Au Uianga a te Aronga Tatau

Peea tatou i kite ei e te tau ra te akatakaanga o te pakari i roto ia Maseli 8:22-31 kia Iesu Karaiti i mua ake ka riro mai ei aia ei tangata?

I roto ia Maseli te tatau ra te akatakaanga akauruia o te pakari e: “Ia Iehova ra au i akamataʼi aia i tana angaanga; ou tana au angaanga, mei taito mairai. . . . Kare i tatumuia te au maunga, kare oki te au tuaivi, [“kua anauia mai au,” NW] . . . Iaia i tamou i te au rangi ra, te reira au: . . . Tei vaitata katoa uaorai au iaia i reira mei te tamaiti angai ra: e te mataora ua ra au i te au rā katoa ra, i te rekareka tamou marie anga ki mua i tona aroaro; . . . e tei te au tamariki a te tangata ra toku mataora anga.”

Kare e tano e te tuatua ua nei teia irava no runga i te pakari akauruia me kore i te pakari tangata. No teaa ra? No te mea ko te pakari e akatakaia nei i konei e mea ‘akamataia,’ me kore e mea angaia, ei akamataanga i ta Iehova angaanga. I vai ua ana rai te Atua ko Iehova e i vai ua ana rai tona pakari. (Salamo 90:1, 2) Kare e akamataanga i tona pakari; kare katoa te reira i te mea angaia me kore i te mea akamataia mai. Kare te reira i te mea ‘anauia mai.’ Tetai katoa, te akaariia mai nei teia pakari e te tuatua ra e te angaanga ra, mei tetai tangata rai.​—Maseli 8:1.

Te karanga ra te Maseli e i muatangana te vaitata ua ra te pakari “mei te tamaiti angai ra” kia Iehova, ko Tei Anga mai. Te tau tika ra teia kia Iesu. I mua roa ake ka aere mai ei aia ki te enua nei kua angaanga piri tikai a Iesu kia Iehova e kua karanga te Tuatua a te Atua e: “Ko mua rai aia i te au mea ravarai nei, koia oki tei mou i te au mea katoa nei.”​—Kolosa 1:17; Apokalupo 3:14.

Kua tau rai i reira kia akatutuia te Tamaiti a te Atua ei pakari, i te mea Nana i akakite mai i to Iehova au akakoroanga pakari e te au ture. I mua ake ka riro mai ei aia ei tangata, ko Iesu te Logo a te Atua, me kore te Vaa Tuatua. (Ioane 1:1) Te akatakaia maira aia i konei e “ko te mana ïa o te Atua e te pakari o te Atua.” (1 Korinetia 1:24, 30) E akatakaanga manea tikai no te Tamaiti a te Atua, tei riro tona mataoraanga no te au tangata ei akakeu iaia kia oronga i tona oraanga ei oko no ratou!​—Ioane 3:16.

[Tutu i te kapi 31]

“Kare i tatumuia te au maunga . . . [“kua anauia mai au,” NW]”