Ka ‘Akatupu a Iehova i te Akatikaanga’

‘Kare aina oki te Atua e akatupu i te akatikaanga ki tona uaorai tangata i ikiia ra, ko tei kapiki atu iaia i te po e te ao?’​—LUKA 18:7.

1. Koai ma te tumu no te akamaroiroianga kia koe, e no teaa ra?

TAKAPINI i te ao nei, te rekareka ra te Au Kite o Iehova i te piri atu anga ki te au taeake e te au tuaine Kerititiano tei tavini tiratiratu ana ia Iehova no te au mataiti e manganui. Kua kite ainei koe i tetai o teia aronga akaperepereia? Penei te akamanako ra koe i tetai tuaine pakarikari, e kua roa te mataiti iaia i te papetitoia anga, e kare takiri aia e topa ana i tetai uipaanga i te Are Uipaanga Patireia. Me kore penei te manako ra koe i tetai taeake pakarikari tei turu tiratiratu ana i te au angaanga no te angaanga orometua i te au epetoma ravarai e kua roa te mataiti iaia i te raveanga i te reira. E tika, e maata teia aronga tiratiratu tei manako ana e, i teianei, kua tupu ke ana a Aramakito. Inara, noatu te tikaanga e te aere nei rai teia ao tau kore, kare te reira i akaparuparu i to ratou irinaki ki ta Iehova au taputou e kare katoa i akaparuparu i ta ratou tautaanga kia ‘tamou marie e tae ua atu ki te openga.’ (Mataio 24:13) Te oonu o te akarongo tei akaariia e te reira au tavini tiratiratu o Iehova ra, e tumuanga tikai no te akamaroiroianga no te putuputuanga katoa.​—Salamo 147:11.

2. Eaa te turanga e tangi ana tatou?

² Inara, i tetai au taime, penei ka kite mai tatou i tetai tu tuke rava. Tetai pae Kite tei piri atu ana ki roto i te angaanga orometua no tetai au mataiti e manganui, taopenga atu, kua paruparu to ratou akarongo i roto ia Iehova, e kare ratou e kapiti akaou atu ana ki te putuputuanga Kerititiano. E tangi ana tatou e kua akaruke te au taeake mua ia Iehova, e e aka inangaro tikai to tatou i te tauturu ua atu rai i te “mamoe [tataki tai] i ngaro ra” kia oki mai ki te anana. (Salamo 119:176; Roma 15:1) Noatu rai, ko teia au tupuanga tukeke​—tetai pae kua akono tamou ua atu rai i to ratou akarongo e tetai kua paruparu to ratou akarongo​—te akatupu nei i te au uianga. Eaa te tauturu ra i te au Kite e manganui kia akatinamou i to ratou akarongo ki roto i ta Iehova au taputou e eaa tetai pae i ngere ei i te reira? Eaa ta tatou uaorai ka rave kia akapapu e te vai ngaueue kore ra to tatou irinakianga e te vaitata maira “te rā maata o Iehova”? (Zephania 1:14) E akamanako ana tatou i tetai akatutuanga tei kiteaia i roto i te Evangelia a Luka.

E Akamatakiteanga ki te Aronga e Ora ra “me Tae Mai te Tamaiti a te Tangata”

3. Koai ma tikai te ka puapinga mei te akatutuanga o te vaine takaua e te akava, e no teaa ra?

³ I roto ia Luka pene 18, ka kite mai tatou i te akatutuanga a Iesu no runga i tetai vaine takaua e tetai akava. Aiteite rai te reira ki te akatutuanga no runga i te tangata akonokono manono, ta tatou i uriuri ana i roto i te atikara i mua atu. (Luka 11:5-13) Inara, te aerenga manako o te irava Pipiria no te akatutuanga o te vaine takaua e te akava, te akaari maira e te akono tika ia ra te reira ki te aronga e noo ra me ‘tae mai ana te Tamaiti a te tangata nei’ ma te mana Patireia, e kua akamata te reira tuatau i te 1914.​—Luka 18:8.a

4. Eaa ta Iesu i uriuri i mua ake i akakite ei aia i te akatutuanga tei kiteaia i roto ia Luka pene 18?

⁴ I mua ake i te oronga anga i te akatutuanga, kua akakite a Iesu e te akapapuanga o tona tae anga mai i roto i te mana Patireia, ka kitea ateaia “mei te uira oki” e “kanapanapa i tetai pae rangi, e kakā ua atura ki tetai pae rangi.” (Luka 17:24; 21:10, 29-33) Noatu rai, ko te maataanga o te au tangata te noo ra i roto i “te tuatau openga ra” kare e akamanako atu ana ki te reira akapapuanga taka meitaki. (Daniela 12:4) Eaa te tumu? No te tumu rai i kopae ei te au tangata i te tuatau o Noa e Lota i te au akamatakiteanga a Iehova. I taua tuatau ra, te ‘kaikai ra, te inu ra, te oko atura, te oko maira, te tanu ra, e te akatu ra te au tangata i te are e tae ua atu ki te ra e ope atu ratou i te mate.’ (Luka 17:26-29) Kua matemate ratou no te mea kua maata roa to ratou taime ki te reira au angaanga matauia e kare rava ratou i akamanako atu ana i te anoano o te Atua. (Mataio 24:39) I teia tuatau, kua varenga ua te maata anga o te au tangata ki te au angaanga raveia i roto i te au ra ua nei e kare ratou e kite ana i te akapapuanga e te vaitata mai nei te openga o teia ao te akono kore ra i te Atua.​—Luka 17:30.

5. (a) Koai ma ta Iesu i akamatakite atu, e no teaa ra? (e) Eaa tei akatupu i tetai pae kia paruparu to ratou akarongo?

⁵ Te taka meitaki ua ra, e te manamanata ra a Iesu e ka akaariu ke katoaia tana au pipi e te ao o Satani, tae rava ki te tuatau e penei ‘ka oki ratou ki te au apinga i muri.’ (Luka 17:22, 31) E, ma te tika, kua tupu teia ki tetai au Kerititiano. No te au mataiti kua tapapa atu te reira aronga i te tuatau e takore ei a Iehova i teia ao kino. Inara, no te mea kare a Aramakito i tupu ana i te tuatau i tapapa ei ratou, kua mareka kore tikai ratou. Kua paruparu to ratou irinakianga ki te vaitataanga o to Iehova ra akavaanga. Kare ratou e rave putuputu akaou ana i te angaanga orometua e aere ua rai kua maata roa to ratou taime ki te au angaanga no te oraanga ua nei e kare e maata ana te taime no te au mea pae vaerua. (Luka 8:11, 13, 14) Aere rai, kua ‘oki ratou ki te au apinga ki muri’​—aue te tangi e!

Te Tumu kia ‘Tamou Marie i te Pure’

6-8. (a) E akakite mai i te akatutuanga o te vaine takaua e te akava. (e) Akapeea a Iesu i te akonoanga i teia akatutuanga?

⁶ Eaa ta tatou ka rave i te akapapu e kare to tatou irinakianga ngaueue kore i roto i te akatupuanga i te au taputou a Iehova e akaparuparuia? (Ebera 3:14) Kua ui atu a Iesu i te reira uianga i muri tika mai i tona akamatakiteanga i te au pipi e auraka e unui ki muri ki te ao kino o Satani.

⁷ Te akakite maira a Luka ia Iesu e kua “akakite katoa atura aia i te parabole, kia tamou marie ratou i te pure, auraka e [“tuku i te au,” NW].” Kua karanga a Iesu: “E tangata akava tei tetai oire, kare aia i mataku i te Atua, kare oki i akono mai i te tangata: E vaine takaua oki tei taua oire ra; aere atura aia kiaia ra, na ko atura, E akatika mai koe iaku i toku nei enemi. E kare akera aia i akatika vave mai: e muri akera, kua na ko iora i roto iaia uaorai, Kore ua atu rai au i te mataku i te Atua ra, e te akono i te tangata nei: No te mea ra, te māro mai nei teianei vaine takaua iaku, e akatika atu au i tana tuatua, ka manamanata aea au iaia i te aere putuputu anga mai.”

⁸ I muri ake i te orongaanga i teia akakiteanga, kua akataka mai a Iesu i te akonoanga: “Ka akarongo ana i te tuatua a taua akava tuatua-tika kore ra. Kare aina oki te Atua e akatika mai i tona uaorai tangata i ikiia ra, ko tei kapiki atu iaia i te po e te ao, e tavare ainei aia i ta ratou tuatua? E karanga atu au kia kotou, Kare rava e mamia, e akatika mai aia ia ratou. Kia tae maira te Tamaiti a te tangata nei, e kitea ainei e ia te akarongo i te enua nei?”​—Luka 18:1-8.

“E Akatika Mai Koe Iaku”

9. Eaa te manako maata i roto i te akatutuanga o te vaine takaua e te akava?

⁹ Te taka meitaki ua ra te tumu manako maata o teia akatutuanga akataka meitakiia. Kua akakiteia mai te reira e nga tangata roa ai e rua i roto i te akatutuanga e pera katoa a Iesu. Kua pati akatenga atu te vaine takaua: “E akatika mai koe iaku.” Kua karanga atu te akava: “E akatika atu au i tana tuatua.” Kua ui atu a Iesu: “Kare aina oki te Atua e akatika mai?” E no Iehova, kua karanga a Iesu e: “Kare rava e mamia, e akatika mai aia.” (Luka 18:3, 5, 7, 8) Aea nei tikai te Atua e ‘akatupu i te akatikaanga’?

10. (a) I naea te akaokoanga i tupu ei i te anere mataiti mua? (e) Aea e ka akapeea te akatikaanga i te raveia anga no te au tavini o te Atua i teia tuatau?

¹⁰ I roto i te anere mataiti mua, kua tae mai te “tuatau akaoko anga” i te mataiti 70 T.N. i te akapouia anga a Ierusalema e to te reira iero. (Luka 21:22) No te au tangata o te Atua i teia tuatau, ka raveia te akatikaanga i “te rā maata o Iehova.” (Zephania 1:14; Mataio 24:21) I taua taime ra, ka “tutaki [a Iehova] i te aronga” e akatupu ra i te kino ki tona iti tangata e “apai mai [ei a Iesu Karaiti] i te akautunga ki runga i te aronga kare i kite i te Atua e tei kore i akarongo i te tuatua meitaki no to tatou Atu ko Iesu ra.”​—2 Tesalonia 1:6-8; Roma 12:19.

11. Na roto i teea tu e ka aere mai te akatikaanga “kare rava e mamia”?

¹¹ Akapeea tatou, i reira, i te maramaanga i ta Iesu akapapuanga e ka akatupu a Iehova i te akatikaanga “kare rava e mamia”? Te akaari maira te Tuatua a te Atua e noatu e e Atua akakoromaki a Iehova, ka tuku viviki aia i te akatikaanga me tano te tuatau. (2 Petero 3:9, 10) I te tuatau o Noa, i te tae anga mai te Vaipuke, kua viviki te aronga kino i te takoreia. Mei te reira katoa rai, i te tuatau o Lota, i te topa mai anga te ai mei te rangi mai, kua matemate te aronga kino. Kua karanga a Iesu: “Ka pera katoa kia tae ki te rā e akakiteia mai ei te Tamaiti a te tangata.” (Luka 17:27-30) Ka kite akaou mai, te aronga kino i te “mate viviki.” (1 Tesalonia 5:2, 3) Ma te tika, papu tikai ia tatou e kare rava a Iehova e akatika i te ao o Satani kia aere ua atu e tai ra akaou mai, i ta te ture e umuumu maira.

Ka ‘Akatupu Aia i te Akatikaanga’

12, 13. (a) Akapeea ta Iesu akatutuanga o te vaine takaua e te akava e apii maira tetai apii? (e) Eaa ka papu ei ia tatou e ka akarongo mai a Iehova i ta tatou au pure e ka akatupu i te akatikaanga?

¹² Te akakite katoa maira te akatutuanga a Iesu o te vaine takaua e te akava i tetai atu au tuatua mou puapinga maata. I te akonoanga i te akatutuanga, kua karanga a Iesu e: “Ka akarongo ana i te tuatua a taua akava tuatua-tika kore ra. Kare aina oki te Atua e akatika mai i tona uaorai tangata i ikiia ra?” E tika, kare mei te mea e te akaaite ra a Iesu ia Iehova ki te akava mei tera te tu e ka akono aiteite rai te Atua i te au taeake irinaki na roto i te reira tu. Mari ra, kua apii a Iesu i tana au pipi i tetai apiianga no runga ia Iehova na te akakiteanga i tetai tuke anga i rotopu i te akava e te Atua. Eaa tetai au ngai e tuke ei raua?

¹³ E tangata “tuatua-tika kore” te akava i roto i te akatutuanga a Iesu, inara e “Akava tuatua tika a te Atua.” (Salamo 7:11; 33:5) Kare rava o te akava inangaro tikai i te vaine takaua, inara e inangaro to Iehova i te au tangata tataki tai. (2 Paraleipomeno 6:29, 30) Kare te akava i inangaro ana i te tauturu i te vaine takaua inara e inangaro to Iehova​—ae, e inangaro maata​—kia tauturu i te aronga te tavini ra Iaia. (Isaia 30:18, 19) Eaa te apiianga? Me kua akarongo atu te akava tuatua tika kore ki te patianga a te vaine takaua, mei teaa atura te maata i to Iehova akarongo anga i te au pure a tona iti tangata e kia akatupu tikai i te akatikaanga no ratou!​—Maseli 15:29.

14. Eaa ra i anoanoia ai kia kore e ngaro to tatou akarongo i te aere anga mai o te ra akavaanga o te Atua?

¹⁴ No reira, te aronga e kua paruparu to ratou akarongo i roto i te aere anga mai o te ra akavaanga o te Atua, te rave ra i tetai tarevake kino pakari. Eaa te tumu? Na te akaparuparuanga i to ratou irinaki papu e te vaitata maira “te rā maata o Iehova,” te ekoko ra ratou me ka rauka rai a Iehova i te irinakiia kia akono tiratiratu i tana au taputou. Inara kare e tau i tetai tangata i te ekoko i te tu tiratiratu o te Atua. (Iobu 9:12) Tetai uianga tau koia oki, Ka vai tiratiratu ainei tatou uaorai? E ko te reira te tumu manako tikai ta Iesu i ui ei i te openga o te akatutuanga no runga i te vaine takaua e te akava.

‘E Kitea Ainei Aia Teia Akarongo i te Enua Nei?’

15. (a) Eaa te uianga ta Iesu i ui, e no teaa ra? (e) Eaa ta tatou ka ui kia tatou uaorai?

¹⁵ Kua ui a Iesu i tetai uianga umere tikai: ‘Kia tae maira te Tamaiti a te tangata nei, e kitea ainei e ia teia akarongo i te enua nei?’ (Luka 18:8) Te tuatua ‘teia akarongo’ te akakite maira e te taiku ra a Iesu, kare ki te akarongo ua nei, mari ra ki tetai tu akarongo tikai​—te akarongo mei to te vaine takaua rai. Kare a Iesu i pau ana i tana uianga. Kua ui aia i te reira kia akamanako tana au pipi no runga i te tu o to ratou uaorai akarongo. Te paruparu marie ua atura ainei te reira, e ka taii atu ki te kino ma te matakuanga e ka oki atu ratou ki ta ratou au apinga i akaruke ei ki muri? Me e tu akarongo ainei to ratou tei akatutuia mai e te vaine takaua? I teia tuatau, kia ui katoa tatou kia tatou uaorai, ‘Eaa te tu o te akarongo ta “te Tamaiti a te tangata nei” e kite maira i roto i toku ngakau?’

16. Eaa te tu o te akarongo o te vaine takaua?

¹⁶ Kia riro mai e ko tatou tetai aronga te ka rauka ta Iehova akatikatikaanga, ka inangaroia tatou kia aru i te aerenga o tera vaine takaua. Eaa te tu o tona akarongo? Kua akaari aia i tona akarongo na te ‘aere tamou marie atu anga [ki te akava], na ko atura, E akatika mai koe iaku.’ Kua tamou marie ua atu rai te reira vaine takaua kia rauka iaia te akatikaanga mei tetai tangata tuatua tika kore. Mei te reira katoa, papu i te au tavini o te Atua i teia tuatau e ka rauka ia ratou te akatikaanga a Iehova​—noatu me ka roa atu te tuatau ka pou i ta ratou i tapapa atu ei. Pera katoa, kua akaari ratou i to ratou irinakianga ki roto i te au taputou a te Atua na te pure tamou marie anga​—ae, na te ‘kapiki atu anga kia Iehova i te po e te ao.’ (Luka 18:7) E tika, me ka tapu ake tetai Kerititiano i te pure anga kia akatupuia te akatikaanga, te akaari maira aia e kare aia e irinaki ana e ka akatupu a Iehova i tana au angaanga no tona au tavini.

17. Eaa te au tumu e kia rave tamou marie ua atu rai tatou i te pure e kia akatinamou i to tatou akarongo i te aere anga mai tikai o te ra akavaanga o Iehova?

¹⁷ Te akaari maira tetai au turanga tikai o te reira vaine takaua e e au tumu ke atu ta tatou no te tamou marie anga i roto i te pure. E akamanako ana i tetai au tuke anga i rotopu i tona turanga e to tatou. Kua aravei ua atu rai te vaine takaua i te akava noatu e kare tetai tangata i akamaroiroi mai ana iaia kia rave i te reira, inara te oronga maira te Tuatua a te Atua kia tatou i te akamaroiroianga maata kia “tamou marie tikai i te pure.” (Roma 12:12) Kare a te vaine takaua akapapuanga e ka akatikaia mai tana au patianga, inara te akapapu maira a Iehova ia tatou e ka akatupuia te akatikaanga. Na roto i tana peroveta, kua karanga a Iehova e: “Ka tapapa atu rai; e tae tika mai ïa, e kare e tavarevare.” (Habakuka 2:3; Salamo 97:10) Kare o te vaine takaua tangata tauturu i te maro atu i tana patianga, i te akateimaa atu i te puapinga o tana patianga. Inara e tauturu ririnui to tatou, ko Iesu, “e tei te rima katau o te Atua ra, te pati ra i ta tatou?” (Roma 8:34; Ebera 7:25) No reira, me kua maro ua atu rai te vaine takaua, noatu tona turanga akaaoanga, ki te akava i te manakonakoanga e ka akatupuia te akatikaanga, mei teaa atura te maata kia akono marie tatou i to tatou akarongo i te aere anga mai tikai o te ra akavaanga o Iehova!

18. Akapeea te pure i te akamaroiroianga i to tatou akarongo e i te tauturuanga ia tatou kia rauka te akatikaanga?

¹⁸ Te apii maira te akatutuanga o te vaine takaua ia tatou e e pirianga vaitata tetai i rotopu i te pure e te akarongo e ka rauka ta tatou au pure tamou marie i te patoi atu i te au akakeuanga te ka akaparuparu i to tatou akarongo. E tika, kare te aiteanga o teia e, ko tetai akaariarianga ua no te oronga anga i te pure, te rapakauanga no te akarongo paruparu. (Mataio 6:7, 8) Me akakeuia tatou kia pure no te mea kua kite tatou e te irinaki pu tikai ra tatou ki te Atua, ka akapiri vaitata atu te pure ia tatou ki te Atua e te akamaroiroi ra i to tatou akarongo. E mei te mea e te umuumuia ra te akarongo no te akaoraanga, no reira rai a Iesu i kite mai ei i te umuumuanga kia akamaroiroi i tana au pipi “kia tamou marie ratou i te pure, auraka e [“tuku i te au,” NW]”! (Luka 18:1; 2 Tesalonia 3:13) E tika, kare e tei runga ua te aere anga mai o “te rā maata o Iehova” i ta tatou au pure​—ka tae mai te reira noatu me ka pure tatou no te reira me kare. Inara noatu me ka rauka ia tatou tataki tai te akatikaanga e ka ora atu i te tamakianga a te Atua me kare, tei runga tikai te reira i to tatou akarongo e te aerenga tuatua tau ta tatou e aruaru atura e pera katoa ta tatou au pure.

19. Akapeea tatou i te akapapuanga e te irinaki tikai nei tatou e ka ‘akatupu te Atua i te akatikaanga’?

¹⁹ Mei ta tatou i maara mai, kua ui a Iesu: “Kia tae maira te Tamaiti a te tangata nei, e kitea ainei e ia te akarongo i te enua nei?” Eaa te pauanga ki teia uianga umere tikai? Mei teaa tikai to tatou mataora e te akapapu ra te au mirioni tavini tiratiratu o Iehova takapini i te ao katoa i teia tuatau nei, na roto i ta ratou au pure, akakoromakianga, e te tamou marie anga e tei ia ratou teia akarongo. Ka rauka ta Iesu uianga i te pau papuia. Ae, noatu te au angaanga tika kore ta te ao o Satani e akatupu ra kia tatou, te irinaki papu tikai ra tatou e ka “akatupu [te Atua] i te akatikaanga ki tona uaorai tangata i ikiia ra.”

[Tataanga Rikiriki i Raro]

Maara Ainei ia Koe?

• Eaa tei akatupu i tetai au Kerititiano kia paruparu to ratou akarongo?

• Eaa i pakari ei to tatou akarongo i roto i te aere anga mai o te ra akavaanga o Iehova?

• Eaa te au tumu ka tamou marie atu ei tatou i te pure?

• Akapeea te pure tamou marie i te tauturuanga i te paruru kia kore e paruparu to tatou akarongo

[Tutu i te kapi 26]

Eaa te apiiia maira e te akatutuanga o te vaine takaua e te akava?

[Au Tutu i te kapi 29]

Mirioni ua atu i teia tuatau te irinaki nei e ka ‘akatupu te Atua i te akatikaanga’