Tuatua ua Atu rai i ta te Atua Tuatua ma te Mataku Kore

¹ Ei au orometua Kerititiano, kua kite tatou e kare te katoatoa e ariki mai i ta tatou tutu anga. (Mata. 10:14) Inara, kare tatou e tuku i te ariuanga kino a etai ke kia akakeu ia tatou kia tapu mei te akakiteanga i te tuatua meitaki. (Maseli 29:25) Eaa te tauturu ra ia tatou kia tuatua ua atu rai i ta te Atua tuatua ma te mataku kore?

² Kua akangateitei te apotetoro ko Paulo ‘i te meitaki maata ra i te kite ia Iesu Mesia.’ Kua akakeu teia iaia kia tuatua ma te “kite pu tikai.” (Philipi 3:8; 1 Tesa. 1:5) Noatu e kua manako etai i tana karere ei mea puapinga kore e te neneva, kua kite aia e ko te “mana ïa o te Atua, kia ora te tangata ravarai e akarongo ra.” (Roma 1:16) No reira, i te aro atu anga i te patoianga, kua ‘tuatua [ua atu rai aia] ma te mataku kore, e kua akatika maira Iehova.’​—Anga. 14:1-7; 20:18-21, 24.

³ To Tatou Tumu no te Maroiroi: Kare i na roto i tona uaorai maroiroi i rauka ai ia Paulo i te oronga i tetai akakiteanga mataku kore. I te tuatua anga iaia uaorai e ia Sila, kua tata a Paulo: “E mate ua matou i muatangana, e te takinga-kino maataia mai, i Philipi ra, i [“mataku kore,” NW] ra matou i to matou Atua i te tuatua anga atu ia kotou i te evangelia a te Atua i roto rai i te taumāro maata.” (1 Tesa. 2:2; Anga. 16:12, 37) Pera katoa, iaia ei mouauri i Roma, kua pati atu a Paulo i tetai atura kia pure nona e rauka ai iaia i te tamou marie i te akakite ua atu anga i te tuatua meitaki ‘ma te mataku kore, ko tei tau oki iaia kia tuatua ra.’ (Ephe. 6:18-20) Na te irinakianga ki runga ia Iehova e kare i runga iaia uaorai, kua rauka ua atu ia Paulo i te tuatua i ta te Atua tuatua ma te mataku kore.​—2 Kori. 4:7; Philipi 4:13.

⁴ Te tika ra te reira i teia tuatau. Ko tetai taeake tei ngata i te akataka atu iaia uaorai e ko tetai ia o te Au Kite o Iehova i tana ngai angaanga e i te akakitekite ua kua pure no runga i te reira e kua akamata i te akakitekite atu. I te akamataanga kua kopae tetai taeake angaanga i tana au tautaanga, inara kua taki atu te taiku anga i te manakonakoanga no te tuakaouanga ki tetai apii Pipiria. Mei reira mai, kua akono te taeake i te au atianga ravarai i te oronga i tetai akakiteanga. I tana ngai angaanga tei aru mai, kua tauturu aia e 34 tangata ki te papetitoanga i roto i te 14 mataiti. Ka papuia tatou e ka akamaroiroi katoa rai a Iehova ia tatou ‘kia tuatua ua i tana tuatua ma te mataku kore.’​—Anga. 4:29.