa, te manako maira e te akakore maira i te ara a Tana au tamariki i te enua nei. “Koai oki tei kite i tana uaorai au ara?” i ui ei a Davida. Ei reira, i te akakite anga mai i tona irinaki anga e kare a Iehova e akara putuputu maira i ta tatou au tarevake, kua tuatua aia e: “E tamā mai koe iaku i te au ara kitea koreia nei.” Kua papu ia Davida e me tuku aia i tana tauta anga pakari, ka arikiia mai tana au tuatua e tona au manako e Iehova.​—Salamo 19:12, 14.

16, 17. Akapeea te au metua i te apii anga i te tamariki i te mataku ia Iehova?

¹⁶ Kua riro a Davida ei akaraanga no te au metua i teia tuatau. “Kua utuutuia maua e to maua nga metua na roto i tetai tu te akariro anga i te tuatua mou ei mea mataora,” i karanga ai a Ralph, te tavini ra raua ko tona teina i ko i tetai opati manga o te Au Kite o Iehova. “I to maua tamariki anga, kua kapiti mai raua ia maua ki roto i ta raua au uriurianga no runga i te au angaanga a te putuputuanga, e kua mataora maua i te tuatua mou, mei ia raua rai. Kua utuutu raua ia maua kia irinaki e ka rauka ia maua i te rave i te au mea meitaki i roto i ta Iehova angaanga. Ko te tika, e maata te au mataiti e noo ana to matou pamiri i tetai enua te anoano maataia ra te au papuritia o te Patireia, e kua tauturu i te akanoo i te au putuputuanga ou.

¹⁷ “Tei tauturu ia maua i runga i te mataara tika kare no te maata i te au ture, no te mea ra e ki to maua nga metua, e mea tika tikai a Iehova e takinga meitaki e te meitaki. Kua inangaro raua i te kite meitaki atu ia Iehova e te akamareka atu iaia, e i apiiia mai ei maua no to raua mataku tikai anga i te Atua e te inangaro iaia. Noatu e kua rave maua i tetai mea tarevake, kare to maua nga metua i akariro ana e kia manako atu maua e kare a Iehova e inangaro mai ana ia maua; kare katoa raua i tuku riri mai ana i te au kotinga kare e anoanoia ana ki runga ia maua. Te maata anga o te taime, kua akanoo raua ia maua e kua tuatua mai kia maua, i tetai taime kua tuatua mai a Mami ma te roi mata i roto i tona mata, i te tauta anga i te itae i to maua ngakau. E kua puapingaia te reira. Kua apiiia mai maua na roto i te au tuatua e te au angaanga a to maua nga metua e ko te mataku ia Iehova ra e mea manea tikai e te riro anga mai e ko tetai o tana Au Kite e mea rekarekaia, kare i te mea teiaa.”​—1 Ioane 5:3.

18. Eaa te ka rauka ia tatou na te mataku anga i te Atua mou?

¹⁸ I roto i te “nga tuatua openga a Davida,” ka tatau tatou: “Ei tuatua-tika ta te tutara ki rungao i te tangata nei, ko te ka tutara ma te mataku i te Atua ra: Mei te mārama popongi ka iti mai ia aia ei rā.” (2 Samuela 23:1, 3, 4) I te akara anga kua apiiia a Solomona, te tamaiti a Davida e tei mono iaia, no runga i teia au tuatua, no te mea kua pati aia kia Iehova kia oronga mai i te “ngakau kite” e te kite karape kiaia ‘kia kite i te meitaki e te kino.’ (1 Ariki 3:9) Kua kite a Solomona e te mataku ia Iehova ko te aerenga pakariia e te mataora. I muri mai, kua akakite poto mai aia na roto i te puka o Koheleta i te au tuatua e: “E akarongo ana tatou i te akaotianga o taua au tuatua katoa nei; Ko te Atua te mataku atu, e akono oki i tana au akauenga: ko ta te tangata katoa ïa e pini ua ake. E apai oki te Atua i to au tuatua katoatoa ki te akavaanga, e te au mea ngaro katoa ra, te au mea meitaki, e te kino katoa ra.” (Koheleta 12:13, 14) Me akarongo tatou ki taua akoanga, ka kiteaia mai e tatou taua “tutaki [anga] o te taakaaka e te mataku ia Iehova” kare ko te pakari ua e te mataora mari ra ko “te apinga nui [katoa] ïa, ko te ngateitei ïa, ko te ora ïa.”​—Maseli 22:4.

19. Eaa te ka tauturu ia tatou kia marama “i te mataku ia Iehova”?

¹⁹ Mei te au akaraanga Pipiria e te au tupuanga o teia tuatau, te kite nei tatou e e tuanga papu te mataku tau i te Atua i roto i te oraanga o te au tavini mou o Iehova. Kare e na taua mataku anake ra e paruru ia tatou kia kore e rave i te mea te akamareka kore ra i to tatou Metua i te rangi, mari ra ka rauka katoa i te oronga mai i te maroiroi kia tatou i te aro atu anga tatou i to tatou au enemi, e te maroiroi kia akakoromaki i te au timataanga e te au turanga ngata te aere maira kia tatou. No reira, kia rave meitaki tatou, te au mapu e te ruaine, i te apiianga i te Tuatua a te Atua, na te akamanako anga i ta tatou i apii ana, e te akapiri vaitata atu anga kia Iehova na te pure putuputu anga ma te ngakau tae. Na te rave anga i te reira, kare e ko “te kite i te Atua” ua te ka kiteaia mai e tatou mari ra te marama katoaanga “i te mataku ia Iehova.”​—Maseli 2:1-5.

[Au Tataanga Rikiriki i Raro]

Ka Rauka Ainei ia Koe te Akataka?

Akapeea te mataku i te Atua

• i te tauturu anga i tetai kia akaoraia mai mei te ara kino pakari?

• i te oronga anga mai i te mataora i raro ake i te au timataanga e te takinokinoanga?

• i te akamaroiroi anga ia tatou kia rave i to te Atua anoano?

• i te riro anga ei tuanga akaperepereia no ta tatou tamariki?

[Tutu i te kapi 26]

No te mataku ia Iehova i tapu ei ia Davida kia kore e ta atu i te Ariki ko Saula

[Au Tutu i te kapi 29]

E tuanga akaperepereia te mataku i te Atua ta te au metua ka oronga atu ki ta ratou tamariki