Autu Anga i te Au Akaaoanga Angaanga Orometua mei Tera Are ki Tera Are
“I maroiroi ra matou i to matou Atua i te tuatua anga atu ia kotou i te evangelia a te Atua i roto rai i te taumāro maata.”—1 TESA. 2:2.
1. Eaa te au akaaoanga ta Ieremia i aro atu, e akapeea aia i te autu anga i te reira?
E TANGATA oki a Ieremia mei ia tatou katoa te tu. Te akakite anga a Iehova kiaia i tana angaanga kia riro “ei peroveta no te pa enua,” kua karanga atura aia e: “Aue! e taku Atu e Iehova e! i na, kare au i kite i te tuatua: e tamaiti ua oki au nei.” Noatu rai, na te irinaki anga kia Iehova, kua ariki aia i te tukuanga angaanga. (Iere. 1:4-10) Kua tere atu i te 40 mataiti, kua akakoromaki ua a Ieremia i te tu manako kore, te kopae anga, te aviri anga, e pera katoa te takinokino anga i te pae kopapa. (Iere. 20:1, 2) I tetai au taime, kua inangaro aia i te akaruke i tana tukuanga angaanga. Inara, kua akakoromaki ua aia i te akakite aere anga i tetai karere reka koreia ki tetai iti tangata kare e ariu mai ana. Na roto i te maroiroi o te Atua, kua rauka ia Ieremia i te akatupu i tei kore e rauka iaia anake ua i te rave.—E tatau ia Ieremia 20:7-9.
2, 3. Akapeea te au tavini o te Atua i teia tuatau i te aro atu anga i te au akaaoanga tei aiteite ki to Ieremia tuatau?
2 E manganui te au tavini o te Atua mei to Ieremia tu rai. I te akamanako anga i te manakonakoanga no te tutu aere anga mei tera are ki tera are, te manako ra etai ia tatou i tetai taime e, ‘Kare rava e rauka iaku i te rave i tera.’ Inara, me kite ra tatou e ko to Iehova ia anoano kia akakite aere tatou i te tuatua meitaki, ka autu ia tatou to tatou tu emiemi e ka rave tatou i te angaanga tutu aere. Noatu rai, e manganui ia tatou kua aro atu ana i te au turanga i roto i to tatou oraanga tei riro mai ei mea ngata, no tetai tuatau ua, kia rave ua atu i te tutu aere anga. E tika rai e, e ngata tikai i te akamata i te tutu aere mei tera are ki tera are e kia tutu aere ua atu e tae rava atu ki te openga.—Mata. 24:13.
3 Akapeea me kua roa toou apiianga i te Pipiria ma te Au Kite o Iehova e te aere anga ki te au uipaanga a te putuputuanga inara te emiemi ra i te akamata i te tutu aere mei tera are ki tera are? Me kore akapeea me e Kite koe tei papetitoia e e ngata tikai i te tomo atu ki roto i te angaanga mei tera ngutupa ki tera ngutupa, noatu e te maroiroi ra rai koe i te rave i te reira? Kua akapapuia mai e kua autu te au tangata no te au turanga ravarai i te au akaaoanga no te angaanga orometua mei tera are ki tera are. Ma ta Iehova tauturu, ka rauka te reira ia koe.
Akamaroiroi Anga ma te Mataku Kore
4. Eaa tei tauturu i te apotetoro ko Paulo kia tuatua i te tuatua meitaki ma te mataku kore?
4 Kare e ekokoanga e te kite ra koe e te rauka nei te angaanga tutu anga i te ao katoa i te akatupuia, kare e na roto i te mana me kore i te pakari o te tangata, mari ra na roto i te vaerua o te Atua. (Zeka. 4:6) E tika katoa te reira no te angaanga orometua a te au Kerititiano tataki tai. (2 Kori. 4:7) E akamanako ana i te apotetoro ko Paulo. I te akamaara anga i tetai tuatau te takinokinoia anga raua ko tona oa mitinari e te aronga patoi, kua tata aia e: “E mate ua matou i muatangana, e te takinga-kino maataia mai, i Philipi ra, i maroiroi ra matou i to matou Atua i te tuatua anga atu ia kotou i te evangelia a te Atua i roto rai i te taumāro maata.” (1 Tesa. 2:2; Anga. 16:22-24) Penei kare tatou i manako ana e e mea ngata i tetai tangata tutu evangeria maroiroi mei ia Paulo rai i te tutu aere i tetai au taime. Inara, mei ia tatou katoatoa rai, kua irinaki a Paulo kia Iehova kia tuatua i te tuatua meitaki ma te mataku kore. (E tatau ia Ephesia 6:18-20.) Akapeea tatou i te aru anga i to Paulo akaraanga?
5. Eaa tetai mataara ka maroiroi ei tatou i te tutu aere ma te mataku kore?
5 Ko tetai mataara ka maroiroi tatou i te tutu aere ma te mataku kore koia oki na roto i te pure. Kua tuatua tetai painia e: “Kua pure au kia rauka iaku i te tuatua ma te irinaki, kua pure au e kia itaeia te ngakau o te au tangata, e kua pure au e kia kite mai au i te rekareka i roto i te angaanga orometua. Ko te tikaanga, na Iehova teia angaanga, kare e na tatou uaorai, no reira kare e rauka ia tatou i te rave i te reira me kare tana tauturu anga.” (1 Tesa. 5:17) Te anoano pouroaia ra tatou e auraka e tukutuku i te pure ma te tauturu a te vaerua tapu o te Atua kia tutu aere ma te mataku kore.—Luka 11:9-13.
6, 7. (a) Eaa te orama tei rauka mai ia Ezekiela, e eaa te aiteanga o te reira? (e) Eaa te apiianga ta te orama a Ezekiela e oronga maira ki te au tavini o te Atua i teia tuatau?
6 Te akaari maira te puka o Ezekiela i tetai mea ke atu te ka tauturu ia tatou kia tuatua ma te mataku kore. I roto i tetai orama, kua oronga a Iehova i tetai pokaikai tuatua kia Ezekiela, e rua nga tua kua tataia e “ko te evakaku, e te mii, e te aue” e kua akakite atu aia kiaia e e kai i te reira, i te karanga anga e: “E te tamaiti a te tangata na, kia keingaia e to kopu, e ka akaki i to ngakau ki teianei pokaikai, taku e o atu kia koe ra.” Eaa ra te aiteanga o teia orama? Kia akono meitaki tikai a Ezekiela i te karere tana ka oronga atu. Kia riro te reira e tuanga nona ra, mei te mea rai e, te akakeu ra i tona au manako ngakau oonu. Kua tuatua maira te peroveta e: “Kua kai iora au; e mei te meli te tu i toku nei vaa i te venereka.” E mea venereka te akakite anga i ta te Atua karere ki te au tangata—mei te tongi anga i te meri—kia Ezekiela. Kua manako aia e e mea ngateitei tikai i te komono anga ia Iehova e te akatupu anga i teia tukuanga angaanga tei orongaia mai e te Atua, noatu e te umuumuia ra kia orongaia tetai karere pakari ki tetai iti tangata ariki kore.—E tatau ia Ezekiela 2:8–3:4, 7-9.
7 Te vai ra i roto i teia orama tetai apiianga puapinga no te au tavini o te Atua i teia tuatau. E karere pakari katoa ta tatou ka oronga atu ki te au tangata kare e ariki ua mai ana i ta tatou au tauta anga. Kia manako ua atu rai tatou i te angaanga orometua Kerititiano ei akameitakianga tei orongaia mai e te Atua, e mea tau kia angai meitakiia tatou i te pae vaerua. Te au peu apii kare e oonu roa me kore kare e rave putuputuia ana, kare e rava ua no tatou kia marama pu tikai i ta te Atua Tuatua. Ka rauka ainei ia koe i te akameitaki mai i te tu me kore i te rave putuputu anga i taau uaorai tatau anga Pipiria e te apii Pipiria? Ka rauka ainei ia koe i te akamanako putuputu e eaa taau e tatau ra?—Sala. 1:2, 3.
Akamata Anga i te Au Uriuri Anga Pipiria
8. Eaa te ravenga tei tauturu i tetai au papuritia Patireia kia akamata i te au uriurianga Pipiria i roto i te angaanga orometua mei tera are ki tera are?
8 Ki te au papuritia e manganui, te tuanga ngata roa atu no te angaanga orometua mei tera are ki tera are, koia oki ko te akamata anga i te tuatua ki te tangata ngutuare. E tika rai, i roto i tetai au ngai tutu anga e ngata tikai i te akamata i te au pukapuka anga. E mea reka atu ki tetai au papuritia i te tuatua ki te au tangata i ko i te ngutupa me akamata ratou i ta ratou tuatua na roto i tetai au tuatua tei iki meitakiia, e oti ka oake atu i tetai aenga pepa ki te tangata ngutuare, mei tei akakiteia mai i roto i te pia. Penei te opu maira te upoko tuatua o te aenga pepa me kore te akatutuanga karakara o te reira i te manako o te tangata ngutuare, i te akatika anga ia tatou kia taiku poto ua atu tatou i te akakoroanga i atoro atu ei tatou iaia e te ui anga i tetai uianga. Te turanga tuke no teia ravenga koia oki kia akaari ki te tangata ngutuare e toru me kore e a aenga pepa tukeke e kia pati atu kiaia kia iki mai aia e tai tumu manako tana e inangaro ra i te kite. E tika rai, to tatou akakoroanga koia oki kare e kia oronga ua i te au aenga pepa me kore kia akaari ua i te reira i ko i te au ngutupa katoatoa mari ra kia akamata i te au uriurianga Pipiria te taki atura ki te au apii Pipiria.
9. Eaa ra i puapinga ai te akapapaanga meitaki?
9 Noatu e eaa taau ravenga e taangaanga ra, na te akapapa meitaki anga e tauturu ei ia koe kia papa e kia maoraora i roto i te angaanga orometua mei tera are ki tera are. Kua akakite mai tetai painia e: “E rekareka maata atu au me kua papa meitaki au. E inangaro ana au i te oronga i taku tuatua i akapapa ana.” Ko tetai painia katoa te karanga ra e, “Me kite au i te au mea i roto i te au puka taku ka oronga atu, maoraora au i te taangaanga anga i te reira.” Mei te mea e e akameitakianga tetai ka tupu mai i te akara marie akaou anga i taau ka tuatua, e manganui tei kite mai e e meitaki atu i te apiipii akaou i ta ratou ka tuatua. Na te rave anga i te reira e tauturu ei ia ratou kia oronga atu i te ka rauka meitaki ia ratou kia Iehova.—Kolo. 3:23; 2 Timo. 2:15.
10. Eaa te ka raveia kia akariro i te au uipaanga no te angaanga orometua ei mea tau e te puapinga?
10 Te oronga maira te au uipaanga tau no te angaanga orometua i te tu tau e te rekareka kia tatou i roto i te angaanga orometua mei tera are ki tera are. Me te tau tikai ra te tia o te ra ki te angaanga tutu anga, penei ka tatauia e ka uriuri potoia te reira. Inara, ko te taeake nana e akono ana i te uipaanga no te angaanga tutu anga, e mea tau kia tuku kia rava te taime no te uriuri anga me kore te akatutu anga i tetai tuatua poto ua te ka tau ki te ngai tutu anga, me kore kia akamanako i tetai akakiteanga tau te ka taangaangaia i roto i te angaanga orometua i taua ra ra. Na teia e tauturu katoa atu i te aronga tei tae mai kia oronga i tetai akakite anga tau. Na te akapapa meitaki anga na mua ake, ka rauka i te aronga pakari e tetai ke te akono ra i teia au uipaanga i te akatupu i teia e kia akamutu rai te uipaanga i roto i te ora tikai tei akanooia.—Roma 12:8.
Te Mana o te Akarongo Anga
11, 12. Akapeea te akarongo tangi aroa i te tauturu anga ia tatou kia itae i te ngakau o te au tangata ma te tuatua meitaki? E oronga mai i te au akaraanga.
11 Kare e ko te akapapaanga meitaki ua te umuumuia ra mari ra ko te akamanako tikai anga i tetai ke, te tauturu ra ia tatou kia akamata i te au uriurianga Pipiria e kia itaeia te ngakau o te au tangata i roto i te angaanga orometua. Ko tetai mataara e akaari ana tatou i taua inangaro ra koia oki na roto i te tu e akarongo ra tatou. Kua akakite mai tetai akaaere tutaka e: “Te akakoromaki anga e te akaari anga i te tu puareinga i te akarongo ki te au tangata, e akakeu anga umere tikai kia inangaro mai ratou i te akarongo mai ki te tuatua meitaki, e e akakite anga umere te reira no te inangaro akapumaana ia ratou.” Te akarongo anga ma te ngakau aroa ko te taviriia no te akatuera anga i te ngakau o te tangata ngutuare, mei ta te tupuanga e aru maira e akaari maira.
12 I roto i tetai reta tei neneiia i roto i te nutipepa Le Progrès, Saint-Étienne, i Varani, kua akataka mai tetai vaine i te atoro a tetai nga vaine i te topapa mai anga raua ki runga i tona ngutupa i muri poto ake te tupu anga te tumatetenga kiaia i te mate anga tana tamaine e toru marama. “Kua kite viviki atu au ia raua ei Au Kite o Iehova,” i tata mai ei aia. “Kua papa meitaki au i te tuaru atu ia raua, inara kua kite atu au i tetai poroutia ta raua e oronga ra. Te tumu o te reira e eaa te Atua i tuku ua ai i te mamae. No reira kua iki au i te akatika mai ia raua ki roto ma te akakoroanga i te akapapu atu e kua tarevake raua. . . . Kua noo mai nga Kite e tere atu e tai ora. Kua akarongo mai raua iaku ma te tangi aroa tikai, e ia raua e akaruke ra, kua angari mai toku manako e kua akatika atu au i tetai atoroanga akaou.” (Roma 12:15) Kare i roa ana, kua ariki mai teia vaine i tetai apii Pipiria. Te akaari maira te reira e ko tana i maara ana no runga i taua atoro anga mua, kare e eaa ta te nga Kite i tuatua mai, kareka ra kua akarongo mai raua.
13. Akapeea tatou i te akatano anga i ta tatou tuatua no te tuatua meitaki ki te au tangata tataki tai ta tatou e aravei atura?
13 Me akarongo tatou ma te tangi aroa, te akatika ra tatou i te au tangata kia akakite mai kia tatou e eaa ra ratou ka anoano ei i te Patireia. Te tuku ra teia ia tatou i roto i te turanga tau tikai kia oronga atu i te tuatua meitaki kia ratou. Penei kua kite ana koe e e aronga akarongo karape te aronga tutu evangeria tau. (Mase. 20:5) Te akaari maira ratou i tetai manako tika tikai ki te au tangata ta ratou e aravei ra i roto i te angaanga orometua. Kare ratou e akamanako ua i to ratou ingoa e te ngai e noo ra ratou mari ra te akamanako katoa ra ratou i to ratou inangaro e te au anoano. Me akakite mai tetai tangata i tetai manamanata, ka rave ratou i te kimikimi anga e ka oki viviki atu i te akakite atu e eaa ta ratou i kite mai. Mei te apotetoro ko Paulo, ka akatano ratou i ta ratou tuatua no te karere o te Patireia ki te aronga tataki tai ta ratou i aravei atu. (E tatau ia 1 Korinetia 9:19-23.) Te arataki maira taua manako tika tikai i te au tangata ki te tuatua meitaki e te akaata umere maira “i te ngakau aroa o to tatou Atua.”—Luka 1:78.
Akono Tamou i te Tu Papu
14. Ia tatou e rave ra i ta tatou angaanga orometua, akapeea tatou i te akaata anga i to Iehova au tu?
14 Kua akaari mai a Iehova e te akaperepere ra aia ia tatou na te oronga anga mai i te tu rangatira kia tatou. Noatu e e Atua Mana Katoatoa aia, kare aia i maro ana i tetai tangata kia tavini iaia inara te pati ra ki te au tangata no runga i te tumu anga o te aroa, i te akameitakianga i te aronga tei ariu meitaki mai ki tana au akanoonoo anga umere. (Roma 2:4) Ei au orometua nana, kia papa ua tatou i te oronga atu i te tuatua meitaki na roto i tetai tu tau no to tatou Atua aroa, ia tatou e oronga ra i tetai akakiteanga i te au taime ravarai. (2 Kori. 5:20, 21; 6:3-6) Ma taua akakoroanga, te anoanoia ra tatou kia akono tamou i tetai tu papu ki te au tangata i roto i ta tatou ngai tutu anga. Eaa te ka tauturu ia tatou kia autu i teia akaaoanga?
15. (a) Kua ikuiku a Iesu i tana au apotetoro kia rave i teaa, me kare te au tangata e ariki mai ana i te karere? (e) Eaa te ka tauturu ia tatou kia akara mou i te kimikimi aere anga i te aronga tei tau?
15 Kua ikuiku a Iesu i tana au pipi e auraka e manako taitaia ua me ka kopae etai ke i te karere, inara kia akara mou ua i te kimi anga i te aronga tei tau. (E tatau ia Mataio 10:11-15.) Na te akanoo anga i te au akakoroanga rikiriki e te tau, ka tauturuia mai tatou kia raveia teia. Kua akaaite tetai taeake iaia uaorai ki tetai tangata kimi auro. Ko tana tuatua koai oki, “Te irinaki nei au e ka rauka mai tetai auro i teia ra.” Te akakoroanga o tetai taeake koia oki “kia aravei i tetai tangata tei akaari mai i te inangaro i te au epetoma ravarai e kia oki atu rai i nga ra i muri mai i te tatanu i te inangaro.” Kua tauta etai au papuritia i te tatau e tai irava ki te tangata ngutuare tataki tai, me ka rauka te reira. Eaa te akakoroanga tau taau ka akanoo naau uaorai?
16. Eaa te au tumu i rave ua atu ei tatou i te tutu aere anga?
16 E puapingaia ai te angaanga orometua mei tera are ki tera are kare e tei runga anake ua i te akaariu mai anga i te au tangata i te ngai e tutu aereia ra. E tika rai, e tuanga maata ta te angaanga tutu anga i te akaora anga i te aronga ngakau tae, inara te tauturu katoa maira te reira i tetai atu au akakoroanga puapinga maata. Te oronga katoa maira te angaanga orometua Kerititiano kia tatou i tetai ravenga kia akaari i to tatou inangaro kia Iehova. (1 Ioa. 5:3) Te tauturu maira te reira ia tatou kia kopae i te akamaringi anga toto. (Anga. 20:26, 27) Te akamatakite maira te reira i te aronga akono tau kore i te Atua e “kua tae oki ki te ora akautunga anga [a te Atua].” (Apo. 14:6, 7) Tei maata roa atu, na roto i te tutu aere anga i te tuatua meitaki, te akapaapaaia ra to Iehova ingoa i te ao katoa. (Sala. 113:3) No reira, me ka akarongo mai te au tangata e me kare, e akakite ua atu rai tatou i te karere o te Patireia. E tika rai, e manea tikai ta tatou au tauta anga no te tutu aere anga i te tuatua meitaki i roto i nga mata o Iehova.—Roma 10:13-15.
17. Kare e roa atu ka maroia te au tangata kia kite i teaa?
17 Noatu e kare te manganui o teia tuatau e ariki mai ana i ta tatou angaanga tutu anga, ka kite vave mai ratou i te reira na roto i tetai manako ke. (Mata. 24:37-39) Kua akapapu a Iehova kia Ezekiela e me tupu mai te au akautunga anga tana e akakite aere ra, ‘ka kite rai te ngutuare meameaau o Iseraela e, e peroveta tei noo ana i rotopu ia ratou.’ (Eze. 2:5) Pera katoa, me rave te Atua i tana akautunga anga ki runga i teia akatereanga o te au mea nei, ka maroia te au tangata kia kite e ko te karere a te Au Kite o Iehova tei tutu aereia i te ngai tangata e mei tera are ki tera are no ko mai te reira i te Atua mou anake ra, ko Iehova, e te tavini tikai ra te Au Kite ei au komono nana. Mei teaa ra te meitaki kia tatou nei i te akakite aere i tona ingoa e te akakite aere i tana karere i teia au tuatau puapinga maata! Na roto i tona maroiroi, ka autu ua atu rai ia tatou te au akaaoanga no te angaanga orometua mei tera ki tera are.
Akapeea Koe me Pau?
• I te tutu aere anga akapeea tatou i te akaari anga i te mataku kore?
• Eaa te ka tauturu ia tatou kia akamata i te au uriurianga Pipiria i roto i te angaanga orometua mei tera are ki tera are?
• Akapeea tatou i te akaari anga i te inangaro ngakau tae ki tetai ke?
• Eaa te ka tauturu ia tatou kia akono tamou i tetai manako papu ki te au tangata i te ngai e tutu aere ra tatou?
[Pia/Tutu i te kapi 9]
Tetai Mataara no te Akamata Anga i te Au Uriurianga Pipiria
Ei akamata anga:
◼ I muri ake i toou aravei anga i te tangata ngutuare, penei ka oake atu koe i tetai aenga pepa kiaia, i te na ko anga e, “Toku akakoroanga i aere mai ei au i teia ra, kia oronga atu i tetai manako akamaroiroi anga no runga i teia tumu tuatua puapinga maata.”
◼ Me kore penei ka oake atu koe i tetai aenga pepa, i te na ko anga e, “E atoro anga poto ua taku i teia ra no te mea te inangaro nei au i te kite e eaa toou manako no runga i teia tumu tuatua.”
Me arikiia mai te aenga pepa:
◼ Kare e taroaroa i te tapu anga, e ui i tetai uianga akamanako anga mama ua tei akatumuia ki runga i te upoko tuatua o te aenga pepa.
◼ E akarongo meitaki, i te kimi anga e me te marama ra koe i te au manako o te tangata ngutuare. E akameitaki atu i tana au tuatua.
Kia rave ua atu i te uriurianga:
◼ E tatau e e uriuri e tai irava me kore e maata atu, i te akatano anga i taau tuatua ki te au inangaro e te au anoano o te tangata.
◼ Me akaari mai e te inangaro maira, e oake atu i te puka e e akatutu i tetai apii Pipiria me ka rauka. E akanoo i te oki akaou atu.