Te Oronga nei a Iehova i te ‘Vaerua Tapu ki te Aronga e Pati Atu Kiaia Ra’
‘E te tika na ia kotou, kino ua rai, kia oronga i te mea meitaki no ta kotou tamariki, ka tangaʼi oki i to kotou Metua i te ao ra, i te oronga i te vaerua tapu ki te aronga e pati atu kiaia ra.’—LUKA 11:13.
1. I teea atianga e anoano tikai ei tatou i te tauturu a te vaerua tapu?
‘KARE e rauka iaku i te akono atu i teia ko au anake ua. Ma te tauturu ua a te vaerua tapu e rauka ai iaku i te akakoromaki i teia timataanga!’ Kua tuatua ana ainei koe i te reira au manako ngakau tae? Kua pera ana te maataanga o te au Kerititiano. Penei kua akapera ana koe i muri ake i toou kite mai anga e kua tuia koe e tetai maki kino. Me kore ko te tuatau te reira i mate ei toou tokorua e kua roa korua i te akaipoipoanga. Me kore penei ko te taime te reira i taui ei toou tu mataora i mua ana ki te au turanga taitaia. I tetai au taime kino pakari i roto i te oraanga, penei kua kite mai ana koe e te ora ua ra koe no te mea kua oronga mai to Iehova vaerua tapu kia koe i te “mana maata meitaki nei.”—2 Korinetia 4:7-9; Salamo 40:1, 2.
2. (a) Eaa te au akaaoanga ta te au Kerititiano mou e aro atura? (e) Eaa te au uianga ta tatou ka akamanako i roto i teia atikara?
2 Te akono ra te au Kerititiano mou i te taomianga e te patoianga maata mei teianei ao e akono kore ra i te Atua. (1 Ioane 5:19) Kapiti katoa mai, te takinokinoia ra te au pipi a Karaiti e Satani te Tiaporo tikai, te kaitamaki ra i tetai tamaki rikarika ki te aronga “tei akono i te au akauenga a te Atua ra, i tei mou marie i te tuatua-akakite a Iesu Mesia ra.” (Apokalupo 12:12, 17) No reira, te marama meitaki ua ra, e e maata atu to tatou anoano i te turuturuanga a te vaerua o te Atua i teia tuatau nei i to mua ana. Eaa ta tatou ka rave kia akapapu e kia rauka ua atu rai ia tatou te vaerua tapu o te Atua? E eaa i papu ei ia tatou e te inangaro tikai ra a Iehova i te oronga mai kia tatou i te maroiroi anoanoia i te au tuatau o tetai timataanga? Ka kite mai tatou i te au pauanga ki teia au uianga i roto i nga akatutuanga e rua a Iesu.
Tamou Marie i te Pure
3, 4. Eaa te akatutuanga ta Iesu i oronga mai, e i akapeea aia i te akono anga i te reira ki te pure?
3 I tetai atianga kua pati atu tetai pipi a Iesu: “E te Atu, e apii mai ia matou nei i te pure.” (Luka 11:1) I te pauanga, kua oronga atu a Iesu e rua nga akatutuanga aiteite. Te mea mua no runga i tetai tangata e akono ra i tetai manuiri, e te rua no tetai metua tei akarongo atu ki tana tamaiti. E akamanako ana tatou i teia nga akatutuanga e rua.
4 Kua karanga a Iesu: “E oa to tetai i o kotou na, ka aere atu ei aia kiaia i te turuaipo, ka karanga atu ei kiaia ra e, E taku oa, o mai ana e toru manga; Kua tapae mai nei tetai oa oku nei i tona aerenga, e kare aku kia tuku atu i mua i tona aroaro. E kia tuatua mai aia i roto ra, kia na ko mai, Auraka e akapekapeka mai iaku: kua tamouia te pa, tei runga au i te roi e taku au tamariki katoa; kare e tika iaku kia tu ki runga e o atu naau. E akakite atu au kia kotou, Kore ua aia i tu ki runga e oronga atu i te mea e oa aia nona; e tu ra aia i te pati akatenga, ka oronga atu ei i tana i anoano ra.” Kua akamarama mai a Iesu i reira i akapeea teia akatutuanga i te akonoia anga ki te pure anga, i te na ko anga e: ‘Karanga atu oki au kia kotou, E pati ua atu rai, e e orongaia mai ta kotou; e kimi ua atu rai, e kitea ïa ia kotou; e topāpā ua atu rai, e kiritiia mai te pa ia kotou. Ko te aronga katoa oki i pati ra, kua rauka ïa: e ko tei kimi ra, kua kitea ïa; e tei topāpā ra, e kiritiia mai ïa te pa iaia.’—Luka 11:5-10.
5. Eaa ta te akatutuanga no runga i te tangata manono e apii maira ia tatou no runga i to tatou tu me pure?
5 Te akaari maira teia akatutuanga taka meitaki o tetai tangata manono, i to tatou tu me pure tatou. E akara ana e kua karanga a Iesu e kua puapinga te tangata i te rauka anga tana i inangaro no tana “pati akatenga.” (Luka 11:8) Okotai rai taime e kiteia ana te tuatua “pati akatenga” i roto i te Pipiria. Kua uriia te reira mei te tuatua Ereni, tona aiteanga tikai e “tu akama kore.” E putuputu te taime e akaari mai ana te tu akama kore i tetai tu kino. Inara, me akaariia te tu akama kore me kore te tu tamou marie no tetai akakoroanga meitaki, ka riro te reira ei tu meitaki tikai. Ko te turanga te reira o te tangata akonokono i roto i te akatutuanga. Kare aia e akama ana i te pati akatenga i tana e inangaro ra. Mei te mea e te akatutu maira a Iesu i teia tangata akonokono ei akaraanga no tatou, kia tamou marie katoa rai tatou i ta tatou au pure. Te inangaro maira a Iehova ia tatou ‘kia pati ua atu rai, kia kimi ua atu rai, kia topapa ua atu rai.’ I te pauanga, ka ‘oronga [aia] i te vaerua tapu ki te aronga e pati atura kiaia.’
6. I te tuatau o Iesu, eaa te manakoanga no te peu akamanuiri anga?
6 Kare e te akaari ua maira a Iesu ia tatou e akapeea i te pure—ma te pati akatenga—pera katoa i te tumu i akapera ei tatou. Kia kite meitaki i te reira apiianga, kia akamanako tatou e akapeea te aronga tei akarongo ki ta Iesu akatutuanga no runga i te tangata akonokono manono, i te manakoanga i te peu no te akaarianga i te tu akamanuiri anga. E manganui te au irava i roto i te Tuatua Tapu tei akaari mai e i te tuatau Pipiria, ko te akonoanga i te au manuiri, e peu akono pakariia te reira e te au tavini tikai o te Atua. (Genese 18:2-5; Ebera 13:2) Te kore anga i te akaari i te tu akamanuiri anga e taakamaanga tikai te reira. (Luka 7:36-38, 44-46) I te akamanakoanga i te reira, e akara akaou tatou i te tua a Iesu.
7. Eaa te tangata akonokono i roto i te akatutuanga a Iesu i kore ei i akama i te akaaraara i tona oa?
7 Kua tae mai tetai manuiri ki te are o te tangata akonokono i te turuaipo. Kua inangaro te tangata akonokono i te oronga i tetai kai no tana manuiri inara kare ana apinga i te ‘tuku atu i mua i tona aroaro.’ I tona manakoanga, e tupuanga poitirere teia! Ka inangaroia aia kia tiki mai i tetai manga, noatu eaa te manamanata. E no reira kua aere atu aia ki tetai taeake ona e ma te akama kore kua akaaraara atu iaia. “E taku oa, o mai ana e toru manga,” i kapiki atu ei te tangata akonokono. Kua maro ua atu rai aia i tana patianga e rauka ua mai iaia tana i inangaro. I reira ua, ma te manga i roto i tona rima, e rauka ai iaia kia riro mai ei tangata akonokono meitaki.
Te Maata Atu ka Anoanoia—Te Maata Atu ka Patiia
8. Eaa te ka akakeu ia tatou i te pure putuputu no te vaerua tapu?
8 Eaa ta teia akatutuanga e akaari maira i te tumu e kia pure putuputu tatou? Kua pati ua atu rai te tangata i te manga no te mea kua manako mai aia e te tu anga i te reira manga, kua inangaro tikaiia kia rauka iaia i te akono i tana apainga ei tangata akonokono. (Isaia 58:5-7) Me kare e manga, kare e rauka iaia i te akono i tana apainga. Aiteite katoa oki, no te mea kua kite mai tatou e ka inangaro tikaiia te vaerua o te Atua i te rave anga i ta tatou angaanga orometua ei Kerititiano mou, ka pure ua atu rai tatou ki te Atua, i te patianga atu i te vaerua. (Zekaria 4:6) Me kare te reira, ka puapinga kore ua tatou. (Mataio 26:41) Kua kite ainei koe i te taopenga anga puapinga maata ta tatou ka rauka mai mei teia akatutuanga? Me akamanako tatou i te vaerua o te Atua ei apinga inangaro vivikiia e tatou, i te akaraanga ka tamou marie tatou i te patianga i te reira.
9, 10. (a) Akatutu mai i te tumu ka anoano ei tatou i te tamou marie i te pati atu anga ki te Atua i tona vaerua. (e) Eaa te uianga ka ui tatou kia tatou uaorai, e no teaa ra?
9 Kia akono i teia apiianga ki teia tuatau nei, e akamanako ana e kua makiia tetai mema pamiri oou i te turuaipo. Ka akaaraara ainei koe i tetai taote kia pati atu kiaia no tetai tauturu? Kare me e manga maki ua to te tangata maki. Inara, me te maki pukuatu ra aia, kare roa koe e akama i te kapiki atu i tetai taote. Eaa te tumu? No te mea te aro atura koe i tetai tupuanga poitirere. Kua kite mai koe e te inangaro tikaiia ra tetai tauturu kite karape. Me kare koe e pati atu i te tauturu ka mate te tangata maki. Mei tera katoa rai, te aro atura te au Kerititiano mou i te au tupuanga poitirere tamou. Ko te tikaanga, te ori aere ua ra a Satani mei tetai “liona ngunguru ra,” te tauta ra i te akapou ia tatou. (1 Petero 5:8) Kia ora ua atu rai tatou i te pae vaerua, te inangaro tikaiia ra te tauturu a te vaerua o te Atua. Me kare tatou e pati atu i te tauturu a te Atua, ka tupu te tumatetenga. No reira, ma te tamou marie ka pati tatou i te Atua no tona vaerua tapu. (Ephesia 3:14-16) Na te rave ua anga i te reira e akono tamou ei tatou i te maroiroi inangaroia kia ‘tamou marie e tae ua atu ki te openga.’—Mataio 10:22; 24:13.
10 E puapinga tikai i reira kia tapu tatou i tetai au taime e kia ui kia tatou uaorai, ‘I na, mei teaa tikai te putuputu i taku au pure?’ E akamaara, e me kite mai tikai tatou e te inangaro ra tatou i te au tauturu a te Atua, ka tamou marie roa atu ta tatou au pure no te vaerua tapu.
Eaa te Akakeu ra ia Tatou kia Pure ma te Irinaki Papu?
11. Akapeea a Iesu i te akonoanga i te akatutuanga o tetai metua ki tana tamaiti ki te pure?
11 Te akakite maira ta Iesu akatutuanga o te tangata akonokono manono i te tu o te tangata e pure ra—te tangata irinaki. Te akatutuanga tei aru mai te akakite maira i te tu o te peretana e akarongo maira i te au pure—ko te Atua ko Iehova. Kua ui a Iesu: “Koai ïa metua i o kotou nei, e apai atu i te toka na tana tamaiti, kia pati mai aia i te manga? e kia pati mai i te ika, e apai atu aina i te ovi nana ei ika? E kia pati aia i te ua moa, e apai atu aina i te sekopio?” Kua akakite atu a Iesu i te akonoanga o te reira, i te na ko anga: ‘E te tika na ia kotou, kino ua rai, kia oronga i te mea meitaki no ta kotou tamariki, ka tangaʼi oki i to kotou Metua i te ao ra, i te oronga i te vaerua tapu ki te aronga e pati atura kiaia ra!’—Luka 11:11-13.
12. Akapeea te akatutuanga o te metua te akarongo anga ki te patianga a tana tamaiti i te akakiteanga i to Iehova tu puareinga ua i te akarongo mai ki ta tatou au pure?
12 Ma teia akaraanga o tetai metua e pau ra i tana tamaiti, te akakite maira a Iesu i to Iehova manako i te aronga tei uri kiaia na roto i te pure. (Luka 10:22) Te mea mua, e akara ana i te akatukeanga. Kare mei te tangata rai i roto i te akatutuanga mua tei kare e inangaro roa ana i te ariu atu ki tetai kapikianga tauturu, mei tetai metua tangata rai a Iehova, te inangaro ua ra i te pau i te patianga mei tana tamaiti. (Salamo 50:15) Kua akakite katoa mai a Iesu i to Iehova tu inangaro ia tatou na te akamanakoanga mei tetai metua ki te metua i te rangi ra. Kua karanga aia e me ka rauka i tetai metua tangata “kino ua rai,” no tona tu ara, i te oronga i tetai apinga meitaki ki tana tamaiti, mei teaa te maata atu i to tatou irinakianga e ka oronga mai to tatou Metua i te rangi ra, ma te tu meitaki tikai, i te vaerua tapu ki tona pamiri akamori!—Iakobo 1:17.
13. Eaa tei papu ia tatou me pure tatou kia Iehova?
13 Eaa te apiianga no tatou? Papu ia tatou e me pati tatou i to tatou Metua i te rangi no te vaerua tapu, ka inangaro ua aia i te oronga mai i ta tatou patianga. (1 Ioane 5:14) Me uri ua atu rai tatou kiaia na roto i te pure, kare rava a Iehova e karanga mai e: “Auraka e akapekapeka mai iaku: kua tamouia te pa.” (Luka 11:7) Kare rava, kua karanga a Iesu e: ‘E pati ua atu rai, e e orongaia mai ta kotou; e kimi ua atu rai, e kitea ïa ia kotou; e topāpā ua atu rai, e kiritiia mai te pa ia kotou.’ (Luka 11:9, 10) Ae, ka “akarongo mai [a Iehova] ia matou kia kapiki atu matou ra.”—Salamo 20:9; 145:18.
14. (a) Eaa te manako tarevake e tamanamanata ra i tetai aronga e aro atura i te au timataanga? (e) Me te aro atura i te au timataanga, eaa tatou ka pure ei kia Iehova ma te irinaki papu?
14 Te akakite katoa maira te akatutuanga a Iesu e e maata atu te tu meitaki o Iehova i te tu meitaki te akaariia ra e tetai ua atu metua. No reira, auraka rava tatou e manako e te au timataanga ta tatou e aro atura e akakiteanga ia i to te Atua mareka kore ia tatou. Ko to tatou enemi maata, ko Satani, te inangaro ra kia manako akapera tatou. (Iobu 4:1, 7, 8; Ioane 8:44) Kare e tumuanga Tuatua Tapu no te reira au manako akaapaanga ia koe uaorai. Kare a Iehova e pikikaa ia tatou ma “te kino.” (Iakobo 1:13) Kare aia e tuku mai ana kia tatou i tetai timataanga mei te ovi rai me kore tetai timataanga mei te sekapio rai. E oronga mai ana to tatou Metua i te rangi ra i te ‘mea meitaki ki te aronga e pati atu kiaia ra.’ (Mataio 7:11; Luka 11:13) E tikai, te maata atu i to tatou marama anga i to Iehova tu meitaki e tona tu puareinga ua i te tauturu ia tatou, te maata atu ia i to tatou akakeuia anga kia pure ma te irinaki papu. Ia tatou e rave ra i te reira, ka rauka katoa ia tatou i te akakite i te au manako mei to te tata taramo tei tata e: “Kua akarongo tikai ra te Atua; kua akono mai i taku i pati atu.”—Salamo 10:17; 66:19.
Akapeea te Vaerua Tapu e Riro ei ei Tauturu no Tatou
15. (a) Eaa te taputou ta Iesu i papau no runga i te vaerua tapu? (e) Eaa tetai mataara e tauturu ana te vaerua tapu ia tatou?
15 I mua poto ua ake i tona mate anga, kua ripiti a Iesu i te akapapuanga tana i oronga i roto i tana au akatutuanga. I te tuatuaanga no runga i te vaerua tapu, kua karanga aia ki tana au pipi: ‘Naku oki e pati atu i te Metua ra, e nana e oronga mai i tetai akapumaana ia kotou, kia noo tikai ki o kotou nei e tuatau ua atu.’ (Ioane 14:16) Kua taputou a Iesu i reira e ka noo mai te tauturu, me kore te vaerua tapu, ki rungao i tana au pipi i te au tuatau ki mua, kapiti mai i to tatou tuatau nei. Eaa tetai mataara puapinga tikai e kite ana tatou i te reira tauturu i teia tuatau? E tauturu ana te vaerua tapu ia tatou i te akakoromaki i te au timataanga tukeke. Akapeea? Kua akataka mai te apotetoro ko Paulo, tei aro katoa atu rai i te au timataanga, i roto i tetai reta ki te au Kerititiano i Korinetia e i akapeea te vaerua o te Atua i te tauturu anga iaia. E akamanako poto ua ana tatou i tana i tata ei.
16. Akapeea to tatou turanga i aiteite ei ki to Paulo?
16 Te mea mua, kua akakite tika ua a Paulo i tona au taeake irinaki e te akono ra aia i tetai “tara i roto i [te] kopapa nei,” tetai tu timataanga. E oti, kua karanga aia: “E e toru oki aku pati anga atu i te Atu i taua mea ra, kia akataka keia iaku.” (2 Korinetia 12:7, 8) Noatu e kua pati akatenga a Paulo kia Iehova kia akaatea i tona mamae, kua vai ua rai te reira. Penei kua aro katoa atu koe i tetai tupuanga aiteite i teia tuatau. Mei ia Paulo rai, penei kua pure ana koe ma te tamou marie e te irinaki papu, i te patianga kia Iehova kia akaatea i tetai timataanga. Inara, noatu taau au patianga putuputu, te aro atu ra rai koe i te reira manamanata. Ko te aiteanga ainei i reira e kare a Iehova i pau ana i taau au pure e kare tona vaerua tapu e tauturu mai ana ia koe? Kare rava! (Salamo 10:1, 17) E akara ana eaa akaou atu ta te apotetoro ko Paulo i tuatua ei.
17. Akapeea a Iehova i te pauanga i te au pure a Paulo?
17 Ei pauanga ki te au pure a Paulo, kua karanga te Atua kiaia: “Kua tuatua maira ra aia, Toku nei aroa ua, oti ra ua ïa taau: ei te apikepike e taka meitaki ravaʼi toku maroiroi.” Kua karanga a Paulo: “E teianei, e mea rekareka ïa iaku kia akatietie i toku nei paruparu, kia vai marie te maroiroi o te Mesia i runga iaku nei [“mei tetai puakapa rai,” NW].” (2 Korinetia 12:9; Salamo 147:5) No reira, kua kite mai a Paulo na roto ia Karaiti, e kua ooraia te paruru maroiroi o te Atua ki rungao iaia mei tetai puakapa rai. I teia tuatau, e pau mai ana a Iehova i ta tatou au pure na roto i tetai tu aiteite. Kua oora aia i tona paruru mei tetai tapoki rai ki rungao i tona au tavini.
18. Eaa i rauka ai ia tatou i te akakoromaki i te au timataanga?
18 E tika, kare tetai puakapa e tapu ana i te ua mei te topa mai anga me kore te au matangi mei te pupui mai anga, inara e oronga mai ana te reira i tetai paruruanga mei te reira au apinga. Mei te reira katoa, kare te paruruanga tei orongaia mai e “te maroiroi o te Mesia” e tapu ana i te au timataanga mei te tupuanga kia tatou me kore te au taomianga tei tukunaia mai ki runga ia tatou. Inara, te oronga maira te reira i te paruruanga pae vaerua mei te au apinga kino o teianei ao e te au takinokino anga a to te reira arataki, ko Satani. (Apokalupo 7:9, 15, 16) No reira, noatu me te akono ra koe i tetai timataanga e kare i ‘akataka keia mei ia koe,’ papu ia koe e te kite ua maira a Iehova i taau putotoanga e kua ariu mai aia ki ‘toou reo e maata.’ (Isaia 30:19; 2 Korinetia 1:3, 4) Kua tata a Paulo: “E tuatua-mou ra ta te Atua, e kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.”—1 Korinetia 10:13; Philipi 4:6, 7.
19. Eaa taau ka aruaru i te rave, e no teaa ra?
19 E tika, te akatutuia nei teia “tuatau openga,” o teia ao te akono tau kore ra i te Atua e te “au tuatau kikino tei ngata roa no te akono atu.” (2 Timoteo 3:1, NW) Noatu rai, ki te au tavini o te Atua, ka rauka teia au tuatau i te akonoia. Eaa te tumu? No te turuturu e te paruruanga a te vaerua tapu o te Atua, ta Iehova e oronga puareinga maata ua maira ki te aronga katoatoa e pati atura kiaia i te reira ma te tamou marie e te irinaki papu. Kia akakoro tatou, i reira, kia pure ua atu rai no te vaerua tapu i te au ra ravarai.—Salamo 34:6; 1 Ioane 5:14, 15.
Akapeea koe me Pau?
• Eaa ta tatou ka rave kia rauka te vaerua tapu o te Atua?
• Eaa tatou ka irinaki papu ei e ka akarongo mai a Iehova i ta tatou au pure no te vaerua tapu?
• Akapeea te vaerua tapu i te tauturuanga ia tatou i te akakoromaki i te au timataanga?
[Tutu i te kapi 21]
Eaa ta tatou ka kite mai mei te akatutuanga a Iesu no runga i te tangata akonokono manono?
[Tutu i te kapi 22]
Te tamou marie ra ainei koe i te pure no te vaerua tapu o te Atua?
[Tutu i te kapi 23]
Eaa ta tatou ka kite mai no runga ia Iehova mei te akatutuanga o tetai metua akono meitaki?