Tane e te Vaine​—Angaia Tetai no Tetai

E INANGARO ua ana te tane e te vaine i te kapitipiti taokotai. Kua akamataia teia inangaro e te Atua. Akara atura a Iehova e kare e meitaki kia noo ua te tangata mua, ko Adamu, koia anake ua. No reira kua anga te Atua “i tetai tauturu tau [no te tangata] ra.”

Kua akamoe tinainai a Iehova ia Adamu, e kua rave iora aia i tetai ivi kaokao nona ra e kua “anga iora ei vaine, e kua arataki maira aia iaia kia Adamu ra.” Rekareka tikai a Adamu i te aravei anga i teia vaine manea i angaia mai e Iehova i akakite ei aia e: “I teianei e ivi teia no toku nei ivi, e kiko oki no toku nei kiko.” Ma tona au tu vaine, kua riro mai te vaine apa kore, ko Eva, ei vaine inangaroia tikai. E ko Adamu apa kore i roto i te tu tane ngateitei te umuumuia ra te akangateitei anga. Kua angaia raua tetai no tetai. Te karanga ra te Pipiria e: “E akaruke ei te tangata i tona metua tane e tona metua vaine, ka piri atu ei ki tana vaine; e ka riro oki raua ei kopapa okotai.”​—Genese 2:18-24.

Inara, te pururu nei te au pamiri, i teia tuatau, te pirianga i rotopu i te tane e te vaine e maata te taime e kino tikai me kare e akatereia ana e te tu noinoi. Ko tetai tu taemoemo anga i rotopu i nga tangata kua riro ei tumu anga te arataki atura ki te pekapeka e te tauetono. E tuke pouroa teia ki ta te Atua akakoroanga no te tane e te vaine. Kua angaia te tane kia akatupu i tetai turanga umere i te enua nei. Te vaine ra kia akono i tetai ngai tau e te umere i te pae i te tane. Ka angaanga kapiti rotai raua. Mei te akamata anga mai i te angaia anga te tangata, kua tauta akarongo mou te au tane e te au vaine akono tau i te Atua i te akatupu i te au turanga ta Iehova i akakoro no ratou, e kua kapiti mai teia i te mataora e te merengo kia ratou. Eaa ra teia nga turanga, e akapeea tatou i te akatupu anga i te reira?

[Tutu i te kapi 3]

Kua angaia te tane e te vaine ei akono i nga turanga ngateitei i roto i ta te Atua akanoonooanga